එසකියෙල් 16:1-63
16 යෙහෝවා දෙවියන් ආයෙත් සැරයක් මට කතා කරලා මෙහෙම කිව්වා.
2 “මනුෂ්‍ය පුත්‍රය, යෙරුසලම කරන පිළිකුල්සහගත දේවල් ගැන ඔයා ඇයට කියන්න ඕනේ.+
3 ඔයා මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා යෙරුසලමට මෙහෙම කියනවා. “ඔබ ආවේ කානානිවරුන්ගේ දේශයෙන්. ඔබ ඉපදුණේ එහෙදියි. ඔබේ තාත්තා අමෝරි ජාතිකයෙක්.+ අම්මා හිත්තී ජාතිකයෙක්.+
4 ඔබ ඉපදුණ දවසේ ඔබේ පෙකණිවැල කපලා තිබුණේ නැහැ. ඔබව නාවලා පිරිසිදු කරලා තිබුණේ නැහැ. ඔබේ ඇඟේ ලුණු ගාලා තිබුණෙවත් ඔබව රෙදිවලින් ඔතලා තිබුණෙවත් නැහැ.
5 කිසිම කෙනෙක් ඔබට අනුකම්පා කරලා ඒ දේවල් ඔබ වෙනුවෙන් කළේ නැහැ. කිසිම කෙනෙක් ඔබ දිහා බැලුවෙවත් නැහැ. ඔබ උපන් දවසේදී ඔවුන් ඔබට වෛර කරපු නිසා ඔබව එළිමහනට වීසි කළා.
6 “‘“මම එතන පහු කරගෙන යද්දී ලේ තැවරිලා හිටපු ඔබ දඟල දඟල ඉන්නවා මං දැක්කා. ලේ තැවරිලා හිටපු ඔබට මං කිව්වා ‘ඔබ ජීවත් වෙයි’ කියලා. ඔබ ලේවලින් තැවරිලා ඉද්දී ‘ඔබ ජීවත් වෙයි’ කියලා මං ඔබට කිව්වා.
7 තණබිමක වැවෙන තණකොළ වගේ මම ඔබව ගණනින් ගොඩක් වැඩි කළා. උස් මහත් වෙලා වැඩිවියට පත් වුණ ඔබ, වටිනාම ආභරණවලින් සැරසිලා හිටියා. ඔබේ පියයුරු හොඳින් වැඩුණා. හිසකෙසුත් හොඳින් වැඩුණා. ඒත් ඔබ හිටියේ කිසිම ඇඳුමක් නැතුව නිරුවතින්.”’
8 “‘මම ඔබව පහු කරගෙන යද්දී මං දැක්කා ඔබ ඉන්නේ ආදරේ කරන වයසේ කියලා. ඉතින් මං මගේ ඇඳුම ඔබ පිටට දාලා ඔබේ නිරුවත වැහුවා.+ මම ඔබට දිවුරලා පොරොන්දුවක් දීලා ඔබ එක්ක ගිවිසුමක් ඇති කරගත්තා. ඊටපස්සේ ඔබ මට අයිති වුණා’ කියලා ශ්‍රේෂ්ඨතම පාලකයාණන් වන යෙහෝවා කියනවා.
9 ‘මම ඔබව නාවලා ඔබේ ඇඟේ තැවරිලා තිබුණ ලේ හෝදලා දැම්මා. ඊටපස්සේ ඔබේ ඇඟේ තෙල් ගෑවා.+
10 මෝස්තර දාලා මහපු ඇඳුමක් ඔබට අන්දවලා ඉස්තරම්ම හම්වලින්* හදපු පාවහන් මම ඔබට දුන්නා. හොඳම ලිනන් රෙදිවලින් ඔබව එතුවා. මම ඔබව මිල අධික ඇඳුම්වලින් සැරසුවා.
11 ආභරණවලින් ඔබව සරසලා අත්වලට වළලුත් කරට මාලයකුත් දැම්මා.
12 මම ඔබේ නහයට මුද්දකුයි, කන්වලට කරාබුයි පැලඳුවා. ඔබේ හිසට ලස්සන ඔටුන්නකුත් දැම්මා.
