පොළොවේ මිනිසුන්ගේ ගණන වැඩි වෙන්න වැඩි වෙන්න, ඒගොල්ලන්ගෙන් ගොඩක්දෙනෙක්, කායින් වගේ නරක දේවල් කරන්න පටන්ගත්තා. ඒ වුණාට එක මිනිසෙක් අනික් අයට වඩා වෙනස්. එයාගේ නම ඒනොක්. ඒනොක් නිර්භීත මිනිසෙක්. නරක දේවල් කරන මිනිස්සුන්ගෙන් ඒනොක් වට වෙලා හිටියත් එයා දිගටම දෙවිට සේවය කළා.

ඒ කාලයේ හිටපු මිනිස්සු මෙච්චර නරක වැඩ කෙරුවේ ඇයි කියලා ඔයා දන්නවාද? ටිකක් හිතන්න. දෙවිට අකීකරු වෙලා දෙවි කන්න එපා කියපු ගෙඩිය කන්න කියලා ආදම් හා ඒවට කිව්වේ කව්ද? ඔව්, ඒ නරක දේවදූතයෙක්. බයිබලයේ එයාට කියන්නේ සාතන් කියලයි. එයා හැමෝවම නරක් කරන්නයි හදන්නේ.

දවසක්, යෙහෝවා දෙවි ඒනොක්ට කිව්වා, ඒ මිනිස්සු අහන්න අකමැති දෙයක් ඒ අයට කියන්න කියලා. ඒ තමයි ‘දෙවි කවදාහරි නරක මිනිස්සු හැමෝවම විනාශ කරන්න යනවා’ කියන එක. මේක අහපු මිනිස්සුන්ට ගොඩක් තරහ යන්න ඇති. ඒනොක්ව මරන්නත් හදන්න ඇති. ඒ නිසා, දෙවි කරන්න යන දේ ගැන මිනිස්සුන්ට කියන්න, ඒනොක්ට හුඟක් නිර්භීතකම අවශ්‍ය වුණා.

ඒ නරක මිනිස්සු එක්ක වැඩි කාලයක් ජීවත් වෙන්න, දෙවි ඒනොක්ට ඉඩ දුන්නේ නැහැ. ඒනොක් ජීවත් වුණේ අවුරුදු තුන්සිය හැටපහක් විතරයි. “අවුරුදු තුන්සිය හැටපහක් විතරයි!” ඒ කාලයේ ජීවත් වුණ මිනිස්සු අද ඉන්න මිනිස්සුන්ට වඩා ශක්තිමත් නිසා, ඒගොල්ලන් හුඟ කාලයක් ජීවත් වුණා. ඒනොක්ගේ පුතා මෙතුසෙලා අවුරුදු නවසිය හැටනවයක් ජීවත් වුණා!

ඒනොක් මැරුණාට පස්සේ, මිනිස්සු තවත් නරක අතට හැරුණා. ‘ඒගොල්ලන් හිතපු හැම දේම නරකයි’ කියලත්, ‘කලබලවලින් පොළොව පිරුණා’ කියලත් බයිබලයේ කියනවා.

ඒ කාලයේ පොළොවේ මෙච්චර කරදර තියෙන්න එක හේතුවක් ඔයා දන්නවාද? මිනිස්සුන්ව නරක පැත්තට හරවන්න, සාතන්ට අලුත් ක්‍රමයක් තිබුණ නිසයි. අපි ඊළඟට, මේ ගැන ඉගෙනගමු.