ද්විතීය කතාව 11:1-32
11 “ඔබේ දෙවි වන යෙහෝවාට ඔබ ප්‍රේම කළ යුතුයි.+ ඔබ නිතරම දෙවිගේ අණපනත් හා තීන්දු+ පිළිපදිමින් ඔහුට පොරොන්දු වූ සෑම දෙයක්ම එලෙසම ඉටු කරන්න.
2 මම දැන් මතක් කර දෙන කාරණා ඔබ හොඳින්ම දන්නවා. (මම අද කතා කරන්නේ ඔබේ දරුවන්ට නොව ඔබටයි. මන්ද යෙහෝවා දෙවි තම සෙනඟව හික්මවන ආකාරය ඔවුන් අද්දැක නැහැ.+ දෙවිගේ තේජස+ හා අතිමහත් බලයවත්,+
3 ඊජිප්තුවේදී පාරාවෝ හා ඔහුගේ මුළු සෙනඟ ඉදිරියේ දෙවි කළ පුදුම දේවල්වත් ඔවුන් දුටුවේ නැහැ.+
4 පාරාවෝ තම සේනාව සමඟ ඊශ්‍රායෙල් සෙනඟ ලුහුබැඳ ආ විට,+ යෙහෝවා දෙවි ඊජිප්තුවේ මුළු අශ්ව රථ සේනාවම රතු මුහුදේ ජලයෙන් යට කර විනාශ කර දැමූ ආකාරයත්+ ඔවුන් දුටුවේ නැහැ.
5 ඔබ පාළුකරයේ ගමන් කළ මුළු කාලය පුරාම දෙවි ඔබ වෙනුවෙන් කළ දේවල් ඔවුන් අද්දැක්කේ නැහැ.
6 රූබෙන්ගේ පුත් එලියාබ්ගේ පුත්‍රයන් වන දාතාන් හා අබිරාම්ටද+ ඔවුන්ගේ පවුල්වලටද ඔවුන් ජීවත් වූ කූඩාරම්වලටද ඔවුන්ගේ පැත්ත ගත් සියලු ඊශ්‍රායෙල්වරුන්ටද දෙවි කළ දේ ඔබේ දරුවන් දුටුවේ නැහැ. එදා පොළොව දෙබෑ වී ඔවුන් සියලුදෙනාවම ගිලගත් ආකාරය ඔවුන් දැක්කේ නැහැ.)+
7 නමුත් ඔබ යෙහෝවා දෙවි කළ මේ සෑම පුදුම ක්‍රියාවක්ම ඔබේ ඇස් දෙකෙන්ම දැක්කා.+
8 “අද මා ඔබට අණ කරන මේ සියලු දේවල්+ ඒ විදිහටම පිළිපදින්න. එවිට ගඟෙන් එගොඩ තිබෙන ඒ දේශය අල්ලාගන්න අවශ්‍ය ධෛර්යය ඔබට ලැබෙයි.+
9 එසේම යෙහෝවා දෙවි ඔබේ මුතුන්මිත්තන්ට හා ඔවුන්ගේ දරු මුනුපුරන්ට පොරොන්දු වූ+ කිරියෙන් හා පැණියෙන්+ ඉතිරී යන ඒ දේශයේ ඔබට බොහෝ කාලයක් ජීවත් වෙන්න ලැබෙයි.+
10 “ඒ දේශය ඔබ වහලුන්ව සිටි ඊජිප්තු දේශය වගේ නොවෙයි. ඊජිප්තුවේදී ඔබට සිදු වුණා දහඩිය මහන්සියෙන් බීජ වපුරන්න. ඔබේ එළවළු වතුවලට අවශ්‍ය වතුර සපයන්න පවා ඔබට වෙහෙසෙන්න* සිදු වුණා.
11 නමුත් ඔබ අයිති කරගන්න යන දේශය නිසි කලට වැසි ලැබෙන, කඳු හෙල් හා තැනිතලාවලින්+ නොඅඩු දේශයක්.
