ගණන් කතාව 13:1-33
13 යෙහෝවා දෙවි මෝසෙස්ට මෙසේ කීවේය.
2 “මම ඊශ්‍රායෙල් සෙනඟට දෙන්න පොරොන්දු වූ කානාන් දේශය ගැන තොරතුරු සොයා බලන්න පුරුෂයන් කිහිපදෙනෙකුව යවන්න.+ ඒ සඳහා සෑම ගෝත්‍රයකින්ම එක මනුෂ්‍යයෙකු බැගින් තෝරාගන්න. ඔවුන් සෙනඟ අතරේ සිටින ප්‍රධානීන්+ විය යුතුයි.”
3 මෝසෙස්ද යෙහෝවා දෙවි අණ කළ ලෙස ඔවුන්ව තෝරාගෙන පාරාන් පාළුකරයෙන්+ පිටත් කර යැව්වේය. ඒ සියලුදෙනා ඊශ්‍රායෙල් සෙනඟ අතරේ සිටි ප්‍රධානියෝය.
4 ඔවුන්ගේ නම් මෙසේය. රූබෙන් ගෝත්‍රයෙන් සක්කූර්ගේ පුත්‍රයා වන ෂම්මුවාය.
5 සිමියොන් ගෝත්‍රයෙන් හෝරීගේ පුත්‍රයා වන ෂාපාත්ය.
6 යූදා ගෝත්‍රයෙන් යෙෆුන්නෙගේ පුත්‍රයා වන කාලෙබ්ය.+
7 ඉසකාර් ගෝත්‍රයෙන් යෝසෙප්ගේ පුත්‍රයා වන ඉගාල්ය.
8 එෆ්‍රායිම් ගෝත්‍රයෙන් නූන්ගේ පුත්‍රයා වන හෝෂෙයාය.*+
9 බෙන්ජමින් ගෝත්‍රයෙන් රාෆුගේ පුත්‍රයා වන පල්තීය.
10 සෙබ්‍යූලන් ගෝත්‍රයෙන් සෝදීගේ පුත්‍රයා වන ගද්දීයෙල්ය.
11 යෝසෙප්ගෙන්+ පැවතෙන මනස්සේ+ ගෝත්‍රයෙන් සූසිගේ පුත්‍රයා වන ගද්දීය.
12 දාන් ගෝත්‍රයෙන් ගෙමල්ලිගේ පුත්‍රයා වන අමියෙල්ය.
13 ආෂෙර් ගෝත්‍රයෙන් මිකායෙල්ගේ පුත්‍රයා වන සෙතුර්ය.
14 නෆ්තලී ගෝත්‍රයෙන් වොප්සීගේ පුත්‍රයා වන නාබීය.
15 ගාද් ගෝත්‍රයෙන් මාකීගේ පුත්‍රයා වන ගෙවුයෙල්ය.
16 දේශයේ තොරතුරු සොයා බලන පිණිස මෝසෙස් පිටත් කර යැවූ මනුෂ්‍යයන්ගේ නම් ඒවාය. මෝසෙස් නූන්ගේ පුත්‍රයා වන හෝෂෙයාට යෙහොෂුවා*+ යන නම දුන්නේය.
17 කානාන් දේශයේ තොරතුරු සොයා බලන පිණිස ඒ පුරුෂයන්ව පිටත් කර යැවූ අවස්ථාවේදී මෝසෙස් ඔවුන්ට මෙසේ කීවේය. “මේ පාරෙන් නෙගෙබ්+ දෙසට ගොස් පසුව කඳුකරයට+ යන්න.
18 දේශය මොන වගේද කියා සොයා බලන්න.+ එහෙ ජීවත් වෙන මිනිස්සු බලවත් අයද කියා බලන්න. කොතරම් ජන සංඛ්‍යාවක් එහි පදිංචිව සිටිනවාද කියාත් සොයා බලන්න.
19 ඔවුන්ගේ දේශය කොයි ආකාරයේද කියාත් ඔවුන් ජීවත් වෙන්නේ කූඩාරම්වලද නැත්නම් බලකොටු තියෙන නුවරවලද කියාත් විස්තර දැනගෙන එන්න.
20 දේශය ගස් වැල්වලින් පිරුණු සරුසාර දේශයක්ද කියා බැලීමට+ ඔබ නිර්භීතව+ ඒ දේශයට ගොස් එහි පලදාවෙන් ස්වල්පයක් රැගෙන එන්න.” දේශයේ තොරතුරු බැලීමට ඔවුන් පිටත්ව ගියේ මිදිවතුවල ප්‍රථම ඵල නෙළන කාලයේදීය.+
21 ඔවුහු ෂින් පාළුකරයේ+ සිට හමාත්හි+ දේශ සීමාව කිට්ටුවෙන් තිබෙන රෙහොබ්+ දක්වා ගමන් කරමින් දේශයේ තොරතුරු සොයා බැලුවෝය.
