ෆිලෙමොන් 1:1-25
1 මෙම ලිපිය ලියන්නේ ක්‍රිස්තුස් යේසුස් වෙනුවෙන් සිරකරුවෙකු වී සිටින+ පාවුල් සහ අපගේ සහෝදර තිමෝතිය.+ මෙය ලියන්නේ අපගේ ප්‍රේමණීය හවුල් සේවකයෙකු වන ෆිලෙමොන් වෙතටය.+
2 එලෙසම අපගේ සහෝදරිය වන අෆියා වෙතටත් අප සමඟ ක්‍රිස්තුස්ගේ හේවායෙකු වී සිටින+ ආකිපස්+ සහ ඔබේ නිවසෙහි රැස් වන සභාව වෙතටත්ය.+
3 අපගේ පියාණන් වන දෙවිගෙන් හා ස්වාමීන් වන යේසුස් ක්‍රිස්තුස්ගෙන් ඔබ සියලුදෙනාටම මහත් කරුණාවත් සමාදානයත් ලැබේවා!+
4 මා දෙවිට යාච්ඤා කරන විට ඔබ ගැන සඳහන් කරන සෑම අවස්ථාවකදීම මම නිරතුරුවම දෙවිට ස්තුති කරමි.+
5 මන්ද ස්වාමීන් වන යේසුස් කෙරෙහි ඔබට තිබෙන විශ්වාසය සහ සියලු ශුද්ධ තැනැත්තන් සඳහා ඔබට තිබෙන ප්‍රේමය ගැන මට නිතරම ආරංචි වේ.+
6 එලෙසම අප සියලුදෙනාම ක්‍රිස්තුස්ට බැඳී සිටීම හේතුවෙන් බොහෝ යහපත් දේවල් භුක්ති විඳින බව ඔබ තේරුම්ගෙන ඇත. එහෙයින් අන් අයට මෙන් ඔබටත් විශ්වාසයක් ඇති නිසා+ ඒ විශ්වාසය මගින් යහපත් දේ කිරීමට පෙලඹීමක් ඔබ තුළ ඇති වෙන්න කියා ප්‍රාර්ථනා කරමි.
7 සහෝදරය, ඔබ පෙන්වූ ප්‍රේමය නිසා ශුද්ධ තැනැත්තන්ට මහත් සැනසීමක් හා ධෛර්යයක් ලැබී ඇත.+ එය මගේ ඉමහත් ප්‍රීතියටත් සැනසිල්ලටත් හේතුවකි.+
8 ක්‍රිස්තුස්ගේ නාමයෙන් කිසි බියක් සැකක් නැතුව ඔබ කළ යුතු දේවල් ගැන පැවසීමට+ මට නිදහස තිබුණත්,
9 මම එසේ නොකරමි. ඒ වෙනුවට මා සඳහන් කිරීමට යන මේ කාරණයේදී ඔබට උනන්දු කරන්නේ ඔබට තිබෙන ප්‍රේමය සැලකිල්ලට ගෙන කටයුතු කිරීමටය.+ එලෙසම මා ක්‍රිස්තුස් යේසුස් වෙනුවෙන් සිරකරුවෙකු+ වී සිටින වයසින් මුහුකුරා ගිය කෙනෙකු බව සැලකිල්ලට ගන්නා ලෙසද ඉල්ලමි.
10 මා දැන් උත්සාහ කරන්නේ මා දරුවෙකු සේ සලකන+ ඔනෙසිමස්+ සම්බන්ධයෙන් ඔබට යම් මඟ පෙන්වීමක් දීමටයි. මා සිරභාරයේ සිටියදී මම ඔහුට පියෙකු මෙන් සැලකුවෙමි.+
11 කලින් ඔහුගෙන් ඔබට කිසි ප්‍රයෝජනයක් නොතිබුණත් දැන් ඔහු ඔබටත් මටත් ප්‍රයෝජනවත් කෙනෙකු බවට පත් වී ඇත.+
12 මම දැන් ඔහුව ඔබ වෙතට එවන්නෙමි. ඔහු මගේ හදවතට ඉතා සමීප කෙනෙකි.+
13 මා ශුභාරංචිය හේතුවෙන් සිරභාරයේ සිටින මේ මොහොතේදී+ ඔබ වෙනුවට+ ඔහුව තබාගෙන මගේ වැඩකටයුතුවලට ඔහුගෙන් දිගටම යම් උපකාරයක් ලබාගැනීමට මම කැමැත්තෙමි.
