හිතෝපදේශ 1:1-33
1 ඊශ්‍රායෙල්හි රජු වූ+ දාවිත්ගේ පුත්+ සලමොන්+ ලියූ හිතෝපදේශ+ මේවාය.
2 ඒවා ලියා තිබෙන්නේ යමෙකුට ප්‍රඥාව+ හා උපදෙස් ලබාගැනීමටත්+ ගැඹුරු කාරණා වටහාගැනීමටත්+ හැකි වන පිණිසය.
3 එහි උපදෙස් පිළිපැදීමෙන්+ වටහාගැනීමේ ශක්තිය+ හා හොඳ තීරණ ගැනීමේ හැකියාව+ දියුණු කරගත හැකියි. ධර්මිෂ්ඨ,+ ප්‍රතිපත්තිගරුක+ ජීවිතයක් ගත කිරීමටද එයින් හැකියාව ලැබෙයි.
4 එමෙන්ම අද්දැකීම් අඩු කෙනෙකුට බුද්ධියද+ තරුණයෙකුට දැනුම+ සහ හොඳින් සිතීමේ හැකියාවද+ ලැබෙයි.
5 ප්‍රඥාවන්ත කෙනෙක් උපදෙස්වලට සවන් දී තව තවත් ඉගෙනගනියි.+ හොඳ අවබෝධයකින් කටයුතු කරන තැනැත්තා සෑමවිටම නිසි මඟ පෙන්වීම් ලබාගනියි.+
6 එවැනි කෙනෙක් හිතෝපදේශ, සංකීර්ණ කාරණා,+ ප්‍රඥාවන්තයන්ගේ වදන්+ හා ගැඹුරු කියමන්+ තේරුම්ගැනීමට උත්සාහ කරයි.
7 දැනුම ලබාගැනීමට මුල්ම පියවර වන්නේ යෙහෝවා දෙවිට ගරුබිය දැක්වීමයි.+ එහෙත් අඥානයෝ* ප්‍රඥාව සහ හික්මවීම සුළු කරති.+
8 මාගේ පුත්‍රය, ඔබේ පියාගෙන් ලැබෙන මඟ පෙන්වීම් හා හික්මවීම් පිළිගන්න.+ ඔබේ මවගේ උපදෙස්වලට පිටු නොපාන්න.+
9 ඒවා ඔබේ හිසට අලංකාර ඔටුන්නක් මෙන්ද+ ඔබේ ගෙල පළඳනා අනර්ඝ මාලයක් මෙන්ද+ වන්නේය.
10 මාගේ පුත්‍රය, පව්කාරයන් ඔබව නොමඟ යවන්න උත්සාහ කළහොත් ඔවුන්ට හසු නොවන්න.+
11 සමහරවිට ඔවුන් ඔබට මෙසේ කීමට ඉඩ තිබේ. “අප සමඟ එන්න. අපි මඟ රැක සිට කවරෙකු හෝ මරා දමමු.+ සැඟවී සිට අහිංසකයෙකුව අල්ලාගමු. එයට හේතුවක් අවශ්‍ය නැත.+
12 මිනී වළ+ මිනිසෙකුව ගිල දමන්නාක් මෙන් අපි ඔහුව පණපිටින්ම අල්ලාගෙන නැති කරමු.+
13 අපි නානාවිධ වස්තු රැස් කරගමු.+ කොල්ල කෑ දේවලින් අපේ ගෙවල් පුරවාගමු.+
14 එන්න, අපේ මිතුරු කැලට එකතු වන්න. අපි සියලුදෙනාම එකම මල්ල බෙදාගමු.”+
15 මාගේ පුත්‍රය, ඔවුන් යන මාර්ගයේ නම් නොයන්න.+ ඔවුන්ගෙන් ඈත් වන්න.+
16 ඔවුන් දුවන්නේ දුෂ්ටකම් කරන්නමය.+ ඔවුහු ලේ වගුරුවන්න ඉක්මන් වෙති.+
17 කුරුල්ලෙකු බලා සිටියදී දැලක් එළීමෙන් කිසි පලක් නොමැත.+
18 එමනිසා උන්ව* මරා දමන්න ඔවුහු සැඟවී සිටිති.+ උන්ගේ ලේ වගුරුවන්න ඔවුහු මාන බලති.+
