1-3. දේශනා සේවය තවත් වැඩියෙන් කරන්න ඕනෙ නිසා යේසුස් කළේ මොනවාද? අපි උත්තර හොයන්නේ මොන ප්‍රශ්නවලටද?

 යේසුස් අවුරුදු දෙකක් පුරාම ගලීලයේ දේශනා කළා. (මතෙව් 9:35-38 කියවන්න.) විවිධ නුවරවලටත් ගම්වලටත් ගිය ඔහු සිනගෝගවල උගන්වමින් ශුභාරංචිය ගැන දේශනා කළා. ඔහු දේශනා කරපු හැම අවස්ථාවකදීම සෙනඟ ඔහු වටේ එක් රැස් වුණා. “අස්වැන්න නම් විශාලයි” කියලත් තව වැඩකරුවන්ව ඕනෙ කියලත් යේසුස් කිව්වේ ඒ නිසයි.

² දේශනා සේවය තවත් වැඩියෙන් කරන්න ඕනෙ නිසා ඔහු ගෝලයන් 12දෙනාව “දෙවිගේ රාජ්‍යය ගැන දේශනා කිරීමට” යැව්වා. (ලූක් 9:1, 2) ඒක කරන්නේ කොහොමද කියලා සමහරවිට ගෝලයන් කල්පනා කරන්න ඇති. කොහොමවුණත් ඒ අයව පිටත් කරන්න කලින් යේසුස් ඒ අයව පුහුණු කළා. හරියට යේසුස් පොළොවට එන්න කලින් යෙහෝවා දෙවි ඔහුව පුහුණු කළා වගේ.

³ යේසුස්ට ඔහුගේ පියාගෙන් ලැබුණේ මොන වගේ පුහුණුවක්ද? යේසුස් ඔහුගේ ගෝලයන්ට දුන්නේ මොන වගේ පුහුණුවක්ද? දේශනා සේවය කරන්න ඕන විදිහ ගැන ක්‍රිස්තුස් ඔහුගේ අනුගාමිකයන්ව අදටත් පුහුණු කරනවාද? පුහුණු කරනවා නම් ඒ කොහොමද? අපි දැන් ඒ ප්‍රශ්නවලට උත්තර හොයමු.

4. යේසුස්ට ඔහුගේ පියාගෙන් පුහුණුව ලැබුණේ කොයි කාලයේ ඉඳන්ද? ඒ කොහේදීද?

⁴ පියාණන් තමන්ට ඉගැන්නුවා කියලා යේසුස් පැහැදිලිවම කිව්වා. “පියාණන් මට ඉගැන්වූ ආකාරයටම මම ඔබට දේවල් කියා දුන් බවත් ඔබට වැටහෙයි” කියලා ඔහු කිව්වේ ඒ නිසයි. (යොහ. 8:28) දෙවිගේ කුලුඳුල් නිර්මාණය වන ඔහුට ඒ පුහුණුව ලැබුණේ ඔහුව නිර්මාණය කරපු අවස්ථාවේ ඉඳලමයි. (කොලො. 1:15) “උදාර උපදේශකයාණන්” වන යෙහෝවා දෙවිත් එක්ක සෑහෙන කාලයක් ස්වර්ගයේ ඉද්දී ඔහුට හුඟක් දේවල් ඉගෙනගන්න පුළුවන් වුණා. (යෙසා. 30:20) ඒ නිසා වෙන කිසිම කෙනෙක්ට වඩා වැඩියෙන් යෙහෝවා දෙවිගේ ගතිගුණ, නිර්මාණ සහ අරමුණු ගැන ඔහු ඉගෙනගත්තා.

5. පොළොවේදී කරන්න ඕන සේවය ගැන යෙහෝවා දෙවි ඔහුගේ පුතාට ඉගැන්නුවේ මොනවාද?