14 නමුත් ඔබේ කැමැත්ත නැතුව කිසිවක් කිරීමට මා සතුටු නැත. ඔබ මේ සම්බන්ධයෙන් යම් යහපත් දෙයක් කිරීමට පෙලඹුණොත් එය සිදු විය යුත්තේ වෙනත් කෙනෙකුගේ බල කිරීම නිසා නොව ඔබේම කැමැත්තෙනි.+
15 සමහරවිට ඔහු කලකට ඔබව අත්හැර ගියේ සැමදා ඔබ සමඟ සිටීමට විය හැක.
16 මෙතැන් පටන් ඔහුව ඔබේ දාසයෙකු ලෙස නොව+ ඔබේම ප්‍රේමණීය සහෝදරයෙකු ලෙස+ සැලකීමට අමතක නොකරන්න. මාත් ඔහුව සලකන්නේ එලෙසය. ඔහුව දාසයෙකු හා ස්වාමීන්ගේ අනුගාමිකයෙකු ලෙස+ නැවත භාරගන්නා විට ඒ දේ අමතක නොකරන්න.
17 ඔබ මාව හවුල්කරුවෙකු ලෙස+ සලකා සාදරයෙන් පිළිගත් ලෙසම ඔහුවද සාදරයෙන් පිළිගන්න.+
18 මීට අමතරව ඔහු අතින් ඔබට යම් වරදක් සිදු වී ඇත්නම් හෝ ඔහු ඔබට ණය වී සිටී නම් හෝ ඒ ණය ගෙවීමට මම කැමැත්තෙමි.
19 මේ දේ පාවුල් වන මා ලියන්නේ මගේම අතින්ය.+ ඒ නිසා ගෙවිය යුතු දේ ගෙවා දැමීමට මම පොරොන්දු වෙමි. ඇත්තටම ඔබේ ජීවිතය ගැන ඔබ මට ණයගැතිව සිටින බව ඔබට මතක් කර දීමට අවශ්‍ය නැත.
20 මගේ සහෝදරය, අප හැමෝම ස්වාමීන්ගේ අනුගාමිකයන් වන නිසා ඔබෙන් යම් උපකාරයක් බලාපොරොත්තු වීම සුදුසු බව පෙනේ. එහෙයින් ක්‍රිස්තුස්ගේ අනුගාමිකයෙකු ලෙස මගේ සිත සතුටු කරන ලෙස ඉල්ලමි.+
21 මා ඔබට මේ දේවල් ගැන ලියන්නේ ඔබ ඊට එකඟව ක්‍රියා කරන බවට විශ්වාසයක් ඇතුවය. ඇත්තෙන්ම මා ඔබෙන් ඉල්ලන දේටත් වඩා ඔබ කරන බව මට නිසැකය.+
22 ඊට අමතරව මට නවාතැනක්+ සූදානම් කරන ලෙසද ඔබෙන් ඉල්ලමි. මන්ද ඔබ සියලුදෙනාගේ යාච්ඤා නිසා+ ඔබ වෙනුවෙන් මට ළඟදීම නිදහස ලැබෙයි+ කියා මම බලාපොරොත්තු වෙමි.
23 ක්‍රිස්තුස් යේසුස් වෙනුවෙන් මා සමඟ සිරභාරයේ සිටින එපෆ්‍රස්ද+ ඔබට සුබ පැතුම් එවයි.
24 එමෙන්ම මා සමඟ හවුලේ සේවය කරන මාක්, අරිස්තාකස්,+ දේමස්+ සහ ලූක් මේ සමඟ ඔබට සුබ පැතුම් එවති.
25 යහපත් ආකල්පයක් ඇතුව සිටින ඔබ සියලුදෙනාට ස්වාමීන් වන ක්‍රිස්තුස්ගේ මහත් කරුණාව ලැබේවා!+
