එසකියෙල් 20:1-49
20 හත්වෙනි අවුරුද්දේ පස්වෙනි මාසයේ දහවෙනිදා ඊශ්‍රායෙල්වරු අතරේ හිටපු වැඩිමහල්ලන්ගෙන් සමහරදෙනෙක් මං ළඟට ඇවිත් මං ඉස්සරහා ඉඳගත්තා. එයාලට ඕනෙ වුණේ යෙහෝවා දෙවියන්ගෙන් තොරතුරු දැනගන්නයි.
2 එතකොට යෙහෝවා මට මෙහෙම කිව්වා.
3 “මනුෂ්‍ය පුත්‍රය, ඊශ්‍රායෙල්වරුන්ගේ වැඩිමහල්ලන්ට කතා කරලා මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මේකයි. “ඔබ ආවේ දේවල් ගැන මගෙන් අහලා දැනගන්නද? ‘ජීවමාන දෙවි වන මම මං ගැනම දිවුරලා කියන්නේ ඔබ අහන කිසිම දේකට මම උත්තර දෙන්නේ නැහැ+ කියලයි.’ ඒ දේ කියන්නේ ශ්‍රේෂ්ඨතම පාලකයාණන් වන යෙහෝවායි.”’
4 “මනුෂ්‍ය පුත්‍රය, එයාලව විනිශ්චය කරන්න ඔයා ලෑස්තිද?* ඒක කරන්න ඇත්තටම ඔයා ලෑස්තිද? එහෙමනම් එයාලාගේ මුතුන්මිත්තන් කරපු පිළිකුල්සහගත දේවල් ගැන එයාලට කියන්න.+
5 එයාලට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මේකයි. “මම ඊශ්‍රායෙල් සෙනඟව තෝරගත්ත දවසේදී+ යාකොබ්ගේ පෙළපතෙන් එන අයට මම දිවුරලා* පොරොන්දුවකුත් දුන්නා. මං මොන වගේ කෙනෙක්ද කියලා ඊජිප්තු දේශයේදී මම ඔවුන්ට හෙළි කළා.+ මම දිවුරලා ඔවුන්ට කිව්වා ‘යෙහෝවා වන මම තමයි ඔබේ දෙවියන්’ කියලා.
6 එදා මම ඔවුන්ට දිවුරලා පොරොන්දු වුණා ඔවුන්ව ඊජිප්තු දේශයෙන් නිදහස් කරලා ඔවුන් වෙනුවෙන්ම මං තෝරගත්ත දේශයකට ඔවුන්ව ගෙනියනවා කියලා. ඒක කිරියෙන් සහ පැණියෙන් ඉතිරෙන දේශයක්.+ අනිත් හැම දේශයකටම වඩා ලස්සන දේශයක්.
7 මම ඔවුන්ට මෙහෙම කිව්වා. ‘හැමෝම ඔබේ හිත් ඇදිලා යන පිළිකුල්සහගත දේවල් අයින් කරලා දාන්න ඕනේ. ඔබ ඊජිප්තුවරුන්ගේ පිළිකුල්සහගත රූපවලට* නමස්කාර කරලා අපවිත්‍ර වෙන්න එපා.+ මම ඔබේ දෙවි වන යෙහෝවා.’+
8 “‘“ඒත් ඔවුන් මට විරුද්ධව කැරලිගැහුවා. මට ඇහුම්කන් දෙන්න අකමැති වුණා. ඔවුන් ඉස්සරහා තිබුණ පිළිකුල්සහගත දේවල් අයින් කළේවත් ඊජිප්තුවරුන්ගේ ජරා රූපවලට නමස්කාර කරන එක අතහැරියෙවත් නැහැ.+ ඉතින් ඊජිප්තුවේ හිටපු ඔවුන්ට මම පොරොන්දු වුණා මං මගේ කේන්තිය, මගේ කෝපය ඔවුන්ට විරුද්ධව සම්පූර්ණයෙන්ම පිට කරනවා කියලා.
