එස්රා 8:1-36
8 අර්තක්ෂස්තා+ රජුගේ පාලන සමයේදී මා සමඟ බැබිලෝනියෙන් පිටත් වූ පෙළපත්වල ප්‍රධානීන්ගේ+ නම් සහ ඔවුන්ගේ පවුල්වල විස්තර+ මතු දැක්වේ.
2 පිනෙහාස්ගේ පුතුන්+ අතරින් ගේර්ෂොම්ද ඉතමාර්ගේ පුතුන්+ අතරින් දානියෙල්ද+ දාවිත්ගේ පුතුන්+ අතරින් හට්ටුෂ්ද සිටියෝය.
3 පාරොෂ්ගෙන්+ පැවත ආ ෂෙකනියාගේ පුතුන් අතරින් සෙකරියාද ඔහු සමඟ පෙළපත් වාර්තාවල නම් ඇතුළත් කළ පුරුෂයෝ එකසිය පනස්දෙනෙක්ද සිටියෝය.
4 පාහත්-මෝවබ්ගේ+ පුතුන් අතරින් සෙරහියාගේ පුත් එලිහෝ-ඒනයිද ඔහු සමඟ පුරුෂයෝ දෙසියදෙනෙක්ද සිටියෝය.
5 සට්ටුගේ පුතුන්+ අතරින් යහෂියෙල්ගේ පුත් ෂෙකනියාද ඔහු සමඟ පුරුෂයෝ තුන්සියදෙනෙක්ද සිටියෝය.
6 ආදින්ගේ පුතුන්+ අතරින් යොනාතාන්ගේ පුත් ඒබෙද්ද ඔහු සමඟ පුරුෂයෝ පනස්දෙනෙක්ද සිටියෝය.
7 ඒලාම්ගේ පුතුන්+ අතරින් අතලියාගේ පුත් යෙෂායාද ඔහු සමඟ පුරුෂයෝ හැත්තෑදෙනෙක්ද සිටියෝය.
8 ෂෙපටියාගේ පුතුන්+ අතරින් මිකායෙල්ගේ පුත් සෙබදියාද ඔහු සමඟ පුරුෂයෝ අසූදෙනෙක්ද සිටියෝය.
9 යෝවාබ්ගේ පුතුන් අතරින් යෙහීයෙල්ගේ පුත් ඔබදියාද ඔහු සමඟ පුරුෂයෝ එකසිය දහඅටදෙනෙක්ද සිටියෝය.
10 බානිගේ පුතුන්+ අතරින් යොසිෆියාගේ පුත් ෂෙලොමිත්ද ඔහු සමඟ පුරුෂයෝ එකසිය හැටදෙනෙක්ද සිටියෝය.
11 බෙබායිගේ පුතුන් අතරින් බෙබායිගේ පුත්+ සෙකරියාද ඔහු සමඟ පුරුෂයෝ විසිඅටදෙනෙක්ද සිටියෝය.
12 අස්ගාද්ගේ පුතුන්+ අතරින් හක්කාටාන්ගේ පුත් යෝහානාන්ද ඔහු සමඟ පුරුෂයෝ එකසිය දහදෙනෙක්ද සිටියෝය.
13 අදොනිකාම්ගේ පුතුන්ගෙන්+ ඉතුරුව සිටි අය වන එලිෆෙලෙත්ද යෙයීයෙල්ද ෂෙමායාද ඔවුන් සමඟ පුරුෂයෝ හැටදෙනෙක්ද සිටියෝය.
14 බිග්වායිගේ පුතුන්+ අතරින් ඌතයිද සබ්බූද්ද ඔවුන් සමඟ පුරුෂයෝ හැත්තෑදෙනෙක්ද සිටියෝය.
15 මම අහාවා+ හරහා ගලා යන ගංගාව අසලට+ ඔවුන් සියලුදෙනාව රැස් කළෙමි. ජනයාව හා පූජකයන්ව+ සෝදිසි කර බලන පිණිස+ අපි සියලුදෙනාම එහි දින තුනක් කඳවුරු බැඳගෙන සිටියෙමු. එහෙත් ලෙවීගේ පුත්‍රයන්ගෙන්+ එක් කෙනෙකුවත් මට සොයාගැනීමට නොහැකි විය.
