1, 2. බානබස්ට හා සාවුල්ට ලැබුණු පැවරුම විශේෂයි කියන්නේ ඇයි? ක්‍රියා 1:8 කියන දේ ඉටු කරන්න ඔවුන්ට ලැබුණු පැවරුම දායක වුණේ කොහොමද?

 අන්තියෝකියේ පිහිටි සභාවට අද ප්‍රීතිමත් දවසක්. රැස්ව සිටි අනාගතවක්තෘවරුන් හා ගුරුවරුන් හැමෝම අතරින් බානබස්ව හා සාවුල්ව විශේෂ කාර්යයක් වෙනුවෙන් දෙවියන්ගේ බලයෙන් තෝරගත්තා. a ඒ, දුර ඈත ප්‍රදේශවලට ශුභාරංචිය අරන් යන්නයි. (ක්‍රියා 13:1, 2) මීට කලිනුත් සුදුසුකම් ලත් පුරුෂයන්ව ශුභාරංචිය දේශනා කරන්න වෙනත් ප්‍රදේශවලට යවලා තිබුණා. නමුත් ඔවුන් ගිය ප්‍රදේශවල ඒ වෙද්දීත් යේසුස්ගේ අනුගාමිකයන් හිටියා. (ක්‍රියා 8:14; 11:22) මේ අවස්ථාවේදී බානබස්ව, සාවුල්ව හා ඔවුන්ගේ සහායට ගිය මාක් කියන වාසගම තිබුණ යොහන්ව යවන්නේ කවදාවත් ශුභාරංචිය අහන්න නොලැබුණු මිනිසුන් හුඟදෙනෙක් ඉන්න ප්‍රදේශවලටයි.

² මීට අවුරුදු 14කට කලින් යේසුස් ඔහුගේ ගෝලයන්ට මෙහෙම කිව්වා. “ඔයාලා යෙරුසලමෙත් යුදය පුරාමත් සමාරියෙත් පොළොවේ දුර ඈත ප්‍රදේශවලත් මං ගැන සාක්ෂි දරයි.” (ක්‍රියා 1:8) බානබස්ට හා සාවුල්ට මිෂනාරිවරුන් විදිහට සේවය කරන්න ලැබුණු මේ විශේෂ පැවරුම යේසුස් කියපු ඒ දේ ඉටු කරන්න දායක වුණ බව නිසැකයි. b

3. පළවෙනි සියවසේදී දුර ගමන් යෑම අපහසු දෙයක් වුණේ ඇයි?

³ යානවාහන තිබෙන අද කාලයේ දුර ප්‍රදේශවලට යන එක ඒ තරම් අපහසු කාර්යයක් නෙවෙයි. පැයක් දෙකක් ඇතුළත සෑහෙන දුරක් යන්න පුළුවන්. නමුත් මුල් සියවසේ තත්වය නම් ඊට වඩා වෙනස්. ඒ කාලයේ හුඟදෙනෙක් ගමන්බිමන් ගියේ පයින්. පාරවලුත් දුෂ්කරයි. දවසක් ඇතුළත ගමන් කරන්න පුළුවන් වුණේ කිලෝමීටර් 30ක් විතරයි. ඒ දුර යන්න සෑහෙන වෙහෙසක් දරන්නත් වුණා. c ඒ නිසා බානබස්  හා සාවුල් තමන්ට ලැබුණු පැවරුම උද්‍යෝගයෙන් භාරගත්තත් ඒක ඉටු කරන්න ලේසි නැහැ කියා ඔවුන් තේරුම්ගන්න ඇති. ඒකට ලොකු වෙහෙසක් දරන්නත් කැප කිරීම් කරන්නත් සිදු වන බව ඔවුන් වටහාගන්න ඇති.—මතෙ. 16:24.

4. (අ) බානබස්ව හා සාවුල්ව විශේෂ කාර්යයක් වෙනුවෙන් තෝරගත්තේ කොහොමද? සභාවේ අය ඒකට ප්‍රතිචාරය දැක්වුවේ කොහොමද? (ආ) අපට ඔවුන්ව ආදර්ශයට ගන්න පුළුවන් කොහොමද?

