යේසුස් ක්‍රිස්තුස් යෙහෝවාගේ පුත්‍රයා මෙන්ම කිට්ටුම සහ හිතවත්ම මිතුරායි. යේසුස් පොළොවේ මනුෂ්‍යයෙකු ලෙස ජීවත් වීමට පෙර, ස්වර්ගයේ බලවත් ආත්ම මැවිල්ලක් ලෙස ජීවත් වුණා. (යොහන් 17:5) පසුව ඔහු මනුෂ්‍යයන්ට දෙවි ගැන සත්‍යය ඉගැන්වීමට පොළොවට පැමිණියා. (යොහන් 18:37) ඒ වගේම ඔහු කීකරු මනුෂ්‍යයන්ව පාපයෙන් සහ මරණයෙන් බේරාගැනීමට තම මනුෂ්‍ය ජීවිතය දුන්නා. (රෝම 6:23) දැන් යේසුස් පොළොව පාරාදීසයක් කරන්න යන ස්වර්ගික ආණ්ඩුව වන දෙවිගේ රාජ්‍යයේ රජ වී සිටිනවා.—එළිදරව් 19:16.

දේවදූතයනුත් දෙවිගේ මිතුරන්. දේවදූතයන්ගේ ජීවිතය ආරම්භ වුණේ පොළොවේ මනුෂ්‍යයන් හැටියට නොවෙයි. දෙවි පොළොව මැවීමට පෙර ඔවුන්ව ස්වර්ගයෙහි මවනු ලැබුවා. (යෝබ් 38:4-7) දේවදූතයන් දසදහස් ගණන් සිටිනවා. (දානියෙල් 7:10) දෙවිගේ මෙම ස්වර්ගික මිතුරන් කැමතියි මනුෂ්‍යයන් යෙහෝවා ගැන සත්‍යය දැනගන්නවාට.—එළිදරව් 14:6, 7.

දෙවිට පොළොවෙත් මිතුරන් සිටිනවා. දෙවි ඔවුන්ව තමන්ගේ සාක්ෂිකාරයෝ ලෙස හඳුන්වනවා. උසාවියකදී සාක්ෂිකාරයෙක් යම් කෙනෙක් ගැන හෝ යම් දෙයක් ගැන ඔහු දන්න දේ පවසනවා. ඒ වගේම යෙහෝවාගේ සාක්ෂිකාරයනුත් යෙහෝවා ගැන හා ඔහුගේ අරමුණ ගැන ඔවුන් දන්න දේ අනිත් අයට පවසනවා. (යෙසායා 43:10) දේවදූතයන්ට මෙන් සාක්ෂිකාරයන්ටත් අවශ්‍ය කරන්නේ යෙහෝවා ගැන සත්‍යය ඉගෙනගැනීමට ඔබට උපකාර කරන්නයි. ඔවුන්ට අවශ්‍ය වන්නේ ඔබත් දෙවිගේ මිතුරෙක් වෙනවා දකින්නයි.