කොලොස්සි 3:1-25
3 දෙවි ඔබව ක්‍රිස්තුස් සමඟ ඉහළ තැන්වලට ඔසවා ඇත්නම්+ ස්වර්ගයේ තිබෙන දේවල් ගැන සොයමින් සිටින්න.+ මන්ද ක්‍රිස්තුස් දෙවිගේ දකුණු පැත්තෙහි ඉඳගෙන සිටියි.+
2 ඔබේ මනස පොළොවේ තිබෙන දේවලට නොව+ ස්වර්ගයේ තිබෙන දේවලට යොමු කර තබාගන්න.+
3 ඇත්තෙන්ම ඔබ මිය ගොස් ඇතැයි කියා පැවසිය හැක.+ එහෙයින් දෙවිගේ කැමැත්තට එකඟව ඔබේ ජීවිතය+ රැඳී තිබෙන්නේ ක්‍රිස්තුස්ගේ අතෙහිය.+
4 අපව ජීවත් කරවන ක්‍රිස්තුස්+ තම තේජවත් බලයෙන් පෙනී සිටින විට ඔබත් ඔහු සමඟ තේජසින්+ පෙනී සිටිනු ඇත.+
5 එමනිසා වේශ්‍යාකම්* කිරීමට හා අපවිත්‍ර ක්‍රියාවල යෙදීමට ඇති ආශාවද කාමාශාවද+ වෙනත් හානිකර ආශාද රූප නමස්කාරයක් හා සමාන වන තණ්හාවද+ සහමුලින්ම ඔබේ* ශරීරයේ අවයවවලින්+ නැති කර* දැමිය යුතුයි.+
6 ඒ දේවල් කරන අයට විරුද්ධව දෙවිගේ උදහස පැමිණෙනු ඇත.+
7 ඔබත් කලින් සිටියේ ඒ දේවල් කරමිනි.+
8 ඇත්තෙන්ම ඔබ උදහස, කෝපය, අයහපත් ක්‍රියා, නින්දාසහගත කතා+ යනාදි සියලු දේවල් ඔබෙන් සම්පූර්ණයෙන්ම ඉවත් කර දැමිය යුතුයි.+ ඔබේ මුවින් කිසි අසභ්‍ය+ කථාවක් පිට නොවිය යුතුයි.
9 එකිනෙකාට බොරු නොකියන්න.+ පරණ පෞද්ගලිකත්වයත්+ ඊට ආවේණික වූ ක්‍රියාත් ඉවත් කර,
10 දෙවි ලබා දෙන අලුත්+ පෞද්ගලිකත්වය පැළඳගන්න. ඒ සඳහා නිවැරදි දැනුම ලබාගෙන දෙවිගේ ගතිලක්ෂණවලට එකඟව+ ඔබේ පෞද්ගලිකත්වය අලුත් කරගත යුතුයි.
11 ඒ අනුව වැදගත් වන්නේ කෙනෙකු ග්‍රීකයෙක්ද යුදෙව්වෙක්ද කියාවත් චර්මච්ඡේදිතද අචර්මච්ඡේදිතද කියාවත් විදේශිකයෙක්ද ස්කිතිය ජාතිකයෙක්ද* කියාවත් දාසයෙක්ද නිදහස් පුද්ගලයෙක්ද+ කියාවත් නොවේ. සෑම දෙයකටම ක්‍රිස්තුස් සම්බන්ධ වී සිටින අතර අපි සියලුදෙනා ඔහු සමඟ බැඳී සිටිමු.+
12 ඒ අනුව දෙවි තෝරාගත්+ ශුද්ධ, ප්‍රේමණීය අය ලෙස ඉමහත් දයානුකම්පාවකින්,+ කරුණාවන්තකමින්, නිහතමානිකමින්,+ මෘදුකමින්+ සහ බොහෝ ඉවසිලිවන්තකමින්+ කටයුතු කරන්න.*
13 අන් අය කරන දේ ගැන අමනාපයක් ඇති වීමට සාධාරණ හේතු තිබෙන විටත්+ ඔවුන් ගැන ඉවසන්න. නිතරම ඔවුන්ට මුළු හදවතින්ම+ සමාව දෙන්න. යෙහෝවා දෙවි ඔබට මුළු හදවතින්ම සමාව දී තිබෙන ආකාරයටම+ ඔබත් සමාව දෙන්න.