⁴ දෙවියන්ගේ බලයෙන් “බානබස්වයි, සාවුල්වයි විශේෂ වැඩකට තෝරගෙන” තිබුණේ ඇයි? (ක්‍රියා 13:2) ඒකට හේතුව බයිබලයේ සඳහන් වෙලා නැහැ. නමුත් එක දෙයක් පැහැදිලියි. ඔවුන් දෙන්නාව තෝරගත්තේ දෙවියන්ගේ බලයේ මඟ පෙන්වීමෙන්. ඒ තේරීම ගැන අන්තියෝකියේ සභාවේ කිසිම අනාගතවක්තෘවරයෙක් හෝ ගුරුවරයෙක් තම අකමැත්ත පළ කළා කියා කියන්න සාක්ෂියක් නැහැ. ඒ වෙනුවට ඔවුන් තම උපරිම සහයෝගය ඒ දෙන්නාට දුන්නා. ඔවුන් නිරාහාරව ඉඳලා ඒ දෙන්නා වෙනුවෙන් යාච්ඤා කළා. ඊටපස්සේ “ඒ දෙන්නා පිට අත් තියලා එයාලව පිටත් කරලා යැව්වා.” (ක්‍රියා 13:3) ටිකක් හිතන්න, සහෝදරයන් ඊර්ෂ්‍යා නොකර ඔවුන් දෙන්නාට ලැබුණු පැවරුම ඉටු කරන්න සම්පූර්ණ සහයෝගය දුන්නාම සාවුල්ට හා බානබස්ට කොහොම දැනෙන්න ඇද්ද! සභාවේ වැඩිමහල්ලන් විදිහට සේවය කරන එක ඇතුළුව විවිධ පැවරුම් ලැබෙන අයට සහයෝගය ලබා දීම වැදගත් දෙයක් නෙවෙයිද? ඊර්ෂ්‍යා කරනවා වෙනුවට “එයාලා කරන සේවය නිසා එයාලට ලොකු ආදරයකින්, ගෞරවයකින් සලකන්න” අපි අදිටන් කරගමු.—1 තෙස. 5:13.

5. සයිප්‍රසය කියන දූපතේ දේශනා කරන එක කොච්චර දුෂ්කර වෙන්න ඇද්ද?

⁵ දෙවියන්ගෙන් ලැබුණු පැවරුම ඉටු කරන්න ගිය බානබස් හා සාවුල්, අන්තියෝකියට නුදුරින් සිලූෂියේ තිබුණ වරායට පයින් ගමන් කළා. එතනින් නැවකට නැග්ග ඔවුන්, සයිප්‍රසය කියන දූපත බලා ගියා. ඒක කිලෝමීටර් 200ක විතර දුර ගමනක්. d බානබස් කියන්නේ සයිප්‍රසයෙන් ආපු කෙනෙක්. සයිප්‍රසයට ගිහින් ශුභාරංචිය දේශනා කරන්න ඔහු ලොකු උද්‍යෝගයකින් ඉන්න ඇති. ඒ දූපතේ නැඟෙනහිර වෙරළබඩ තීරයේ තිබුණ සලමිසය කියන නගරයට ගොඩ බැස්ස ඔවුන්, කාලය නාස්ති නොකර ඉක්මනින්ම “යුදෙව්වරුන්ගේ සිනගෝගවලට ගිහින් දෙවියන්ගේ පණිවිඩය දැනුම් දුන්නා.” e (ක්‍රියා 13:5) ඔවුන් දෙන්නා සයිප්‍රසයේ එක් කොනක ඉඳන් අනිත් කොන දක්වා ගමන් කරලා හැම ප්‍රධාන නගරයකම ශුභාරංචිය දේශනා කළා. ඒකට ඔවුන්ට සමහරවිට කිලෝමීටර් 160ක් විතර පයින් යන්න වෙන්න ඇති.

6, 7. (අ) සර්ජියස් පාවුලස් කියන්නේ කවුද? දෙවියන්ගේ පණිවිඩය අහන එකෙන් ඔහුව වළක්වන්න බාර්යේසුස් උත්සාහ කළේ ඇයි? (ආ) ඒ වෙලාවේ සාවුල් බාර්යේසුස්ට කළේ මොකක්ද?