9 ඒත් ඔවුන් වටේ හිටපු ජාතීන් ඉස්සරහා මගේ නම අගෞරවයට පත් වෙනවා දකින්න මං කැමති වුණේ නැහැ. ඒ නිසා මං මගේ නම ගැන හිතලා ඔවුන්ව ඊජිප්තු දේශයෙන් පිටතට අරන් එද්දී, මං මොන වගේ කෙනෙක්ද කියලා ඔවුන්ට* හෙළි කළා.+ අවට ජාතීන් ඉස්සරහම මං ඒ දේ කළා.+
10 මම ඔවුන්ව ඊජිප්තු දේශයෙන් නිදහස් කරලා පාළුකරයට ගෙනාවා.+
11 “‘“ඊටපස්සේ මම මගේ අණපනත් සහ තීන්දු ගැන ඔවුන්ට දැනුම් දුන්නා.+ එහෙම කළේ කෙනෙක් ඒවා පිළිපැද්දොත් දිගටම ජීවත් වෙන්න ඔහුට අවස්ථාව දෙන්නයි.+
12 මම ඔවුන්ට සබත් දවස් පවත්වන්න කියලත් නියම කළා.+ ඒක ඔවුන්ට ලකුණක්.+ ඒ ලකුණ දුන්නේ ශුද්ධ සෙනඟක් විදිහට ඔවුන්ව වෙන් කරන්නේ යෙහෝවා වන මමයි කියලා ඔවුන්ට මතක් කරලා දෙන්නයි.
13 “‘“ඒත් ඊශ්‍රායෙල් සෙනඟ පාළුකරයේදී මට විරුද්ධව කැරලිගැහුවා.+ ඔවුන් මගේ අණපනත් පිළිපැද්දේ නැහැ. මං දුන්න තීන්දු ගණන් ගත්තේ නැහැ. කෙනෙක් ඒ තීන්දුවලට එකඟව වැඩ කළා නම් දිගටම ජීවත් වෙන්න ඔහුට අවස්ථාව තිබුණා. ඒත් මං නියම කරපු සබත් දවස්වලට ඔවුන් කිසිම ගෞරවයක් පෙන්නුවේ නැහැ. ඔවුන් ඒවා කඩ කළා. ඒ නිසා ඔවුන්ට විරුද්ධව ඇවිළිලා තියෙන මගේ කේන්තිය පාළුකරයේදීම පිට කරලා ඔවුන්ව නැත්තටම නැති කරලා දානවා කියලා මම පොරොන්දු වුණා.+
14 ඒත් මම ඊජිප්තුවෙන් ඔවුන්ව නිදහස් කරපු විදිහ දැක්ක ජාතීන් ඉස්සරහා මගේ නම අගෞරවයට පත් වෙනවා දකින්න මම කැමති වුණේ නැහැ. ඒ නිසා මං මගේ නම ගැන හිතලා වැඩ කළා.+
15 මම ඔවුන් වෙනුවෙන්ම වෙන් කරපු දේශයට ඔවුන්ව අරන් යන්නේ නැහැ කියලත් පාළුකරයේදී මං ඔවුන්ට දිවුරලා කිව්වා.+ කිරියෙන් සහ පැණියෙන් ඉතිරෙන ඒ දේශය+ අනිත් හැම දේශයකටම වඩා කොච්චර ලස්සන දේශයක්ද!
16 මං දිවුරලා එහෙම කිව්වේ ඔවුන් මගේ තීන්දු ගණන් ගත්තෙවත් මගේ අණපනත්වලට කීකරු වුණේවත් මං නියම කරපු සබත් දවස් පැවැත්තුවෙවත් නැති නිසයි. ඔවුන්ගේ හිත් ඇදිලා ගියේම ඔවුන්ගේ පිළිකුල්සහගත රූපවලටයි.+
17 “‘“ඒත් මට ඔවුන් ගැන අනුකම්පාවක් ඇති වුණ නිසා මම ඔවුන්ව විනාශ කළේ නැහැ. පාළුකරයේදී මම ඔවුන්ව නැත්තටම නැති කළේ නැහැ.
