යෞවනියක් වන ඉලේන් මෙහෙම කියනවා. “මගේ ඉස්කෝලේ යාළුවන්ට ෆලෝවර්ස්ලා සිය ගාණක් ඉන්නවා. මට හිතුණා ‘ෂා, නියමයිනේ! එයාලා කොච්චර ප්‍රසිද්ධද’ කියලා. ඇත්තම කිව්වොත් මට පොඩි ඊර්ෂ්‍යාවකුත් දැනුණා.”

 ඔයාටත් කවදා හරි එහෙම හිතිලා තියෙනවාද? එහෙමනම් ඔන්ලයින් තරුවක් වෙන උගුලට වැටෙන්නේ නැතුව ඉන්න ඔයාට මේ ලිපිය උදව් වෙයි.

•  අනතුරු මොනවාද?

•  “රැවටිල්ලක් විතරයි”

•  ෆලෝවර්ස්ලා, ලයික් එච්චරම වැදගත්ද?

•  බොරු නිහතමානිකමක් පෙන්නලා පම්පෝරි ගහන්න එපා!

 හිතෝපදේශ 22:1 මෙහෙම කියනවා. “වස්තු සම්භාරයක් තිබීමට වඩා වටින්නේ හොඳ නමක් ඇතුව සිටීමයි” කියලා. ඒ කියන්නේ අනිත් අයගේ හිත දිනාගන්න, හොඳ නමක් ඇති කරගන්න ආස වෙන එක වැරදි නැහැ.

 හැබැයි පරෙස්සම් වුණේ නැත්නම් ඒ ආසාව දුරදිග ගිහිල්ලා ප්‍රසිද්ධ කෙනෙක් වෙන්න ඔයාගේ හිතේ ලොකු කෑදරකමක් ඇති වෙන්න පුළුවන්. ඒක ඔයාට අනතුරක් වෙන්නේ කොහොමද? අවුරුදු 16ක් වයස ආන්යා කියන දේ බලන්න:

 “අපේ ඉස්කෝලේ සමහර ළමයි ප්‍රසිද්ධ වෙන්න, අනිත් අයගේ අවධානය ඇදගන්න මහා පිස්සු දේවල් කරන්නේ. සමහරු ඉස්කෝලේ බිල්ඩින් එකේ දෙවෙනි තට්ටුවෙනුත් පනිනවා.”

 සමහරු එයාලා කරන මෝඩ දේවල් වීඩියෝ කරලා ඒවා ඔන්ලයින් දානවා. උදාහරණෙකට හුඟක් යෞවනයෝ එයාලා වැඩ්ඩෝ කියලා පෙන්නන්න රෙදි හෝදන දියර තියෙන පුංචි පැකට් කාලා පෙන්නනවා. ප්‍රසිද්ධ වෙන්න ඒ වගේ විස දේවල් වුණත් කන්න එයාලා ලෑස්තියි.

 බයිබලයේ මෙහෙම කියනවා: “අනිත් අයගේ අවධානය ඇදගන්න අදහසින් කිසි තේරුමක් නැති දේවල් කරන්න එපා.”—ෆිලිප්පි 2:3, Good News Translation.

 හිතන්න දෙයක්:

•   ඔන්ලයින් තරුවක් වෙන එක ගැන ඔයාට හිතෙන්නේ මොනවාද?

•   ඔයාට ඕනෙ ජීවිතේ අනතුරේ දාන වැඩක් කරලා හරි අනිත් අය ඉස්සරහා කැපිලා පේන්නද?

 සමහර අය ප්‍රසිද්ධ වෙන්න හදන්නේ ජීවිතේ අනතුරේ දාන දේවල් කරලාම නෙවෙයි. බලන්න අවුරුදු 22ක් වයස එරිකා ඒ ගැන කියන දේ:

 “සමහරු පෝස්ට් කරන්නේ එයාලා ජොලියේ හිටපු වෙලාවලදී ගත්ත ෆොටෝ විතරයි. යාළුවෝ එක්ක ගත්ත ඒ වගේ ෆොටෝ එයාලා එක පිට එක දානවා. ඉතින් ඒවා බලන කෙනෙක්ට හිතෙන්නේ එයාට සෑහෙන්න යාළුවෝ ඉන්නවා, එයා හැම තිස්සේම ඉන්නේ ෆුල් ජොලියේ කියලා. ඒත් ඒක රැවටිල්ලක් විතරයි.”