⁶ ඒ කාලයේ සයිප්‍රසයේ හිටිය හුඟදෙනෙක් අසත්‍යය උගන්වන ආගම්වල ග්‍රහණයට හසු වෙලා හිටියා. සයිප්‍රසයේ බටහිර වෙරළබඩ තීරයේ තිබුණ පාෆස් කියන නගරයට ආවාම බානබස්ට හා සාවුල්ට ඒක හොඳින් වැටහුණා. එහෙදී ඔවුන්ට “බාර්යේසුස් කියලා යුදෙව් මනුස්සයෙක්ව හම්බ වුණා. එයා මන්තර ගුරුකම් කරන බොරු අනාගතවක්තෘවරයෙක්. එයා හිටියේ ඒ දූපතේ ආණ්ඩුකාරයා වුණ සර්ජියස් පාවුලස්  එක්ක. සර්ජියස් පාවුලස් හරිම බුද්ධිමත් කෙනෙක්.” f ඒ කාලයේ රෝම වැසියන් අතරේ හිටිය සර්ජියස් පාවුලස් වගේ “හරිම බුද්ධිමත්” අය පවා යම් වැදගත් තීරණයක් ගන්න කලින් මන්තර ගුරුකම් කරන අයගෙන් හෝ ජ්‍යෝතිශ්ශාස්ත්‍රඥයන්ගෙන් මඟ පෙන්වීම් පැතුවා. නමුත් සර්ජියස් පාවුලස්ට දේවරාජ්‍යයේ පණිවිඩය ගැන කුතුහලයක් ඇති වුණා. වාර්තාවේ කියන්නේ “එයාට දෙවියන්ගේ පණිවිඩය දැනගන්න ලොකු ආසාවක් තිබුණා” කියලා. නමුත් බාර්යේසුස් නම් ඒ ගැන සතුටු වුණේ නැහැ. බාර්යේසුස්ව “මන්තර ගුරුකම් කරන කෙනා” කියන තේරුම ඇති එලිමස් කියන නමිනුත් හැඳින්වුවා.—ක්‍රියා 13:6-8.

⁷ බානබස් හා සාවුල් දේශනා කළ පණිවිඩයට බාර්යේසුස් දැඩි විරෝධය පෑවා. ඔහුට ඕනෙ වුණේ “ආණ්ඩුකාරයා පණිවිඩය අහලා ඒ ගැන විශ්වාසයක් ඇති කරගන්න එක කොහොමහරි නවත්තලා දාන්නයි.” මොකද ආණ්ඩුකාරයාගේ උපදේශකයා විදිහට තමන්ට තිබුණ තනතුර රැකගන්න පුළුවන් වෙන්නේ එහෙම කළොත් විතරයි කියා ඔහු දැන සිටියා. (ක්‍රියා 13:8) පාවුලස්ට තිබුණ උනන්දුව නැති කරලා දාන්න මන්තර ගුරුකම් කරන කෙනෙක් උත්සාහ කරද්දී සාවුල් මුකුත් නොකර බලන් හිටියාද? නැහැ. වාර්තාවේ කියන්නේ මෙහෙමයි. “පාවුල් කියන නමිනුත් හඳුන්වපු සාවුල් තුළ ඒ වෙලාවේ දෙවියන්ගේ බලය ප්‍රබල විදිහට ක්‍රියාත්මක වෙන්න පටන්ගත්තා. එයා එලිමස් දිහා බලලා, මෙහෙම කිව්වා. ‘ඔයා මහ බොරුකාරයෙක්! දුෂ්ටකම්වලින් පිරුණු යක්ෂයාගේ පුතෙක්! හරි දේට විරුද්ධව  වැඩ කරන සතුරෙක්! ඇයි ඔයා හැම වෙලාවෙම යෙහෝවාගේ සත්‍ය ඉගැන්වීම් විකෘති කරන්න හදන්නේ? යෙහෝවා ඔයාට දඬුවම් කරනවා. දැන් ඔයාගේ පෙනීම නැති වෙලා දවස් ගාණක් යන කල් ඔයාට හිරු එළියවත් දකින්න බැරි වෙයි.’ ඒ වෙලාවෙම එයාව ගන මීදුමකින් වැහිලා ගියා. එයාට දැනුණා හැම දේම අඳුරු වෙලා එයාගේ පෙනීම නැති වෙනවා කියලා. එයාව අතින් අල්ලගෙන යන්න පුළුවන් කෙනෙක්ව හොයහොය එයා එහේ මෙහේ ඇවිද්දා.” g ඒ ආශ්චර්යය දැක්කාට පස්සේ “ආණ්ඩුකාරයාට ස්වාමීන් ගැන විශ්වාසයක් ඇති වුණා. යෙහෝවා ගැන ඉගෙනගත්ත දේවල් නිසා එයා පුදුම වුණා.”—ක්‍රියා 13:9-12.

8. පාවුල්ගේ නිර්භීතකම අපට ආදර්ශයට ගන්න පුළුවන් කොහොමද?