18 පාළුකරයේ ඉද්දී ඔවුන්ගේ පුතාලට මම මෙහෙම කිව්වා.+ ‘ඔබ ඔබේ තාත්තලා හිතුමතේට හදාගත්ත නීති පිළිපදින්නවත්+ ඔවුන් ගත්ත විදිහේ තීරණ ගන්නවත් එපා. ඔවුන්ගේ පිළිකුල්සහගත රූපවලට නමස්කාර කරලා ඔබ අපවිත්‍ර වෙන්න එපා.
19 මම ඔබේ දෙවි වන යෙහෝවායි. ඒ නිසා මගේ අණපනත් පිළිපදින්න. මගේ තීන්දු හිතට අරන් ඒවාට එකඟව ජීවත් වෙන්න.+
20 මම නියම කරපු සබත් දවස් ශුද්ධ දවස් විදිහට සලකන්න.+ ඒවා ඔබට ලකුණක් වෙයි. මම ඔබේ දෙවි වන යෙහෝවා කියලා ඒවා ඔබට මතක් කරලා දෙයි.’+
21 “‘“ඒත් ඔවුන්ගේ පුතාලත් මට විරුද්ධව කැරලිගහන්න පටන්ගත්තා.+ ඔවුන් මගේ අණපනත් පිළිපැද්දේ නැහැ. මං දුන්න තීන්දු හිතට ගත්තෙවත් ඒවාට එකඟව ජීවත් වුණේවත් නැහැ. කෙනෙක් ඒ තීන්දුවලට එකඟව වැඩ කළා නම් දිගටම ජීවත් වෙන්න ඔහුට පුළුවන්. ඒත් මම නියම කරපු සබත් දවස් ඔවුන් පැවැත්තුවේ නැහැ. ඒ නිසා මං මගේ කේන්තිය, මගේ කෝපය පාළුකරයේදී සම්පූර්ණයෙන්ම ඔවුන්ට විරුද්ධව පිට කරනවා කියලා පොරොන්දු වුණා.+
22 ඒත් මම මගේ නම ගැන හිතලා+ මගේ කේන්තිය පිට කළේ නැහැ.+ එහෙම කළා නම් මම ඔවුන්ව* බේරගත්ත විදිහ දැකපු ජාතීන් ඉස්සරහා මගේ නම අගෞරවයට පත් වෙන්න තිබුණා.
23 ඔවුන්ව එක එක දේශවලට පන්නලා ජාතීන් අතරේ විසුරුවාහරිනවා කියලත් පාළුකරයේදී මම ඔවුන්ට දිවුරලා කිව්වා.+
24 එහෙම කිව්වේ ඔවුන් මගේ තීන්දු පිළිපැද්දෙවත් මගේ අණපනත් ගණන් ගත්තෙවත්+ මං නියම කරපු සබත් දවස් පැවැත්තුවෙවත් නැති නිසයි. ඔවුන්ගේ තාත්තලා නමස්කාර කරපු පිළිකුල්සහගත රූප පස්සේ ඔවුනුත් ගියා.+
25 ඔවුන්ම දාගත්ත, කිසිම ප්‍රයෝජනයක් නැති ඔවුන්ගේ නීතිවලට එකඟව වැඩ කරන්නත් ඔවුන්ව විනාශයට අරගෙන යන තීරණ ගන්නත් මම ඔවුන්ට ඉඩහැරියා.+
26 ඔවුන් තමන්ගේ කුලුඳුල් දරුවන්ව ගින්නෙන් දවලා පූජා විදිහට ඔප්පු කළා.+ ඔවුන්ට ඒ විදිහට අපවිත්‍ර වෙන්න මං ඉඩහැරියා. මං එහෙම කළේ ඔවුන්ව විනාශ කරලා දාන්නයි. එතකොට මම යෙහෝවා කියලා පිළිගන්න ඔවුන්ට සිද්ධ වෙනවා.”’
