එසකියෙල් 23:1-49
23 යෙහෝවා දෙවියන් ආයෙත් මට කතා කරලා මෙහෙම කිව්වා.
2 “මනුෂ්‍ය පුත්‍රය, අම්මා කෙනෙක්ට දුවලා දෙන්නෙක් හිටියා.+
3 එයාලා දෙන්නා තරුණ වයසේම ඊජිප්තුවේදී ගණිකාවන් වුණා.+ එහෙදී එයාලා අනාචාරයේ යෙදිලා තමන්ගේ නිර්මලකම නැති කරගත්තා.
4 අක්කාගේ නම ඔහොලා.* නංගිගේ නම ඔහොලිබා.* ඒ දෙන්නාව මම අයිති කරගත්තා. එයාලා දරුදැරියන්වත් බිහි කළා. ඔහොලා කියන්නේ සමාරිය.+ ඔහොලිබා කියන්නේ යෙරුසලම.
5 “ඔහොලා මට අයිති වෙලා ඉද්දීම ගණිකාවක් වගේ වැඩ කරන්න පටන්ගත්තා.+ ඇය රාගයෙන් මත් වෙලා ඇගේ පෙම්වතුන්+ ඒ කියන්නේ ඇගේ අසල්වාසීන් වුණ ඇසිරියානුවන් පස්සේ ගියා.+
6 ඇගේ පෙම්වතුන් නිල් පාට ඇඳුම්වලින් සැරසිලා හිටපු ආණ්ඩුකාරයන් සහ නිලධාරීන්. එයාලා හැමෝම අශ්වයන් පිටේ යන කඩවසම් තරුණයෝ.
7 ඇසිරියාවේ වංශවත් හැම කෙනෙක් එක්කම ඇය දිගටම අනාචාරයේ යෙදුණා. ඇය රාගයෙන් මත් වෙලා හොයාගෙන ගිය අය නිසා අපවිත්‍ර වුණා.+ එයාලාගේ පිළිකුල්සහගත රූපවලට* නමස්කාර කරලා ඇය අපවිත්‍ර වුණා.
8 ඊජිප්තුවේදී ගණිකාවක් වගේ හැසිරුණ ඇය දිගටම ඒ දේ කළා. එහෙදී තරුණ වයසේ හිටපු ඇය එක්ක එයාලා* ලිංගික සම්බන්ධකම් පැවැත්තුවා. එයාලා ඇගේ නිර්මලකම නැති කරලා දාලා තමන්ගේ ආශාවන් ඇගෙන් ඉටු කරගත්තා.+
9 ඉතින් ඇයට වහ වැටිලා හිටපු ඇගේ පෙම්වතුන්ගේ අතට මම ඇයව අල්ලලා දුන්නා. ඒ කියන්නේ ඇය හොයාගෙන ගිය ඇසිරියානුවන්ගේ අතට ඇයව අල්ලලා දුන්නා.+
10 එයාලා ඇයව නිරුවත් කළා.+ ඇගේ දූපුතුන්ව අල්ලගෙන+ ඇයව කඩුවෙන් මරලා දැම්මා. ඇය නම කැත කරගත්ත කෙනෙක් විදිහට කාන්තාවන් අතරේ ප්‍රසිද්ධ වුණා. ඒ නිසා එයාලා ඇයට දඬුවම් කළා.
11 “ඇගේ නංගි වුණ ඔහොලිබා වෙච්ච ඒ හැම දෙයක්ම දැක්කා. ඒත් ඇය තව තවත් රාගයෙන් මත් වුණා. ඇය ගණිකාවක් විදිහට අක්කාටත් වඩා පහත් දේවල් කළා.+
12 ඇය ආශාවෙන් මත් වෙලා ඇගේ අසල්වාසීන් වුණ ඇසිරියාවේ ආණ්ඩුකාරයන් සහ නිලධාරීන් පස්සේ ගියා.+ වටින ඇඳුම්වලින් සැරසිලා හිටපු ඒ අය අශ්වයන් පිටේ යන, කඩවසම් තරුණයෝ.
13 ඇය ඒ විදිහට අපවිත්‍ර වෙද්දී අක්කායි, නංගියි වැඩ කරන්නේ එකම විදිහට කියලා මට තේරුණා.+
14 ඒත් නංගි තව තවත් වැඩියෙන් පහත් දේවල් කළා. ඇය දැක්කා පුරුෂයන්ගේ රූප බිත්තියේ කැටයම් කරලා තියෙනවා. රතු සායම් ගාලා කැටයම් කරපු කල්දිවරුන්ගේ පෙනුම තියෙන රූප ඇය දැක්කා.
15 ඒ රූපවල හිටපු අයට ඉණපටි, ලස්සන හිස්වැසුම්* දාලා තිබුණා. එයාලා හරියට රණශූරයන් වගෙයි. ඒ හැම රූපයකටම තිබුණේ කල්දිවරුන්ගේ දේශයේ ඉපදුණ බැබිලෝනිවරුන්ගේ පෙනුමයි.