⁸ ඒ සිද්ධියෙන් අපි ඉගෙනගන්නේ මොනවාද? බාර්යේසුස්ගේ තර්ජන ගර්ජන මැද්දේ පාවුල් සැලුණේ නැහැ. ඒ වගේ අපිත් අපේ පණිවිඩයට හොඳ ප්‍රතිචාරයක් දක්වන අයගේ උනන්දුව නැති කරන්න හදන විරුද්ධවාදීන්ට බය වෙන්න ඕනෙ නැහැ. ඇත්ත, අපි “නිතරම කාරුණිකව” කතා කරන්න ඕනෙ වගේම අපේ “කතාව ලුණුවලින් රස කරපු කෑමක් වගේ වෙන්න ඕනේ.” (කොලො. 4:6) නමුත් උනන්දුව දක්වන කෙනෙක්ට විරුද්ධවාදීන්ගෙන් තර්ජන එල්ල වෙද්දී වාදයක් ඇති වෙයි කියන බයට අපේ විශ්වාසයන් ගැන අපි කතා නොකර ඉන්නේ නැහැ. බාර්යේසුස් කළා වගේ අද අසත්‍යය උගන්වන ආගම් “යෙහෝවාගේ සත්‍ය ඉගැන්වීම් විකෘති කරනවා.” ඒ බොරු ඉගැන්වීම් හෙළි කරන්න අපි බය වෙන්නේ නැහැ. (ක්‍රියා 13:10) පාවුල් වගේ අපිත් නිර්භීතව දෙවියන් ගැන සත්‍යය කියලා අවංක හදවත් ඇති අයව හොයන්න උත්සාහ දරමු. එදා වගේ අද දෙවියන් ආශ්චර්යයක් කරලා අපට උපකාර නොකළත් සුදුස්සන්ව සත්‍යයට ගේන්න ඔහුගේ බලය පාවිච්චි කරන බව අපිට නිසැකයි.—යොහ. 6:44.

9. සභාවේ පෙරමුණ ගන්න අයට පාවුල් හා බානබස් කදිම ආදර්ශයක් තිබ්බේ කොහොමද?

⁹ ක්‍රියා 13:13 කියන්නේ “පාවුල් සහ එයාත් එක්ක හිටිය දෙන්නා” පාෆස් ඉඳන් නැවකට ගොඩ වෙලා කිලෝමීටර් 250ක් දුරින් තියෙන කුඩා ආසියාවේ වෙරළබඩ තීරයේ තිබුණ පර්ගා කියන නගරයට ගිය බවයි. එතන විශේෂයෙන් පාවුල්ගේ නම සඳහන් කරලා තියෙන එකෙන් තේරෙන්නේ එතන ඉඳන් ඒ ගමනේදී පෙරමුණ ගත්තේ ඔහු බවයි. ඒ ගැන බානබස්ට ඊර්ෂ්‍යාවක් ඇති වුණා කියලා කියන්න කිසිම සාක්ෂියක් නැහැ. ඒ වෙනුවට දෙවියන්ගේ කැමැත්ත කරන්න ඔවුන් දෙන්නා සහයෝගයෙන් වැඩ කළා. අද සභාවේ පෙරමුණ අරන් වැඩ කරන සහෝදරයන්ට පාවුල් හා බානබස් මොන තරම් කදිම ආදර්ශයක්ද! “ඔයාලා හැමෝම සහෝදරයෝ” කියා යේසුස් කියපු දේ නිතරම මතකයේ තියාගන්න සැබෑ ක්‍රිස්තියානීන් උත්සාහ කරනවා. ඒ නිසා සහෝදරයන් එක්ක තරඟකාරී විදිහට වැඩ කරලා කැපිලා පේන්න ඔවුන් උත්සාහ කරන්නේ නැහැ. මොකද “උසස් වෙන්න උත්සාහ කරන කෙනාව පහත් කරයි. ඒත් නිහතමානීව වැඩ කරන කෙනාව උසස් කරයි” කියලත් යේසුස් කිව්වා.—මතෙ. 23:8, 12.

10. පර්ගා ඉඳන් පිසිදියේ අන්තියෝකියට යන ගමන විස්තර කරන්න.