27 “මනුෂ්‍ය පුත්‍රය, ඊශ්‍රායෙල් සෙනඟට කතා කරන්න. එයාලට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “ඔබේ තාත්තලා මට ද්‍රෝහි වෙලා කරපු වැඩ නිසා මට වුණේ ලොකු අපහාසයක්.
28 ඒත් මං දිවුරලා ඔවුන්ට දෙන්න පොරොන්දු වුණ දේශයට ඔවුන්ව අරන් ආවා.+ එහෙදීත් ඔවුන් කඳු හෙල්, සරුවට වැඩුණු ගස් දැක්ක ගමන්ම+ ඒවාට පූජා ඔප්පු කරන්න පටන්ගත්තා. ඔවුන් මං පිළිකුල් කරපු පූජා ඔප්පු කළා. මිහිරි සුවඳක් නැඟෙන පූජාත් පාන පූජාත් ඔවුන් ඒ තැන්වල ඔප්පු කළා.
29 ඒ නිසා මම ඔවුන්ගෙන් මෙහෙම ඇහුවා. ‘ඔබ මේ පූජනීය තැන්වලට* යන්නේ මොනවා බලාපොරොත්තුවෙන්ද? (ඒ තැන් අදටත් හඳුන්වන්නේ පූජනීය ස්ථාන කියලයි.)’”’+
30 “ඊශ්‍රායෙල් සෙනඟට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “ඔබේ මුතුන්මිත්තන් පිළිකුල්සහගත රූප පස්සේ ගිහින් මට ද්‍රෝහි වුණා.* ඔබත් හදන්නේ ඒ දේම කරලා අපවිත්‍ර වෙන්නද?+
31 ඔබ තවමත් ඔබේ පිළිකුල්සහගත රූපවලට පූජා ඔප්පු කරනවා. ඔබේ පුතාලව ගින්නෙන් දවලා පූජා කරනවා.+ ඊශ්‍රායෙල් සෙනඟෙනි, ඔබ ඒ විදිහට අපවිත්‍ර වෙන ගමන්ම මගෙනුත් දේවල් ගැන අහනවා. මං උත්තර දෙයි කියලා ඔබ හිතනවාද?”’+
“ශ්‍රේෂ්ඨතම පාලකයාණන් වන යෙහෝවා කියන්නේ මේකයි. ‘ඔබ අහන කිසිම දේකට මම උත්තර දෙන්නේ නැහැ. ජීවමාන දෙවි වන මම මං ගැනම දිවුරලා ඒක කියනවා.+
32 ඔබ කියනවා “අපිත් ලීවලට, ගල්වලට නමස්කාර කරන ජාතීන් වගේ වෙමු.+ අවට දේශවල ඉන්න සෙනඟ වගේ වෙමු” කියලා. ඒත් ඔබ හිතාගෙන ඉන්න ඒ දේ කවදාවත් වෙන්නේ නැහැ.’