16 ඒ රූප දැක්ක ගමන්ම ඇය රාගයෙන් මත් වෙලා කල්දිවරුන්ගේ දේශයට පණිවිඩකරුවන් යැව්වා.+
17 ඉතින් බැබිලෝනිවරු දිගින් දිගටම ඇගේ යහන හොයාගෙන ආවා. ඇය එක්ක ලිංගික සම්බන්ධකම් පවත්වලා ඇයව අපවිත්‍ර කළා. ඊටපස්සේ ඇයට ලොකු අප්පිරියාවක් දැනිලා එයාලාගෙන් අයින් වුණා.
18 “ඇය කිසිම ලැජ්ජාවක් බයක් නැතුව ගණිකාවක් වගේ හැසිරිලා ඇගේ නිරුවත එළිපිටම පෙන්නුවා.+ ඒ ගැන මට දැනුණ පිළිකුල නිසා මම ඇයව ප්‍රතික්ෂේප කළා. මම ඇගේ අක්කාගෙන් අයින් වුණ විදිහටම ඇගෙනුත් අයින් වුණා.+
19 ඇය තරුණ කාලේ ඊජිප්තුවේ ඉද්දී අනාචාරයේ යෙදුණ විදිහ මතක් කරකර+ තව තවත් වැඩියෙන් පහත් දේවල් කළා.+
20 ඇය ආශාවෙන් මත් වෙලා ඇගේ පෙම්වතුන් පස්සේ ගියා. ඇය හැසිරුණේ හරියට බූරුවන්ට සහ අශ්වයන්ට තියෙනවා වගේ ලිංගේන්ද්‍රියන් තියෙන පුරුෂයන්ගේ උපභාර්යාවන් වගෙයි.
21 ඔහොලිබා, ඔයා තරුණ කාලේදී ඊජිප්තුවේ ගත කරපු ජරා ජීවිතේට ඔයාට තිබුණේ පුදුම ආසාවක්.+ එහෙදී එයාලා ඔයා එක්ක අනාචාරයේ යෙදිලා ඔයාගේ නිර්මලකම නැති කළා.+
22 “ඔහොලිබා, ශ්‍රේෂ්ඨතම පාලකයාණන් වන යෙහෝවා ඔයාට කියන මේ දේට ඇහුම්කන් දෙන්න. ‘ඔබට අප්පිරියාවක් දැනිලා අයින් කරපු ඔබේ පෙම්වතුන්ව+ මම ඔබට විරුද්ධව උසිගන්වනවා. ඔබට පහර දෙන්න හැම පැත්තෙන්ම මම ඔවුන්ව එවනවා.+
23 මම බැබිලෝනිවරුන්වයි,+ කල්දිවරුන් හැමෝවමයි,+ පෙකොඩ්,+ ෂෝවා සහ කෝවාවල සෙනඟවයි, ඇසිරියාවේ හැමෝවමයි ඔබට විරුද්ධව එවනවා. ඔවුන් හැමෝම අශ්වයන් පිටේ යන කඩවසම් තරුණයෝ. ඔවුන් ආණ්ඩුකාරයන්, නිලධාරීන් සහ තෝරගත්ත රණශූරයන්.
24 ලොකු කුඩා පලිස්* අතේ අරන්, හිස්වැසුම් දාගෙන, ලොකු සේනාවක් එක්ක යුධ රථවල නැඟලා ඔවුන් ඔබට විරුද්ධව එයි. ඔවුන්ගේ යුධ රථවල හඬ හැම පැත්තෙන්ම ඇහෙයි. ඔවුන් ඔබව වට කරයි. ඔබව විනිශ්චය කරන්න මම ඔවුන්ට අවසර දෙනවා. ඔවුන් තමන්ට කැමති විදිහට ඔබට දඬුවම් කරයි.+
25 මට ඔබ ගැන දැනෙන කේන්තිය මම පිට කරනවා. එතකොට ඔවුන් ලොකු කෝපයකින් ඔබට පහර දෙයි. ඔබේ නාස් සහ කන් ඔවුන් කපලා දායි. ඉතුරු වෙන අයව කඩුවෙන් මරලා දායි. ඔවුන් ඔබේ දරුදැරියන්ව අරන් යයි. ඉතුරු වෙන අයව ගින්නෙන් පුච්චලා දායි.+
26 ඔවුන් ඔබේ ඇඳුම් ගලවගනියි.+ ඔබේ ලස්සන ආභරණ පැහැරගනියි.+
27 ඔබේ පහත් හැසිරීමයි, ඊජිප්තුවේදී පටන්ගත්ත+ ඔබේ අනාචාර ජීවිතෙයි මම කෙළවර කරනවා.+ ඔබ ආයෙත් ඔවුන්* දිහා බලන්නේ නැහැ. ඊජිප්තුව ගැන ඔබ ආයෙත් මතක් කරන්නෙවත් නැහැ.’
