2 සාමුවෙල් 19:1-43
19 පසුව යෝවාබ්ට මෙසේ ආරංචි විය. “රජ තවමත් අබ්සලොම් ගැන හඬා වැලපෙනවා.”+
2 සෙනඟටද මෙසේ දන්වන ලදි. “රජ ඔහුගේ පුත්‍රයාගේ මරණය ගැන බොහෝ සෙයින් දුක් වෙනවා.” එබැවින් එදින ඔවුන්ට ජයග්‍රහණය අත් වී තිබුණද මුළු සෙනඟ ඉතා ශෝකයෙන් සිටියෝය.
3 යුධ පිටියෙන් පලා යෑමට සිදු වීම නිසා ලැජ්ජාවට පත් වූ සෙනඟක් මෙන් ඔවුහු හොර රහසින්ම නුවරට ඇතුල් වූහ.+
4 රජද තම මුහුණ වසාගෙන, “අනේ මගේ පුතා අබ්සලොම්, අනේ මගේ පුතා” යයි කියමින් මහත් හඬින් හඬා වැලපුණේය.+
5 අන්තිමේදී යෝවාබ්, රජු ළඟට පැමිණ ඔහුට මෙසේ කීවේය. “ඔබේ ජීවිතෙත්+ ඔබේ දූපුතුන්ගේ ජීවිතත්+ ඔබේ භාර්යාවන්ගේ+ හා උපභාර්යාවන්ගේ ජීවිතත්+ බේරාගත් ඔබේ සේවකයන්ව අද ඔබ ලැජ්ජාවට පත් කළා.
6 ඔබේ නිලධාරීන්ගෙන්වත් ඔබේ සේවකයන්ගෙන්වත් ඔබට කිසි වැඩක් නැහැයි කියලා ඔබ අද පෙන්වුවා. ඔබට ප්‍රේම කරන අයට ඔබ වෛර කරනවා. ඔබට වෛර කරන අයට ඔබ ප්‍රේම කරනවා. අපි හැමෝම මැරිලා අබ්සලොම් විතරක් ඉතුරු වුණා නම් අද ඔබ සතුටින් ඉඳියි කියලා දැන් මම දන්නවා.
7 ඒ නිසා දැන් මෙතැනින් නැඟිටලා ඔබේ සේවකයන් ඉදිරියට ගිහින් ඔවුන්ගේ හිත සැනසෙන විදිහට කතා කරන්න.+ මම යෙහෝවා දෙවි ඉදිරියේ දිවුරලා කියන්නේ, ඔබ ඔවුන් සමඟ කතා කළේ නැත්නම් අද රෑ වෙද්දී ඔබේ එක සේවකයෙකුවත් මෙහෙ රැඳී ඉන්න එකක් නැහැ.+ ඔවුන් හැමෝම ඔබව අත්හැරලා යයි. ඔබේ තරුණ වයසේ ඉඳන් මේ වෙනකම් ඔබට සිදු වුණ හැම විපතකටම වඩා එය දරුණු වෙයි.”
8 එය අසා රජ නුවර දොරටුව ළඟට ගොස් හිඳගත්තේය.+ පසුව, “රජු නුවර දොරටුව අසල ඉන්නවා” කියා සෙනඟට දන්වන ලදි. එය අසා සෙනඟ රජු වෙතට එන්න පටන්ගත්තෝය.
ඊශ්‍රායෙල්වරු* තම තමන්ගේ නිවෙස්වලට පලා ගොස් සිටියෝය.+
9 පසුව ඊශ්‍රායෙල්හි සියලු ගෝත්‍ර අතරේ විවාදයක් හටගත්තේය. ඔවුහු එකිනෙකා අතරේ මෙසේ කතා වූහ. “රජ්ජුරුවෝ තමයි අපේ සතුරන්ගේ අතින් අපිව බේරගත්තේ.+ පිලිස්තිවරුන්ගේ අතිනුත් අපිව බේරගත්තා. නමුත් අබ්සලොම් නිසා ඔහු දේශයෙන් පලා ගියා.+
10 අපි රජ හැටියට අභිෂේක කළ අබ්සලොම්+ යුද්ධයේදී මැරුණා.+ රජ්ජුරුවන්ව ආපහු මෙහෙට කැඳවාගෙන එන්නේ නැත්තේ ඇයි?”+
11 දාවිත් රජ පූජකයන් වන සාදොක්ට+ සහ අබියාතර්ට+ මෙසේ දැන්වූවේය. “යූදා ගෝත්‍රයේ වැඩිමහල්ලන්ට+ මෙහෙම කියන්න. ‘ඊශ්‍රායෙල් සෙනඟ එකිනෙකා අතරේ කතා වන දේ රජුට දැනගන්න ලැබුණා. නමුත් රජුගේම ගෝත්‍රයේ අය ඔහුව මාලිගාවට ගෙන්වාගැනීමට කිසිවක් නොකරන්නේ ඇයි?
