නැහැ, පෘථිවිය කිසිම දවසක විනාශ වෙන්නේවත් ගින්නෙන් දැවී යන්නේවත් නැහැ. ඒ වගේම පෘථිවිය විනාශ වෙලා ඒ වෙනුවට අලුත් ග්‍රහ ලෝකයක් එන්නෙත් නැහැ. බයිබලේ කියන්නේ දෙවියන් පෘථිවිය ඒ කියන්නේ මේ පොළොව නිර්මාණය කළේ සදහටම පවතින්න කියලයි.

•   “ධර්මිෂ්ඨයෝ පොළොව උරුම කරගන්නෝය. ඔවුහු එහි සදාකල් ජීවත් වන්නෝය.”—ගීතාවලිය 37:29.

•   “ඔබ [දෙවියන්] පොළොව ස්ථිර ලෙස පිහිටෙව්වෙහිය. එය කිසිදා නොසෙල්වෙන අයුරින් සෑදුවෙහිය.”—ගීතාවලිය 104:5.

•   “පොළොව සදහටම පවතියි.”—දේශනාකාරයා 1:4.

•   ‘යෙහෝවා දෙවි පොළොවද නිර්මාණය කර එය ස්ථිර ලෙස පිහිටෙව්වේය. ඔහු පොළොව සෑදුවේ හිස් පාළු ස්ථානයක් වීමට නොව, මිනිසුන්ගේ වාසය සඳහාය.’—යෙසායා 45:18.

 යුද්ධවලින්, පරිසර දූෂණයෙන් හෝ වෙන ඕනෑම ක්‍රමයකින් මේ පොළොව සම්පූර්ණයෙන්ම විනාශ කරලා දාන්න දෙවියන් මිනිසුන්ට ඉඩ දෙන්නේ නැහැ. දෙවියන් ළඟදීම “පොළොව විනාශ කර දමන අයව විනාශ” කරනවා. (එළිදරව් 11:18) ඔහු ඒක කරන්නේ කොහොමද?

 මේ පොළොව ආරක්ෂා කරගන්න දේශපාලන ආණ්ඩුවලට බැරි වෙලා තියෙනවා. ඒත් දෙවියන් ඒ ආණ්ඩු වෙනුවට දේවරාජ්‍යයේ පාලනය මේ පොළොවට ගේනවා. (දානියෙල් 2:44; මතෙව් 6:9, 10) ඒ රාජ්‍යයේ රජ විදිහට කටයුතු කරන්නේ දෙවියන්ගේ පුත්‍රයා වන යේසුස් ක්‍රිස්තුස්. (යෙසායා 9:6, 7) මේ පොළොවේ ජීවත් වුණ කාලයේදී ස්වාභාවික දේවල් පාලනය කරන්න යේසුස්ට බලය තිබුණා. (මාක් 4:35-41) දේවරාජ්‍යයේ රජ විදිහට යේසුස් පොළොවත් ඒකේ තියෙන හැම දේමත් පාළනය කරන්න යනවා. ඔහු මේ පොළොව අතීතයේ තිබුණ ඒදන් උයන වගේ කිසිම අඩුවක් නැති ලස්සන තැනක් බවට පත් කරනවා.—මතෙව් 19:28; ලූක් 23:43.

 බයිබලයේ එහෙම දෙයක් සඳහන් වෙන්නේ නැහැ. එහෙම දෙයක් සඳහන් වෙනවා කියලා සමහරු හිතන්නේ 2 පේතෘස් 3:7 තියෙන අදහස වැරදියට තේරුම් අරන් තියෙන නිසයි. එතන කියන්නේ “දැන් පවතින අහසත් පොළොවත් වෙන් කර තිබෙන්නේ ගින්නෙන් දවාලීම සඳහාය” කියලයි. ඒත් ඒ බයිබල් පදය හරියට තේරුම්ගන්න අපිට උදව් වෙන කාරණා දෙකක් දැන් බලමු.

1.   බයිබලයේ භාවිත කරලා තියෙන “අහස,” “පොළොව,” “ගින්න” කියන වචනවලින් විවිධ දේවල් අදහස් වෙනවා. උදාහරණයකට උත්පත්ති 11:1 කියනවා “ඒ දවස්වලදී, මුළු පොළොවෙම තිබුණේ එක භාෂාවකි” කියලා. එතන පොළොවේ කියද්දී අදහස් වෙන්නේ පොළොවේ හිටිය මිනිස් සමාජයයි.

2.   2 පේතෘස් 3:7 සඳහන් “අහස,” “පොළොව” සහ “ගින්න” කියන වචනවල අර්ථය තේරුම් ගන්න අවට පාඨ සම්බන්ධය බලන එක උදව් වෙනවා. 2 පේතෘස් 3:5 සහ 6 කතා කරන්නේ නෝවාගේ කාලයේදී සිද්ධ වුණ ජලගැල්ම ගැනයි. ඒ ජලගැල්මෙන් විනාශ වුණේ දුෂ්ට මිනිස් සමාජය මිසක් මේ “පොළොව” නෙමෙයි. (උත්පත්ති 6:11) “අහස” විදිහට හඳුන්වන්න පුළුවන් මිනිස් පාලකයනුත් ඒ ජලගැල්මෙන් විනාශ වුණා. ඒ වුණත් පෘථිවිය විනාශ වුණේ නැහැ. ඒ ජලගැල්මෙන් බේරුණ නෝවා සහ එයාගේ පවුලේ අය ඊටපස්සේ මේ පොළොවේ ජීවත් වුණා.—උත්පත්ති 8:15-18.

 එදා ජලගැල්මෙන් දුෂ්ට මිනිසුන්ව විනාශ වුණා වගේ 2 පේතෘස් 3:7 සඳහන් ගින්නෙන් අද ඉන්න දුෂ්ට මිනිසුන් විනාශ වෙනවා. ඒත් පෘථිවිය විනාශ වෙන්නේ නැහැ. “සැමදා ධර්මිෂ්ඨකම රජයන අලුත් අහසක් සහ අලුත් පොළොවක් පැමිණෙවා” කියලා දෙවියන් පොරොන්නු වෙලා තියෙනවා. (2 පේතෘස් 3:13) “අලුත් අහසක්” විදිහට හඳුන්වන අලුත් ආණ්ඩුවකින් “අලුත් පොළොවක්” විදිහට හඳුන්වන අලුත් මිනිස් සමාජයක් පාලනය කරන්න යනවා. ඒ ආණ්ඩුව දේවරාජ්‍යයි. ඒ කාලයේදී මුළු පොළොවම සාමයෙන් පිරුණු ලස්සන පාරාදීසයක් බවට පත් වෙනවා.—එළිදරව් 21:1-4.