12 යෙහෝවා දෙවි ඒ දේශය ආදරයෙන් රැකබලා ගන්නවා. අවුරුද්ද පුරාම යෙහෝවා දෙවි ඒ දේශය දෙස බලාගෙනයි+ සිටින්නේ.
13 “මා අද ඔබට කියා දෙන මේ අණපනත්වලින්+ එකක්වත් කඩ නොකර ඒවාට කීකරු වෙන්න. ඔබ යෙහෝවා දෙවිට ප්‍රේම කර මුළු හදවතින්ම ඔහුට සේවය කරන්න. ඔබේ මුළු ජීවිතයම ඔහු වෙනුවෙන් කැප කරන්න.+
14 ඔබ එසේ කළොත් ඔබට හිමි වන දේශයට දෙවි නියම කාලයේදී+ එනම්, වසන්ත සමයේ හා සරත් සමයේදී වැසි ලබා දෙයි.+ අස්වැන්න නෙළන කාලයේදී ඔබට ධාන්‍ය බහුලව එකතු කරගත හැකි වන අතර අලුත් වයින්වත් තෙල්වත් ඔබට කිසි දිනක හිඟ වෙන්නේ නැහැ.
15 හොඳින් කා බී සතුටින් සිටින්න ඔබට හැකි වන අතර+ දෙවි ඔබ ඇති කරන සතුන්ටද ඇති තරම් ආහාර ලබා දෙයි.+
16 නමුත් කල්පනාකාරී වන්න. ඔබේ සිත ඔබව නොමඟ යවන්න ඉඩ තිබෙනවා.+ එහෙම වුණොත් ඔබ දෙවිගෙන් ඈත් වී වෙනත් දෙවිවරුන් ඉදිරියේ වැඳ වැටී නමස්කාර කරයි.+
17 එසේ කළොත් යෙහෝවා දෙවිගේ උදහස ඔබට විරුද්ධව ඇවිළී ඔහු අහසේ කවුළු වසා දමයි. එවිට ඔබට අවශ්‍ය වැස්ස හා භූමියෙන් නිසි පලදාව නොලැබෙයි.+ යෙහෝවා දෙවි ඔබට ලබා දෙන ඒ සරුසාර දේශය ඔබට ඉක්මනින්ම අහිමි වී ඔබත් විනාශ වී යයි.+
18 “මා ඔබට කියා දෙන මේ වචන ඔබේ සිතට ගන්න.+ ඒවා ඔබේ ජීවිතයට අදාළ කරගන්න. ඒවා ඔබේ අතෙත් නළලෙත් බැඳගන්න.+
19 ඔබ ඒ දේවල් ඔබේ දූපුතුන්ට ඉගැන්විය යුතුයි. ඔබ නිවසේ සිටින විටත් ගමන්බිමන් යන විටත් විවේක සුවෙන් සිටින විටත් අවදි වන විටත් ඒ දේවල් ඔවුන් සමඟ කතාබහ කරන්න.+
20 ඒ දේවල් ඔබේ නිවසේ උළුවහුවලත් නුවරේ දොරටුවලත් ලියා තබන්න.+
21 ඔබ එසේ කළොත් යෙහෝවා දෙවි ඔබේ මුතුන්මිත්තන්ට පොරොන්දු වූ ඒ දේශයේ+ බොහෝ කල් ජීවත් වෙන්න ඔබටත් ඔබේ දරුදැරියන්ටත් හැකි වෙයි.+ අහස පොළොව පවතින තාක් කල්+ ඔබත් ඒ දේශයේ පදිංචි වී සිටියි.