16 එහෙයින් මම ප්‍රධානීන් වූ එලියේසර්, අරියෙල්, ෂෙමායා, එල්නාතාන්, යාරිබ්, එල්නාතාන්, නාතන්, සෙකරියා සහ මෙෂල්ලම් යන අයවද ගුරුවරුන්+ වූ යෝයාරීබ් සහ එල්නාතාන් යන අයවද කැඳවා,
17 කසිෆියා නම් ස්ථානයේ ප්‍රධානියෙකු වූ ඉද්දෝ වෙතට යැව්වෙමි. ඉද්දෝ සමඟත් ඔහුගේ සහෝදරයන් වන නෙතිනිම්වරුන්+ සමඟත් කතා කර,+ අපේ දෙවිගේ ගෘහයේ සේවය කිරීම සඳහා අවශ්‍ය සේවකයන්ව+ රැගෙන ඒමට මම ඔවුන්ට අණ කළෙමි.
18 අපට දෙවිගේ ආශීර්වාදය තිබුණු නිසා+ ඊශ්‍රායෙල්ගේ පුත් ලෙවීගේ+ මුනුපුරෙකු වූ මාලීගේ පුතුන්+ අතරින් නුවණැති+ මිනිසෙකු වූ ෂෙරෙබියාවද+ ඔහුගේ පුතුන්වද ඔහුගේ සහෝදරයන්වද රැගෙන ඒමට ඔවුන්ට හැකි විය. ඔවුන් එතැනට රැගෙන ආ මුළු සංඛ්‍යාව දහඅටකි.
19 මීට අමතරව ඔවුහු හෂබියාව සහ මෙරාරීගේ+ පුතුන් අතරින් යෙෂායාවද ඔහුගේ සහෝදරයන්වද ඔහුගේ පුතුන්වද රැගෙන ආවෝය. ඔවුන්ගේ මුළු සංඛ්‍යාව විස්සකි.
20 දාවිත් සහ ඔහුගේ අධිපතීන් විසින් ලෙවීවරුන්ට සේවය කිරීම සඳහා නියම කරන ලද නෙතිනිම්වරුන් අතරින් දෙසිය විසිදෙනෙකුද ඔවුහු රැගෙන ආවෝය. මෙම නෙතිනිම්වරුන් සියලුදෙනාගේ නම් පෙළපත් වාර්තාවලට ඇතුළත් කර තිබිණ.
21 ඉන්පසුව මම අහාවා ගඟ අසල රැස්ව සිටි සියලුදෙනාට නිරාහාරව සිට දෙවිට කන්නලව් කරන්න කියා පැවසුවෙමි. අපටත් අපගේ කුඩා දරුවන්ටත්+ අපගේ බඩු බාහිරාදියටත් රැකවරණය ලබා දෙමින් නිසි ලෙස මඟ පෙන්වන මෙන්+ අපි අපගේ දෙවිට නිහතමානීව+ කන්නලව් කළෙමු.
22 අප මීට පෙර රජ්ජුරුවන්ට මෙසේ පවසා තිබිණ. “අපගේ දෙවිගෙන් මඟ පෙන්වීම් පතමින් ඔහුට ළං වන සියලුදෙනාට+ දෙවිගේ ආශීර්වාදය+ අනිවාර්යයෙන්ම ලැබෙනවා. නමුත් ඔහුව අත්හරින+ අයට විරුද්ධව ඔහුගේ උදහස ඇවිළෙයි.+ දෙවි තමාගේ මහත් බලයෙන් ඔවුන්ට දඬුවම් දෙයි.” ඒ නිසා අප යන ගමනේ ආරක්ෂාව සඳහා හමුදා පිරිසක්+ සහ අසරුවන්+ ලබා දෙන මෙන් රජ්ජුරුවන්ගෙන් ඉල්ලීමට මම ලැජ්ජා වුණෙමි.
23 එහෙයින් අපි නිරාහාරව+ සිටිමින් අපගේ ගමනට ආශීර්වාද කරන මෙන් දෙවිට කන්නලව් කළෙමු.+ දෙවිද අපගේ කන්නලව්වලට සවන් දුන්නේය.+
24 පසුව මම පූජකයන් අතරේ සිටි ප්‍රධානීන්ගෙන් දොළොස්දෙනෙකුව එනම්, ෂෙරෙබියාවද+ හෂබියාවද+ ඔවුන්ගේ සහෝදරයන් දසදෙනෙකුවද වෙන් කළෙමි.
25 ඉන්පසුව රජ්ජුරුවන්ද+ ඔහුගේ උපදේශකයන්ද+ අධිපතීන්ද ඒ ප්‍රදේශයේ සිටි සියලු ඊශ්‍රායෙල්වරුන්ද+ අපගේ දෙවිගේ ගෘහය වෙනුවෙන් සම්මාදම් කළ රන්, රිදී හා සියලු භාණ්ඩ+ මම ඔවුන්ට කිරා මැන භාර දුන්නෙමි.
