නිව් යෝර්ක් - සාක්ෂිකරුවන්ගේ අලුත් ලෝක මූලස්ථානයේ ගොඩනැඟිලි ඉදි කිරීම් වැඩ අවසන් වුණේ 2016 අගෝස්තු මාසයේ. වෝර්වික්වල පිහිටි ඒ ගොඩනැඟිලි පරිසරයට හිතකර විදිහට තනා තියෙන නිසා සාක්ෂිකරුවන්ව GBI සංවිධානයේ (Green Building Initiative) පැසසුමට ලක් වුණා. GBI ​සංවිධානය, ලොව පුරා ඉදි කරන ගොඩනැඟිලි පරිසරයට කොයි තරම් හිතකරද කියලා සොයා බලා ඇගයීමට ලක් කරන සංවිධානයක්. ඒ සංවිධානයෙන් පිරිනමන ඉහළම සම්මානය වන Four Green Globes කියන විශිෂ්ට සම්මානය සාක්ෂිකරුවන්ගේ අලුත් ලෝක මූලස්ථානයේ ගොඩනැඟිලි 7ටම හිමි වුණා.

GBI සංවිධානයේ මහජන සම්බන්ධතා අධ්‍යක්ෂකවරියක් වන ෂයිනා වයින්ස්ටයින් මෙහෙම කිව්වා. “සාමාන්‍යයෙන් Four Green Globes කියන විශිෂ්ටතම සම්මානය දෙන්නේ ජලය සහ ඉන්ධන නාස්තියක් නැතිවිදිහටත් පරිසරයට හිතකර විදිහටත් සාදා තියෙන හොඳම ගොඩනැඟිලි වෙනුවෙන්. රට පුරා තියෙන ගොඩනැඟිලි ව්‍යාපෘති 965කින් Four Green Globes කියන උසස්ම සම්මානය ප්‍රධානය කළේ ගොඩනැඟිලි 64කට විතරයි. වෝර්වික්වල තියෙන යෙහෝවා දෙවිගේ සාක්ෂිකරුවන්ගේ ගොඩනැඟිලි 7ටම Four Green Globes කියන විශිෂ්ට සම්මානය ලැබුණ එක හරිම සුවිශේෂී දෙයක්.”

GBI සංවිධානයේ වෙබ්සයිට් එකේ මෙහෙම සඳහන් වුණා. “ආදායම් නොලබන සංවිධානයක් වන අපේ අරමුණ පරිසරයට හිතකර විදිහට ගොඩනැඟිලි ඉදි කිරීමට මහජනයාව උනන්දු කිරීමයි.” GBI සංවිධානයෙන් අලුතෙන් හදන ගොඩනැඟිලි පරිසරයට හිතකරද කියා පරීක්ෂා කර ඒ තොරතුරුවලට අනුව ගොඩනැඟිලිවලට ලකුණු දෙනවා. යම් ගොඩනැඟිල්ලකට දෙන ලකුණු ප්‍රමාණය තීරණය කරන්න කලින් GBI ආයතනයෙන් ලබාගත්ත තොරතුරුවල නිවැරදිභාවය ගැන වෙනත් ආයතනයක් හරහා සොයා බැලීමක් කරන්නත් සැලසුම් කරනවා. ඒ නිසා ඔවුන් පරීක්ෂා කරලා ලබාගන්නා තොරතුරු ඉතා නිවැරදියි කියලා කියන්න පුළුවන්.

එක්සත් ජනපදයේ යෙහෝවා දෙවිගේ සාක්ෂිකරුවන්ගේ පරිසර හිතකාමී කාර්යාල නිර්මාණය කිරීමේ සම්බන්ධීකාරක ඩේවිඩ් බීන් මෙහෙම කිව්වා. “අපිට ලැබුණ මේ සම්මාන අපි ගොඩක් අගය කරනවා. අපේ සියලුම ගොඩනැඟිලි සහ ඉදි කිරීම් පරිසරයට හිතකර විදිහට හදන්න හැමෝම කොච්චර මහන්සි වෙලා තියෙනවාද කියලා මේ ලැබුණ සම්මානවලින් පැහැදිලියි. ඒ අවට තියෙන ස්ටර්ලින් වනාන්තරයේ සුන්දරත්වයටත් කිසිම හානියක් වෙලා නැහැ.”

සාක්ෂිකරුවන් වනාන්තරයේ ගස් පුළුවන් තරම් ආරක්ෂා කරන්න මහන්සි වුණා. කපලා දාපු ගස් ගොඩනැඟිලි වැඩවල ප්‍රයෝජනයට ගත්තා. ස්ටර්ලින් වනාන්තරයේ කටයුතු භාරව හිටිය කළමණාකරුවෙක් වන ජෙෆ්රි හට්චින්සන් මෙහෙම කිව්වා. “කපන ගස්වල ලී ඉදි කිරීමේ වැඩවලට පාවිච්චි කරපු එක ගැන මං ගොඩක් සතුටු වෙනවා. ඒ නිසා අවට පරිසරය අපවිත්‍ර වුණේ නැහැ. පරිසරය ආරක්ෂා කරන්න සාක්ෂිකරුවන් ගත්තු ක්‍රියාමාර්ග ඉතා විශිෂ්ටයි.” ෂයිනා වයින්ස්ටයින් මෙහෙම අදහස් දැක්වුවා. “පරිසරයට හිතකර විදිහට ගොඩනැඟිලි හදන්නේ කොහොමද කියන එකට වෝර්වික්වල සාක්ෂිකරුවන්ගේ ලෝක මූලස්ථානය හොඳ ආදර්ශයක්.”

සාක්ෂිකරුවන්ගේ වෝර්වික් ගොඩනැඟිලි ව්‍යාපෘතියේ වැඩකටයුතු භාරව හිටපු රිචඩ් ඩිවයින් මෙහෙම කිව්වා. “අවුරුදු ගණනාවක්ම අපේ සංවිධානයෙන් බෘක්ලින්වල තියෙන ගොඩනැඟිලි ලස්සනට තියාගන්න හුඟක් මහන්සි වුණා. අපේ වෝර්වික්වල තියෙන ගොඩනැඟිලි පරිසරයට හිතකර විදිහටත් ඒ අවට තියෙන සුන්දර වටපිටාවට බාධාවක් වෙන්නේ නැති විදිහටත් තියාගන්න අපි බලාපොරොත්තු වෙනවා.”

මාධ්‍ය ප්‍රකාශක:

ඩේවිඩ් ඒ. සෙමෝනියන්, මහජන තොරතුරු අංශය, විමසීම්: 1-845-524-3000