එසකියෙල් 17:1-24
17 යෙහෝවා දෙවියන් ආපහු සැරයක් මට කතා කරලා මෙහෙම කිව්වා.
2 “මනුෂ්‍ය පුත්‍රය, ඊශ්‍රායෙල් සෙනඟ ගැන උපමාවක් කියන්න. ඒක තේරවිල්ලක් විදිහට කියන්න.+
3 ඔයා මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මේකයි. “විශාල රාජාලියෙක් හිටියා.+ ඌට වර්ණවත් පිහාටු තිබුණා. ගොඩක් ලොකු, දිග අත්තටු දෙකකුත් තිබුණා. ඌ ලෙබනොන් දේශයට ඇවිත්+ එහේ තිබුණ දේවදාර ගහක මුදුන කඩාගත්තා.+
4 ඌ ඒ ගහේ මුදුනේම තිබුණ රිකිල්ල කඩාගෙන ඒක වෙළඳුන්ගේ දේශයට* ගෙනාවා. ඊටපස්සේ ඒක වෙළඳුන්ගේ නගරයක හිටෙව්වා.+
5 ඌ දේශයෙන් බීජ ටිකක් අරගෙන+ සරුබිමක පැළ කළා. වතුර පාරවල් ළඟ තියෙන විලෝ ගහක් වගේ සරුවට වැවෙයි කියලා හිතලා ඌ බීජයක් පැළ කළා.
6 ඒක දලු දාලා සරු මිදිවැලක් විදිහට වැඩුණා. ඒක ඒ තරම් උසට වැඩුණේ නැති,+ අතු ගොඩක් විහිදිලා ගියේ නැති මිදිවැලක්. ඒකේ මුලුත් විහිදිලා ගියේ නැහැ. ඒක අතුරිකිලි දාපු මිදිවැලක් වුණා.+
7 “‘“ඊටපස්සේ ගොඩක් ලොකු පියාපත් තියෙන+ තවත් විශාල රාජාලියෙක් ආවා.+ එතකොට ඒ මිදිවැල හරිම කෑදර විදිහට ඒකේ මුල් ඒක හිටවලා තිබුණ පාත්තියේ ඉඳන් රාජාලියා දිහාවට විහිදෙව්වා. අතුත් ඌ දිහාවට විහිදෙව්වා. එහෙම කළේ උගෙන් වතුර ලබාගන්නයි.+
8 ඒත් ඒ වෙද්දීත් ඒක වතුර පාරවල් ළඟ තියෙන සරුබිමක පැළ කරලයි තිබුණේ. ඒ, අතු හොඳට විහිදිලා පල දරන විශාල මිදිවැලක් වගේ ඒකට වැඩෙන්න පුළුවන් වෙන්නයි.”’+
9 “‘ශ්‍රේෂ්ඨතම පාලකයාණන් වන යෙහෝවා කියන්නේ මේකයි’ කියලා කියන්න. ‘“ඒ මිදිවැල සරුවට වැඩෙයිද? කෙනෙක් ඒකේ මුල් උදුරලා+ ඒකේ ගෙඩි කුණු වෙලා යන්නත් දලු වේළිලා යන්නත් සලස්වන එකක් නැද්ද?+ ඒක කොච්චර දුරට වේළිලා යනවාද කියනවා නම් ඒක සම්පූර්ණයෙන්ම උදුරලා දාන්න ශක්තිමත් අතක්වත් ලොකු සෙනඟක්වත් ඕනෙ වෙන්නේ නැහැ.
10 ඒක වෙන තැනක පැළ කළත් සරුවට වැඩෙයිද? නැඟෙනහිරෙන් එන හුළඟට ඒක සම්පූර්ණයෙන්ම වේළිලා යන්නේ නැද්ද? ඒක දලු දාලා වැඩුණු පාත්තියේම වේළිලා යනවා.”’”
11 යෙහෝවා ආපහු සැරයක් මට කතා කරලා මෙහෙම කිව්වා.