13 ඔබ නිතරම රත්තරන් සහ රිදීවලින් සැරසිලා හිටියා. ඔබේ ඇඳුම් මහලා තිබුණේ හොඳම ලිනන්වලින්, මිල අධික රෙදිවලින්. මෝස්තර දාලා මහපු ඇඳුමක් තමයි ඔබ ඇන්දේ. ඔබ කෑමට ගත්තේ සිහින්ව කොටාගත්ත පිටිවලින් හදපු කෑම. මීපැණි සහ තෙල් ඔබ කෑමට ගත්තා. ඔබ හරිම ලස්සන කෙනෙක් වුණා.+ රැජිනක් වෙන්න සුදුසු කෙනෙක් වුණා.’”
14 “‘ඔබේ ලස්සන නිසා ජාතීන් අතරේ ඔබ ගොඩක් ප්‍රසිද්ධ වුණා.+ ඔබේ පෙනුමේ කිසිම අඩුවක් තිබුණේ නැහැ. ඒ මම මගේ තේජසින් ඔබව ලස්සන කරපු නිසයි’+ කියලා ශ්‍රේෂ්ඨතම පාලකයාණන් වන යෙහෝවා කියනවා.”
15 “‘ඒත් ඔබ ඔබේ ලස්සන ගැන ආඩම්බර වුණා.+ ඔබට ලැබුණ ප්‍රසිද්ධිය නිසා ඔබ ගණිකාවක් වුණා.+ යන එන හැම කෙනෙක් එක්කම ඔබ ගණිකාවක් වගේ හැසිරුණා.+ ඔවුන්ට කැමති දෙයක් ඔබට කරන්න ඔබ ඔවුන්ට ඉඩ දුන්නා.
16 ඔබ ඔබේ වර්ණවත් ඇඳුම්වලින් කීපයක් අරගෙන පූජනීය ස්ථාන* සැරසුවා. ඒ ස්ථානවල තමයි ඔබ ගණිකාවක් වගේ හැසිරුණේ.+ ඒ වගේ දේවල් වෙන එක සුදුසු නැහැ. කවදාවත් ඒ වගේ දේවල් වෙන්න බැහැ.
17 මම ඔබට දුන්න රන් රිදීවලින් ඔබ හදාගත්ත ලස්සන ආභරණ අරගෙන ඔබ පුරුෂයන්ගේ රූප හැදුවා. ඔවුන්* එක්ක ඔබ ගණිකාවක් වගේ හැසිරුණා.+
18 මෝස්තර දාලා මහපු ඔබේ ඇඳුම් අරගෙන ඔබ ඔවුන්ව සැරසුවා. මගේ තෙල් සහ සුවඳ ද්‍රව්‍ය ඔබ ඔවුන්ට ඔප්පු කළා.+
19 සිහින්ව කොටාගත්ත පිටියි, තෙලුයි, මීපැණියි දාලා හදාගත්ත රොටි ඔබ ඔවුන්ට පූජා කළා. මම ඔබට කන්න දීපු රොටි ඔබ ඔවුන්ට පූජා කළා. ඔවුන්ව සතුටු කරන්න* ඔබ ඒවා ඔවුන්ට ඔප්පු කළා.+ ඒක තමයි වුණේ’ කියලා ශ්‍රේෂ්ඨතම පාලකයාණන් වන යෙහෝවා කියනවා.”
20 “‘ඔබ ගණිකාවක් විදිහට හැසිරුණා මදිවටද මගෙන් ඔබට ලැබුණ දරුදැරියන්ව+ ඒ රූපවලට ඔප්පු කළේ?+
21 ඔබ මගේ පුතුන්ව මරලා දැම්මා. ගින්නෙන් දවලා ඔවුන්ව පූජා කළා.+
22 පිළිකුල්සහගත දේවල් කරද්දී, ගණිකාවක් වගේ හැසිරෙද්දී ඔබට ඔබේ ළමා කාලය මතක් වුණේ නැහැ. ඔබ නිරුවතින් හිටපු කාලෙවත් ලේ තැවරිලා දඟල දඟල හිටපු කාලෙවත් ඔබට මතක් වුණේ නැහැ.
23 ඔබ කරපු දුෂ්ට දේවල් නිසා ඔබට මුහුණ දෙන්න වෙන්නේ මොන තරම් දරුණු විපතකටද’+ කියලා ශ්‍රේෂ්ඨතම පාලකයාණන් වන යෙහෝවා කියනවා.