⁵ පොළොවේදී කරන්න ඕන සේවය ගැන යෙහෝවා දෙවි සුදුසුම කාලයේදී යේසුස්ට ඉගැන්නුවා. උදාර උපදේශකයා වන දෙවි ඔහුගේ කුලුඳුල් පුතාට උගන්වන විදිහ ගැන සඳහන් අනාවැකිය ගැන ටිකකට හිතන්න. (යෙසායා 50:4, 5 කියවන්න.) යෙහෝවා දෙවි “උදයක් උදයක්  පාසා” ඔහුගේ පුතාව අවදි කළා කියලා ඒකේ සඳහන් වෙනවා. ඒක හරියට ගුරුවරයෙක් හැම උදේකම ඔහුගේ ශිෂ්‍යයාව අවදි කරලා ඔහුට උගන්වනවා වගෙයි. එක පොතක ඒ ගැන සඳහන් වුණේ මෙහෙමයි. “දේශනා කරන්න ඕනෙ මොනවා ගැනද සහ ඒක කරන්න ඕනෙ කොහොමද කියලා යෙහෝවා දෙවි යේසුස්ට ඉගැන්නුවේ හරියට ශිෂ්‍යයෙක්ව පාසැලකට අරන් ගිහින් උගන්වනවා වගෙයි.” “මා කිව යුතු දේ මට පැහැදිලිවම අණ කර තිබෙනවා” කියලා යේසුස් කියපු දෙයින් ඒක තවත් පැහැදිලි වෙනවා. (යොහ. 12:49) අනිත් අයට උගන්වන්න ඕන විදිහ ගැනත් පියා ඔහුගේ පුතාට ඉගැන්නුවා. a යෙහෝවා දෙවිගෙන් ලැබුණු ඒ පුහුණුව අදාළ කරගෙන යේසුස් තමන්ට පැවරිලා තිබුණු සේවය ඉටු කරන ගමන් අනුගාමිකයන්ට ඔවුන්ගේ සේවය සාර්ථකව කරන්නත් පුහුණු කළා.

6, 7. (අ) යේසුස් ඔහුගේ ගෝලයන්ට දුන්නේ මොන වගේ පුහුණුවක්ද? ඒ පුහුණුව නිසා ඔවුන්ට කරන්න පුළුවන් වුණේ මොනවාද? (ආ) යේසුස් අපිට දීලා තියෙන්නේ මොන වගේ පුහුණුවක්ද?

⁶ යේසුස් ඔහුගේ ගෝලයන්ට දුන්නේ මොන වගේ පුහුණුවක්ද? දේශනා සේවය කරන්න ඕන විදිහ ගැන යේසුස් ඒ අයට නිශ්චිත මඟ පෙන්වීම් දුන්නා. උදාහරණයකට දේශනා කරන්න ඕනෙ කොහේද (මතෙ. 10:5, 6), දේශනා කරන්න ඕනෙ මොනවා ගැනද (මතෙ. 10:7), යෙහෝවා දෙවි මත විශ්වාසය තියන එක කොච්චර වැදගත්ද (මතෙ. 10:9, 10), මිනිසුන්ට පණිවිඩය ගැන කියන්න ඕනෙ කොහොමද (මතෙ. 10:11-13), පණිවිඩය ප්‍රතික්ෂේප කරද්දී කරන්න ඕනෙ මොනවාද (මතෙ. 10:14, 15) සහ විරුද්ධවාදීකම්වලට මුහුණ දෙන්න පුළුවන් කොහොමද (මතෙ. 10:16-23) කියලා ඔහු පැහැදිලි කළා. b යේසුස්ගෙන් ලැබුණු ඒ කදිම පුහුණුව නිසා පළවෙනි සියවසේදී ඔහුගේ නියෝජිතයන්ට ශුභාරංචිය තවත් වැඩියෙන් දේශනා කරන්න පුළුවන් වුණා.

⁷ අපි ගැන කියන්න පුළුවන් මොනවාද? දෙවිගේ රාජ්‍යයේ රජු විදිහට යේසුස් “රාජ්‍යය පිළිබඳ මේ ශුභාරංචිය . . . සියලු ජාතීන්ට සාක්ෂියක් වන පිණිස මුළු පොළොව පුරාම දේශනා” කරන පැවරුම අපිට දීලා තියෙනවා. (මතෙ. 24:14) අපිට ලැබිලා තියෙන වැදගත්ම පැවරුම හැටියට ඒක හඳුන්වන්න පුළුවන්. ඒ පැවරුම ඉටු කරන්න රජු අපිව පුහුණු කරලා තියෙනවාද? ඔව්. ශුභාරංචිය දේශනා කරන්න ඕනෙ කොහොමද කියලත් සභාවට අදාළ විශේෂ වගකීම් ඉටු කරන්න ඕනෙ කොහොමද කියලත් ඔහු අපිව පුහුණු කරලා තියෙනවා.

