2022 ජූනි 7වෙනිදා මානව හිමිකම් පිළිබඳ යුරෝපීය අධිකරණය (ECHR) රුසියාවට විරුද්ධව ඓතිහාසික නඩු තීන්දුවක් ලබා දුන්නා. ඒ, රුසියාවේ බලධාරීන් යෙහෝවා දෙවිගේ සාක්ෂිකරුවන්ට පීඩා කරන එකට විරුද්ධව. 2017දී සාක්ෂිකරුවන්ගේ වැඩ තහනම් කිරීම නීති විරෝධියි කියලා යුරෝපීය අධිකරණය ප්‍රකාශ කළා. සාක්ෂිකරුවන්ගේ මුද්‍රිත ප්‍රකාශන සහ jw.org වෙබ් අඩවිය තහනම් කරපු එකත් නීත්‍යානුකූල නැහැ කියලා අධිකරණය කිව්වා. සාක්ෂිකරුවන්ට විරුද්ධව දැනට විභාග වෙන සියලුම අපරාධ නඩු නතර කරන්න කියලත් සිරගතව ඉන්න හැම සාක්ෂිකරුවෙක්වම නිදහස් කරන්න කියලත් අධිකරණය නියෝග කළා. ඒ වගේම රාජසන්තක කළ සියලුම දේපළ ආයෙත් භාර දෙන්න, එහෙම නැත්නම් යූරෝ 59,617,458ක් (ඇමරිකානු ඩොලර් 63,684,978) වන්දියක් විදිහට ගෙවන්න කියලත් කිව්වා. පීඩාවට ගොදුරු වුණ අයට (වින්දිතයන්ට) වන්දියක් විදිහට ගෙවන්න අණ කළ මුළු මුදල යූරෝ 3,447,250ක් (ඇමරිකානු ඩොලර් 3,682,445).

මේ තීන්දුව දෙන්න කලින් 2010 සිට 2019 දක්වා ගොනු කරපු නඩු 20ක් සලකා බැලුවා. ඒ නඩුවලට තනි තනි සාක්ෂිකරුවන් සහ නීතික ආයතන ඇතුළත්. මුළු වින්දිතයන් සංඛ්‍යාව 1400කට වඩා වැඩියි. යුරෝපීය අධිකරණයෙන් ලබා දුන්න තීන්දුව වින්දිතයන් 1400දෙනාට වඩා වැඩි පිරිසකට බලපානවා. තීන්දුවේ සඳහන් වුණේ මෙහෙමයි. “රුසියාව යෙහෝවා දෙවිගේ සාක්ෂිකරුවන්ට විරුද්ධව දැනට විභාග කරන සියලුම නඩු වහාම නතර කරන්න වගබලා ගත යුතුයි. එමෙන්ම තමන්ගේ නිදහස අහිමි කර තිබෙන සියලුම යෙහෝවා දෙවිගේ සාක්ෂිකරුවන්ව නිදහස් කළ යුතුයි.“ රුසියාවෙත්, රුසියාවෙන් පිටත් ඉන්න හැම සහෝදරයෙක්ම සහ සහෝදරියක්ම නීතිගරුක අය කියලත් එයාලව වැරදිකරුවන් කරලා සිරගත කරලා තියෙන්නේ නීති විරෝධී විදිහට කියලත් ඒ නඩු තීන්දුවෙන් ඔප්පු වුණා.

අපේ සහෝදරයන්ගේ හැසිරීම, වැඩ කටයුතු, විශ්වාසය, අපේ ප්‍රකාශන සහ වෙබ් අඩවිය අන්තවාදී කියලා රුසියාව ප්‍රකාශ කෙරුවත් ඒවා පදනම් විරහිත චෝදනා කියලා යුරෝපීය අධිකරණය ඒ නඩු වාරය පුරාම පැහැදිලිවම ඔප්පු කළා. උදාහරණයකට, ඒ නඩු තීන්දුවෙන් උපුටාගත්ත කොටස් කීපයක් බලන්න.

• හැසිරීම: “චෝදනා ලබපු අය ප්‍රචණ්ඩ විදිහට කටයුතු කරලා තියෙනවා කියලවත් අනිත් අයට වෛර කරන්න හෝ පහත් කරලා සලකන්න මිනිසුන්ව පෙලඹවීමට කිසිම දෙයක් කියලාවත් කරලාවත් තියෙනවා කියලා හොයාගන්න රුසියානු අධිකරණයට හැකි වෙලා නැහැ.” (271 කොටස)

• සත්‍යය තියෙන්නේ තමන් ළඟ කියලා යෙහෝවා දෙවිගේ සාක්ෂිකරුවන්ගේ විශ්වාසය: “තමන්ගේ ආගම තමයි නිවැරදි ආගම කියලා අනිත් අයට සාමකාමීව තේරුම් කරලා දෙන එක සහ ‘බොරු ආගම්‘ අතහැරලා ‘සත්‍ය ආගමට‘ එකතු වෙන්න කියලා අනිත් අයට උනන්දු කරන එක නීතියට අනුව වරදක් නෙමෙයි. මොකද ඔවුන්ට ආගමික නිදහස පාවිච්චි කරන්නත් අදහස් ප්‍රකාශ කරන්නත් අයිතියක් තියෙනවා.” (156 කොටස)