12 මාගේ සහෝදරයෙනි, ඔබ මගේම පවුලේ අය.*+ ඇයි ඔබ මාව ආපහු ගෙන්වාගන්න කිසිවක් නොකරන්නේ?’
13 ඔබ අමාසාට මෙහෙම කියන්න.+ ‘ඔබ මගේම සහෝදරයෙක්.* ඒ නිසා මම යෝවාබ් වෙනුවට ඔබව+ හමුදාපති හැටියට පත් කරනවා. මම එහෙම කළේ නැත්නම් දෙවි මට දැඩි ලෙස දඬුවම් කළ යුතුයි.’”+
14 එසේ පවසමින් ඔහු යූදාහි සියලු පුරුෂයන්ගේ සිත් දිනාගත්තේය. එබැවින් ඔවුහු එකා මෙන්+ රජුට මෙසේ දන්වාහැරියෝය. “රජ්ජුරුවනි, ඔබේ සේවකයන් සමඟ ආපහු මෙහෙට එන්න.”
15 එබැවින් රජ නැවත ආවේය. ඔහු යොර්දාන් ගඟ අසලට පැමිණ නතර විය. රජුව යොර්දාන් ගඟෙන් මෙගොඩට කැඳවාගෙන එන පිණිස යූදාහි මනුෂ්‍යයෝ ගිල්ගාල් නුවරට+ ගියෝය.
16 ඒ අවස්ථාවේදී බෙන්ජමින් ගෝත්‍රයට අයත් බහුරීම්හි+ ජීවත් වූ ගෙරාගේ පුත්‍රයා+ වන ෂිමෙයි+ යූදාහි මනුෂ්‍යයන් සමඟ දාවිත් රජුව හමු වීමට කඩිමුඩියේ ගියේය.
17 ඔහු සමඟ බෙන්ජමින් ගෝත්‍රයට අයත් මිනිස්සු දහසක්ද සිටියෝය. (සාවුල්ගේ නිවසේ සේවය කළ ෂීබාද+ ඔහුගේ පුත්‍රයෝ පහළොස්දෙනාද+ ඔහුගේ සේවකයෝ විසිදෙනෙක්ද ෂිමෙයි සමඟ සිටියෝය. රජු යොර්දාන් ගඟ ළඟට පැමිණෙන්න කලින් ඔවුහු සියලුදෙනාම එතැනට ආවෝය.
18 රජුව හා ඔහුගේ ගෙයි වැසියන්ව මෙගොඩට කැඳවාගෙන එන පිණිසත් රජුගේ කැමැත්ත ඉටු කර දෙන පිණිසත් ෂීබා ගඟෙන් එගොඩට ගියේය.)+ රජු ගඟෙන් එගොඩ වීමට යන විට ගෙරාගේ පුත්‍රයා වන ෂිමෙයි එතැනට පැමිණ ඔහු ඉදිරියේ වැටී+
19 මෙසේ කීවේය. “අනේ මගේ ස්වාමීනි, ඔබ යෙරුසලම අත්හැර ගිය දවසේදී මම ඔබට කළ වරදට මට සමාවෙන්න. අනේ, ඒක මතක තියාගන්න එපා.+ ඒක ඔබේ හිතෙන් අයින් කරන්න.+
20 මම කළේ වරදක් කියලා මම දන්නවා. මගේ ස්වාමීන් වන රජ්ජුරුවනි, යෝසෙප්ගේ පෙළපතේ+ අනික් හැමෝටම ඉස්සෙල්ලා මම ඔබව හමු වෙන්න ආවේ ඒ නිසයි.”