33 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබේ රජ විදිහට මං ඔබව පාලනය කරනවා. මම මගේ අත දික් කරලා මගේ මහත් බලය පාවිච්චි කරලා ඔබට දඬුවම් කරනවා. ඔබ ගැන මට තියෙන කේන්තිය කොච්චරද කියලා ඔබ අනිවාර්යයෙන්ම දකියි. ජීවමාන දෙවි වන මම මං ගැනම දිවුරලා ඒ දේ කියනවා.+
34 විවිධ ජාතීන් අතරේ ඉන්න ඔබව මම එළියට ගේනවා. එක එක දේශවලට විසුරුවාහැරිය ඔබව මම එකට එකතු කරගන්නවා. මම මගේ අත දික් කරලා මගේ මහත් බලය පාවිච්චි කරලා ලොකු කේන්තියකින් ඒ දේ කරනවා.+
35 මම ඔබව ජාතීන්ගේ පාළුකරයට අරගෙන එනවා. එතනදී මම ඔබ ඉස්සරහට ඇවිත් ඔබව විනිශ්චය කරනවා.+
36 “‘ඊජිප්තු දේශයේ පාළුකරයේදී මම ඔබේ මුතුන්මිත්තන්ව විනිශ්චය කරපු විදිහටම ඔබවත් විනිශ්චය කරනවා’ කියලා ශ්‍රේෂ්ඨතම පාලකයාණන් වන යෙහෝවා කියනවා.
37 ‘එඬේරාගේ සැරයටිය යටින් බැටළුවන්ව යවනවා වගේ මම ඔබවත් සැරයටිය යටින් යවනවා.+ එතකොට ඔබට ගිවිසුමට එකඟව වැඩ කරන්නම වෙනවා.
38 මට විරුද්ධව වැරදි කරන අයවයි, කැරලිකාරයන්වයි මම ඔබ අතරින් අයින් කරලා දානවා.+ ඔවුන් විදේශිකයන් විදිහට ඉන්න දේශවලින් මම ඔවුන්ව නිදහස් කරගෙන එනවා. ඒත් ඊශ්‍රායෙල් දේශයට අඩිය තියන්න ඔවුන්ට හම්බ වෙන්නේ නැහැ.+ මම යෙහෝවා කියලා පිළිගන්න ඔබට සිද්ධ වෙනවා.’
39 “ඊශ්‍රායෙල් සෙනඟෙනි, ශ්‍රේෂ්ඨතම පාලකයාණන් වන යෙහෝවා ඔබට මෙහෙම කියනවා. ‘හැමෝම ගිහින් ඔබ හදාගත්ත පිළිකුල්සහගත රූපවලට නමස්කාර කරන්න.+ ඒත් මේ දේ මතක තියාගන්න. ඔබ මට ඇහුම්කන් දෙන්නෙම නැත්නම් මම ඔබව අතහරිනවා. එතකොට ඔබ ඔප්පු කරන පූජා නිසාත් ඔබේ පිළිකුල්සහගත රූප නිසාත් මගේ ශුද්ධ නම තවදුරටත් අගෞරවයට පත් වෙන්නේ නැහැ.’+
40 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘මගේ ශුද්ධ කන්දේදී, ඊශ්‍රායෙල්වල තියෙන උස කන්දකදී+ මුළු ඊශ්‍රායෙල් සෙනඟම මට නමස්කාර කරනවා.+ එදාට මම ඔවුන් ගැන සතුටු වෙනවා. ඔබේ හැම ශුද්ධ පූජාවක්ම ඒ කියන්නේ ඔබේ සම්මාදම්, ඔබ ඔප්පු කරන හොඳම දේවල් මං ඉස්සරහට ගෙනෙයි කියලා මම බලාපොරොත්තු වෙනවා.+
