2015 වාර්ෂික පදය
“යෙහෝවා දෙවිට ස්තුති කරන්න. මන්ද ඔහු යහපත්ය.”
රතු මුහුද ළඟදී පාරාවෝගෙන් හා ඔහුගේ හමුදාවෙන් ඊශ්‍රායෙල්වරුන්ව බේරාගත්තම යෙහෝවා දෙවිට ස්තුති කරන්න ඔවුන්ට ගොඩක් හේතු තිබුණා. අද අපිටත් යෙහෝවා දෙවිට ස්තුති කරන්න හුඟක් හේතු තියෙනවා. විවිධ දුෂ්කරතාවලට මුහුණ දෙද්දී කලකිරීම් ඇති වෙන එක සාමාන්‍යයි. ඒත් ඒ වගේ වෙලාවලදී යෙහෝවා දෙවි අපිට කරලා තියෙන ආශීර්වාද ගැන හිතනවා නම් සහනයක් හා ශක්තියක් ලබාගන්න ඒක අපිට උදව් වෙනවා.
ළඟදීම මේ දුක් වේදනා නැති කරන එක යෙහෝවා දෙවි අපිට කරන ලොකුම ආශීර්වාදයයි. ඒ වෙන කල් අපිට මොන වගේ දුෂ්කරතාවලට මුහුණ දෙන්න සිදු වුණත් දෙවි කවදාවත් අපිව අත්හරින්නේ නැහැ කියලා අපි දන්නවා. අපේ ප්‍රේමණීය පියාණන් ඔහුට විශ්වාසවන්තව සේවය කරන්න හැම අතින්ම අපිට උපකාර කරනවා. මොකද ඔහු “අපේ රැකවරණයය. අපේ ශක්තියය. දුක් කරදරවලදී අපිට පිහිට වීමට ඔහු සූදානමින් සිටින්නේය” කියලා බයිබලයේ කියනවා. (ගීතා. 46:1) අපි නිතරම දෙවි අපි වෙනුවෙන් කරලා තියෙන දේවල් ගැන හිතනවා නම් මොන තරම් දුෂ්කරතා ආවත් ඒවාට හොඳින් මුහුණ දෙන්න අපිට පුළුවන්. ඒ නිසා අපි මේ වසර පුරාම දෙවි කරලා තියෙන ආශීර්වාද මතක් කරගමු. එතකොට “යෙහෝවා දෙවිට ප්‍රශංසා කරන්න, යෙහෝවා දෙවිට ස්තුති කරන්න” අපිට පුළුවන් වෙයි. “මන්ද ඔහු යහපත්ය.”