24 ‘හන්දියක් හන්දියක් ගාණේ ඔබ වෙනත් දෙවිවරුන්ට නමස්කාර කරන්න තැනුත් පූජනීය ස්ථානත් හදාගත්තා.
25 ඔබ හැම පාරකම ප්‍රසිද්ධ තැන්වල පූජනීය ස්ථාන හදාගත්තා. ඔබව පහු කරගෙන යන හැමෝටම හරිම කැමැත්තෙන් ඔබවම විකුණලා ඔබේ ලස්සන පෙනුම අප්‍රසන්න එකක් කරගත්තා.+ ඔබ කෙළවරක් නැතුව වේශ්‍යාකම් කළා.+
26 කාමාශාවෙන් මත් වෙලා ඉන්න ඔබේ අසල්වාසීන් වන ඊජිප්තුවරුන් එක්ක ඔබ ගණිකාවක් වගේ හැසිරුණා.+ ඔබ දිගින් දිගටම වේශ්‍යාකම් කරලා මාව කේන්ති ගැස්සුවා.
27 මම ඔබට විරුද්ධව මගේ අත දික් කරනවා. ඔබට ලැබෙන කෑම පංගුව මම අඩු කරනවා.+ ඔබට වෛර කරන ස්ත්‍රීන්ගේ අතට+ ඒ කියන්නේ ඔබේ ජරා හැසිරීම පිළිකුල් කරන පිලිස්තිවරුන්ගේ දූවරුන් අතට+ මම ඔබව භාර දෙනවා.
28 “‘කොච්චර වේශ්‍යාකම් කළත් ඔබ සෑහීමට පත් වුණේ නැහැ. ඒ නිසා ඔබ ඇසිරියානුවන් එක්කත් වේශ්‍යාකම් කළා.+ ඔවුන් එක්ක වේශ්‍යාකම් කරලත් ඔබ තෘප්තියට පත් වුණේ නැහැ.
29 ඔබ වෙළඳුන්ගේ දේශයේදීත්* කල්දිවරුන් එක්කත් වේශ්‍යාකම් කළා.+ ඒ විදිහට ඔබ තව තවත් වැඩියෙන් වේශ්‍යාකම් කළා. ඒත් ඔබ තෘප්තියට පත් වුණේ නැහැ.
30 කිසිම ලැජ්ජාවක් බයක් නැති ගණිකාවක් වගේ ඔබ ඒ දේවල් කරද්දී ඔබේ හිත අන්තයටම පිරිහිලා තිබුණා’*+ කියලා ශ්‍රේෂ්ඨතම පාලකයාණන් වන යෙහෝවා කියනවා.
31 ‘වෙනත් දෙවිවරුන්ට නමස්කාර කරන්න හැම පාරකම තියෙන ප්‍රසිද්ධ තැන්වලත් හැම හන්දියකමත් ඔබ පූජනීය තැන් හදාගෙන ගණිකාවක් වගේ හැසිරුණා. ඒත් ඔබ සාමාන්‍ය ගණිකාවක් වගේ නෙමෙයි. මොකද ඔබ කුලියක් ගන්න කැමති වුණේ නැහැ.
32 ඔබ සැමියා එක්ක ඉන්නවාට වඩා වෙනත් පුරුෂයන් එක්ක ඉන්න කැමති අනාචාරයේ යෙදෙන බිරිඳක්.+
33 සාමාන්‍යයෙන් ගණිකාවන් ළඟට යන මිනිස්සු ඔවුන්ට තෑගි දෙනවා.+ ඒත් ඔබ කරන්නේ ඔබ පස්සේ රාගයෙන් මත් වෙලා එන මිනිස්සුන්ට තෑගි දෙන එකයි.+ ඔබ වටේම ඉන්න අයට සල්ලි දීලා ඔබ එක්ක වේශ්‍යාකම් කරන්න ඒ අයව ඔබ ළඟට ගෙන්නගන්නවා.+
34 ඔබ අනිත් ගණිකාවන්ට වඩා සම්පූර්ණයෙන් වෙනස්. ඔබ වැඩ කරන විදිහට වෙන කිසිම ගණිකාවක් වැඩ කරන්නේ නැහැ. ඔබයි අනිත් අයට ගෙවන්නේ. ඒත් ඔවුන් ඔබට කිසිම ගෙවීමක් කරන්නේ නැහැ. ඔබ කරන්නේ සම්පූර්ණයෙන්ම අනිත් පැත්ත.’
