1 සාමුවෙල් 30:1-31
30 දාවිත් සහ ඔහුගේ සෙනඟ ෂික්ලග්+ වෙත ගමන් කරමින් සිටි තුන්වෙනි දවසේදී අමලෙක්වරු+ දකුණු දෙසින් තිබෙන ප්‍රදේශවලටත්* ෂික්ලග් නගරයටත් පහර දුන්නෝය. ඔවුහු ෂික්ලග් නුවර ගින්නෙන් දවා
2 එහි සිටි ස්ත්‍රීන්වද+ බාල මහලු සියලුදෙනාවද පැහැරගෙන ගියෝය. ඔවුහු කිසිවෙකු නොමරා සියලුදෙනාවම වහල්කමට ගෙන ගියෝය.
3 දාවිත් සහ ඔහුගේ සෙනඟ එතැනට පැමිණි විට මුළු නුවරම ගිනිබත් වී තිබුණු බවත් තම භාර්යාවන් හා දූපුතුන් පැහැරගෙන ගොස් තිබුණු බවත් දුටුවෝය.
4 දාවිත් සහ ඔහු සමඟ සිටි සියලුදෙනාම එය දැක මහත් හඬින් හඬන්න පටන්ගත්තෝය.+ තවත් කඳුළු සැලීමට නොහැකි වන තරමටම ඔවුහු හැඬුවෝය.
5 දාවිත්ගේ භාර්යාවන් දෙදෙනා වන යෙෂ්‍රෙයෙල්හි අහිනොවම්වද+ කර්මෙල්හි වැසියෙකු වූ නාබල්ගේ බිරිඳව සිටි අබිගායිල්වද+ පැහැරගෙන ගොස් තිබිණ.
6 දාවිත් බොහෝ සෙයින් අධෛර්යයට පත් විය.+ මන්ද සෙනඟ තම තමන්ගේ දූපුතුන් නැති වූ නිසා මහත් කෝපයෙන් සිටියෝය.+ ඔවුහු දාවිත්ට ගල් ගසන්න පවා සූදානම් වූහ.+ එබැවින් දාවිත් තම දෙවි වන යෙහෝවාගෙන් උපකාර පැතුවේය. ඉන්පසු ඔහු ධෛර්යයවත් විය.+
7 ඉන්පසු දාවිත්, “ඒෆොද් හැට්ටය+ මා ළඟට ගෙනෙන්න” කියා අහිමෙලෙක්ගේ පුත්‍රයා වූ පූජක අබියාතර්ට+ කීවේය. අබියාතර්ද ඒෆොද් හැට්ටය දාවිත් ළඟට ගෙන ගියේය.
8 එවිට දාවිත්, යෙහෝවා දෙවිගෙන් මෙසේ ඇසුවේය.+ “මම මේ කොල්ලකරුවන්ව ලුහුබැඳ යන්නද? මට ඔවුන්ව අල්ලගන්න පුළුවන් වෙයිද?” දෙවිද,+ “යන්න. ඔබට නිසැකවම ඔවුන්ව අල්ලාගැනීමට හැකි වන්නේය. ඔවුන් පැහැරගෙන ගිය සෙනඟවද ඔබට නිදහස් කරගැනීමට හැකි වනු ඇත”+ කියා දාවිත්ට කීවේය.
9 එය ඇසූ විගස දාවිත් මිනිසුන් හයසියයක්+ සමඟ එතැනින් පිටත් වී බෙසොර් නිම්නය දක්වා ගමන් කළේය. සෙනඟ අතරින් කිහිපදෙනෙක් ඉන් එහාට ගමන් නොකළෝය.
