එස්තර් 8:1-17
8 එදින අහෂ්වේරොෂ් රජ, යුදෙව්වරුන්ට සතුරුකම් කළ+ හාමාන්ගේ නිවස එස්තර් බිසවට භාර දුන්නේය.+ මොර්දෙකයි හා තමා අතර ඇති නෑකම එස්තර් බිසව රජුට පැවසූ පසු, රජ මොර්දෙකයිව තමා ඉදිරියට කැඳවීය.+
2 රජ තම මුද්ද*+ ගලවා මොර්දෙකයිට දුන්නේය. රජ එම මුද්ද, කලින් හාමාන්ට දී තිබුණත් එය ආපසු ඔහුගෙන් ගෙන තිබිණ. එස්තර් බිසව හාමාන්ගේ නිවස මොර්දෙකයිගේ භාරයේ තැබුවාය.+
3 පසුව ආගග්ගෙන් පැවත ආ හාමාන්, යුදෙව්වරුන්ට නපුරක් කිරීමේ අටියෙන්+ කළ කුමන්ත්‍රණය+ නිෂ්ප්‍රභ කරන ලෙස+ එස්තර් බිසව රජුගේ පාමුල වැටී කන්නලව් කළාය.+ බිසව රජු ඉදිරියේ හඬමින් රජුගේ කරුණාව අයැදුවාය.
4 එවිට රජ තම රන් යෂ්ටිය+ එස්තර් බිසව වෙතට දිගු කළේය. එස්තර් බිසව නැඟිට රජු ඉදිරියේ සිටගෙන,
5 රජුට මෙසේ කීවාය. “රජතුමනි, ඔබේ කරුණාව මා දිනාගෙන තිබේ නම්,+ මා ඔබෙන් ඉල්ලන දේ සාධාරණයි කියා ඔබට සිතෙනවා නම්, එය ඉටු කර දීමට ඔබ සතුටු නම්, මගේ මේ ඉල්ලීම ඉටු කරන්න. ආගග්ගෙන්+ පැවත ආ හම්මෙදාතාගේ පුත් හාමාන්, රාජධානියේ සෑම පළාතකම+ ජීවත් වන යුදෙව්වරුන්ව විනාශ කර දැමීමේ අටියෙන්+ කූට ලෙස නීතියක් පනවා එය ලිඛිතව දැනුම් දී තිබෙනවා.+ එහෙයින් රජතුමනි, මා ඔබෙන් ඉල්ලන්නේ ඒ නීතිය අවලංගු කර දැමීමට ලිපියක් යවන ලෙසයි.
6 මගේ සෙනඟ පිටට පැමිණෙන්න යන විපත්තිය දැක දැකත් මම එය ඉවසාගෙන ඉන්නේ කොහොමද? මගේ නෑදෑයන් විනාශ වෙද්දී මම එය කොහොම දරාගන්නද!”
7 එවිට අහෂ්වේරොෂ් රජ එස්තර් බිසවට හා යුදෙව් ජාතික මොර්දෙකයිට මෙසේ කීවේය. “හාමාන් යුදෙව්වරුන්ට විරුද්ධව කුමන්ත්‍රණය කළ නිසා ඔහුව කණුවක එල්ලා දැමීමට+ මම නියම කළා. ඔහුගේ නිවස මම එස්තර් බිසවට භාර දුන්නා.+
8 දැන් ඔබ, යුදෙව්වරුන්ගේ යහපත වෙනුවෙන් සුදුසුයි කියා සිතෙන දෙයක් රජුගේ නමින් ලියා+ රජුගේ මුද්දෙන් මුද්‍රා කරන්න. මන්ද යම් ලියවිල්ලක් රජුගේ නමින් ලියා රජුගේ මුද්දෙන් මුද්‍රා කළොත් එහි සඳහන් දේ කිසිම කෙනෙකුට අවලංගු කරන්න බැහැ.”+