¹⁰ ඔවුන් පර්ගා නගරයට ගියාම මාක් කියන වාසගම දරපු යොහන්, පාවුල්ව හා බානබස්ව අත්හැර නැවත යෙරුසලමට ගියා. ඔහු ඒ වගේ හදිසි තීරණයක් ගන්න හේතුව බයිබලයේ සඳහන් වන්නේ නැහැ. කොහොමවුණත් පාවුල් හා බානබස් ඔවුන්ගේ පැවරුම දිගටම කරගෙන ගියා. ඔවුන් පර්ගාවලින් පිටත් වෙලා පිසිදියේ තිබුණ අන්තියෝකියට ගමන් කළා. ඒක තිබුණේ ගලාතිය කියන පළාතේ. ඒ ගමන ලෙහෙසි පහසු ගමනක් වුණේ නැහැ. මොකද පිසිදියේ අන්තියෝකිය තිබුණේ මුහුදු මට්ටමේ සිට අඩි 3,600ක් විතර ඉහළිනුයි. ඔවුන්ට ගමන් කිරීමට සිදු වුණේ ඉතා දුෂ්කර පාරවල්වලයි. ඒ පාරවල්වල අවි ගත් සොරුන් රැක සිටි නිසා ඔවුන්ගේ ගමන තවත් අවදානම් වුණා. ඒ මදිවට පාවුල් අසනීප තත්වයන්ටත් මුහුණ දෙන්න ඇති. h

11, 12. සිනගෝගයේ රැස් වෙලා හිටපු අයගේ හදවතට කාවදින විදිහට පාවුල් කතා කළේ කොහොමද?

¹¹ සබත් දවසකදී පාවුල් හා බානබස් පිසිදියේ අන්තියෝකියේ තිබුණ සිනගෝගයකට ඇතුල් වුණා. ඊටපස්සේ වුණ දේ ගැන වාර්තාවේ කියන්නේ මෙහෙමයි. “නීතියෙන්  සහ අනාගතවක්තෘවරුන්ගේ ලියවිලිවලින් ප්‍රසිද්ධියේ කියෙව්වාට පස්සේ ඒ සිනගෝගයේ නායකයන් එයාලට මෙහෙම පණිවිඩයක් යැව්වා. ‘සහෝදරයෙනි, මෙතන ඉන්න අයව දිරිගන්වන්න ඔයාලට මොනවා හරි කියන්න තියෙනවා නම් දැන් ඔයාලට පුළුවන් කතා කරන්න.’” (ක්‍රියා 13:15) ඒ අවස්ථාව ප්‍රයෝජනයට අරන් පාවුල් එහේ හිටපු සියලුදෙනාවම ඇමතුවා.

¹² පාවුල් තම කතාව පටන්ගත්තේ මෙහෙමයි. “ඊශ්‍රායෙල් ජනයෙනි, . . . දෙවියන්ට ගරුබිය දක්වන අනිත් හැමෝමත් මං කියන දේ අහන්න.” (ක්‍රියා 13:16) එතන රැස්ව සිටි අය අතර යුදෙව්වන් හා යුදෙව් ආගමට හැරුණු අයත් හිටියා. දෙවියන්ගේ අරමුණ ඉටු කරද්දී යේසුස්ට තිබුණ අතිවැදගත් කාර්යය පිළි නොගත්ත මේ අයගේ හදවතට කාවදින විදිහට පාවුල් තම කතාව ඉදිරිපත් කළේ කොහොමද? මුලින්ම පාවුල් යුදෙව් ජාතියේ ඉතිහාසය ගැන කෙටියෙන් සඳහන් කළා. ඊශ්‍රායෙල්වරුන් “ඊජිප්තුවේ විදේශිකයන් විදිහට ජීවත් වුණ කාලේදී දෙවියන් එයාලව බලවත් කළා” කියලත් ඊජිප්තුවෙන් නිදහස් කළාට පස්සේ ‘අවුරුදු 40ක් තිස්සේ පාළුකරයේදී ඔහු එයාලා එක්ක හරිම ඉවසීමෙන් වැඩ කළා’ කියලත් පාවුල් පැහැදිලි කළා. ඊශ්‍රායෙල් සෙනඟ පොරොන්දු දේශය යටත් කරගත්තා කියලත් යෙහෝවා “ඒ ප්‍රදේශ ඔහුගේ සෙනඟට උරුමයක් විදිහට දුන්නා” කියලත් ඔහු ඔවුන්ට සිහිගැන්නුවා. (ක්‍රියා 13:17-19) ඒ අවස්ථාවේ පාවුල් සඳහන් කළේ එදා සිනගෝගයේ ප්‍රසිද්ධියේ කියවපු ලියවිල්ලේ කොටස් ගැන විය හැකියි කියා සමහරු කියනවා. ඔවුන් කියන දේ ඇත්තක් නම් පාවුල් ‘හැම පසුබිමකම ඉන්න අයට උදව් කරන්න පුළුවන් හැම දේම කළා’ කියන එකට ඒක කදිම සාක්ෂියක්.—1 කොරි. 9:22.