10 සෙනඟගෙන් දෙසීයදෙනෙක් බොහෝ වෙහෙසට පත්ව සිටි නිසා ඔවුන්ට බෙසොර් නිම්නය+ හරහා ගමන් කිරීමට නොහැකි විය. නමුත් දාවිත් සහ අනික් හාරසියදෙනා දිගින් දිගටම කොල්ලකරුවන් පසුපස ලුහුබැඳ ගියෝය.+
11 කොල්ලකරුවන්ව ලුහුබැඳ යන විට ඊජිප්තු ජාතිකයෙකුව+ ඔවුන්ට හමු විය. ඔහු සිටියේ කෙතකය. ඔවුහු ඒ මිනිසාව දාවිත් ළඟට ගෙන ගොස් ඔහුට කන්න රොටිද බොන්න වතුරද දුන්නෝය.
12 ඔවුහු වියළි අත්තික්කා කුට්ටියකින් කැබැල්ලක්ද වියළි මිදි කුට්ටි දෙකක්ද ඔහුට කන්න දුන්නෝය.+ ඔහු කෑ පසු ප්‍රාණවත් විය.+ මන්ද දවස් තුනක්ම ඔහුට කෑමවත් වතුරවත් ලැබී තිබුණේ නැත.
13 ඉන්පසු දාවිත්, “ඔබ කොහේ ඉඳන්ද ආවේ? ඔබ කාගේ කවුද” කියා ඔහුගෙන් ඇසුවේය. ඔහු මෙසේ පැවසුවේය. “මම ඊජිප්තු ජාතිකයෙක්. මම අමලෙක් ජාතිකයෙකුගේ දාසයෙක්. දවස් තුනකට කලින් මම ලෙඩ වුණා. ඒ නිසා මගේ ස්වාමියා මාව මෙහෙ දාලා ගියා.+
14 අපි තමයි කෙරෙතිවරුන්ගේ දේශයේ+ දකුණු පළාතටත් යූදා දේශයටත් කාලෙබ්ගේ දේශයේ+ දකුණු පළාතටත් පහර දුන්නේ. අපි ෂික්ලග් නුවර සම්පූර්ණයෙන්ම පුලුස්සා දැම්මා.”
15 එවිට දාවිත්, “ඔබ සමඟ සිටිය කොල්ලකරුවන් ළඟට මාව එක්කගෙන යන්න පුළුවන්ද” කියා ඔහුගෙන් ඇසුවේය. ඔහුද, “ඔබ මාව මරන්නේ නැහැ කියලත් මගේ ස්වාමියාගේ අතට මාව පාවා දෙන්නේ නැහැ+ කියලත් දෙවිගේ නමින් දිවුරුවොත්+ මම ඔවුන් ළඟට ඔබව ගෙන යන්නම්” කියා දාවිත්ට කීවේය.
16 එසේ කී පසු ඔහු දාවිත්ව කොල්ලකරුවන් සිටි තැනට ගෙන ගියේය.+ කොල්ලකරුවෝ සෑම තැනකම විසිර සිටියෝය. ඔවුහු පිලිස්තිවරුන්ගේ දේශයෙන් හා යූදා දේශයෙන් බොහෝ වස්තු කොල්ල කෑ නිසා+ කමින් බොමින් විනෝද වෙමින් සිටියෝය.+
17 ඔවුන්ව සම්පූර්ණයෙන්ම විනාශ කර දැමීමට තීරණය කළ දාවිත් උදෑසන සිට සවස් වන තුරුම ඔවුන්ට පහර දුන්නේය. ඔටුවන් පිට පලා ගිය තරුණයන් හාරසියදෙනෙකු හැර වෙන කිසිවෙක් ගැලවුණේ නැත.+
18 දාවිත්, අමලෙක්වරුන් පැහැරගත් සියල්ලම නැවත ලබාගත්තේය.+ ඔහුගේ භාර්යාවන් දෙදෙනාවද ඔහු ගලවාගත්තේය.
19 නැති වූ සියල්ලම ඔවුහු නැවත ලබාගත්තෝය. පැහැරගෙන ගිය ඔවුන්ගේ පුත්‍රයන්වද දූවරුන්වද බාල මහලු සියලුදෙනාවද දාවිත් ගලවාගත්තේය.+ ඔවුන්ගෙන් කොල්ල කෑ සියලු වස්තුද ඔහු නැවත ලබාගත්තේය.