35 “ගණිකාව,+ යෙහෝවා කියන දේට දැන් ඇහුම්කන් දෙන්න.
36 ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබ හැසිරුණේ රාගයෙන් මත් වෙලා. ඔබ පෙම්වතුන් එක්කයි, පිළිකුල්සහගත ජරා රූප* එක්කයි වේශ්‍යාකම් කරලා+ ඔබේ නිරුවත ප්‍රදර්ශනය කළා. ඒ රූපවලට ඔබේ පුතුන්ගේ ලේ පූජා කළා.+
37 ඒ නිසා ඔබෙන් වින්දනයක් ලබපු පෙම්වතුන් හැමෝවම මං එකට එකතු කරනවා. ඔබ ආදරය කරපු අය වගේම ඔබ දැන් වෛර කරන අයවත් මං එකට එකතු කරනවා. මම ඔවුන්ව එකතු කරලා ඔබට විරුද්ධව සටන් කරන්න ඔවුන්ව හැම පැත්තකින්ම එවනවා. ඔබේ නිරුවත මම ඔවුන්ට පෙන්නනවා. ඔබ නිරුවතින් ඉන්න විදිහ ඔවුන් දකියි.+
38 “‘අනාචාරයේ යෙදෙන ස්ත්‍රීන්ටත්+ ලේ හලන ස්ත්‍රීන්ටත්+ ලැබෙන්න ඕනෙ දඬුවම් මම ඔබටත් දෙනවා. මම කේන්තියෙන්, ලොකු උදහසකින්* ඔබේ ලේ හලනවා.+
39 මම ඔබව ඔවුන්ගේ අතට භාර දෙනවා. ඔබ වෙනත් දෙවිවරුන්ට නමස්කාර කරන්න හදපු තැන් ඔවුන් කඩලා දායි. පූජනීය ස්ථාන පෙරළලා දායි.+ ඔවුන් ඔබේ ඇඳුම් ඉරලා දාලා+ ඔබේ ලස්සන ආභරණ ගලවගෙන+ ඔබව නිරුවතින් අතහැරලා දායි. ඔබේ නිරුවත හැමෝම දකියි.
40 ඔවුන් ඔබට පහර දෙන්න විශාල පිරිසක්ව ගෙනෙයි.+ ඔවුන් ඔබට ගල් ගහලා+ ඔබව කඩුවෙන් මරලා දායි.+
41 ඔවුන් ඔබේ ගෙවල්වලට ගිනි තියයි.+ මම ඔබට දීපු තීන්දුව ස්ත්‍රීන් හුඟදෙනෙක් ඉස්සරහා ඔවුන් ඉටු කරයි. ඔබ කරන වේශ්‍යාකම් මම නතර කරනවා.+ ඔබ ඔබේ පෙම්වතුන්ට කුලී ගෙවන එකත් නතර කරයි.
42 ඔබට විරුද්ධව ඇවිළුණ මගේ කේන්තිය නිවිලා යනවා.+ ඔබ පිටට ආව මගේ කෝපය ඔබෙන් අයින් වෙලා යනවා.+ ඊටපස්සේ මං සන්සුන් වෙනවා. මම තවත් ඔබ එක්ක අමනාපයෙන් ඉන්නේ නැහැ.’
43 “‘ඔබේ ළමා කාලේදී මම ඔබව බලාගත්ත විදිහ ඔබ අමතක කරපු නිසාත්+ මේ හැම දෙයක්ම කරලා මාව කේන්ති ගස්සපු නිසාත් ඔබ කරපු දේවල්වල ප්‍රතිඵල මම ඔබ පිටටම ගේනවා’ කියලා ශ්‍රේෂ්ඨතම පාලකයාණන් වන යෙහෝවා කියනවා. ‘ඔබ දැන් කරන පිළිකුල්සහගත දේවලුත් ජරා වැඩත් දිගටම කරන්නේ නැහැ.’
44 “‘“අම්මා වගේමයි දුවත්”+ කියන කියමන පාවිච්චි කරන හැමෝම ඒක ඔබට අදාළ කරයි.