 සමහරු බොරු තොරතුරු දාලා එයාලා අනිත් අය අතරේ ප්‍රසිද්ධයි කියලා මවාපාන්න හදනවා. ඒ ගැන අවුරුදු 15ක් වයස කේරා කියන දේ බලන්න:

 “සමහරු පාටියකට වගේ ඇඳගෙන ලස්සනට ෆොටෝ අරන් දානවා. හැබැයි බලද්දී එයා ඉන්නේ ගෙදර තට්ට තනියම.”

 අවුරුදු 22ක් වයස මැතිව් කළෙත් ඒ වගේ දෙයක්. බලන්න එයා කියන දේ:

 “දවසක් මං ෆොටෝ එකක් අරන් මං ඉන්නේ එවරස්ට් කන්දේ කියලා දැම්මා. ඇත්තම කිව්වොත් එවරස්ට් කන්දට තියා මං ආසියාවටවත් අඩිය තියලා නෑ.”

 බයිබලයේ මෙහෙම කියනවා: “අප සෑම දෙයකදීම අවංකව කටයුතු කිරීමට කැමතියි.”—හෙබ්‍රෙව් 13:18.

 හිතන්න දෙයක්:

•   ඔයා ඔන්ලයින් තරුවක් වෙන්න හදන්නේ අනිත් අයව රවට්ටලාද?

•    ඔයා දාන ෆොටෝවලින්, කමෙන්ට්වලින් ඇත්තටම ඔයා කවුද, ඔයා ගත කරන්නේ මොන වගේ ජීවිතයක්ද කියලා පේනවාද?

 ගොඩක් ෆලෝවර්ස්ලා ඉන්නවා නම් හුඟක් ලයික් තියෙනවා නම් ඒක තමයි සුපිරි තරුවක් වෙන්න ඕනෙම දේ කියලා හුඟක් අය හිතනවා. කලින් කතා කරපු මැතිව්ට හිතුණෙත් එහෙමයි. එයා මෙහෙම කියනවා:

 “කවුරු හරි හම්බුණාම මං අහනවා ‘ඔයාට ෆලෝවර්ස්ලා කීදෙනෙක් ඉන්නවාද? ඔයාට ලැබිලා තියෙන වැඩිම ලයික් ගාණ කීයද’ කියලා. මගේ ෆලෝවර්ස්ලා ගාණ වැඩි කරගන්න මං අඳුරන්නේ ඇති අයවත් ෆලෝ කරනවා. එතකොට එයාලත් මාව ෆලෝ කරයිනේ. ඔන්ලයින් තරුවක් වෙන්න මට පුදුම ආසාවක් තිබ්බේ. මේ ඇප් හදලත් තියෙන්නේ ඒ ආසාව තව අවුළන්න පුළුවන් විදිහට.”

 අවුරුදු 25ක් වයස මරියා කියනවා සමහරු තමන්ගේ වටිනාකම මනින්නෙත් එයාලට ඉන්න ෆලෝවර්ස්ලා ගාණෙන්, එයාලට ලැබෙන ලයික් ගාණෙන් කියලා. එයා මෙහෙම කියනවා:

 “ගෑනු ළමයෙක් සෙල්ෆියක් දාලා ඒකට එච්චර දෙනෙක් ලයික් කළේ නැත්නම් එයා හිතන්නේ ‘මං හරි කැතයි, කවුරුත් මට කැමති නෑ’ කියලා. ඒක නෙවෙයි ඇත්ත. ඒත් හුඟක් අය හිතන්නේ එහෙම තමයි. අන්තිමට බලද්දී අනිත් අය මුකුත් කියලත් නෑ. එයාම එයාගේ හිත රිද්දගෙන.”

 බයිබලයේ මෙහෙම කියනවා: “අපි අහංකාරකමින් ක්‍රියා නොකරමු. එකිනෙකා අතරේ තරඟකාරිත්වයක් ඇති කරමින් එකිනෙකාට ඊර්ෂ්‍යා නොකරමු.”—ගලාති 5:26.

 හිතන්න දෙයක්:

•   අනිත් අය ඉන්ටර්නෙට් එකේ දාන දේවල් බලලා ඔයා ඔයාව යාළුවෝ එක්ක සන්සන්දනය කරනවාද?

•   ඔයාට වැඩියෙන්ම වටින්නේ ඔයා ගැන සැලකිලිමත් වෙන හොඳ යාළුවෝ ඇති කරගන්න එකද නැත්නම් ෆලෝවර්ස්ලා ගාණ වැඩි කරගන්න එකද?