2වන පාඩම
ඒදන් උයනෙන් පිටමං කරයි
දෙවිගේ පාලනය ප්‍රතික්ෂේප කිරීමට කැරලිකරුවෙක් ආදම් සහ ඒවට බලපෑම් කරයි. ඒ නිසා මිනිස් වර්ගයාට පව්කාර ස්වභාවය හා මරණය උරුම වෙයි
මිනිසාව නිර්මාණය කිරීමට බොහෝ කාලයකට පෙර ස්වර්ගයේ ජීවත් වීම සඳහා දෙවි මිනිසුන්ට නොපෙනෙන ජීවීන් එනම්, දේවදූතයන්ව නිර්මාණය කළා. ඔවුන් අතරින් එක් දේවදූතයෙක් දෙවිට විරුද්ධව කැරලිගැසුවා. ඔහුව සාතන් නමැති යක්ෂයා ලෙස හැඳින්වූයේ ඒ නිසයි. ඔහුගේ අරමුණ වුණේ දෙවි නොකන්න කියා අණ කර තිබූ ගසේ පල කෑමට ඒවව පෙලඹවීමයි.
සාතන් ඒ සඳහා ඒව සමඟ කතා කිරීමට සර්පයෙකුව යොදාගත්තා. සර්පයා මාර්ගයෙන් ඔහු ඒවට පැවසුවේ දෙවි නොකන්න කියා අණ කර තිබූ ගසේ පල කෑවොත් ඔවුන් මිය නොයන බවයි. එසේ පැවසීමෙන් දෙවි බොරුකාරයෙකු බවට ඔහු චෝදනා කළා. එමෙන්ම දෙවිට අකීකරුව ක්‍රියා කළොත් දෙවි හා සමාන දැනුමක් හා නිදහසක් ඔවුන්ට ලබාගත හැකි බව ඔහු පැවසුවා. එසේ පැවසීමෙන් ඔහු ඇඟෙව්වේ යම් වටිනා දෙයක් දෙවි ආදම් සහ ඒවට ලබා නොදෙන බවයි. නමුත් සාතන් පැවසූ ඒ සියල්ල බොරු. පොළොවෙහි මුලින්ම පැවසූ බොරුව එයයි. සාතන් ඒවට පැවසූ ඒ සියල්ලෙන් ඉතා බැරෑරුම් කාරණයක් ඉස්මතු වුණා. එය දෙවිගේ පාලනය හා සම්බන්ධයි. එනම් මිනිසුන්ව පාලනය කිරීමට දෙවිට අයිතියක් තිබෙනවාද යන්න හා දෙවි මිනිසුන්ව පාලනය කරන්නේ ඔවුන්ට යහපතක් වන අයුරින්ද යන්නයි.
සාතන් පැවසූ බොරුව විශ්වාස කළ ඒවට ඒ ගසේ පල කන්න ආශාවක් ඇති වුණා. ඇය එහි පල කෑ පසු ඇගේ පුරුෂයාටත් එය දුන්නා. ඔහුත් එහි පල කෑවා. ඔවුන් කළ ඒ ක්‍රියාව ඇත්තෙන්ම කැරලිගැසීමක්. කිසිම අඩුවක් නැති ජීවිතයක් ඇතුළු ඔවුන්ට අවශ්‍ය සෑම දෙයක්ම ලබා දුන් දෙවිව ඔවුන් ප්‍රතික්ෂේප කළා. දෙවි දුන් ආඥාවක් හිතාමතා කඩ කිරීමෙන් ආදම් සහ ඒව පෙන්නුම් කළේ දෙවිගේ පාලනය ඔවුන්ට අවශ්‍ය නැති බවයි. එසේ ඔවුන් දෙදෙනාම පව්කාරයන් බවට පත් වුණා.
විශේෂ තැනැත්තා, “ඔබේ හිස පොඩි කරන්නේය. ඔබ ඔහුගේ විලුඹ පොඩි කරන්නෙහිය.”—උත්පත්ති 3:15
දෙවි ආදම් සහ ඒව කළ ඒ වරදට මරණ දඬුවම නියම කළා. නමුත් ඔවුන්ගෙන් පැවතෙන්නන්ට දයාව පෙන්වීමට දෙවි තීරණය කළ නිසා දෙවි ඒ මොහොතේදීම එම දඬුවම ක්‍රියාත්මක කළේ නැහැ. සර්පයාව යොදාගෙන කතා කළ සාතන්ව විනාශ කර දැමීමට පැමිණෙන විශේෂ තැනැත්තෙකු ගැන ඒ අවස්ථාවේදී දෙවි පැවසුවා. ඒ විශේෂ තැනැත්තා මාර්ගයෙන් ඒදන් උයනේ සිදු වූ කැරැල්ලේ සියලු අහිතකර ප්‍රතිඵල නැති කර දමන බවත් දෙවි පවසා සිටියා. ඒ නිසා ආදම්ගෙන් පැවතෙන්නන්ට අනාගතය ගැන බලාපොරොත්තුවක් තිබුණා. ගැලවීම ලබා දෙන ඒ විශේෂ තැනැත්තා කවුද කියාත් ඔහු මාර්ගයෙන් දෙවි අරමුණු කළ දේ ඉටු වන්නේ කෙසේද කියාත් දෙවි බයිබලය තුළින් ක්‍රමානුකූලව එළිදරව් කළා.
ආදම් සහ ඒව කැරලිගැසූ අවස්ථාවේදීම දෙවි ඔවුන්ව ඒදන් උයනෙන් පිටමං කළා. එතැන් සිට ඔවුන්ට වෙහෙස මහන්සි වී වැඩ කරමින් ඉතා කටුක ජීවිතයක් ගත කරන්න සිදු වුණා. කලක් ගත වූ පසු ඒව පුතෙකු බිහි කළා. ඔහුගේ නම කායින්. පසුව ඇයට ආබෙල් සහ නෝවාගේ මුතුන්මිත්තෙකු වන සෙත් ඇතුළු තවත් දරුදැරියන් බොහෝදෙනෙක් සිටියා.
