හිතෝපදේශ 7:1-27
7 මාගේ පුත්‍රය, මා පවසන දේ සිතේ තබාගන්න.+ මාගේ ආඥා නිධානයක් සේ රැකගන්න.+
2 මාගේ ආඥා පවත්වා දිගු කල් ජීවත් වන්න.+ ඔබේ ඇසේ කලු ඉංගිරියාව මෙන් මාගේ නීතිය රක්ෂා කරන්න.+
3 ඒවා ඔබේ ඇඟිලිවල බැඳගෙන+ ඔබේ සිත නමැති පුවරුවේ ලියාගන්න.+
4 ප්‍රඥාවට,+ “ඔබ මාගේ සහෝදරිය” යයි කියන්න. තේරුම්ගැනීමේ හැකියාවට, “ඔබ මාගේ නෑදෑයෙකි” යයි කියන්න.
5 එවිට ඔබ අනාචාරයේ යෙදෙන* ස්ත්‍රීන්ගේ චාටු බස්වලට+ නොරැවටී ආරක්ෂා+ වනු ඇත.
6 මම මාගේ ගෙයි ජනේලයෙන්+ වීථිය දෙස බැලූ විට,
7 ජීවිතයේ අද්දැකීම් අඩු තරුණයෙකු දුටුවෙමි.+ තරුණයන් අතරින් අඥානයෙකුව*+ සිටි ඔහුට සිදු වන දේ තේරුම්ගැනීමට මම උනන්දු වුණෙමි.
8 ඔහු වීථිය දිගේ ගොස් ඇය සිටින පාරට හැරී, ඇගේ නිවස දෙසට ඇවිදගෙන යයි.+
9 ඔහු ඒ දෙසට යන්නේ සවස් වරුවේ අඳුර වැටීගෙන එන වේලාවේදීය.+ ඔහු පියමං කරන්නේ රාත්‍රියේ ගන අඳුර දසත පැතිරෙන විටයි.
10 බලන්න! ඔහුව හමු වන්න ස්ත්‍රියක් පැමිණ සිටියි. ගණිකාවකගේ ඇඳුමෙන් සැරසී+ සිටින ඇය කපටි සිතක් ඇති ස්ත්‍රියකි.
11 ඇය කටකාරය, හිතුවක්කාරය.+ කොයි වේලෙත් නිවසේ රැඳී නොසිටියි.+
12 විටක ඇය එළිමහනේ සිටියි. විටක ඇය ප්‍රධාන මංසන්ධිවල ගැවසෙමින් සිටියි.+ සෑම පාරකම මුල්ලකට වී ඇය මඟ බලාගෙන සිටියි.+
13 ඇය ඒ තරුණයා දෙසට දුව ගොස් ඔහුව සිප වැලඳගනියි.+ ඇය කිසි භයක් සැකක් නොමැතිව ඔහුට මෙසේ කියයි.
14 “මම අද හවුල් පූජා ඔප්පු කළෙමි.+ මගේ භාර ඉටු කළෙමි.+
15 ඒ නිසයි මා ඔබව හමු වීමට ආවේ. මම ඔබව සොයා ආවෙමි.
16 ඊජිප්තුවෙන් ගෙනා+ පාට පාට ලිනන් ඇතිරිලිවලින් මාගේ ඇඳ සැරසුවෙමි.
17 මාගේ යහන සුවඳ ලාටු, අගිල්* සහ කුරුඳුවලින් සුවඳවත් කළෙමි.+
18 එන්න, උදෑසන වන තුරු අපි පෙම් බස් දොඩමින් ආදරයෙන් මත් වී සිටිමු.+
19 මගේ ස්වාමිපුරුෂයා ගෙදර නැත. ඔහු දුර ගමනක් ගොස් ඇත.+
20 මුදල් මල්ලක්ද ඔහු රැගෙන ගියේය. ඔහු නැවත ගෙදර එන්නේ පුන්සඳ දකින දවසේදීය.”
21 ඇය බොහෝ මායම්වලින් ඔහුව රවටාගෙන ඇත.+ චාටු බස්වලින් ඔහුව වශී කරගෙන ඇත.+
22 විගස, ඔහු ඇය පසුපස යන්නේය.+ මරන්න ගෙන යන ගොනෙකු මෙන්ද විලංගු දමා දඬුවම් කිරීමට ගෙන යන මෝඩයෙකු මෙන්ද ඔහු ඇය පසුපස යන්නේය.
23 ඔහු හදිස්සියේම උගුලකට හසු වන කුරුල්ලෙකු මෙනි.+ ඔහුගේ ජීවිතය අනතුරේ ඇති බව ඔහු නොදනී.+ ඊතලයක් ඔහුගේ අක්මාව පසාරු කරගෙන යන තුරු ඔහු කිසිවක් නොදනී.+
24 ඉතින් මාගේ පුත්‍රයෙනි, මට සවන් දී මාගේ වදන් පිළිගන්න.+
25 ඇගේ මාර්ග වෙතට ඔබේ සිත ඇදී යන්න ඉඩ නොදෙන්න. මංමුළා වී ඇගේ මාවත්වලට හැරී නොයන්න.+
26 මන්ද ඇය නිසා බොහෝදෙනෙකුට තම ජීවිත අහිමි වී ඇත.+ ඇගෙන් මැරුම් කෑ අය අප්‍රමාණය.+
27 ඇගේ නිවස බැස යන්නේ මිනී වළටයි.+ මිනී වළේ ගැඹුරුම තැන් වෙතට එය බැස යයි.+