• රුධිරය ශරීරගත කිරීම: “රුධිරය ශරීරගත කිරීම ප්‍රතික්ෂේප කරන එක, තමන්ගේ තීරණ ගැනීමේ අයිතිය පාවිච්චි කරන විදිහක්. සෞඛ්‍ය ප්‍රතිකාර සම්බන්ධයෙන් ඕනෙම කෙනෙක්ට පෞද්ගලික කැමැත්ත ප්‍රකාශ කරන්න අයිතිය තියෙනවා කියලා යුරෝපීය මානව හිමිකම් පිළිබඳ සම්මුතියෙන් වගේම රුසියානු නීතියෙනුත් සහතික කරලා තියෙනවා.” (165 කොටස)

• හමුදා සේවය ප්‍රතික්ෂේප කිරීම: “ආගමික විශ්වාසයක් නිසා හමුදා සේවය ප්‍රතික්ෂේප කිරීම කිසිම රුසියානු නීතියක් උල්ලංගනය කරන්නේ නැහැ.” (169 කොටස)

• අපේ ප්‍රකාශන: “අයදුම්කරුවන්ගේ ආගමික ක්‍රියාකාරකම් සහ ඔවුන්ගේ ප්‍රකාශනවල තියෙන තොරතුරු ඔවුන් උගන්වන සාමකාමී පණිවිඩයට එකඟයි.” (157 කොටස)

• JW.ORG: “jw.org වෙබ් අඩවියේ තියෙන කිසිම දෙයක් අන්තවාදී නැහැ කියලා අධිකරණය නිගමනය කළා. බලධාරීන් වෙබ් අඩවියේ තියෙන සමහර තොරතුරු අනුමත කරන්නේ නැත්නම් සම්පූර්ණ වෙබ් අඩවිය තහනම් කරනවා වෙනුවට නුසුදුසුයි කියලා ඔවුන් සලකන කොටස් විතරක් ඉවත් කරන්න කියලා සංවිධානයෙන් ඉල්ලා සිටින්න තිබුණා.” (231 සහ 232 කොටස්)

තීන්දුව මාර්ගෙන් රුසියාවේ බලධාරීන්ව දැඩි විදිහට විවේචනය කරලා තිබුණා. රුසියාවේ බලධාරීන් සත්භාවයෙන් කටයුතු කරලා නැහැ කියලත් ඒ අය පක්ෂග්‍රාහී වෙලා කියලත් ඒ තීන්දුවේ සඳහන් වුණා. උදාහරණයකට අධිකරණයෙන් කරපු සොයාගැනීම් කීපයක් ඒ තීන්දුවේ සඳහන් වෙලා තිබුණේ මෙහෙමයි.

• “රුසියාවේ ඉන්න යෙහෝවා දෙවිගේ සාක්ෂිකරුවන්ගේ හැම ආගමික සංවිධානයක්ම බලහත්කාරයෙන් විසුරුවාහැරියේ රුසියාව තමන්ගේ නීතිය මධ්‍යස්ථව ක්‍රියාත්මක කරපු නිසා නෙමෙයි. එහෙම කළේ යෙහෝවා දෙවිගේ සාක්ෂිකරුවන්ව රුස්සන්නේ නැති නිසයි. යෙහෝවා දෙවිගේ සාක්ෂිකරුවන් එයාලාගේ විශ්වාසය අත්හරියි කියලත් අනිත් අය සාක්ෂිකරුවන්ට එකතු නොවී ඉඳියි කියලත් ඒකෙන් එයාලා බලාපොරොත්තු වුණා.” (254 කොටස)

• රුසියානු බලධාරීන් පොත් පත් ගැන තීරණ ගත්තේ පැති නොගෙන හොයලා බලලා නෙමෙයි. ඒ වෙනුවට එයාලා පොලිසිය සහ නඩු පවරන්නන් තෝරගත්ත, පක්ෂග්‍රාහී ලෙස සකස් කරපු වාර්තා විශ්වාස කළා. එහෙම කරන එකෙන් එයාලගේ සැලැස්මේ තිබුණ අඩුපාඩුවලට බරපතල විදිහට ඉඩ දුන්නා. (203 කොටස)

• අන්තවාදය පිළිබඳ නීතිය ගොතලා තියෙන්නේ පුළුල් පරාසයක් අහු වෙන විදිහට. එය පැහැදිලිව දක්වා නැහැ. ඒ නිසා යෙහෝවා දෙවිගේ සාක්ෂිකරුවන්ට විරුද්ධව හිතේ හැටියට ක්‍රියා කරන්න රුසියානු බලධාරීන්ට අවස්ථාව ලැබෙනවා. (272 කොටස)

මේ තීන්දුවට රුසියාවේ බලධාරීන් කොහොම ප්‍රතිචාරය දක්වයිද කියලා තාම දන්නේ නැහැ. කොහොමවුණත් පීඩා විඳදරාගන්න අපි රඳා ඉන්නේ මිනිසුන් මත නෙමෙයි. ‘අපි බලාපොරොත්තුවෙන් ඉන්නේ යෙහෝවා දෙවි කෙරෙහියි. අපේ උපකාරකයාත් අපේ පලිහත් ඔහුයි.‘—ගීතාවලිය 33:20.