45 ඔබ ඔබේ අම්මා වගේමයි. ඇයත් ඇගේ පුරුෂයාවයි, දරුවන්වයි පහත් කරලා සැලකුවා. ඔබ ඔබේ සහෝදරියන් වගෙයි. ඔවුනුත් ඔවුන්ගේ පුරුෂයන්වයි, දරුවන්වයි පහත් කරලා සැලකුවා. ඔබේ අම්මා හිත්තී ජාතිකයෙක්. ඔබේ තාත්තා අමෝරි ජාතිකයෙක්.’”+
46 “‘ඔබේ අක්කා සමාරිය.+ ඇය ඇගේ දූවරු* එක්ක ඔබට උතුරෙන්* ජීවත් වෙනවා.+ ඔබේ නංගි සොදොම.+ ඇය ඇගේ දූවරු එක්ක ඔබට දකුණින්* ජීවත් වෙනවා.+
47 ඔබ ඔවුන් කරපු වැඩයි, ඔවුන් කරපු පිළිකුල්සහගත දේවලුයි කළා මදිවට හරිම කෙටි කාලයකදී ඔවුන් කළාටත් වඩා දුෂ්ට විදිහට හැම දෙයක්ම කරන්න පටන්ගත්තා.’+
48 ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබයි, ඔබේ දූවරුනුයි කළා වගේ දේවල් ඔබේ නංගි වුණ සොදොමයි, ඇගේ දූවරුනුයි කළේ නැහැ කියලා ජීවමාන දෙවි වන මම මං ගැනම දිවුරලා කියනවා.
49 ඔබේ නංගි වුණ සොදොම කරපු වැරදි තමයි මේ. ඇයත් ඇගේ දූවරුනුත්+ හරිම ආඩම්බරයි.+ ඔවුන්ට ඇති තරම් කෑම බීම තිබුණා.+ ඔවුන් හරිම සැහැල්ලුවෙන් ජීවිතේ ගත කළා.+ ඒත් ඔවුන් අසරණ අයටවත් දුප්පත් අයටවත් අත දුන්නේ නැහැ.+
50 ඔවුන් දිගටම අහංකාර විදිහට වැඩ කළා.+ ඔවුන් පිළිකුල්සහගත දේවල් මං ඉස්සරහා දිගින් දිගටම කළා.+ ඉතින් ඔවුන්ව නැති කරලාම දාන්න ඕනෙ කියලා මට තේරුණා.+
51 “‘සමාරිය+ ඔබ කරපු වැරදිවලින් භාගයක්වත් කළේ නැහැ. ඔවුන් කළාටත් වඩා ගොඩක් පිළිකුල්සහගත දේවල් ඔබ දිගින් දිගටම කළා. ඔබ මොන තරම් පිළිකුල්සහගත දේවල් කළාද+ කියනවා නම් ඔබ කරපු දේවල් එක්ක බලද්දී ඔබේ සහෝදරියන් ඔබට වඩා ධර්මිෂ්ඨයි.
52 ඔබ හැසිරෙන විදිහ බලද්දී ඔබේ සහෝදරියන්ගේ හැසිරීම හොඳයි කියලයි පේන්නේ. ඒ නිසා දැන් ඔබට නින්දා විඳින්න වෙනවා. ඔවුන් කරපු වැරදිවලට වඩා ගොඩක් පිළිකුල් දේවල් ඔබ කළා. ඒ නිසා ඔබේ සහෝදරියන් ඔබට වඩා ධර්මිෂ්ඨයි. ඔබට වඩා ඔබේ සහෝදරියන් ධර්මිෂ්ඨයි කියලා ඔබ වැඩ කරන විදිහෙන් පේන නිසා දැන් ලැජ්ජා වෙන්න. නින්දා විඳින්න ලෑස්ති වෙන්න.’
53 “‘වහලුන් විදිහට ඉන්න සොදොමට සහ ඇගේ දූවරුන්ට අයිති අයවත් සමාරිය සහ ඇගේ දූවරුන්ට අයිති අයවත් මං ආපහු එකතු කරනවා. වහලුන් විදිහට ඉන්න ඔබට අයිති අයවත් මම ඔවුන් එක්කම ආපහු එකතු කරනවා.+
54 එතකොට ඔබට නින්දා විඳින්නම වෙනවා. ඔබ ඔබේ සහෝදරියන්ගේ හිතට සහනයක් දුන්න නිසා ඔබ ලැජ්ජාවට පත් වෙනවා.
