2005දී ශාඛා කාර්යාලය බෙතෙල් සාමාජිකයෙක් වන සහෝදර ටිං වා එන්ව චීන භාෂාව කතා කරන අයට සාක්ෂි දරන්න විශේෂ පුරෝගාමියෙක් හැටියට පත් කළා. ඔහුගේ දෙමව්පියන් චීනයේ ඉඳන් සැන්ටො ඩොමින්ගෝවලට පදිංචියට ආපු නිසා ඔහු ඉපදුණේ, හැදුණේ වැඩුණේ මේ රටෙයි.

2008 ජනවාරි 1වෙනිදා සැන්ටො ඩොමින්ගෝවල පළවෙනි චීන භාෂා සභාව ආරම්භ කළා. 2011 වෙද්දී සන්තියාගෝවලත් චීන කණ්ඩායමක් පටන්ගත්තා. දැන් චීන භාෂාව කතා කරන ප්‍රචාරකයන් 70ක් ඉන්නවා. ඒ අතරට ස්ථාවර පුරෝගාමීන් 36ක් සහ සහායක පුරෝගාමීන් කිහිපදෙනෙකුත් ඇතුළත්. ඔවුන් මාසයකට බයිබල් පාඩම් 76ක් විතර පවත්වනවා.

2007 වෙද්දී ඩොමිනිකන් ජනරජයේ සභා 376ක ප්‍රචාරකයන් 27,466ක් හිටියා. ඔවුන් බයිබල් පාඩම් 49,795ක් පැවැත්තුවා. ඉංග්‍රීසි භාෂාව කතා කරන ගොඩක් අය හිටියත් ඒ භාෂාවෙන් රැස්වීම් තිබුණේ නැහැ. ඒ නිසා 2008 අප්‍රියෙල් මාසයේදී ශාඛා කාර්යාලයෙන් ඩොනල්ඩ් සහ ජේන් එල්වෙල් යන මිෂනාරි යුවළව ඉංග්‍රීසි භාෂාව කතා කරන සභාවක් ආරම්භ කරන්න සැන්ටො ඩොමින්ගෝවට යැව්වා. ඔවුන් තවත් කීපදෙනෙක් එක්ක එකතු වෙලා ඉංග්‍රීසි භාෂාව කතා කරන හැමෝවම හොයාගන්න සැලැස්මකට අනුව සේවය කළා.

ඒ අයගේ උත්සාහය නිසා සැන්ටො ඩොමින්ගෝවල තිබුණු කණ්ඩායමේ ගණන එන්න එන්නම වැඩි වුණා. 2009 ජූලි මාසය වෙද්දී ඒ කණ්ඩායම ප්‍රචාරකයන් 39දෙනෙක්ගෙන් යුත් සභාවක් බවට පත් වුණා. වෙනත් ප්‍රදේශවල ඉන්න ඉංග්‍රිසි භාෂාව කතා කරන අයව හොයාගන්නත් ඔවුන් ඒ විදිහටම කටයුතු කළ නිසා 2011 නොවැම්බර් මාසය වෙද්දී සභා 7ක් සහ එක කණ්ඩායමක් ඇති වුණා.

ලොරිස් හැදුණේ වැඩුණේ අනාථ දරුවෙක් විදිහට. ඇය උපතින්ම කන් ඇහෙන්නේ නැති කෙනෙක්. අවුරුදු 16 වෙද්දී පෙනීමත් ටිකෙන් ටික දුර්වල වෙන්න පටන්ගත්තා. දවල් වරුවේ ටිකක් පෙනුණත් අඳුර වැටුණාට පස්සේ නම් ලොරිස්ට කොහොමටවත් පේන්නේ නැහැ. ඒ වගේ වෙලාවට ඇය අදහස් හුවමාරු කරන්නේ අන්ධ අය අතින් අල්ලලා කරන සංඥා භාෂාවෙන්.