13. අපට හමු වන අයගේ හදවතට කාවදින විදිහට අපේ පණිවිඩය ඉදිරිපත් කරන්න පුළුවන් කොහොමද?

¹³ අපත් උත්සාහ කළ යුත්තේ අපට හමු වන අයගේ හදවතට කාවදින විදිහට අපේ පණිවිඩය කියන්නයි. උදාහරණයකට කෙනෙක්ගේ ආගමික පසුබිම මොකක්ද කියා වටහාගෙන ඒ පුද්ගලයා උනන්දුවක් දක්වන දේවල් පදනම් කරගෙන පණිවිඩය ගොඩනඟන්න අපට හැකියි. ඒ පුද්ගලයා බයිබලයේ සඳහන් යම් දේවල් දැනටමත් දන්නවා නම් ඒ කොටස් පාවිච්චි කරලා පණිවිඩය කියන්න පුළුවන්. ඔහුට බයිබලයක් තියෙනවා නම් ඔහුගේම බයිබලයෙන් ඔහුට කියවන්න දෙන එකෙන් අප කියන දේ විශ්වාස කරන්න ඔහු තුළ පෙලඹීමක් ඇති විය හැකියි. ඔබට සවන් දෙන අයගේ හදවතට කාවදින විදිහට පණිවිඩය ඉදිරිපත් කරන්න ඒ වගේ ක්‍රම ගැන හිතන්න.

14. (අ) යේසුස් ගැන කියන්න පාවුල් අඩිතාලම දැම්මේ කොහොමද? සවන් දුන්න අයට ඔහු දුන්න අනතුරු ඇඟවීම මොකක්ද? (ආ) රැස් වෙලා හිටපු අයගේ ප්‍රතිචාරය වුණේ මොකක්ද?

 ¹⁴ ඉතිහාසයේ වුණ ඒ සිදුවීම් ගැන කිව්වාට පස්සේ ‘ගැලවුම්කරු වන යේසුස්’ ඊශ්‍රායෙල්වල රාජකීය පෙළපතින් ආවා කියලත් පාවුල් කිව්වා. යේසුස් එන්න කලින් යොහන් බව්තීස්ත කරපු සේවය ගැනත් ඔහු සඳහන් කළා. යේසුස්ව මරණයට පත් කළ බවත් ඔහුව නැවත නැඟිටවපු බවත් කිව්වාට පස්සේ පාවුල් මේ ප්‍රබල කාරණය ඔවුන්ට කාවැද්දුවා. “ඉතින් සහෝදරයෙනි, අපි කියන මේ දේ හිතට ගන්න. ඒ කෙනා මාර්ගයෙන් තමයි ඔයාලාගේ පව්වලට සමාව ලබාගන්න පුළුවන් වෙන්නේ. . . . ඒ කෙනා නිසා, විශ්වාසයක් ඇති කරගන්න හැමෝවම දෙවියන් නිදොස් අය විදිහට පිළිගන්නවා.” ඊටපස්සේ ඔහු සවන් දෙමින් සිටි අයට අනතුරු අඟවමින් මෙහෙම කිව්වා. “ඒ නිසා අනාගතවක්තෘවරුන්ගේ පොතේ කියලා තියෙන මේ දේ ඔයාලට වෙන්න දෙන්න එපා. ‘අනුන්ට නින්දා කරන්නෙනි, කට ඇරන් පුදුමෙන් බලන් ඉන්න. මොකද ඔයාලා ජීවත් වෙලා ඉන්න කාලේදීම ඔයාලා හිතන්නෙවත් නැති දෙයක් මම කරනවා. ඔයාලට ඒ ගැන විස්තර ඇතුව කිව්වත් ඔයාලා ඒ ගැන විශ්වාස කරන්නේ නැහැ. අන්තිමට ඔයාලා මිය යනවා.’” පාවුල් ඉදිරිපත් කළ කතාව ඔවුන්ගේ හදවතට මොන තරම් හොඳින් කාවැදුණාද කියනවා නම් “ඊළඟ සබත් දවසේදීත් ඇවිල්ලා එයාලට කියලා දෙන්න” කියලා එහේ හිටපු අය ඔවුන්ගෙන් ඉල්ලුවා. ඒ වගේම සිනගෝගයෙන් පිටත් වුණාට පස්සේ “යුදෙව්වන් සහ යුදෙව් ආගමට හැරිලා දෙවියන්ට නමස්කාර කරපු හුඟදෙනෙක් පාවුල් සහ බානබස් පිටිපස්සේ ගියා” කියලත් වාර්තාවේ සඳහන් වෙනවා.—ක්‍රියා 13:20-43.