22 “මා ඔබට කියා දෙන මේ අණපනත්වලින්+ එකක්වත් කඩ නොකර ඒවා පිළිපැදීමට වගබලා ගන්න. එසේම ඔබේ දෙවි වන යෙහෝවාට ප්‍රේම කර+ ඔහුගේ මඟ පෙන්වීම්වලට අනුව ජීවත් වෙන්න+ නිතරම උත්සාහ කරන්න. නිතරම ඔහු මත රඳා සිටින්න.+ ඔබ එසේ කළොත්
23 යෙහෝවා දෙවි ඒ දේශයේ සිටින ජාතීන්ව පලවාහැර ඔබට එය ලබා දෙයි.+ ඔබටත් වඩා බලවත් ඒ ජාතීන්ව දේශයෙන් පන්නා දමන්න ඔබට පුළුවන් වෙයි.+
24 ඔබ පා තබන සෑම ප්‍රදේශයක්ම ඔබට හිමි වෙයි.+ ඔබේ දේශ සීමාව පාළුකරයේ සිට ලෙබනොන් දේශය දක්වාත් යුප්‍රටීස් ගඟ සිට බස්නාහිර දෙසට පිහිටි මුහුද දක්වාත් විහිදී යයි.+
25 ඔබට විරුද්ධව නැඟී සිටින කිසිම කෙනෙක් සාර්ථක වෙන්නේ නැහැ.+ ඔබට පොරොන්දු වූ ලෙසම ඔබ ඒ දේශයේ වැසියන් අතරට යන්නත් කලින්ම ඔවුන් යෙහෝවා දෙවිගේ ක්‍රියා ගැන අසා භයෙන් වෙවුලයි.+
26 “ඊශ්‍රායෙල්වරුනි, ආශීර්වාද හා ශාප ගැන යමක් මා ඔබට දැන් පවසන්නම්.+
27 අද මම ඔබට කියා දෙන ඔබේ දෙවි වන යෙහෝවාගේ සියලු අණපනත්වලට ඔබ කීකරු වුණොත් ඔබට ආශීර්වාද ලැබෙයි.+
28 නමුත් ඔබ යෙහෝවා දෙවිගේ අණපනත්වලට අකීකරු වී,+ මා ඔබට ලබා දෙන මඟ පෙන්වීම් නොසලකාහැර ඔබ නොදන්නා වෙනත් දෙවිවරුන්ට නමස්කාර කළොත් ඔබට අත් විඳින්න සිදු වෙන්නේ ශාප+ පමණයි.
29 “ඔබට හිමි වන දේශයට යෙහෝවා දෙවි ඔබව රැගෙන ගිය පසු+ ඔබ ගෙරිසීම් කන්ද පාමුල සිට ඒ ආශීර්වාද ගැනත්+ ඒබාල් කන්ද පාමුල සිට ඒ ශාප ගැනත්+ සියලුදෙනාට ඇසෙන සේ ප්‍රකාශයක් කළ යුතුයි.
30 මෙම කඳු දෙක පිහිටා තිබෙන්නේ යොර්දාන් ගඟට බස්නාහිර දෙසින් ජීවත් වන කානානිවරුන්ගේ දේශයේයි. අරබා+ ප්‍රදේශයේ තිබෙන ගිල්ගාල්+ නුවරට නුදුරින් මොරේගේ+ විශාල ගස් අසල ඒ කඳු දැකගන්න පුළුවන්.
31 ඔබ යොර්දාන් ගඟෙන් එගොඩ වන්නේ යෙහෝවා දෙවි ඔබට ලබා දෙන දේශය හිමි කරගන්නයි. එමනිසා ඔබ එය යටත් කරගෙන එහි පදිංචි වෙන්න.+
32 එහි පදිංචි වූ පසුත් මා අද ඔබට කියා දෙන නීතිරීති හා තීන්දු+ සියල්ලම පිළිපැදීමට වගබලා ගත යුතුයි.+
පාදසටහන්
^ ඇතැම්විට ජල රෝද පෑගීමෙන් හෝ දිය අගල් කැපීමෙන් හෝ ඔවුන් වතුර සපයාගන්න ඇති.