විශේෂ පුරෝගාමි යුවළකට ලොරිස්ව මුණගැහෙද්දී ඇයට අවුරුදු 23යි. ඇය ජීවත් වුණේ ඇගේ පුරුෂයායි දුවයි එක්ක. ඇගේ පුරුෂයාත් කන් ඇහෙන්නේ නැති කෙනෙක්. ඒත් දුවට නම් එහෙම ගැටලුවක් තිබුණේ නැහැ. දවසක් රැස්වීමකට  ගිය ලොරිස්ට එහිදී ඉගෙනගත්ත දේවල් ගැන ලොකු ආසාවක් ඇති වුණා.

වැඩි කාලයක් යන්න කලින් ලොරිස් ඇගේ ජීවිතයේ ලොකු වෙනස්කම් කළා. නීත්‍යානුකූලව විවාහ නොවී එකට ජීවත් වෙන එක වැරදියි කියලා ඇය ඉගෙනගත්තා. ඒ නිසා ඇය පුරුෂයාට කිව්වා බයිබලයේ තියෙන ප්‍රතිපත්තිවලට විරුද්ධ වෙන කිසිම දෙයක් කරන්න තමන් අකමැති නිසා විවාහය ලියාපදිංචි කරමු කියලා. ඇගේ පුරුෂයාත් ඒකට කැමති වුණා.

 නීත්‍යානුකූලව විවාහ වුණාට පස්සේ ප්‍රචාරකයෙක් වුණු ලොරිස් ටික කාලයකින් බව්තීස්ම වුණා. දිගටම බයිබලය ඉගෙනගත්ත නිසා ඇයට ඇමරිකානු සංඥා භාෂාව ඉගෙනගන්නත් පුළුවන් වුණා. දැන් ඇගේ දුවටත් සංඥා භාෂාව උගන්වන ඇය බයිබල් සත්‍යයන්ද දුවට කියලා දෙනවා.

ඩොමිනිකන් ජනරජයේ හා හයිටිවල ඉන්න අයට 2010 ජනවාරි 12වෙනිදා අමතක නොවන දවසක්. හයිටි රටේ දරුණු භූමිකම්පාවක් ඇති වුණේ එදායි. ඒ නිසා හයිටි ශාඛා කාර්යාලයට මුදල් යවන්න කියලා ඩොමිනිකන් ජනරජයේ ශාඛා කාර්යාලයට පාලක මණ්ඩලයෙන් දැනුම් දුන්නා. විශාල මුදල් ප්‍රමාණයක් ගෙනියන්න තිබුණු නිසා ඔවුන් ඒකට තෝරගත්තේ අඩි 6.3ක් උස හැඩිදැඩි සහෝදරයෙක් වන ඉවාන් බාටිස්ටාවයි. ඔහු බෙතෙල් එකේ සේවය කරන වෛද්‍යවරයෙක්.

 ඔහු ඒ ගමන ගිය එක වඩාත් හොඳ දෙයක් වුණා. මොකද හයිටිවලට ළඟා වෙද්දීම ඔහුට දැනගන්න ලැබුණා එහේ ඉන්න අයට වෛද්‍ය උපකාර ගොඩක් අවශ්‍යයි කියලා. දරුණු ලෙස තුවාල වෙලා හිටිය අයව හයිටි ශාඛා කාර්යාලයට යාබදව තියෙන සමුළු ශාලාවට ගෙනල්ලා තිබුණා. මුදල් අරගෙන ආපු සහෝදරයා වෛද්‍යවරයෙක් කියලා හයිටි ශාඛා කාර්යාලයෙන් දැනගත්තාම ඔහුව ටික දවසකට නවත්වගන්න ඔවුන් ඩොමිනිකන් ජනරජයේ ශාඛා කාර්යාලයෙන් අවසර ඉල්ලගත්තා. ඒ නිසා හයිටි රටේ ඉන්න සහෝදරයන්ට අවශ්‍ය ප්‍රතිකාර ලබා දෙන්න සහෝදර බාටිස්ටාට පුළුවන් වුණා.