14 නමුත් ඒ සියල්ලට අමතරව ඔබ තුළ ප්‍රේමය තිබිය යුතුයි.+ මන්ද එක්සත්කමට දායක වන හොඳම බැඳීම+ එයයි.
15 ඔබේ සිත් පාලනය කිරීමට+ ක්‍රිස්තුස් ලබා දෙන සමාදානයට+ ඉඩ දෙන්න. මන්ද දෙවි ඔබව කැඳවා තිබෙන්නේ එක ශරීරයක් සේ සිටීමටත්+ සමාදානයෙන් සිටීමටත්ය. ඔබ තුළ ස්තුතිවන්තකමද දක්නට ලැබිය යුතුයි.
16 ක්‍රිස්තුස් ඉගැන්වූ දේවල් ඔබේ ජීවිතය තුළ නිතරම ක්‍රියාත්මක විය යුතුයි. එහි ප්‍රතිඵලයක් ලෙස ඔබට සියලු ප්‍රඥාව ලැබේ.+ ගීතිකාවලින්ද+ දෙවිට ස්තුති ප්‍රශංසා ඔප්පු කිරීමෙන්ද ඔහුට මියුරු ගීත+ ගයමින්ද එකිනෙකාට උගන්වා+ මඟ පෙන්වීම් ලබා දෙන්න. එසේ ඔබේ මුළු හදවතින්ම යෙහෝවා දෙවිට ගී ගයන්න.+
17 ඔබ කුමක් පැවසුවත් කුමක් කළත්+ ඒ සෑම දෙයක්ම පියාණන් වන දෙවිට ස්තුති කරමින්+ ස්වාමීන් වන යේසුස්ව+ සිහියේ තබාගනිමින් කරන්න.
18 භාර්යාවෙනි, ඔබේ ස්වාමිපුරුෂයන්ට යටත්ව සිටින්න.+ මන්ද ක්‍රිස්තුස්ගේ අනුගාමිකයන් ලෙස එසේ කිරීම සුදුසුය.
19 ස්වාමිපුරුෂයෙනි, ඔබේ භාර්යාවන් සමඟ අධික ලෙස කෝප නොවී+ ඔවුන්ට දිගටම ප්‍රේම කරන්න.+
20 දරුවෙනි, සියලු කාරණාවලදී ඔබේ දෙමාපියන්ට කීකරු වන්න.+ මන්ද එසේ කිරීමෙන් ස්වාමීන් සතුටු වෙයි.
21 පියවරුනි, ඔබේ දරුවන් තුළ කෝපයක් ඇති නොකරන්න.+ මන්ද එසේ කිරීමෙන් ඔවුන් තුළ කලකිරීමක් ඇති වේ.
22 දාසයෙනි, ඔබේ ස්වාමිවරුන් ලෙස කටයුතු කරන අයට+ සියලු කාරණාවලදී කීකරු වන්න. මිනිසුන්ව සතුටු කරන අය මෙන් මූණිච්චාවට නොව+ අවංක සිතින් යෙහෝවා දෙවිට ගරුබිය දක්වන අය ලෙස+ ඔවුන්ට කීකරු වන්න.
23 ඔබ කුමක් කළත් මිනිසුන්ට නොව යෙහෝවා දෙවිට කරන්නා සේ+ මුළු හදවතින්ම+ එය කරන්න.
24 මන්ද ඔබට උරුම වන දේ ලැබෙන්නේ+ යෙහෝවා දෙවිගෙන්+ බව ඔබ දන්නහුය. ස්වාමීන් වන ක්‍රිස්තුස් වෙනුවෙන් වෙහෙස මහන්සි වී සේවය කරන්න.+
25 ඇත්තෙන්ම වැරදි දේ කරන තැනැත්තාට තමා කළ වරදට ප්‍රතිඵල ලැබේ.+ එවැනි කාරණාවලදී දෙවි සියලුදෙනාටම එක හා සමානව සලකයි.+
පාදසටහන්
^ මූ.අ., “මරා.”
^ මූ.අ., “පොළොවෙහි තිබෙන ඔබේ.”
^ එනම්, අවිවාහකයෙකු හෝ විවාහකයෙකු ලිංගික දුරාචාරයේ යෙදීම. උපග්‍ර. 8 බලන්න.
^ මෙය ඉතා පහත් ලෙස සැලකූ ජනතාව සඳහාද භාවිත කරන ලදි.
^ මූ.අ., “පැළඳගන්න.”