26 මේ අනුව මම ඔවුන්ට රිදී තලෙන්ත*+ හයසිය පනහක්ද තලෙන්ත දෙකක් බරැති රිදී බඳුන් සියයක්ද රන් තලෙන්ත සියයක්ද
27 දරික් දහසක් වටිනා කුඩා රන් බඳුන් විස්සක්ද රත්තරන් තරම් වටිනා රන්වන් පැහැයෙන් දිලිසෙන ඉස්තරම්ම තඹවලින් සෑදූ භාජන දෙකක්ද කිරා මැන දුනිමි.
28 පසුව මම ඔවුන්ට මෙසේ පැවසුවෙමි. “ඔබ යෙහෝවා දෙවිගේ සේවය සඳහා කැප වූ ශුද්ධ+ පිරිසක්. ඔබට භාර දුන් භාජනත්+ ශුද්ධයි. ඒ වගේම ඔබට දුන් රන් සහ රිදී ඔබේ මුතුන්මිත්තන්ගේ දෙවි වන යෙහෝවාට කැමැත්තෙන්ම පරිත්‍යාග කළ දේවල් බව මතක තබාගන්න.
29 ඔබ යෙහෝවා දෙවිගේ ගෘහයේ භෝජන ශාලාවලදී+ නායක පූජකයන්ටත් ලෙවීවරුන්ටත් යෙරුසලමෙහි සිටින ඊශ්‍රායෙල්වරුන්ගේ පෙළපත්වල අධිපතීන්ටත් මේ සියල්ල කිරා මැන+ භාර දිය යුතුයි. ඒ සියල්ල භාර දෙන තුරු ඔබ සෝදිසියෙන් සිට ඒ දේවල් පරෙස්සමෙන් තබාගන්න.”
30 එවිට පූජකයෝද ලෙවීවරුද යෙරුසලමෙහි පිහිටි අපගේ දෙවිගේ ගෘහයට+ ගෙන යා යුතු රන්ද රිදීද භාජනද භාරගත්තෝය.
31 අහාවා ගඟ+ අසල රැස්ව සිටි අප, යෙරුසලම බලා යන ගමන ආරම්භ කළේ පළමු මාසයේ+ දොළොස්වන දිනයේදීය. අපගේ දෙවි අපට රැකවරණය ලබා දුන් නිසා අපට සතුරන්ගේ හිරිහැරවලින් හා මංකොල්ලකරුවන්ගේ ප්‍රහාරවලින් බේරීමට+ හැකි විය.
32 යෙරුසලමට+ පැමිණි අපි එහි දින තුනක් ගත කළෙමු.
33 හතරවන දිනයේදී අපි අපගේ දෙවිගේ ගෘහයට ගොස් රන්ද රිදීද භාජනද+ කිරා මැන,+ පූජක උරියාහ්ගේ පුත් මෙරේමොත්ටද+ පිනෙහාස්ගේ පුත් එලියාසර්ටද ලෙවීවරුන් වූ යේෂුවාගේ පුත් යෝෂාබාද්ටද+ බින්නුයිගේ+ පුත් නොවදියාටද භාර දුන්නෙමු.
34 ඒ අවස්ථාවේදී භාර දුන් සෑම දෙයක්ම ගණන් කර ඒවායේ මුළු බරද ලේඛනගත කරන ලදි.
35 ඉන්පසු වහල්කමින් නිදහස්ව+ පැමිණි අය එකතු වී ඊශ්‍රායෙල්හි දෙවිට දවන පූජා+ ඔප්පු කළෝය. ඒ සඳහා ඔවුහු මුළු ඊශ්‍රායෙල් සෙනඟ වෙනුවෙන් ගවයන්+ දොළහක්ද බැටළුවන්+ අනූහයක්ද බැටළු පැටවුන් හැත්තෑහතක්ද පාප පූජාවක් ලෙස එළුවන්+ දොළහක්ද ඔප්පු කළෝය. ඒ සියල්ල යෙහෝවා දෙවිට දවන පූජාවක් ලෙස ඔවුහු ඔප්පු කළෝය.
36 ඉන්පසුව අප රජ්ජුරුවන් දුන් නීති හා නියෝග+ මහ ගඟෙන් එගොඩ+ රජ්ජුරුවන්ට සේවය කරන දිසාපතීන්ට+ හා ආණ්ඩුකාරයන්ට+ දුන් විට, ඔවුහු ඊශ්‍රායෙල් සෙනඟටත් සැබෑ දෙවිගේ ගෘහයේ වැඩකටයුතුවලටත් සහයෝගය+ දැක්වූහ.
පාදසටහන්
^ නික් 25:39හි පාදසටහන බලන්න.