15. ඊළඟ සබත් දවසේදී වුණේ මොකක්ද?

¹⁵ ඊළඟ සබත් දවසේදී “නගරේ ඉන්න හැමෝම වගේ” පාවුල්ට සවන් දෙන්න රැස් වුණා. සමහර යුදෙව්වන් නම් ඒ ගැන ඒ තරම් සතුටු වුණේ නැහැ. ඒ නිසා ඔවුන් “හුඟක් අපහාසාත්මක විදිහට පාවුල් කියපු හැම දේකටම විරුද්ධව තර්ක කළා.” නමුත් පාවුල් හා බානබස් නිර්භීතව ඔවුන්ට මෙහෙම කිව්වා. “දෙවියන්ගේ පණිවිඩය මුලින්ම කියන්න කිව්වේ ඔයාලටයි. ඒත් ඔයාලා ඒ පණිවිඩය ප්‍රතික්ෂේප කරනවා. ඔයාලම තීරණය කරලා තියෙනවා ඔයාලා සදාකාල ජීවනය ලබාගන්න සුදුසු අය නෙමෙයි කියලා. ඒ නිසා අපි දැන් වෙනත් ජාතීන් ළඟට පණිවිඩය අරන් යනවා. මොකද යෙහෝවා අපිට මෙහෙම අණ කරලා තියෙනවා. ‘මම ඔයාලව ජාතීන්ට ආලෝකයක් විදිහට පත් කරනවා. එහෙම කරන්නේ පොළොවේ ඈත කෙළවරවල ඉන්න අයටත් ඔයාලා මාර්ගයෙන් ගැලවීම ලබාගන්න පුළුවන් වෙන්නයි.’”—ක්‍රියා 13:44-47; යෙසා. 49:6.

16. පාවුල් හා බානබස් නිර්භීතව කියපු දේට සමහර යුදෙව්වන්ගේ ප්‍රතිචාරය වුණේ මොකක්ද? විරුද්ධවාදිකම් ආවත් ඒ දෙන්නා කළේ මොනවාද?

¹⁶ පාවුල්ට සවන් දුන්න වෙනත් ජාතීන් අහන්න ලැබුණු දේවල් ගැන සතුටු වුණා. “සදාකාල ජීවනය ලබා දෙන සත්‍යය පිළිගන්න කැමැත්තෙන් හිටපු හැමෝම යේසුස්ගේ අනුගාමිකයන් වුණා.” (ක්‍රියා 13:48) යෙහෝවා දෙවියන්ගේ පණිවිඩය ඒ ප්‍රදේශය පුරාම පැතිර ගියා. නමුත් එහේ හිටපු සමහර යුදෙව්වන්ගේ ප්‍රතිචාරය වෙනත් ජාතීන් දක්වපු ප්‍රතිචාරයට වඩා හාත්පසින්ම වෙනස්. පාවුල් හා බානබස් ඔවුන්ට  නිර්භීතව කිව්වේ දෙවියන්ගේ පණිවිඩය මුලින්ම ඔවුන්ට ප්‍රකාශ කළත් ඔවුන් ක්‍රිස්තුස්ව ප්‍රතික්ෂේප කළ නිසා ඔවුන්ට දෙවියන්ගෙන් විනිශ්චයක් ලැබෙන බවයි. ඒ නිසා යුදෙව්වන් නගරයේ හිටිය ඉහළ පෙළේ ස්ත්‍රීන්ව හා නගරයේ ප්‍රධානීන්ව පාවුල්ට සහ බානබස්ට විරුද්ධව උසිගන්වලා “ඒ දෙන්නාට පීඩා කරලා එයාලව එයාලාගේ ප්‍රදේශයෙන් පන්නලා දැම්මා.” ඒ අවස්ථාවේදී පාවුල් හා බානබස් කළේ මොකක්ද? වාර්තාවේ කියන්නේ “ඒ දෙන්නා එයාලාගේ කකුල්වල තියෙන දූවිලි ගසලා දාලා ඉකෝනියට ගියා” කියලයි. පිසිදියේ අන්තියෝකියේ තිබුණ සභාව ඒකෙන් පස්සේ දුර්වල වුණාද? නැහැ. එහේ හිටිය “ගෝලයෝ දිගටම සතුටින් හිටියා. එයාලට දෙවියන්ගේ බලයත් කිසිම අඩුවක් නැතුව ලැබුණා” කියලා වාර්තාවේ සඳහන් වෙනවා.—ක්‍රියා 13:50-52.