22 ඔවුහු නෙගෙබ්+ වෙත ගමන් කර හෙබ්‍රොන්+ නම් නගරයට ආවෝය. අනාක්ගේ+ පුත්‍රයෝ වූ අහිමාන්, ෂේෂයි හා තල්මයි+ ඒ ප්‍රදේශයේ ජීවත් වූහ. ඊජිප්තුවේ ෂොවන්+ නම් නගරය ගොඩනඟන්න අවුරුදු හතකට පෙර හෙබ්‍රොන්+ නගරය ගොඩනඟා තිබිණ.
23 ඔවුහු එෂ්කොල් නිම්නයට+ පැමිණ එතැන තිබූ මිදිවැලකින් මිදිපොකුරක් සහිත අත්තක් කපාගත්තෝය.+ එම අත්ත පොල්ලක ගැටගසා මනුෂ්‍යයන් දෙදෙනෙක් එය උසුලාගෙන ගියෝය. ඒ ස්ථානයෙන් දෙළුම් ගෙඩි+ කිහිපයක්ද අත්තික්කා ගෙඩි කිහිපයක්ද කඩාගෙන ගියෝය.
24 ඊශ්‍රායෙල් සෙනඟ එම ස්ථානයෙන් මිදිපොකුරක් කපාගත් බැවින් එයට එෂ්කොල්*+ නිම්නය යන නම තබන ලදි.
25 දේශයේ තොරතුරු සොයා බලා දවස් හතළිහකට+ පසුව ඔවුහු හැරී
26 පාරාන් පාළුකරයේ කාදෙෂ්+ නම් ස්ථානය වෙත ඇවිදගෙන ගියෝය. ඔවුහු මෝසෙස්, ආරොන් හා මුළු සෙනඟ වෙත පැමිණ දේශයේ තොරතුරු ඔවුන්ට කීවෝය. දේශයෙන් ගෙනා පලතුරුද ඔවුන්ට පෙන්වූවෝය.
27 මෝසෙස්ට තොරතුරු දන්වමින් ඔවුහු මෙසේ කීවෝය. “ඔබ අපිට යන්න කියූ දේශයට අපි ගියා. ඇත්තටම ඒ දේශය කිරියෙන් හා පැණියෙන් ඉතිරෙන දේශයක්.+ අපි මේ පලතුරු ගෙනාවේ ඒ දේශයෙන්.+
28 නමුත් එහෙ ජීවත් වන මිනිස්සු නම් හරිම ශක්තිමත්. පවුරුවලින් වට කර තිබෙන ඔවුන්ගේ නුවරවල් හරිම විශාලයි.+ ඒ වගේම අනාක්ගෙන් පැවතෙන අයත් ඒ දේශයේ ජීවත් වෙනවා.+
29 අමලෙක්වරුන්+ නෙගෙබ්+ ප්‍රදේශයේ ජීවත් වෙනවා. හිත්තීවරුන්, යෙබූසිවරුන්+ හා අමෝරිවරුන්+ කඳුකර පළාතේ ජීවත් වෙනවා. කානානිවරුන්+ ජීවත් වෙන්නේ මුහුදුබඩ හා යොර්දාන් ගඟ අසලයි.”
30 ඒ අවස්ථාවේදී මෝසෙස් ඉදිරියේ කැලඹී සිටි සෙනඟව සන්සුන් කරන පිණිස කාලෙබ්+ මෙසේ කීවේය. “අපි දැන්මම ගිහින් ඒ දේශය යටත් කරගමු. කිසිම සැකයක් නැහැ, අපිට ඒ දේශය පහසුවෙන්ම යටත් කරගන්න පුළුවන්.”+
31 නමුත් ඔහු සමඟ ගිය අනික් පුරුෂයෝ මෙසේ කීවෝය. “ඒ දේශයේ මිනිස්සු අපිට වඩා හුඟක් බලවත්. ඔවුන්ට විරුද්ධව සටන් කරන්න අපට ශක්තියක් නැහැ.”+
32 ඔවුහු තමන් බැලීමට ගිය දේශය ගැන ඊශ්‍රායෙල් සෙනඟට මෙම නරක තොරතුරු පැවසුවෝය.+ “අපි බලන්න ගිය දේශය, වැසියන්ව බිලිගන්නා භයානක දේශයක්. ඒ දේශයේ අපි දුටු සෑම කෙනෙක්ම යෝධයෝ වගේ.+
33 ඒ දේශයේ නෙෆිලිම්වරුන්ගෙන්* පැවතෙන අනාක්ගේ+ පුත්‍රයනුත් ජීවත් වෙනවා. ඔවුන් ඉදිරියේ අපි නිකම්ම නිකම් තණකොළ පෙත්තන් වගෙයි.”+
