විනිශ්චයකරුවෝ 10:1-18
10 අබිමෙලෙක්ගේ මරණයෙන් පසු දෝදෝගේ පුත්‍රයෙකු වූ පුවාගේ පුත් තෝලා, ඊශ්‍රායෙල්වරුන්ට සේවය කිරීම සඳහා විනිශ්චයකරුවෙකු ලෙස පත් විය.+ ඔහු ඉසකාර් ගෝත්‍රයේ කෙනෙකි. ඔහු ජීවත් වූයේ එෆ්‍රායිම් කඳුකරයේ+ ෂාමීර් නම් ස්ථානයෙහිය.
2 ඔහු ඊශ්‍රායෙල් දේශයේ අවුරුදු විසිතුනක් පුරා විනිශ්චයකරුවෙකු ලෙස සේවය කළේය. ඔහු මිය ගිය විට ඔහුව තැන්පත් කරන ලද්දේ ෂාමීර් නම් ස්ථානයෙහිය.
3 ඉන්පසු ඊශ්‍රායෙල්හි විනිශ්චයකරුවෙකු ලෙස පත් වූයේ ගිලියද් දේශයේ වැසියෙකු වූ+ යායිර්ය. ඔහු අවුරුදු විසිදෙකක් පුරා විනිශ්චයකරුවෙකු ලෙස සේවය කළේය.
4 ඔහුට පුතුන් තිස්දෙනෙක් සිටියෝය. හොඳින් වැඩුණු බූරුවන්+ තිස්දෙනෙකු පිට ගමන් කළ ඔවුහු නුවරවල් තිහක් පාලනය කළෝය. ගිලියද් දේශයේ තිබූ මෙම නුවරවල් තිහම ඔවුහු හව්වෝත්-යායිර්+ යන නමින් හැඳින්වූහ. අද දක්වාම ඒ නුවරවල් හඳුන්වන්නේ ඒ නමින්ය.
5 යායිර් මිය ගිය විට ඔහුව තැන්පත් කරන ලද්දේ කාමොන් නම් ස්ථානයෙහිය.
6 ඔහුගේ මරණයෙන් පසු ඊශ්‍රායෙල්වරු නැවතත් යෙහෝවා දෙවි පිළිකුල් කරන දේවල් කිරීමට පටන්ගත්තෝය.+ ඔවුහු බාල් දෙවිවරුන්ටත්+ අෂ්ටොරෙත්+ දෙවඟනගේ රූපවලටත් සිරියාවේ දෙවිවරුන්ටත්+ සීදොන් වැසියන්ගේ දෙවිවරුන්ටත්+ මෝවබ්වරුන්ගේද+ අම්මොන්වරුන්ගේද+ පිලිස්තිවරුන්ගේද+ දෙවිවරුන්ටත් වැඳුම්පිදුම් කිරීමට පටන්ගත්තෝය. මෙසේ යෙහෝවා දෙවිට නමස්කාර කිරීම අත්හැර දැමූ ඔවුහු දෙවිගෙන් ඈත් වූහ.+
7 ඔවුන් කළ මේ දේවල් නිසා බොහෝ සෙයින් උදහස් වූ යෙහෝවා දෙවි+ ඔවුන්ව පිලිස්තිවරුන්ගේ+ හා අම්මොන්වරුන්ගේ+ අතට හසු වීමට ඉඩහැරියේය.+
8 ඔවුහු ඊශ්‍රායෙල් සෙනඟට අවුරුදු දහඅටක් පුරා දරුණු ලෙස හිරිහැර කළෝය. යොර්දාන් ගඟෙන් එගොඩ අමෝරිවරුන්ගේ දේශයේ එනම්, ගිලියද් දේශයේ විසූ සියලුම ඊශ්‍රායෙල්වරු ඔවුන්ගේ කුරිරු පාලනය නිසා බොහෝ සේ හිංසා පීඩා වින්දෝය.