55 ඔබේම සහෝදරියන් වන සොදොම සහ සමාරියත් ඔවුන්ගේ දූවරුනුත් ඔවුන් කලින් හිටපු තත්වයට එනවා. ඔබ සහ ඔබේ දූවරුනුත් ඔබ කලින් හිටපු තත්වයට එනවා.+
56 ඔබ අහංකාර විදිහට වැඩ කරපු කාලේ ඔබ ඔබේ නංගි වුණ සොදොම ගැන කතා කරන්නවත් කැමති වුණේ නැහැ.
57 ඒ ඔබේ දුෂ්ටකම ගැන හෙළි වෙන්න කලින්.+ ඒත් දැන් සිරියාවේ දූවරු සහ ඇගේ අසල්වැසියනුත් පිලිස්තියේ දූවරුනුත් ඔබට නින්දා කරනවා.+ ඔබ වටේට ඉන්න ඒ හැමෝම ඔබට සමච්චල් කරනවා.
58 ඔබ කරපු ජරා වැඩවලයි, පිළිකුල්සහගත දේවල්වලයි ප්‍රතිඵල ඔබට විඳින්න සිද්ධ වෙනවා’ කියලා යෙහෝවා කියනවා.”
59 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබ කරපු දේවල්වලට අනුව මම ඔබට දඬුවම් කරනවා.+ මොකද ඔබ මට දුන්න පොරොන්දුව සැහැල්ලුවට ගත්තා. මං ඇති කරගත්ත ගිවිසුම කඩ කළා.+
60 ඒත් ඔබේ යොවුන් වියේදී මං ඔබ එක්ක ඇති කරගත්ත ගිවිසුම මම සිහි කරනවා. මම ඔබ එක්ක සදහටම තියෙන ගිවිසුමක් ඇති කරගන්නවා.+
61 ඔබ ඔබේ අක්කලවයි, නංගිලවයි පිළිගද්දී ඔබ හැසිරුණ විදිහ ගැන මතක් වෙලා ඔබට ලැජ්ජාවක් දැනෙයි.+ මම ඔවුන්ව ඔබට දූවරුන් විදිහට දෙනවා. ඒත් එහෙම කරන්නේ ඔබ එක්ක මං ඇති කරගත්ත ගිවිසුම නිසා නෙමෙයි.’
62 “‘මම ඔබ එක්ක ගිවිසුමක් ඇති කරගන්නවා. මම යෙහෝවා කියලා පිළිගන්න ඔබට සිද්ධ වෙනවා.
63 ඔබ එච්චර දේවල් කරලා තියෙද්දීත් මං ඔබට සමාව දෙනවා.+ එතකොට ඔබ කරපු දේවල් ඔබට මතක් වෙයි. කට අරින්නවත් බැරි විදිහට ඔබ ලැජ්ජාවට පත් වෙයි’+ කියලා ශ්‍රේෂ්ඨතම පාලකයාණන් වන යෙහෝවා කියනවා.”
පාදසටහන්
^ හෝ, “සීල් මත්ස්‍යයාගේ හම්වලින්.”
^ මූ.අ., “උස් තැන්.”
^ ඒ කියන්නේ පුරුෂයන්ගේ රූප.
^ හෝ, “මිහිරි සුවඳක් නඟින විදිහට.”
^ මූ.අ., “කානාන් දේශයේදීත්.”
^ හෝ සමහරවිට, “මට ඔබ ගැන කොච්චර කේන්තියක් දැනෙනවාද!”
^ හෙබ්‍රෙව් භාෂාවෙන් ඒ රූප කොච්චර පිළිකුල් දේවල්ද කියලා විස්තර කරන්න ඒවාට “ගොම” කියන වචනය පාවිච්චි කරලා තියෙනවා.
^ දෙවියන් බලාපොරොත්තු වෙනවා ඔහුගේ සෙනඟ ඔහුට විතරක් නමස්කාර කරයි කියලා. ඔහුට ද්‍රෝහි වෙද්දී ඔහුට දැනෙන කේන්තිය තමයි මෙතන විස්තර කරන්නේ.
^ මූ.අ., “ඔබේ දකුණු පැත්තේ.”
^ මූ.අ., “ඔබේ වම් පැත්තේ.”
^ සමහරවිට මෙතන කතා කරන්නේ අවට තිබුණ නගර ගැන වෙන්න ඇති.