ඩොමිනිකන් ජනරජයේ ශාඛා කාර්යාලයෙන් දවස් දෙකක් ඇතුළත ඒ කියන්නේ ජනවාරි 14වෙනිදා පාන්දර 2.30 වෙද්දී හාල් සහ බෝංචි ඇට කිලෝ 6,800කට වඩා වැඩි ප්‍රමාණයකුත් වෙනත් ආහාර පානත් හයිටි රටට යැව්වා. බොහෝදුරට ඒ රටට ලැබුණු මුල්ම සහනාධාර තොගය ඒක වෙන්න ඇති. එදාම ඩොමිනිකන් ජනරජයෙන් තවත් වෛද්‍යවරුන් තුන්දෙනෙක් හයිටිවලට ගියා. ඔවුන්ට ඒ ගමන සඳහා පැය 7ක් ගත වුණා. ඔවුන් හයිටි ශාඛා කාර්යාලයට යනකොට රෑ බෝ වෙලා තිබුණත් ඔවුන් නවාතැන්වලට යනවා වෙනුවට කෙළින්ම ගියේ විපතට පත් වුණු සහෝදරයන්ට වෛද්‍ය උපකාර සපයන්නයි. ඔවුන් මැදියම් රෑ වෙනකම්ම වෙහෙස නොබලා වැඩ කළා. ඊළඟ දවසේ තවත් වෛද්‍යවරුන් 4දෙනෙක් සහ හෙදියන් 4දෙනෙක් ඩොමිනිකන් ජනරජයෙන් හයිටිවලට ගියා. සමහර අයට සැත්කම් කරන්න සිදු වුණු නිසා ඔවුන් ඒවා කළේ සමුළු ශාලාවේ තාවකාලිකව හදපු ශල්‍යාගාරයකයි. ඊළඟ සතියේදී මේ 12දෙනා 300කට වඩා වැඩිදෙනෙකුට වෛද්‍ය උපකාර ලබා දී තිබුණා.

හැම දවසකම ප්‍රතිකාර සඳහා අසාධ්‍ය රෝගීන්ව ඩොමිනිකන් ජනරජයට ගෙනා අතර සමහර අවස්ථාවලදී හයිටි රටට සහනාධාර ගෙනිච්ච වාහනත් ගිය සැණින්ම  නැවත ආවේ රෝගීන්ව අරගෙනයි. ඔවුන්ව ඩොමිනිකන් ජනරජයේ රෝහල්වලට ඇතුල් කළා විතරක් නෙමෙයි ශාඛා කාර්යාලයෙන් ඔවුන්ට අවශ්‍ය බේත් හේත් හා දිරිගැන්වීම් ලබා දෙන්නත් සහෝදරයන්ව පත් කළා. රෝගීන් එක්ක ආපු පවුලේ අයටත් ඒ අවට සභාවල ඉන්න සහෝදර සහෝදරියන් ආහාර පාන හා නවාතැන් ලබා දුන්නා.

බයිබලයේ හිතෝපදේශ 17:17 සඳහන් වෙන “සැබෑ මිතුරෙකු සෑම වෙලේම ප්‍රේමණීයයි. ඔහු විපතකදී උපකාර කරන්න ඉපදුණු සහෝදරයෙකි” කියන වචනවල සත්‍යතාව විපතට පත් වුණු හයිටි සහෝදරයන් අද්දැක්කා. ඔවුන්ට මාස ගණනාවක් යන කල් අවශ්‍ය සහනාධාර ලැබුණා. යෙහෝවා දෙවිගේ සාක්ෂිකරුවන් කෑම පාර්සල් 4,00,000ක් ඇතුළුව තවත් බොහෝ දේවල් ඔවුන්ට ලබා දුන්නා. ලොව පුරා වෛද්‍ය ක්ෂේත්‍රයේ ඉන්න සහෝදර සහෝදරියන් 78දෙනෙක් සහ තවත් ස්වේච්ඡා සේවකයන් එකතු වෙලා ඔවුන්ගේ කාලය හා ශ්‍රමය හයිටි රටේ සහෝදරයන් වෙනුවෙන් වැය කළා. මේ වගේ අද්දැකීම්වලින් පැහැදිලි වෙන්නේ යෙහෝවා දෙවි තම බලය හා ක්‍රිස්තියානි සහෝදරයන් මාර්ගයෙන් ඔහුගේ විශ්වාසවන්ත සේවකයන්ව ඕනෑම දරුණු තත්වයකදී බලාගන්නා බවයි. *