සලමොන්ගේ ගීතිකාව 3:1-11
3 “රාත්‍රියේ මගේ යහනේදී, මා හද දිනාගත් තරුණයාව මම සෙව්වෙමි.+ නමුත් මට ඔහුව සම්බ නොවීය.
2 මා දැන් නැඟිට නගරයට ගොස්+ වීථි දිගේත් මංසන්ධිවලත්+ මගේ පෙම්වතාව සොයන්නෙමි. මා ඔහුව සොයා ගියත් මට ඔහුව සම්බ නොවීය.
3 ‘මගේ පෙම්වතාව ඔබ දුටුවාද’ කියා නගරයේ සක්මන් කරමින් සිටි මුරකරුවන්ගෙන්+ මම විමසුවෙමි.
4 එසේ විමසා මම ඔවුන්ගෙන් සමුගෙන යනවාත් සමඟම මට මගේ පෙම්වතාව හමු විය. මම ඔහුව වැලඳගත්තෙමි. ඔහුගේ දෑත අල්ලාගෙන මාව බිහි කළ තැනැත්තියගේ නිවසට* මම ඔහුව ගෙන ගියෙමි.
5 යෙරුසලමේ ළඳුනේ, මා තුළ ආදර හැඟීම් අවදි කිරීමට වෑයම් නොකරන්න.+ ඔබ එසේ නොකරන බවට මුවදෙනුන්ගේ නාමයෙන්+ දිවුරා මට පොරොන්දු වන්න.”+
6 “පාළුකරයේ සිට පැමිණෙන මේ දේ කුමක්ද? එය ඈතට දිස් වන්නේ දුම් කණු මෙනි. ඒවායින් සුවඳ ලාටු, කට්ටකුමංජල්+ සහ අනර්ඝ සුවඳ ද්‍රව්‍යවල සුවඳ නික්මෙන්නේය.”+
7 “ඒ සලමොන් රජුගේ දෝලාවයි! ඊශ්‍රායෙල්හි එඩිතර සෙබළු+ හැටදෙනෙක් එය පිරිවරාගෙන සිටිති.
8 ඔවුහු සියල්ලෝම කඩුවෙන් සටන් කිරීමට දක්ෂයෝය. රාත්‍රියේදී උවදුරුවලට මුහුණ දීමට සිදු වන නිසා ඔවුහු තම තමන්ගේ ඉණේ කඩුවක් ගසාගෙන සිටිති.”+
9 “ඒ, ලෙබනොන්හි ලීවලින්+ නිමවා තිබෙන සලමොන් රජුගේ දෝලාවයි!
10 එහි කණු රිදීය. ආධාරක කොටස් රන්ය. එහි ආසනය රත්නිල් පැහැගැන්වූ ලොම්වලින් නිමවා තිබුණි. එහි ඇතුළත අලංකාරවත් කළේ යෙරුසලමේ ළඳුන් විසින්ය.”
11 “සියොන්හි ළඳුනේ, එන්න. සිය මව්+ සෑදූ කිරුළ+ දරා සිටින සලමොන් රජුව ඇවිත් බලන්න. ප්‍රීතිය උතුරා ගිය ඔහුගේ මංගල දිනයේදී+ එය ඔහුට පළඳවන ලදි.”
පාදසටහන්
^ හෝ, “ඇතුල් කාමරයට.”