8, 9. (අ) සේවා පාසැලේ අරමුණ වුණේ මොකක්ද? (ආ) දක්ෂ දේවසේවකයෙක් වෙන්න සතිය මැද පවත්වන රැස්වීම ඔබට උදව් වෙලා තියෙන්නේ කොහොමද?

⁸ දේශනා සේවය සාර්ථකව කරන්නේ කොහොමද කියලා සමුළුවලින් වගේම සේවා රැස්වීම වගේ සභා රැස්වීම්වලින් දෙවිගේ සංවිධානය හුඟ කාලයක් තිස්සේ අපිව පුහුණු කරනවා. අපිව තවත් හොඳින් පුහුණු කරන්න 1940 ගණන්වල ඉඳන් අපේ මූලස්ථානයේ සහෝදරයන් විවිධ පාසැල් සංවිධානය කරන්න පටන් අරන් තියෙනවා.

⁹ සේවා පාසැල. මේ පාසැල පටන්ගත්තේ 1943දියි. මේ පාසැලේ මූලික අරමුණ වුණේ රැස්වීම්වලදී දක්ෂ විදිහට පැවරුම් ඉදිරිපත් කරන්න ශිෂ්‍යයන්ව පුරුදු කරන එක විතරක් නෙවෙයි. ඒකේ මූලිකම අරමුණ වුණේ දේශනා සේවයේදී යෙහෝවා දෙවිව ප්‍රශංසාවට පත් කරන්න දෙවිගේ සේවකයන්ව පුහුණු කරන එක. (ගීතා. 150:6)  හැම සහෝදර සහෝදරියකටම දක්ෂ දේවසේවකයෙක් වෙන්න සතිය මැද පැවැත්වෙන රැස්වීමෙන් හොඳ පුහුණුවක් ලැබෙනවා.

10, 11. දැන් ගිලියද් පාසැලට සහභාගි වෙන්න අවස්ථාව තියෙන්නේ කාටද? පාසැලේ අරමුණ මොකක්ද?

¹⁰ ගිලියද් මුරටැඹ බයිබල් පාසැල. මේ පාසැල මුලින්ම පටන්ගත්තේ 1943 පෙබරවාරි 1වෙනිදා. මේ පාසැල සංවිධානය කළේ පුරෝගාමීන්ව සහ පූර්ණකාලීන සේවකයන්ව අවශ්‍යතාව තියෙන රටක සේවය කරන්න පුහුණු කරන්නයි. හැබැයි 2011 ඔක්තෝබර් මාසයේ ඉඳන් මේ පාසැලට සහභාගි වෙන්න අවස්ථාව ලැබුණේ විශේෂ පූර්ණකාලීන සේවකයන්ට විතරයි. ඒ කියන්නේ විශේෂ පුරෝගාමීන්, සංචාරක සේවකයන් සහ ඔවුන්ගේ භාර්යාවන්, බෙතෙල් සේවකයන් සහ මේ පාසැලට සහභාගි වෙලා නැති මිෂනාරි සේවකයන්ට විතරයි.

¹¹ ගිලියද් පාසැලේ අරමුණ මොකක්ද? මේ පාසැලේ උපදේශකයෙක් ඒ ගැන කිව්වේ මෙහෙමයි. “බයිබලය හොඳින් අධ්‍යයනය කරන්න උදව් කරලා ශිෂ්‍යයන්ගේ විශ්වාසය ශක්තිමත් කරන එක, ඒ අයගේ පැවරුමේදී එන අභියෝගවලට හොඳින් මුහුණ දෙන්න අවශ්‍ය කරන ගුණාංග වර්ධනය කරගන්න උදව් කරන එක මේ පාසැලේ අරමුණට අයිතියි. ඒ වගේම ලොකු උනන්දුවකින් දේවසේවයේ හවුල් වෙන්න පෙලඹීමක් ඇති කරන එකත් මේ පාසැලේ මූලිකම අරමුණක් වෙනවා.”—එෆී. 4:11.