12 “කැරලිකාර සෙනඟට මෙහෙම කියන්න. ‘මේ උපමාවෙන් කියන්න හදන දේ ඔබට තේරෙන්නෙම නැද්ද?’ මෙහෙමත් කියන්න. ‘බැබිලෝනියේ රජ යෙරුසලමට ගිහින් එහේ රජවයි, අධිපතීන්වයි බැබිලෝනියට ගෙනාවා.+
13 ඊටපස්සේ ඔහු රජ පෙළපතට අයිති කෙනෙක් එක්ක+ ගිවිසුමක් ඇති කරගෙන ඒක කඩ කරන්නේ නැහැ කියලා ඒ කෙනාගෙන් පොරොන්දුවක් ගත්තා.+ ඔහු දේශයේ හිටපු ප්‍රධානීන්වත් අරගෙන ගියා.+
14 එහෙම කළේ ඒ රාජ්‍යය පහත් තත්වයකට ගෙනල්ලා ඒකට ආපහු ඔළුව උස්සන්න බැරි වෙන්නයි. ඒ වගේම ඔහුට ඕනෙ වුණේ ඇති කරගත්ත ගිවිසුම කැඩුවොත් ඒ රාජ්‍යයට පවතින්න බැහැ කියලා පෙන්නන්නයි.+
15 ඒත් යූදාවල රජ බැබිලෝනියේ රජට විරුද්ධව කැරලිගැහුවා.+ ඔහු ඊජිප්තුවට පණිවිඩකරුවන් යවලා අශ්වයන්වයි,+ විශාල හමුදාවකුයි ඔවුන්ගෙන් ඉල්ලුවා.+ ඔහු කරන දේ සාර්ථක වෙයිද? මේ දේවල් කරන ඔහුට දඬුවමින් බේරෙන්න පුළුවන් වෙයිද? ගිවිසුම කඩ කරලා ඔහුට ඇත්තටම ගැලවෙන්න පුළුවන්ද?’+
16 “‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “ජීවමාන දෙවි වන මම මං ගැනම දිවුරලා කියනවා ඔහු බැබිලෝනියේදී අනිවාර්යයෙන්ම මැරෙනවා කියලා. ඒ කියන්නේ ඔහුව* රජකමට පත් කරපු රජ* ජීවත් වෙන දේශයේදී ඔහු මැරෙනවා. ඒ රජ එක්ක ඇති කරගත්ත ගිවිසුමයි ඔහු කැඩුවේ. ඒ විදිහට ඔහු රජට වුණ පොරොන්දුව සැහැල්ලුවට ගත්තා.+
17 පාරාවෝ බලවත්, විශාල හමුදාවක් එක්ක ඔහුගේ උදව්වට ආවත් ඒකෙන් කිසිම වැඩක් වෙන්නේ නැහැ.+ හුඟදෙනෙක්ව මරලා දාන අදහසින් සතුරෝ නගරය වටලන්න බැමි බැඳලා පවුරු ගොඩනඟද්දී ඒ හමුදාවෙන් කිසිම වැඩක් වෙන්නේ නැහැ.
18 ඔහු තමන් දුන්න පොරොන්දුව සැහැල්ලුවට අරන් ගිවිසුම කඩ කළා. ඔහු පොරොන්දුවක් දීලා* තියෙද්දීත් ඒ දේවල් කරපු නිසා ඔහු කීයටවත් ගැලවෙන්නේ නැහැ.’”
19 “‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “ජීවමාන දෙවි වන මම මං ගැනම දිවුරලා කියනවා මගේ පොරොන්දුව ඔහු සැහැල්ලුවට අරන් මගේ ගිවිසුම* කඩ කරපු නිසා ඒකේ ප්‍රතිඵල මම ඔහු පිටටම ගේනවා කියලා.+
20 මම දඩයම් කරන්න එළන දැල ඔහුට විරුද්ධව දානවා. ඔහු ඒකට අහු වෙනවා.+ ඊටපස්සේ මම ඔහුව බැබිලෝනියට ගෙනල්ලා ඔහුව විනිශ්චය කරනවා. මොකද ඔහු මට ද්‍රෝහි වුණා.+
21 ඔහුගේ හමුදාවෙන් පැනලා යන හැමෝම කඩු පහරින් මැරුම් කනවා. ඉතුරු වෙන අයව හතර අතේ* විසුරුවාහරිනවා.+ යෙහෝවා වන මමයි මේ දේවල් කිව්වේ කියලා ඔබට පිළිගන්න සිද්ධ වෙනවා.”’+
22 “‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “මම ඒ උස දේවදාර ගහේ මුදුනෙන් රිකිල්ලක් අරගෙන+ ඒක පැළ කරනවා. ගහේ අතුරිකිලි අතරේ උඩින්ම තියෙන, ළපටි රිකිල්ලක් කඩාගෙන+ ගොඩක් උස කන්දක ඒක පැළ කරනවා.+
23 මම ඒක ඊශ්‍රායෙල් දේශයේ තියෙන උස කන්දක පැළ කරනවා. ඒක අතු හොඳින් වැඩුණු, පල දරන විශාල දේවදාර ගහක් වෙනවා. හැම ජාතියකම කුරුල්ලෝ ඒ ගහ යටට ඇවිත් ඒකේ අතුවල හෙවණේ ලැගුම් ගනියි.
24 යෙහෝවා වන මම උසට වැඩුණු ගහ බිම හෙළුවා කියලත් පොඩි ගහ විශාල ගහක් කළා කියලත් අනිත් හැම ගහක්ම තේරුම්ගනියි.+ ඒ වගේම සරුවට වැඩුණු ගහ මම වේළිලා යන්න සැලැස්සුවා කියලත් වේළිලා ගිය ගහ සරුවට වැඩෙන්න සැලැස්සුවා කියලත් තේරුම්ගනියි.+ ඒ දේ කිව්වෙත් ඒක ඉටු කළෙත් යෙහෝවා වන මමයි.”’”
පාදසටහන්
^ මූ.අ., “කානාන් දේශයට.”
^ ඒ කියන්නේ ශෙදකියා.
^ ඒ කියන්නේ නෙබුකද්නෙෂර්.
^ මූ.අ., “අතට අත දීලා.”
^ ඒ කියන්නේ ඔහු යෙහෝවා ඉස්සරහා වුණ පොරොන්දුව සහ ඇති කරගත්ත ගිවිසුම.
^ මූ.අ., “හුළං හමන හැම පැත්තටම.”
