යෝනා 4:1-11
4 එහෙත් දෙවි ගත් තීරණය ගැන අසතුටු වූ යෝනා+ බොහෝ සෙයින් කෝප විය.
2 ඔහු යෙහෝවා දෙවිට යාච්ඤා කරමින් මෙසේ කීවේය. “යෙහෝවා දෙවියනි, ඔබ මේ වගේ දෙයක් කරාවි කියා මම මගේම රටේ සිටියදී දැනගෙන සිටියා. ඔබ ඉතා කරුණාවන්ත, දයාන්විත දෙවි කෙනෙක් බව මම දන්නවා.+ ඔබ ඉක්මනින් කෝප නොවන බොහෝ සෙයින් ප්රේමය* පෙන්වන දෙවි කෙනෙක්.+ ඔබ දඬුවමක් නියම කළ පසුත් අනුකම්පා කර තීරණය වෙනස් කරන බව මම දන්නවා.+ මම තර්ෂිෂ් වෙතට පලා යන්න+ තීරණය කළෙත් ඒ නිසයි.
3 ඉතින් මම තවත් ජීවත් වෙලා වැඩක් තියෙනවාද?+ යෙහෝවා දෙවියනි, ඔබ මාව මරලා දැම්මා නම් මීට වඩා හොඳයි.”+
4 එවිට යෙහෝවා දෙවි ඔහුගෙන් මෙසේ ඇසුවේය. “ඔබට කෝප වීමට සාධාරණ හේතුවක් තිබෙනවා කියා ඔබ සිතනවාද?”+
5 යෝනා එවෙලේම නගරයෙන් පිට වී නැඟෙනහිර දෙසට ගොස් හිඳගත්තේය. පසුව ඔහු අව් රශ්මියෙන් ආරක්ෂාව ලබාගැනීමට එතැන පැලක් සාදාගත්තේය.+ ඔහු පැල ඇතුළට වී නුවරට කුමක් සිදු වේදැයි බලා සිටියේය.+
6 අව් රශ්මිය නිසා පීඩා විඳිමින් සිටි යෝනාට සෙවණක් ලබා දීමට යෙහෝවා දෙවි ලබු වැලක් හටගන්න සැලැස්වූවේය.+ ඒ ගැන යෝනා ඉතා සතුටු විය.
7 නමුත් පසුවදා අලුයම වෙද්දී සැබෑ දෙවි ඒ ලබු වැල කා දමන්න පණුවෙකුව+ එව්වේය. අන්තිමේදී ඒ ලබු වැල වියළී ගියේය.+
8 ඉර මුදුන් වූ විට දෙවි නැඟෙනහිර දෙසින් වියළි සුළඟක් හමන්න සැලැස්වූවේය.+ යෝනා ක්ලාන්ත වන තරමටම අව් රශ්මිය දැඩි විය.+ එවිට යෝනා, “අනේ, මම මැරුණා නම් මීට වඩා හොඳයි” කියා පවසමින් තම ජීවිතය නැති කර දමන මෙන් දෙවිගෙන් අයැදුවේය.+
9 ඉන්පසු දෙවි යෝනාගෙන් මෙසේ ඇසුවේය. “ලබු වැලක් නිසා මෙලෙස කෝප වීම සාධාරණයි කියා ඔබ සිතනවාද?”+
එවිට යෝනා, “ඔව්, ඒක සාධාරණයි. මට දැන් ජීවිතෙත් එපා වෙලා” කියා කීවේය.
10 එවිට යෙහෝවා දෙවි ඔහුට මෙසේ පැවසුවේය. “ඔබ ඒ ලබු වැල වවන්නවත් බලාගන්නවත් මහන්සි වුණේ නැහැ. එක රැයකින් වැඩී වියළී ගිය ලබු වැලක් ගැන ඔබ දුක් වුණා.
11 එහෙමනම් හරි වැරැද්ද අතර වෙනස නොදන්න* එක්ලක්ෂ විසිදාහකට වඩා වැඩි මිනිසුන් සහ සතුන් ප්රමාණයක් සිටින+ මේ විශාල නුවර වන නිනිවය විනාශ කිරීම ගැන මට දුක් වෙන්න අයිතියක් නැද්ද?”+