12, 13. ලෝකෙ පුරාම සිද්ධ වෙන දේශනා සේවයට ගිලියද් පාසැල දායක වෙලා තියෙන්නේ කොහොමද? උදාහරණයක් දෙන්න.

¹² ලෝකෙ පුරාම සිද්ධ වෙන දේශනා සේවයට ගිලියද් පාසැල දායක වෙලා තියෙන්නේ කොහොමද? 1943 ඉඳන් මේ වෙන කල් 8,500දෙනෙක් මේ පාසැලෙන් පුහුණුව ලබලා තියෙනවා. c ඒ වගේම පාසැලෙන් පුහුණුව ලබපු මිෂනාරි සේවකයන් ලෝකෙ පුරා රටවල් 170කට වඩා වැඩි ප්‍රමාණයක සේවය කරලා තියෙනවා. පාසැලෙන් ලබපු පුහුණුව නිසා උද්‍යෝගයෙන් සේවයේ හවුල් වෙන ඒ අය උද්‍යෝගයෙන් සේවය කරන්න අනිත් අයවත් පුහුණු කරනවා. හුඟක් අවස්ථාවලදී ප්‍රචාරකයන් කිහිපදෙනෙක් හිටිය ප්‍රදේශවල නැත්නම් ප්‍රචාරකයන් එක්කෙනෙක්වත් හිටියේ නැති ප්‍රදේශවල දේශනා සේවය පටන්ගන්න පුළුවන් වෙලා තියෙන්නේ මිෂනාරි සේවකයන් නිසයි.

¹³ උදාහරණයක් බලමු. දෙවෙනි ලෝක මහා යුද්ධයෙන් පස්සේ ජපානයේ සභා මට්ටමින් සංවිධානය කරපු දේශනා සේවය සම්පූර්ණයෙන්ම නතර වෙලයි තිබුණේ. 1949 අගෝස්තු වෙද්දී ජපානයේ ප්‍රචාරකයන් 10දෙනෙක්වත් හිටියේ නැහැ. හැබැයි ඒ අවුරුද්දේ අග වෙද්දී ගිලියද් පාසැලෙන් පුහුණුව ලබපු 13දෙනෙක් මිෂනාරි සේවකයන් විදිහට ජපානයේ සේවය කරන්න පටන්ගත්තා. ඊටපස්සේ තවත් මිෂනාරි සේවකයන් ජපානයට ආවා. මුලදී ඒ අය සේවය කළේ ලොකු නගරවල විතරයි. හැබැයි කාලෙකට පස්සේ ඒ අය වෙන නගරවලටත් ගියා. ඒ අයත් එක්ක එකතු වෙලා පුරෝගාමීන් විදිහට සේවය කරන්න එන්න කියලා ඔවුන් බයිබල් ශිෂ්‍යයන්ටත් අනිත් අයටත් දිරිගන්වලා තියෙනවා. ඒ විදිහට වෙහෙස බලන්නේ නැතුව වැඩ කරපු මිෂනාරි සේවකයන්ගේ වෙහෙසට හොඳ ප්‍රතිඵල ලැබිලා තියෙනවාද? ඔව්. දැන් ජපානයේ ප්‍රචාරකයන් 2,16,000කට වඩා ඉන්නවා. ඒ විතරක් නෙවෙයි ඒ අතරින් සියයට 40ක් විතර පුරෝගාමීන් විදිහට සේවය කරනවා. d

14. දෙවිගේ සේවකයන්ව පුහුණු කරන්න විවිධ පාසැල් තියෙන එකෙන් පැහැදිලි වෙන්නේ මොකක්ද? (“ දේවසේවකයන්ව පුහුණු කරන පාසැල්” යන කොටුවත් බලන්න.)