20 දාවිත් අමලෙක්වරුන් ළඟ තිබූ සියලු සතුන්වද ගත්තේය. ඔවුහු තමන්ගෙන් කොල්ල කෑ සතුන්ට ඉදිරියෙන් අමලෙක්වරුන්ගේ සතුන්වද දක්කාගෙන ගියෝය. සෙනඟ උන්ව පෙන්වමින්, “මේ දාවිත්ගේ කොල්ලය” කියා කීවෝය.+
21 පසුව දාවිත් බෙසොර් නිම්නය ළඟට පැමිණියේය. බොහෝ වෙහෙසට පත්ව එහි නතර වී සිටි මිනිස්සු දෙසීයදෙනා+ දාවිත් සහ ඔහුගේ සෙනඟ ළඟට පැමිණියෝය. එවිට දාවිත් ඔවුන්ගෙන් සැප දුක් විමසුවේය.
22 නමුත් දාවිත් සමඟ සිටි වැදගැම්මකට නැති දුෂ්ට පුරුෂයෝ+ මෙසේ කීවෝය. “ඔවුන් අපිත් එක්ක ආවේ නැහැ. ඒ නිසා අපි කොල්ල කෑ කිසිම දෙයක් ඔවුන්ට දෙන්න අවශ්‍ය නැහැ. ඔවුන්ගේ භාර්යාවන් හා දරුවන් විතරක් රැගෙන ඔවුන්ට මෙහෙන් යන්න කියමු.”
23 නමුත් දාවිත් ඔවුන්ට මෙසේ කීවේය. “සහෝදරයෙනි, එහෙම කරන එක හොඳ නැහැ. අපිට මේ හැම දෙයක්ම දුන්නේ යෙහෝවා දෙවියි.+ අපිව ආරක්ෂා කරලා+ කොල්ලකරුවන්ව අපේ අතටම හසු කර දුන්නේ+ ඔහුයි.
24 ඉතින් ඔබ කියූ කතාවට එකඟ වෙන්නේ කොහොමද? යුද්ධයට ගිය අයට වගේම බඩු මලු ළඟ නැවතී සිටි අයටත් කොටසක් ලැබෙනවා.+ දෙගොල්ලන්ටම කොල්ලය එක සමානව බෙදා දිය යුතුයි.”+
25 එදා පටන් අද දක්වාම දාවිත් කී ඒ දේ ඊශ්‍රායෙල්හි පනතක් හා නියෝගයක් ලෙස පවතින්නේය.+
26 දාවිත් ෂික්ලග් වෙත පැමිණි විට ඔහු තම මිත්‍රයන් වන යූදාහි සිටි වැඩිමහල්ලන්ට කොල්ලයෙන් කොටසක් යැව්වේය.+ ඔහු ඔවුන්ට මෙසේද දන්වා යැවීය. “මේ යෙහෝවා දෙවිගේ සතුරන්ගෙන් කොල්ල කෑ දෙයින් ඔබේ කොටසයි. ඒක තෑග්ගක්* හැටියට පිළිගන්න.”+
27 බෙතෙල්හිද+ රාමොත්හි+ දකුණු දිශාවේද යත්තීර්හිද+ සිටි අයටත්
28 අරෝයේර්හිද සිප්මොත්හිද එෂ්තෙමෝවාහිද+ සිටි අයටත්
29 රාකල්හිද යෙරාමෙයෙල්වරුන්ගේ+ හා කේනිවරුන්ගේ නුවරවලද විසූ අයටත්+
30 හොර්මාහිද+ බෝර්ආෂාන්හිද+ ආතක්හිද
31 හෙබ්‍රොන්හිද සිටි අයටත්+ දාවිත් කොටසක් බැගින් යැව්වේය. දාවිත් හා ඔහුගේ සෙනඟ ගිය සියලු ස්ථානවල විසූ අයට කොටසක් ලැබිණ.
