ශෙපනියා 2:1-15
2 කිසි ලැජ්ජාවක් නැතුව+ දිගටම දුෂ්ට මාර්ගයේ ගමන් කරන ජනයෙනි, රැස් වෙන්න.+
2 දෙවි තීන්දු කළ දේ ඉටු වන්නේය.+ යෙහෝවා දෙවිගේ උදහස+ ප්‍රකාශ කරන දවස පැමිණ සුළඟට ගසාගෙන යන දහයියා මෙන් සැණෙකින් අවසන් වන්නේය. ඒ දවස පැමිණ යෙහෝවා දෙවිගේ දැවෙන උදහස ඔබ පිට වැගිරීමට පෙර+
3 දේශයේ වසන නිහතමානී සියල්ලෙනි,+ මේ දේ කරන්න. දෙවිගේ නීති පිළිපදින ඔබ සියලුදෙනාම යෙහෝවා දෙවි වෙතට හැරෙන්න.+ ධර්මිෂ්ඨකම සොයා ඒ අනුව ජීවත් වන්න.+ නිහතමානීව කටයුතු කිරීමට වෙර දරන්න.+ එසේ කළොත් යෙහෝවා දෙවිගේ උදහස ප්‍රකාශ කරන දවසේදී සමහරවිට+ ඔබට රැකවරණය ලැබෙයි.+
4 ගාසා නගරයේ සියලු වැසියෝ ඇයව අත්හැර යන්නෝය.+ අෂ්කෙලොන් නගරය පාළු බිමක් වනු ඇත.+ මහ දවාලේ සතුරෝ ඇවිත්+ අෂ්දොද් නගරයේ වැසියන්ව පන්නා දමන්නෝය.+ එක්‍රොන් නගරයද සම්පූර්ණයෙන්ම විනාශ කරනු ලැබේ.+
5 මුහුදුබඩ ප්‍රදේශයේ වාසය කරන කෙරෙතිවරුන්ට මුහුණ දීමට සිදු වන විපත මොන තරම් දරුණුද!+ මන්ද යෙහෝවා දෙවි ඔබට විරුද්ධව තීන්දුවක් දී තිබේ. කානාන් දේශයේ වාසය කරන පිලිස්තිවරුනි, මම ඔබෙන් එක් කෙනෙකුවත් ඉතුරු නොකර ඔබ සියලුදෙනාවම විනාශ කර දමන්නෙමි.+
6 එවිට මුහුදුබඩ ප්‍රදේශය තණබිමක් බවට පත් වෙයි.+ එඬේරු එහි ළිංද බැටළු ගාල්ද සාදාගනු ඇත.
7 යූදා පෙළපතෙන් ඉතුරු වී සිටින අය එහි වාසය කරන්නෝය.+ එහිදී ඔවුන්ට ඇති තරම් කෑම තිබෙනු ඇත. සවස් වරුවේදී ඔවුහු අෂ්කෙලොන් නගරයේ නිවෙස්වලට වී විවේක සුවයෙන් කල් ගෙවනු ඇත. මන්ද ඒ කාලයේදී ඔවුන්ගේ දෙවි වන යෙහෝවා ඔවුන්ට කරුණාව පෙන්වනු ඇත.+ සතුරු දේශවල සිටින ඔවුන්ව ඔහු නැවත එක් රැස් කරනු ඇත.+
8 “මාගේ සෙනඟට මෝවබ්වරු නින්දා කරන ආකාරයත්+ අම්මොන්වරු අපහාසාත්මකව කතා කරන ආකාරයත් මට ඇසුණි.+ මාගේ සෙනඟගේ දේශයට කරන්න යන දේ ගැන ඔවුහු උදම් අනති.”
9 නමුත් ස්වර්ගයේ සේනාවල අධිපතිද ඊශ්‍රායෙල්වරුන්ගේ දෙවිද වන යෙහෝවා මෙසේ පවසන්නේය. “සොදොම් දේශයට සිදු වූ දේ මෝවබ් දේශයටත්+ ගොමෝරාවට සිදු වූ දේ අම්මොන්වරුන්ටත්+ සිදු වන බව ජීවමාන දෙවි වන මම+ සහතිකවම පවසන්නෙමි. ඒ දේශ සදහටම කටු පඳුරුවලින් වැසී ගිය ලුණු වළවල් සහිත පාළු ස්ථාන බවට පත් වනු ඇත.+ නිදහස් වී පැමිණෙන මාගේ සෙනඟ ඔවුන්ගේ දේපළ කොල්ල කා ඔවුන්ගේ දේශය අයිති කරගන්නෝය.+
10 ‘ඔවුන්ගේ අහංකාරකම නිසා ඔවුන්ට ලැබෙන දඬුවම එයයි.+ මන්ද ඔවුහු ස්වර්ගයේ සේනාවල අධිපති වූ යෙහෝවා දෙවිගේ සෙනඟට අපහාස කරමින් උඩඟු ලෙස ක්‍රියා කළෝය.+
11 යෙහෝවා දෙවි ඔවුන්ට විරුද්ධව ගෙනෙන දඬුවම ඉතා භයානකය.+ පොළොවේ වැසියන් නමස්කාර කරන සියලු දෙවිවරුන්ව ඔහු සම්පූර්ණයෙන්ම විනාශ කර දමන්නේය.+ ඉන්පසු සියලුදෙනා තම තමන්ගේ ස්ථානයේ සිට දෙවිට නමස්කාර කරන්නෝය.+ දූපත්වල සියලු වැසියෝද ඔහුට නමස්කාර කරන්නෝය.’+
12 “ඉතියෝපියාවේ වැසියෙනි,+ මගේ කඩුවෙන්+ ඔබත් පහර කා නසිනු ඇත.”
13 “දෙවි උතුරු දෙසින් පිහිටි ඇසිරියාවට විරුද්ධවද විනාශයක් ගෙනෙන්නේය.+ ඔහු නිනිවය නගරය විනාශ කර+ දිය පොදක් නැති පාළුකරයක් බවට පත් කරන්නේය.
14 අවට සිටින සියලු වනසතුන් ඒ දේශයට පැමිණ එහි ලගින්නෝය.+ පැස්තුඩුවාද ඉත්තෑවාද+ ඒ දේශයේ කැඩී බිඳී ගිය කණු+ අතරේ රාත්‍රිය ගත කරන්නෝය. කුරුල්ලෝද කවුළු අතරින් හඬ නඟන්නෝය.* ලීයෙන් කළ කැටයම් කැඩී බිඳී ගොස් සියලු ගොඩනැඟිලි ජරාවාස වී යයි.+
15 ‘මා හා සමාන වෙන කිසිවෙක් නැත’+ කියා සිතමින් කිසි බියක් සැකක් නොමැතිව තේජාන්විතව වැජඹුණු නගරයට ලැබෙන දඬුවම එයයි.+ ඒ නගරය වනසතුන්ගේ තෝතැන්නක් වනු ඇත. ඒ නගරයට සිදු වන දේ දැක සියලු ජනයා පුදුමයට පත් වන්නෝය. එය පසු කර යන සියලුදෙනා ඒ දෙස බලා කවටකම් කරන්නෝය.”+
පාදසටහන්
^ හෝ, “සුළඟේ ශබ්දය නැත්නම් වනසතෙකුගේ හඬ විය හැක.”