17-19. පාවුල් හා බානබස්ව අපට ආදර්ශයට ගන්න පුළුවන් කොහොමද? ඒක අපේ ප්‍රීතියට දායක වන්නේ කොහොමද?

¹⁷ විරුද්ධවාදිකම් ආවත් මේ විශ්වාසවන්ත සේවකයන් දෙන්නා වැඩ කරපු විදිහෙන් අපට මොන තරම් දේවල් ඉගෙනගන්න පුළුවන්ද! සමාජයේ ඉහළ පෙළේ අය අපේ සේවය නවත්තන්න කොච්චර උත්සාහ කළත් අප කොහොමටවත් අපේ සේවය නතර කරන්නේ නැහැ. අන්තියෝකියේ වැසියන් පණිවිඩය ප්‍රතික්ෂේප කළාම පාවුල් හා බානබස් “එයාලාගේ කකුල්වල තියෙන දූවිලි ගසලා” එතනින් ගියේ ඔවුන් එක්ක කේන්තියෙන් නෙවෙයි. නමුත් එහෙම කරපු එකෙන් ඔවුන් පෙන්නුවේ එහේ වැසියන්ගේ ජීවිතවලට තමන් වග කිව යුතු නැති බවයි. පණිවිඩය පිළිගන්නවාද නැද්ද කියන එක තීරණය කරන්න සවන් දෙන තැනැත්තාට අයිතියක් තියෙන නිසා ඒකට බලපෑම් කරන්න තමන්ට නොහැකි බව ඔවුන් තේරුම් අරන් හිටියා. අනිත් අයගේ බලපෑම් නිසා තමන් කරන සේවය නතර කරන්න අවශ්‍ය නැති බවත් ඔවුන් දැනන් හිටියා. ඔවුන් එතනින් ඉකෝනියට ගිහින් දිගටම දේශනා කරගෙන ගියේ ඒ නිසයි.

¹⁸ ඒ වෙද්දීත් අන්තියෝකියේ යේසුස්ගේ අනුගාමිකයන් වෙලා හිටපු අය ගැන කියන්න පුළුවන් මොනවාද? ඔවුන් සේවය කළේ දැඩි විරුද්ධවාදිකම් තිබුණ ප්‍රදේශයක. නමුත් ඔවුන්ගේ ප්‍රීතිය රඳා පැවතුණේ ශුභාරංචියට මිනිසුන් දක්වපු ප්‍රතිචාරය මත නෙවෙයි. යේසුස් කිව්වෙත් “ඇත්තටම සතුටින් ඉන්නේ දෙවියන් කියන දේ අහලා ඒක පිළිපදින අය” කියායි. (ලූක් 11:28) පිසිදියේ අන්තියෝකියේ සිටි යේසුස්ගේ අනුගාමිකයන් දෙවියන් කියපු දේවල් පිළිපැදලා ඒ ප්‍රීතිය අද්දැක්කා.

¹⁹ ශුභාරංචිය දේශනා කරන එක අපේ වගකීම බව පාවුල් හා බානබස් වගේ අපිත් නිතරම මතකයේ තියාගමු. පණිවිඩය පිළිගන්නවාද නැද්ද කියන දේ සවන් දෙන පුද්ගලයාට භාරයි. අපට හොඳ ප්‍රතිචාරයක් නොලැබෙන අවස්ථාවලදී පළවෙනි සියවසේ සිටි ගෝලයන් කරපු දේ මතක් කරගන්න එක ප්‍රයෝජනවත්. දෙවියන් ගැන සත්‍යය දැනගන්න අපට ලැබී තිබෙන අවස්ථාව අප අගය කරනවා නම්, දෙවියන්ගේ බලයේ මඟ පෙන්වීම්වලට අප යටත් වෙනවා නම් විරුද්ධවාදිකම් ආවත් අපට දිගටම ප්‍රීතියෙන් ඉන්න පුළුවන්.—ගලා. 5:18, 22.