යොෂුවා 5:1-15
5 යෙහෝවා දෙවි ඊශ්‍රායෙල් සෙනඟට යොර්දාන් ගඟෙන් එගොඩ වීම සඳහා එහි වතුර සිඳී යෑමට සැලැස්වූ බව ගඟෙන් බස්නාහිර පැත්තේ සිටි අමෝරිවරුන්ගේ රජවරුන්ට+ හා වෙරළබඩ තීරයේ සිටි කානානිවරුන්ගේ රජවරුන්ට+ ආරංචි විය. එම ආරංචිය ලැබුණු විට ඔවුහු මහත් සේ තැතිගත්තෝය.+ ඊශ්‍රායෙල්වරුන් ගැන අසන්න ලැබුණු ඒ දේවල් නිසා ඊශ්‍රායෙල්වරුන්ට විරුද්ධව කිසිවක් කිරීමට ශක්තියක් ඔවුන් තුළ නොවීය.+
2 යෙහෝවා දෙවි යොෂුවාට මෙසේ කීවේය. “ගල් මුවහත් කර පිහි සාදා ඊශ්‍රායෙල් පුත්‍රයන්ව චර්මච්ඡේදනය කරන්න.”*+
3 එවිට යොෂුවා තමන් සෑදූ පිහි රැගෙන ගිබෙයාත්-හාඅරලොත්හිදී+ ඊශ්‍රායෙල් පුත්‍රයන්ව චර්මච්ඡේදනය කළේය.
4 යොෂුවා ඔවුන්ව චර්මච්ඡේදනය කළේ මේ හේතුව නිසාය. ඊජිප්තු දේශයෙන් පිටත්ව ආ ඊශ්‍රායෙල් සෙනඟ අතරෙන් යුද්ධයට යා හැකි වයසක සිටි සියලු පුරුෂයෝ පාළුකරයේදී මිය ගියෝය.+
5 ඊජිප්තු දේශයෙන් පිටත්ව ආ සියලු පුරුෂයන්ව චර්මච්ඡේදනය කර තිබුණත් පාළුකරය හරහා ගමන් ගන්නා අතරතුරදී ඉපදුණු පිරිමි දරුවන්ව චර්මච්ඡේදනය කර නොතිබිණ.
6 ඊශ්‍රායෙල් සෙනඟ අතරේ යුද්ධයට යා හැකි වයසක සිටි සියලුම පුරුෂයෝ මිය යන තෙක් ඔවුන්ට අවුරුදු හතළිහක්+ පුරා පාළුකරයේ ගමන් කිරීමට සිදු විය. යෙහෝවා දෙවි තම සෙනඟට කිරියෙන් හා පැණියෙන් ඉතිරෙන දේශයක්+ දෙන බවට ඔවුන්ගේ මුතුන්මිත්තන්ට පොරොන්දු වී තිබිණ.+ නමුත් ඒ සියලුදෙනා යෙහෝවා දෙවිට අකීකරු වූ නිසා ඔවුන්ට කවදාවත් ඒ දේශය දකින්න නොලැබෙන+ බව යෙහෝවා දෙවි ස්ථිරවම පවසා තිබිණ.
7 නමුත් දෙවි ඒ දේශය ඔවුන්ගේ පුත්‍රයන්ට හිමි කර දුන්නේය.+ පාළුකරය හරහා ගමන්ගන්නා අතරතුරදී ඉපදුණු ඒ දරුවන්ව චර්මච්ඡේදනය කර තිබුණේ නැත. එමනිසා යොෂුවා ඔවුන්ව චර්මච්ඡේදනය කළේය.
8 ඒ සියලුදෙනාව චර්මච්ඡේදනය කළ පසු ඔවුහු සුව වන තෙක් කඳවුරේම රැඳී සිටියෝය.+
9 පසුව යෙහෝවා දෙවි යොෂුවාට මෙසේ කීවේය. “ඊජිප්තුවරුන් මාගේ සෙනඟට කළ අපහාස අද මම නවතා දැමුවෙමි.”+ එහෙයින් අද වන තුරු ඒ ස්ථානය ගිල්ගාල්*+ යන නමින් හඳුන්වනු ලැබේ.
10 යෙරිකෝවේ පාළුකරයේ පිහිටි ගිල්ගාල් නගරයේ කඳවුරු බැඳගෙන සිටි ඊශ්‍රායෙල්වරු ඒ මාසයේ දහහතරවනදා සවස පාස්කුව පැවැත්වූහ.+
11 පාස්කුවට පසුවදා ඔවුහු එම දේශයේ පලදාවෙන් සාදාගත් මුහුන් නොදැමූ රොටි+ සහ බැදපු ධාන්‍ය කෑවෝය.
12 ඊශ්‍රායෙල් සෙනඟ දේශයේ පලදාව ආහාරයට ගත් දවසේ සිට භූමිය මතට මන්නා වැටීම නතර විය.+ ඒ අවුරුද්දේ සිට ඔවුහු කානාන් දේශයේ පලදාව ආහාරයට ගැනීමට පටන්ගත්තෝය.+
13 දිනක් යොෂුවා යෙරිකෝව අසල සිටියදී කඩුවක් අතට ගත්+ මිනිසෙකු+ තමාට ඉදිරියෙන් සිටගෙන සිටිනවා දුටුවේය. යොෂුවා ඔහු වෙතට ගොස්, “ඔබ අපේ මිත්‍රයෙක්ද නැත්නම් සතුරෙක්ද” කියා ඔහුගෙන් ඇසුවේය.
14 එවිට ඔහු, “මම යෙහෝවා දෙවිගේ සේනාවේ අධිපති”+ කියා පැවසුවේය. එය ඇසූ විගස යොෂුවා දණින් වැටී තම හිස නමා+ ඉතා ගෞරවයෙන් මෙසේ ඇසුවේය. “මාගේ ස්වාමීනි, ඔබ පැමිණියේ ඔබේ සේවකයා වන මට කුමක් පැවසීමටද?”
15 එවිට යෙහෝවා දෙවිගේ සේනාවේ අධිපති, යොෂුවාට මෙසේ කීවේය. “ඔබ සිටගෙන සිටින භූමිය ශුද්ධයි. ඒ නිසා ඔබේ පාවහන් ගලවන්න.” නොපමාව යොෂුවා එසේ කළේය.+