19 අයුතු ලෙස වස්තු රැස් කරන අය ක්‍රියා කරන්නේද එලෙසමය.+ නමුත් අවසානයේදී එය ඔවුන්ගේම විනාශයට මඟ පාදයි.+
20 සැබෑ ප්‍රඥාව+ සියල්ලන්ට ඇසෙන පරිදි වීථිවලද+ ප්‍රධාන මංසන්ධිවලද ශබ්ද නඟා කතා කරන්නීය.+
21 ඇය සෙනඟ ගැවසෙන ස්ථානවල හඬ නඟන්නීය.+ නුවර දොරටු අසල සිට මෙසේ හඬගසන්නීය.+
22 “අනුවණයෙනි, ඔබ කොපමණ කල් අනුවණකමට ආශා කරන්නහුද?+ සමච්චල් කරන්නෙනි, ඔබ තව කොපමණ කල් සමච්චල් කිරීමෙන් ප්‍රීතියක් ලබන්නහුද?+ අඥානයෙනි, ඔබ කොපමණ කල් දැනුම එපා කරන්නහුද?+
23 මාගේ අවවාදය සිතට ගන්න.+ එවිට මම ඔබට ප්‍රඥාව* නොඅඩුව ලබා දෙන්නෙමි.+ මාගේ වචන ඔබට දන්වන්නෙමි.+
24 මා හඬගැසුවත් ඔබ මට සවන් දෙන්නේ නැත.+ මා අත දුන්නත් කිසිවෙක් එය පිළිගන්නේ නැත.+
25 මා දෙන උපදෙස් ඔබ ගණනකටවත් ගන්නේ නැත.+ මාගේ අවවාදත් ඔබ පිළිගන්නේ නැත.+
26 එහෙයින් ඔබේ විපතේදී මම සිනාසෙන්නෙමි.+ විනාශය ඔබ පිටට පැමිණෙද්දී මම ඔබට සරදම් කරන්නෙමි.+
27 විනාශය කුණාටුවක් මෙන්ද විපත්තිය සුළිසුළඟක් මෙන්ද ඔබ පිටට පැමිණ,+ ඔබ බොහෝ දුක් පීඩා හා අසීරුතාවලට මුහුණ දෙන විට+ මම ඔබට සමච්චල් කරන්නෙමි.
28 එවිට ඔබ දිවා රෑ දෙකෙහිම මට හඬගසන නමුත් මම පිළිතුරු නොදෙන්නෙමි.+ ඔබ සෑම තැනකම මාව සෙව්වද සම්බ නොවන්නේය.+
29 මන්ද ඔබ දැනුම එපා කළහුය.+ යෙහෝවා දෙවිට ගරුබිය දක්වන්න ඔබ කැමැත්තක් දැක්වූයේ නැත.+
30 කිසිදාක මාගේ දැනමුතුකම් පිළිගත්තේ නැත.+ ඔබ මාගේ සෑම අවවාදයක්ම හෙළාදුටුවහුය.+
31 එමනිසා ඔබේ ක්‍රියාවල ප්‍රතිඵල විඳින්න ඔබට සිදු වෙයි.+ ඔබ යෙදූ උපායන්වල ප්‍රතිඵල ඔබටම අත් විඳින්න සිදු වෙයි.+
32 අඥානයන්ගේ කැරලිකාරකම නිසා+ ඔවුන්ට මරණය අත් වෙයි.+ ඔවුන්ගේ විනාශයට මුල් වන්නේ කාරණා සැහැල්ලුවට ගැනීමය.+
33 නමුත් මට සවන් දෙන තැනැත්තා කිසි විපතකට භය නොවී+ සුරක්ෂිතව ජීවත් වන්නේය.”+
පාදසටහන්
^ බයිබලයේ, “අඥානයා,” “අනුවණයා” සහ “මෝඩයා” යන වචන භාවිත කර තිබෙන්නේ, යෙහෝවා දෙවිගේ ප්‍රමිතිවලට මුරණ්ඩු ලෙස පිටු පාන කෙනෙකුව විස්තර කිරීමටය.
^ මෙහි අහිංසක මිනිසුන්ව කුරුල්ලන්ට සමාන කර ඇත.
^ මූ.අ., “බලය.”
