යේසුස් මිය ගොස් තුන්වෙනි දවසේ ඔහුගේ ගෝලයන් වූ ස්ත්‍රීන් කිහිපදෙනෙක් ඔහුව තැන්පත් කර තිබූ සොහොන් ගෙය ළඟට ගියා. එවිට සොහොන් ගෙය වසා තිබූ විශාල ගල අහකට පෙරළා ඇති බවත් සොහොන් ගෙය හිස්ව තිබෙන බවත් ඔවුන් දුටුවා.

දේවදූතයන් දෙදෙනෙක් ඒ අවස්ථාවේදී ඔවුන් ඉදිරියේ පෙනී සිටි අතර එක් දේවදූතයෙක් ඔවුන්ට මෙසේ පැවසුවා. “ඔබ සොයන්නේ . . . නාසරෙත් නුවරේ යේසුස්ව කියා මම දන්නවා. ඔහුව මරණයෙන් නැඟිටුවා තිබෙනවා.” (මාක් 16:6) ස්ත්‍රීන් එය අසා ඒ ගැන මුල් ගෝලයන්ට දැනුම් දීමට ඉක්මනින්ම එතැනින් පිටත්ව ගියා. ඔවුන් යන අතරමඟදී නැවත නැඟිටුවනු ලැබූ යේසුස් ඔවුන් ඉදිරියේ පෙනී, “බිය නොවන්න! ගොස් මගේ සහෝදරයන්ට මේ ගැන දන්වන්න. එවිට ඔවුන් ගලීලයට යයි. එහිදී මාව දකින්න ඔවුන්ට අවස්ථාවක් ලැබෙයි” කියා පැවසුවා.—මතෙව් 28:10.

එදිනම වෙනත් අවස්ථාවක යේසුස්ගේ ගෝලයෝ දෙදෙනෙක් යෙරුසලමේ සිට එම්මාවුස් නම් ගම්මානයට යමින් සිටියදී ඒ ගමනට අමුත්තෙක් එක් වුණා. ඔවුන් සමඟ එක් වූ ඒ අමුත්තා වූයේ නැවත නැඟිටුවනු ලැබූ යේසුස්. නමුත් ඔහුව හඳුනාගැනීමට ඔවුන්ට හැකි වුණේ නැහැ. ඒ අමුත්තා ගෝලයන් දෙදෙනාගෙන් ඔවුන් කතා කරමින් සිටින දේ ගැන විමසුවා. ඉතා කනස්සල්ලෙන් සිටි ඔවුන්, කතා කරමින් සිටියේ යේසුස් ගැන බව ඔහුට පැවසුවා. එවිට ඒ අමුත්තා ක්‍රිස්තුස් ගැන ශුද්ධ ලියවිල්ලේ තිබෙන තොරතුරු සියල්ලක්ම ඔවුන්ට තේරුම් කර දුන්නා. ක්‍රිස්තුස් ගැන කලින් පවසා තිබූ සෑම දෙයක්ම යේසුස් තුළින් ඒ අයුරින්ම ඉටු වුණා. a ඔවුන් සමඟ ගමන් කළ ඒ අමුත්තා යේසුස් බව ඔවුන් හඳුනාගත් මොහොතේම යේසුස් අතුරුදහන් වුණා.

යේසුස්ව හඳුනාගත් ඔවුන් දෙදෙනා නැවත යෙරුසලමට හැරී ගොස් දොරවල්වල අගුල් දමාගෙන ඉතා භයෙන් සිටි යේසුස්ගේ මුල් ගෝලයන්ව හමු වුණා. ඔවුන් දෙදෙනා මුල් ගෝලයන්ට නැවත නැඟිටුවනු ලැබූ යේසුස් ඔවුන් ඉදිරියේ පෙනී සිටි ආකාරය විස්තර කළා. ඒ අවස්ථාවේදී යේසුස් ඔවුන් සියලුදෙනා ඉදිරියේ පෙනී සිටියා. එය අදහාගත නොහැකිව ඔවුන් බලා සිටි නිසා යේසුස්, ‘ඔබ සැකයෙන් මා දෙස බලන්නේ ඇයි’ කියා ඔවුන්ගෙන් ඇසුවා. ඔහු තවදුරටත් ඔවුන්ට මෙසේ පැවසුවා. “ශුද්ධ ලියවිල්ලේ ලියා තිබුණු ආකාරයට ක්‍රිස්තුස් දුක් විඳ මිය ගියත් තුන්වෙනි දවසේදී මරණයෙන් නැඟිටිය යුතුයි.”—ලූක් 24:38, 46.

නැවත නැඟිටීමෙන් පසු දවස් 40ක් පුරා විවිධ අවස්ථාවලදී යේසුස් තම ගෝලයන් ඉදිරියේ පෙනී සිටි අතර එක් අවස්ථාවකදී 500දෙනෙක් ඉදිරියේ පෙනී සිටියා. සමහරවිට මෙම වැදගත් පැවරුම ඔහු තම ගෝලයන්ට භාර දුන්නේ එම අවස්ථාවේදී විය හැකියි. “ගොස් සෑම ජාතියකටම අයත් මිනිසුන්ට මගේ ගෝලයන් වෙන්න උපකාර කරන්න. . . . මා ඔබට අණ කළ සෑම දෙයක්ම පිළිපදින්න ඔවුන්ට උගන්වන්න. මෙයද මතක තබාගන්න. මම මෙතැන් පටන් පවතින සමාජයේ අවසාන කාල පරිච්ඡේදය නිමා වන තුරුම ඔබ සමඟ සැමදා සිටිනවා.”—මතෙව් 28:19, 20.

යේසුස් තම විශ්වාසවන්ත ගෝලයන් 11දෙනා ඉදිරියේ පෙනී සිටි අවසාන අවස්ථාවේදී ඔවුන්ට මෙවැනි පොරොන්දුවක් දුන්නා. “ඔබට දෙවිගේ බලය ලැබුණු විට ඔබ ශක්තිමත් වෙයි. ප්‍රතිඵලයක් ලෙස ඔබ . . . පොළොවේ දුර ඈත කෙළවරවලද මා ගැන සාක්ෂි දරයි.” (ක්‍රියා 1:8) ඉන් අනතුරුව යේසුස්ව ඉහළට ඔසවාගත් අතර වලාකුළකින් වැසී ගිය නිසා ගෝලයන්ට ඔහුව තවදුරටත් දැකගැනීමට හැකි වුණේ නැහැ.

—මතෙව් 28වෙනි පරිච්ඡේදය; මාක් 16වෙනි පරිච්ඡේදය; ලූක් 24වෙනි පරිච්ඡේදය; යොහන් 20 හා 21 පරිච්ඡේද; 1 කොරින්ති 15:5, 6.