¹⁴ තවත් පාසැල්. පුරෝගාමි පාසැලට, විවාහක යුවළයන් සඳහා  බයිබල් පාසැලට සහ තනිකඩ සහෝදරයන් සඳහා බයිබල් පාසැලට සහභාගි වුණු අය හුඟක් ප්‍රයෝජන ලබලා තියෙනවා. අවබෝධයෙන් ක්‍රියා කරන්නත් උද්‍යෝගයෙන් සේවයේ හවුල් වෙන්නත් ඒ අයට පුළුවන් වෙලා තියෙන්නේ ඒ පාසැල්වලින් ලැබුණු පුහුණුව නිසයි. e දේවසේවය සම්පූර්ණයෙන්ම ඉටු කරන්න අපේ රජු දිගටම ඔහුගේ අනුගාමිකයන්ට අවශ්‍ය කරන පුහුණුව දෙනවා කියලා කියන්න ඒ පාසැල් කදිම සාක්ෂියක්.—2 තිමෝ. 4:5.

15. යේසුස්ව ආදර්ශයට ගන්න වගකීම් දරන සහෝදරයන්ට පුළුවන් කොහොමද?

¹⁵ දෙවි, යේසුස්ට උගන්වන විදිහ ගැන යෙසායා පොතේ සඳහන් වුණු අනාවැකිය ඔබට මතකද? “විඩා වූ අයට සහනයක් ගෙන දෙන අයුරින් කතා” කරන්න යේසුස් ඉගෙනගත්තේ දෙවිගෙන් ලැබුණු ඒ පුහුණුව නිසයි. (යෙසා. 50:4) යේසුස් ඉගෙනගත්ත ඒ දේ ඔහු පොළොවේ ඉද්දී අදාළ කරගත්තා. “වෙහෙස වූ බරින් පීඩිත වූ” අයට සහනයක් ලැබෙන විදිහට ඔහු ක්‍රියා කළේ ඒ නිසයි. (මතෙ. 11:28-30) අද ඉන්න වගකීම් ඉටු කරන සහෝදරයනුත් යේසුස් කළා වගේ සහෝදර සහෝදරියන්ට සහනයක් ලැබෙන විදිහට ක්‍රියා කරන්න ඕනේ. සුදුසුකම් තියෙන සහෝදරයන්ට ඒ දේ  කරන්න උදව් කරන්න තමයි අද විවිධ පාසැල් සංවිධානය කරලා තියෙන්නේ.

16, 17. පත් කළ සහෝදරයන් සඳහා පාසැලේ අරමුණ මොකක්ද? (පාදසටහනත් බලන්න.)

¹⁶ පත් කළ සහෝදරයන් සඳහා පාසැල. මුලින්ම මේ පාසැල පවත්වලා තියෙන්නේ 1959 මාර්තු 9වෙනිදා නිව් යෝර්ක් නගරයේදියි. මාසයක් පුරා පවත්වපු ඒ පාසැලට ආරාධනා ලැබුණේ සංචාරක සේවකයන්ට සහ වැඩිමහල්ලන්ට. පස්සේ කාලෙක මේ පාසැල වෙනත් භාෂාවලිනුත් පවත්වන්න පටන්ගත්ත නිසා ලෝකෙ පුරාම ඉන්න සහෝදරයන්ට ඒ පාසැලෙන් පුහුණුව ලබන්න පුළුවන් වෙලා තියෙනවා. f

¹⁷ පත් කළ සහෝදරයන් සඳහා පාසැලේ අරමුණ ගැන ‘1962 යෙහෝවා දෙවිගේ සාක්ෂිකරුවන්ගේ වාර්ෂික පොතේ’ මෙහෙම සඳහන් වුණා. “අපි ජීවත් වෙන්නේ හුඟක් කාර්යබහුල ලෝකයක නිසා වැඩිමහල්ලන් සභාවේ වැඩවලට හොඳ අවධානයක් දෙන්න පුළුවන් වෙන විදිහටත් සභාවේ අයට සහනයක් වෙන්න පුළුවන් වෙන විදිහටත් තමන්ගේ පෞද්ගලික වැඩ සැලසුම් කරගන්න ඕනේ. හැබැයි සභාවේ වැඩ නිසා පවුලේ වගකීම් පැහැරහරින එක සුදුසු නැහැ. ඒ වෙනුවට සිහිකල්පනාවෙන් වැඩ කරන්න ඕනේ. පත් කළ සහෝදරයන් සඳහා පාසැලට හවුල් වෙලා බයිබලයේ සඳහන්  වෙන විදිහට සභාවේ වගකීම් ඉටු කරන්න ඕනෙ කොහොමද කියලා ඉගෙනගන්න ලෝකෙ පුරාම ඉන්න වැඩිමහල්ලන්ට ලැබිලා තියෙන අවස්ථාව කොයි තරම් වටිනවාද!”—1 තිමෝ. 3:1-7; තීත. 1:5-9.