9 තුන්වන මාසයේ එනම්, සීවාන් මාසයේ විසිතුන්වනදා රජුගේ ලේකම්වරුන්ව+ කැඳවීය. මොර්දෙකයි අණ කළ සියල්ල ලේකම්වරුන් ලවා ලියවිල්ලක ලියා යුදෙව්වරුන්ටත් දිසාපතීන්ටත්+ ආණ්ඩුකාරයන්ටත් යවන ලදි. එමෙන්ම ඉන්දියාවේ සිට ඉතියෝපියාව දක්වා තිබූ සියලු පළාත්වල එනම්, පළාත් එකසිය විසිහතක+ වෙසෙන අධිපතීන්ටද එය යවන ලදි. ඒ ඒ පළාත්වල ජීවත් වූ සෙනඟගේ භාෂාවලින්+ හා ඔවුන්ට කියවිය හැකි අකුරුවලින් ඒවා ලියන ලදි.+ යුදෙව්වරුන්ට යැවූ ලියවිල්ල ලියන ලද්දේ ඔවුන්ගේම භාෂාවෙන් හා ඔවුන්ට කියවිය හැකි අකුරුවලින්ය.+
10 මොර්දෙකයි ඒ ලියවිලි අහෂ්වේරොෂ් රජුගේ නමින් ලියා+ රජුගේ මුද්දෙන්+ මුද්‍රා තබා+ රජුගේ සේවාවන් සඳහාම යොදාගත්, ඉතා වේගවත් අශ්වයන් පිට නැඟ යන පණිවිඩකරුවන් අතේ යැව්වේය.+
11 සෑම නුවරකම ජීවත් වූ යුදෙව්වරුන්ට තම ජීවිත රැකගැනීම සඳහා සංවිධානය වීමට+ රජු අවසර දෙන බව එම ලියවිල්ලේ සඳහන් විය. යුදෙව්වරුන්ට දුෂ්ටකම් කරන පිණිස නැඟී සිටින, ඕනෑම පළාතක වෙසෙන ජන පිරිසක්ව+ ඔවුන්ගේ භාර්යාවන් හා දරුවන් සමඟ සම්පූර්ණයෙන්ම විනාශ කර දැමීමටත් ඔවුන්ගේ දේපළ පැහැරගැනීමටත්+ රජු යුදෙව්වරුන්ට අවසර දෙන බව එම ලියවිල්ලේ සඳහන් විය.
12 අහෂ්වේරොෂ් රජු යටතේ තිබූ සෑම පළාතක්ම එකම දවසක+ එනම්, දොළොස්වන මාසය වන ආදාර් මාසයේ+ දහතුන්වනදා+ එසේ කළ යුතු බවද එහි සඳහන් විය.
13 ලියවිල්ලේ සඳහන් දේ සෑම පළාතකම ජීවත් වූ සෙනඟට දන්වන ලදි.+ මන්ද එහි සඳහන් දේ නීතියක් ලෙස පිළිපැදිය යුතු විය. එමෙන්ම යුදෙව්වරුන්ටද ඒ දවසේදී තම සතුරන්ට විරුද්ධව පියවර ගැනීමට සූදානම් වන පිණිස එසේ කරන ලදි.+
14 රජු අණ කළ ලෙස පණිවිඩකරුවෝ+ එම ලිපි රැගෙන රජුගේ සේවාවන් සඳහාම යොදාගත් වේගවත් අශ්වයන් පිට නැඟී පිටත්ව ගියෝය.+ ෂූෂන් මාලිගාවේද+ එම නීතිය ගැන දැනුම් දෙන ලදි.
15 මොර්දෙකයි නිල් පැහැති රෙදිවලින් හා ලිනන් රෙදිවලින් නිමැවූ රාජ වස්ත්‍රයක්ද+ රත්නිල් පැහැගැන්වූ+ ලොම්වලින් නිමැවූ අනර්ඝ සළුවක්ද+ රන් ඔටුන්නක්ද පැළඳ, රජු ඉදිරියෙන් පිටතට ගියේය. ෂූෂන් නුවරෙහි වැසියෝ ප්‍රීති ඝෝෂා නැඟුවෝය.+
16 මන්ද එහි සිටි යුදෙව්වරුන්ට මහත් බලාපොරොත්තුවක්ද ගෞරවයක්ද ලැබිණ. ඔවුන්ගේ ප්‍රීතිය බොහෝ සෙයින් වැඩි විය.+
17 රජු පැනවූ නීතිය ගැන ප්‍රකාශ කළ සෑම පළාතකම හා සෑම නුවරකම ජීවත් වූ යුදෙව්වරුද එදින බොහෝ සෙයින් ප්‍රීති වෙමින් උත්සව පැවැත්වූහ.+ යුදෙව්වරුන්ට භය වූ+ ජනයාගෙන් බොහෝදෙනෙක්+ තමන් යුදෙව්වරුන් බව කියා සිටියෝය.+
පාදසටහන්
^ මූ.අ., “මුද්‍රා තබන මුද්ද.”