41 විවිධ ජාතීන් අතරටත් එක එක දේශවලටත් විසුරුවාහැරිය ඔබව මම එකට එකතු කරගත්තාට පස්සේ මම ඔබ ගැන සතුටු වෙනවා.+ මොකද එදාට ඔබ ඔප්පු කරන පූජාවලින් නැඟෙන්නේ මිහිරි* සුවඳක්. මම ශුද්ධ කෙනෙක් කියන දේ ජාතීන් ඉස්සරහා මම ඔබට පෙන්නනවා.’+
42 “‘ඔබේ මුතුන්මිත්තන්ට දෙන්න මං පොරොන්දු වුණ දේශය වන ඊශ්‍රායෙල් දේශයට මම ඔබව අරගෙන එනවා.+ එතකොට මම යෙහෝවා කියලා පිළිගන්න ඔබට සිද්ධ වෙනවා.+
43 අතීතයේ ඔබ කරපු දේවල්, ඔබ හැසිරුණ විදිහ නිසා ඔබ අපවිත්‍ර වුණා. ඒ හැම දෙයක්ම එදාට ඔබට මතක් වෙයි.+ ඔබ කරපු හැම පහත් දෙයක් ගැනම හිතද්දී ඔබට ඔබ ගැනම ලැජ්ජාවක් දැනෙයි.+
44 ඊශ්‍රායෙල් සෙනඟෙනි, මම ඔබ එක්ක වැඩ කරන විදිහ දැක්කාම මම යෙහෝවා කියලා පිළිගන්න ඔබට සිද්ධ වෙනවා. මොකද මම වැඩ කළේ මගේ නම ගැන හිතලා.+ ඔබ කරපු හැම දූෂිත දේකටම, දුෂ්ට වැඩකටම ලැබෙන්න ඕනෙ දඬුවම මම ඔබට දුන්නේ නැහැ.’ එහෙම කියන්නේ ශ්‍රේෂ්ඨතම පාලකයාණන් වන යෙහෝවායි.”
45 යෙහෝවා මට ආයෙත් කතා කරලා මෙහෙම කිව්වා.
46 “මනුෂ්‍ය පුත්‍රය, ඔයාගේ මූණ දකුණු දිශාවට හරවලා දකුණට විරුද්ධව කතා කරන්න. දකුණු දිශාවේ තියෙන කැලෑවලට විරුද්ධව අනාවැකි කියන්න.
47 ඒ කැලෑවලට මෙහෙම කියන්න. ‘යෙහෝවා කියන දේට ඇහුම්කන් දෙන්න. ශ්‍රේෂ්ඨතම පාලකයාණන් වන යෙහෝවා කියන්නේ මේකයි. “මම ඔබට විරුද්ධව ගින්නක් පත්තු කරනවා.+ ඒ ගින්නෙන් ඔබ අතරේ තියෙන හැම ගහක්මත් වේළිලා ගිය හැම ගහක්මත් පුච්චලා දානවා. ඒ ඇවිළෙන ගිනිදලු නිවලා දාන්නේ නැහැ.+ දකුණේ ඉඳන් උතුර වෙන කල් ඉන්න හැම කෙනෙක්ටම ඒ ගින්නේ රස්නය දැනෙයි.
48 ඒ කැලෑවලට ගිනි තිබ්බේ යෙහෝවා වන මම කියලා හැම කෙනෙක්ම දකියි. ඒක නිවලා දාන්න බැරි ගින්නක්.”’”+
49 එතකොට මම මෙහෙම කිව්වා. “අනේ යෙහෝවා, ශ්‍රේෂ්ඨතම පාලකයාණෙනි, එයාලා කියනවා මම තේරවිලිම කියකිය ඉන්නවා කියලා.”
පාදසටහන්
^ හෝ, “එයාලට විරුද්ධව දීලා තියෙන තීන්දු ගැන කියන්න ඔයා ලෑස්තිද?”
^ මූ.අ., “මම මගේ අත උස්සලා.”
^ හෙබ්‍රෙව් භාෂාවෙන් ඒ රූප කොච්චර පිළිකුල් දේවල්ද කියලා විස්තර කරන්න ඒවාට “ගොම” කියන වචනය පාවිච්චි කරලා තියෙනවා.
^ ඒ කියන්නේ ඊශ්‍රායෙල්වරුන්ට.
^ ඒ කියන්නේ ඊශ්‍රායෙල්වරුන්ව.
^ මූ.අ., “උස් තැන්වලට.”
^ ඒ ද්‍රෝහිවීම හරියට කෙනෙක් අනාචාරයේ යෙදෙනවා වගෙයි.
^ හෝ, “දෙවියන්ව සතුටු කරන.”