18. පත් කළ සහෝදරයන් සඳහා පාසැලෙන් සභාවේ හැමෝම ප්‍රයෝජන ලබනවා කියලා කියන්න පුළුවන් ඇයි?

¹⁸ පත් කළ සහෝදරයන් සඳහා පාසැලෙන් සභාවේ ඉන්න හැමෝම ප්‍රයෝජන ලබනවා. ඒ කොහොමද? ඒ පාසැලෙන් ලැබෙන පුහුණුව නිසා සභාවේ වැඩිමහල්ලන්ටත් සහායක සේවකයන්ටත් පුළුවන් වෙනවා යේසුස් වගේ අනිත් අයට සහනයක් වෙන විදිහට කටයුතු කරන්න. ඒ අය අපිව මුණගැහිලා දිරිගන්වද්දී එහෙමත් නැත්තම් හරිම ඉවසීමෙන් අපි කියන දේවල් අහගෙන ඉද්දී අපිට ඒකෙන් මොන තරම් සහනයක් ලැබෙනවාද! (1 තෙස. 5:11) ඒ සහෝදරයන් ඇත්තටම සභාවට ලොකු ආශීර්වාදයක්.

19. ඉගැන්වීම් කමිටුව සංවිධානය කරලා තියෙන තවත් පාසැල් මොනවාද? ඒ පාසැල්වලින් සිද්ධ වෙන්නේ මොනවාද?

¹⁹ තවත් පාසැල්. සංවිධානයේ වගකීම් ඉටු කරන විදිහ ගැන සහෝදරයන්ව පුහුණු කරන්න පාලක මණ්ඩලයේ ඉගැන්වීම් කමිටුව තවත් පාසැල් සංවිධානය කරලා තියෙනවා. වැඩිමහල්ලන්ට, සංචාරක සේවකයන්ට සහ ශාඛා කමිටුවල සේවය කරන සහෝදරයන්ට ඒ අයගේ වගකීම් තවත් හොඳින් ඉටු කරන්න ඒ පාසැල්වලින් හොඳ පුහුණුවක් ලැබෙනවා. ඒ පාසැල්වලින් සහෝදරයන්ව දිරිගන්වන්නේ විශ්වාසයෙන් ඒ අයට භාර දීලා තියෙන රැළ ආදරයෙන් රැකබලා ගන්න සහ දිගටම දෙවි කැමති ගුණාංග වර්ධනය කරගන්න කියලයි.—1 පේතෘ. 5:1-3.

20. “යෙහෝවා දෙවි ඔවුන් සියලුදෙනාටම උගන්වයි” කියලා යේසුස් කිව්වේ ඇයි? ඔබ අදිටන් කරගත්තේ මොනවා කරන්නද?

²⁰ දෙවිගේ රාජ්‍යයේ රජු දිගටම ඔහුගේ අනුගාමිකයන්ට අවශ්‍ය පුහුණුව දෙනවා කියලා හොඳින්ම පැහැදිලියි. ඒ පුහුණුව පටන් අරන් තියෙන්නේ ස්වර්ගයෙන්. මුලින්ම යෙහෝවා දෙවි ඔහුගේ පුතාව පුහුණු කළා. ඊටපස්සේ පුතා ඔහුගේ අනුගාමිකයන්ව පුහුණු කළා. “යෙහෝවා දෙවි ඔවුන් සියලුදෙනාටම උගන්වයි” කියලා යේසුස් කියලා තියෙන්නේ ඒ නිසයි. (යොහ. 6:45; යෙසා. 54:13) අපේ රජු අපිට දෙන පුහුණුවෙන් උපරිම ප්‍රයෝජන ගන්න අපි අදිටන් කරගමු. ඒ වගේම ඒ පුහුණුව ලැබෙන්නේ අපිට දෙවි ගැන තියෙන විශ්වාසය තවත් ශක්තිමත් කරගෙන දේවසේවය සම්පූර්ණයෙන්ම ඉටු කරන්න කියලා අපි හැමදාමත් මතක තියාගමු.