21 එය ඇසූ විගස ෂෙරුයියාගේ පුත්‍රයා+ වන අබිෂයි,+ රජුට මෙසේ කීවේය. “ෂිමෙයි, යෙහෝවා දෙවිගේ අභිෂේක ලත් තැනැත්තාට අපහාස කළ නිසා ඔහුව මරලා දාන්න ඕනේ.”+
22 නමුත් දාවිත් රජ මෙසේ කීවේය. “ෂෙරුයියාගේ පුත්‍රයෙනි, ඔබ මගේ කැමැත්තට විරුද්ධව කටයුතු කරන්නේ ඇයි?+ ඔබ මේ කාරණය ගැන කරදර වෙන්න ඕනේ නැහැ.+ මේක මගේ ප්‍රශ්නයක්. අද ඊශ්‍රායෙල් කෙරෙහි මගේ රජකම ස්ථිර වුණා. ඒ නිසා අද ඊශ්‍රායෙල් දේශයේ එක මනුෂ්‍යයෙක්වත් මරන්න අවසර නැහැ.”+
23 ඉන්පසු රජ, “ඔබව මරන්නේ නැහැ” කියා ෂිමෙයිට පැවසුවේය. රජ එසේ නොකරන බවට ෂිමෙයිට දිවුරුවේය.+
24 සාවුල්ගේ මුනුපුරා වන මෙෆිබොෂෙත්ද+ රජුව හමු වීමට ආවේය. රජු ගිය දා සිට ආපසු සමාදානයෙන් පැමිණි දවස දක්වාම ඔහු තම පාද සෝදාගෙන තිබුණේවත්+ රැවුල කපා තිබුණේවත්+ ඇඳුම් සෝදාගෙන තිබුණේවත් නැත.
25 ඔහු යෙරුසලමේදී රජුව හමු වීමට ගිය විට රජ ඔහුගෙන් මෙසේ ඇසුවේය. “මෙෆිබොෂෙත්, ඇයි ඔබ මා සමඟ ආවේ නැත්තේ?”
26 එවිට ඔහු මෙසේ පැවසුවේය. “මගේ ස්වාමීනි, රජ්ජුරුවනි, ඔබේ සේවකයා වන මට ඇවිදින්න අපහසු නිසා,+ ‘මම බූරුදෙනක්ව ගමනට සූදානම් කරගෙන උගේ පිටේ නැඟලා රජු සමඟ යනවා’ කියලා මගේ සේවකයාට කිව්වා. හැබැයි ඔහු+ මාව රැවැට්ටුවා.
27 ඔහු මගේ ස්වාමීන් වන රජ්ජුරුවන්ට මං ගැන බොරු කිව්වා.+ මගේ ස්වාමීනි, රජ්ජුරුවනි, ඔබ සැබෑ දෙවිගේ දූතයෙක් වගේ.+ ඒ නිසා ඔබට යහපත් කියලා හිතෙන දෙයක් කරන්න.
28 මගේ පියාගේ මුළු පෙළපතම නැත්තටම නැති කරලා දාන්න මගේ ස්වාමීන් වන රජ්ජුරුවන්ට තිබුණා. නමුත් ඔබ එසේ නොකර ඔබ සමඟ එකට වාඩි වෙලා කෑම කන්න ඔබේ සේවකයාට ඉඩ දුන්නා.+ ඉතින් තවත් දේවල් ඔබෙන් ඉල්ලන්න මට අයිතියක් තියෙනවාද?”+
29 එහෙත් රජ, “ඔබ මේ ගැන තවත් කතා කරන්නේ ඇයි? ගිහින් ෂිබා සමඟ කෙත බෙදාගන්න”+ කියා මෙෆිබොෂෙත්ට කීවේය.
30 එවිට මෙෆිබොෂෙත්, “ඔහු මුළු කෙතම ගත්තාවේ.+ මගේ ස්වාමීන් වන රජ්ජුරුවන් දැන් සමාදානයෙන් මාලිගාවට ආව නිසා ඒ ගැන මම සතුටු වෙනවා. මට ඒ ඇති” කියා දාවිත්ට කීවේය.
31 ගිලියද්හි ජීවත් වූ බාසිල්ලයි,+ රොගේලීම් සිට පැමිණ රජුව යොර්දාන් ගඟ ළඟට කැඳවාගෙන ගියේය.
32 බාසිල්ලයි ඉතා මහලු කෙනෙකි. ඔහුට වයස අවුරුදු අසූවක් විය.+ ඔහු ඉතා ධනවත් පුද්ගලයෙකි.+ රජු මහනායිම්හි සිටි දවස්වලදී ඔහුට කෑම බීම සැපයුවේ බාසිල්ලයිය.+
33 රජද, “ඔබත් මා සමඟ ගඟෙන් එගොඩ වී යෙරුසලමට යන්න එන්න. එහිදී මම ඔබට කන්න බොන්න දී ඔබව රැකබලා ගන්නම්”+ කියා බාසිල්ලයිට කීවේය.
34 නමුත් බාසිල්ලයි රජුට මෙසේ කීවේය. “මම තව වැඩි කල් ජීවත් වෙන්නේ නැහැ. ඒ නිසා රජ්ජුරුවන් සමඟ යෙරුසලමට ගියාට ප්‍රයෝජනයක් නැහැ.