9 එපමණක්ද නොව අම්මොන්වරු යොර්දාන් ගඟෙන් මෙගොඩට ඇවිත් එහි සිටි යූදා, බෙන්ජමින් සහ එෆ්‍රායිම් යන ගෝත්‍රවලට විරුද්ධව සටන් කළෝය. මෙසේ ඔවුහු ඊශ්‍රායෙල් දේශයේ සිටි සියලුදෙනාටම බොහෝ සේ හිරිහැර කළෝය.+
10 එවිට ඊශ්‍රායෙල්වරු යෙහෝවා දෙවිගේ පිහිට පතමින්+ දෙවිට මෙසේ පැවසූහ. “දෙවියනි, අපි ඔබව අත්හැර බාල් දෙවිවරුන්ට පුදපූජා ඔප්පු කළා.+ එය අප අතින් සිදු වූ බරපතළ පාපයක්.”+
11 පසුව යෙහෝවා දෙවි ඊශ්‍රායෙල්වරුන්ට මෙසේ පැවසීය. “මම ඔබව ඊජිප්තුවරුන් අතින්ද+ අමෝරිවරුන්,+ අම්මොන්වරුන්+ හා පිලිස්තිවරුන් අතින්ද+
12 සීදොන්වරුන්,+ අමලෙක්වරුන්+ හා මිදියන්වරුන් අතින්ද+ ගලවාගත්තේ නැද්ද? ඔවුන් ඔබට හිංසා පීඩා කළ විට+ මම ඔබේ මොරගැසීම්වලට ඇහුම්කන් දී ඔබව ඔවුන්ගෙන් බේරාගත් ආකාරය ඔබට මතක නැද්ද?
13 නමුත් ඔබ මාව අත්හැර+ වෙනත් දෙවිවරුන්ට නමස්කාර කළහුය.+ එමනිසා මම නැවත වරක් ඔබේ සතුරන්ගෙන් ඔබව ගලවා නොගන්නෙමි.+
14 ඔබ නමස්කාර කරන ඔබේ දෙවිවරුන්+ වෙතටම දැන් යන්න. ඔවුන්ගෙන් පිහිට පතන්න.+ ඔබ දැන් අද්දකින මේ හිංසා පීඩාවලින් ඔබව ගලවාගන්න කියා ඔවුන්ටම පවසන්න.”
15 නමුත් ඊශ්‍රායෙල්වරු යෙහෝවා දෙවිට මෙසේ පැවසූහ. “දෙවියනි, අප කළේ බරපතළ පාපයක්.+ ඒ නිසා ඔබ කැමති විදිහට අපට දඬුවම් කරන්න.+ ඒත් අප ඔබෙන් ඉතා බැගෑපත්ව ඉල්ලා සිටින්නේ මේ අවස්ථාවේදී අපේ සතුරන්ගෙන් අපව ගලවාගන්න කියලයි.”+
16 එසේ පැවසූ ඊශ්‍රායෙල්වරු තමන් පුදපූජා ඔප්පු කරමින් සිටි සියලුම බොරු දෙවිවරුන්ව ඉවත් කර,+ යෙහෝවා දෙවිට නමස්කාර කරන්න පටන්ගත්තෝය.+ ඔවුන් කළ ඒ දේ දෙවි දුටුවේය. ඔහුට තවදුරටත් ඊශ්‍රායෙල්වරුන් අද්දකිමින් සිටි ඒ මහත් වේදනාව බලා සිටීමට නොහැකි විය.+
17 කල් යත්ම අම්මොන්වරු+ ගිලියද් දේශයට+ විරුද්ධව යුද්ධ කිරීම සඳහා එහි ගොස් කඳවුරු බැඳගත්තෝය. එහෙයින් ඊශ්‍රායෙල්වරුද යුද්ධ කිරීම සඳහා මිෂ්පාහි+ කඳවුරු බැඳගත්තෝය.
18 ඒ අවස්ථාවේදී ගිලියද්හි වැසියන් හා එහි අධිපතීන් අතරේ සාකච්ඡාවක් ඇති විය. ඔවුහු මෙසේ කතා වූහ. “අම්මොන්වරුන්ට විරුද්ධව යුද්ධයට යද්දී අපේ නායකයා හැටියට අපි කාව හරි පත් කරගන්න ඕනේ.+ ඒ නිසා ඊට සුදුසු කෙනෙක්ව ගිලියද්හි වැසියන්ගේ ප්‍රධානියා හැටියට අපි පත් කරමු.”+