35 මට දැන් වයස අවුරුදු අසූවක් වෙනවා.+ ඒ නිසා ඔබේ සේවකයා වන මට දැන් හොඳ නරක තෝරන්න බැහැ. මට කන බොන දේවල රසවත් හරියට දැනෙන්නේ නැහැ.+ ගායක ගායිකාවන්ගේ+ ගීත රස විඳින්නත් බැහැ.+ මම කොහොමද මගේ ස්වාමීන් වන රජ්ජුරුවන්ට බරක් වෙන්නේ?+
36 ඔබේ සේවකයා වන මම ඔබ සමඟ ආවේ යොර්දාන් ගඟ ළඟට වෙනකම් විතරයි. ඒ වගේ පොඩි දෙයකට මේ තරම් හොඳින් මට සලකන්නේ ඇයි?+
37 ඔබේ සේවකයා වන මට ආපහු යන්න අවසර දෙන්න. මට ඕනේ මගේම නුවරේ මැරෙන්නයි.+ මාව මගේ පියා හා මව ළඟ තැන්පත් කරනවාට මම කැමතියි.+ හැබැයි ඔබේ සේවකයා වන කිම්හාම්+ මෙතැන ඉන්නවා. මගේ ස්වාමීනි, රජ්ජුරුවනි, ඔබ කැමති නම් ගඟෙන් එගොඩට යද්දී ඔහුව රැගෙන යන්න. ඔබට හොඳයි කියලා හිතෙන දෙයක් ඔහු වෙනුවෙන් කරන්න.”
38 එබැවින් රජ ඔහුට මෙසේ කීවේය. “ගඟෙන් එගොඩට යද්දී මම කිම්හාම්වත් එක්කගෙන යන්නම්. ඔබ කැමති ඕනෑම දෙයක් මම ඔහු වෙනුවෙන් කරන්නම්. මම ඔබ වෙනුවෙනුත් ඕනෑම දෙයක් කරන්න සූදානම්.”
39 ඉන්පසු මුළු සෙනඟ යොර්දාන් ගඟෙන් එතෙර වූහ. රජද බාසිල්ලයිව සිපගෙන+ ඔහුට ආශීර්වාද+ කළ පසු ගඟෙන් එගොඩ විය. ඉන්පසු බාසිල්ලයි ආපසු තම නුවරට හැරී ගියේය.
40 රජු ගඟෙන් එගොඩ වී ගිල්ගාල් නුවරට+ යද්දී කිම්හාම්ද ඔහු සමඟ ගියේය. යූදාහි මුළු සෙනඟද ඊශ්‍රායෙල් සෙනඟගෙන් දෙකෙන් කොටසක්ද ඔහු සමඟ ගියෝය.
41 පසුව ඊශ්‍රායෙල්හි පුරුෂයෝ රජු ළඟට පැමිණ මෙසේ ඇසුවෝය. “යූදා ගෝත්‍රයේ අපේ සහෝදරයන්, ඔබවයි ඔබේ ගෙයි වැසියන්වයි ඔබේ සේවකයන්වයි යොර්දාන් ගඟෙන් මෙගොඩට රැගෙන ආවේ හොර රහසින්.+ ඇයි ඔවුන් අපිට නොකියා එහෙම දෙයක් කළේ?”+
42 එවිට යූදාහි මනුෂ්‍යයෝ ඊශ්‍රායෙල් සෙනඟට මෙසේ පැවසුවෝය. “අපි තමයි රජුගේ කිට්ටුම නෑයෝ.+ අපි රජුගේ වියදමින් කිසි දෙයක් කෑවාද? ඔහුව රැගෙන ආවා කියලා අපිට තෑග්ගක් ලැබුණාද? ඉතින් ඇයි ඔබ අමනාප වෙන්නේ?”
43 නමුත් ඊශ්‍රායෙල් සෙනඟ යූදාහි මනුෂ්‍යයන්ට මෙසේ කීවෝය. “රාජ්‍යයෙන් කොටස් දහයක් අපට අයිතියි.+ ඒ නිසා දාවිත් රජු හා සම්බන්ධ කාරණාවලදී ඔබට වඩා අයිතියක් අපට තියෙනවා. ඇයි ඔබ අපිට මෙතරම් පහත් විදිහට සැලකුවේ? අපේ රජුව ආපහු රැගෙන එන්න වැඩි අයිතියක් තියෙන්නේ අපිට නේද?”+ නමුත් යූදා මනුෂ්‍යයෝ වඩා සැරපරුෂ ලෙස ඊශ්‍රායෙල් මනුෂ්‍යයන්ට බැණවැදුණෝය.
පාදසටහන්
^ එනම්, අබ්සලොම්ට උපකාර කළ සෙනඟ.
^ මූ.අ., “අපි ඔබේම මාංසය, ඔබේම ඇටකටු.”
^ 2සාමු 19:12හි පාදසටහන බලන්න.