28 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබ වෛර කරපු, අප්පිරියාවක් දැනිලා ඔබ අයින් කරපු අයගේ අතටම මම දැන් ඔබව භාර දෙන්නයි යන්නේ.+
29 ඔවුන් ඔබට විරුද්ධව එන්නේ ලොකු වෛරයකින්. ඔබ වෙහෙස මහන්සි වෙලා හම්බ කරපු හැම දෙයක්ම ඔවුන් අරන් යයි.+ ඔවුන් ඔබව නිරුවත් කරලා හැමෝටම පේන්න ඔබව දාලා යයි. කිසිම ලැජ්ජාවක් නැතුව ඔබ අනාචාරයේ යෙදුණ විදිහ හැමෝම දකියි. ඔබේ පහත් හැසිරීමයි, අනාචාර වැඩයි හැමෝම ඉස්සරහා හෙළි වෙයි.+
30 ඒ හැම දෙයක්ම ඔබට වෙන්නේ ඔබ ගණිකාවක් වගේ වෙනත් ජාතීන් පස්සේ වහ වැටිලා ගිය නිසයි.+ ඔවුන්ගේ පිළිකුල්සහගත රූප පස්සේ ගිහින් අපවිත්‍ර වුණ නිසයි.+
31 අක්කාගේ අඩිපාරේම ඔබ ගිය නිසා+ මම ඇයට දුන්න කුසලානේම ඔබේ අතටත් දෙනවා.’+
32 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා.
‘ඔබේ සහෝදරියට දුන්න විශාල, ගැඹුරු කුසලානෙන් ඔබටත් බොන්න වෙනවා.+නින්දාවෙන් පුරවලා තියෙන ඒ කුසලානෙන් බොද්දී හැමෝගෙම හිනාවට, නින්දා අපහාසවලට ඔබ ලක් වෙයි.+
33 ඔබේ සහෝදරිය වුණ සමාරියට දුන්නේභීතියක් ගේන, විනාශයක් කරන කුසලානයක්.ඔබ ඒකෙන් හොඳටම බීලා මත් වෙයි. දුක ඔබව වෙළාගනියි.
34 ඔබට අනිවාර්යයෙන්ම කුසලානය හිස් වෙන කල්ම බොන්න වෙනවා.+ ඒ මැටි කුසලානේ කැඩුණ කෑලිත් ඔබට හපහප ඉන්න වෙනවා.ඔබ දුකෙන් ඔබේ පියයුරු කපලා අයින් කරනවා.
“මොකද ඒ දේ කිව්වේ මමයි” කියලා ශ්‍රේෂ්ඨතම පාලකයාණන් වන යෙහෝවා කියනවා.’
35 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබේ පහත් හැසිරීමෙයි, අනාචාර වැඩවලයි ප්‍රතිඵල විඳින්න ඔබට සිද්ධ වෙනවා. මොකද ඔබ මාව අමතක කළා. මාව සම්පූර්ණයෙන්ම අතහැරලා දැම්මා.’”+
36 ඊටපස්සේ යෙහෝවා මට මෙහෙම කිව්වා. “මනුෂ්‍ය පුත්‍රය, ඔහොලාටයි, ඔහොලිබාටයි+ ලැබෙන්න යන විනිශ්චය ගැන කියන්න ඔයා ලෑස්තිද? එයාලා කරන පිළිකුල්සහගත දේවල් ගැන එයාලට කෙළින්ම කියන්න ඔයා ලෑස්තිද?
37 එයාලා අනාචාරයේ යෙදුණා.*+ එයාලාගේ අත් ලේවලින් නැහැවිලා. තමන් හදාගත්ත පිළිකුල්සහගත රූපවලට නමස්කාර කරලා එයාලා අනාචාරයේ යෙදුණා මදිවට මගෙන් එයාලට ලැබුණ පුතාලාවත් ගින්නෙන් දවලා ඒ රූපවලට ඔප්පු කළා.+
38 ඒ දවසේම එයාලා මට විරුද්ධව තව දේවල් කළා. එයාලා මගේ ශුද්ධස්ථානය අපවිත්‍ර කළා. මම නියම කරපු සබත් දවස්වලට කිසිම ගෞරවයක් පෙන්නුවේ නැහැ. ඒවා කඩ කළා.
39 තමන්ගේ පුතාලව මරලා පිළිකුල්සහගත රූපවලට පූජා කරපු දවසේම+ එයාලා මගේ ශුද්ධස්ථානයට ඇවිත් ඒකත් අපවිත්‍ර කළා.+ ඒවා තමයි එයාලා මගේ ගෘහය ඇතුළේ කළේ.
40 එයාලා දුර ඈත ඉන්න පුරුෂයන්ව ගෙන්නගන්න පණිවිඩකරුවෙක්වත් යැව්වා.+ ඒ අය එද්දී ඔයා* මොනවාද කළේ? ඔයා හොඳට ඇඟපත හෝදගෙන, ඇස් පාට කරගෙන ලස්සන ආභරණවලින් සැරසුණා.+
41 ඔයා විශාල යහනක ඉඳගත්තා.+ ඒක ඉස්සරහා මේසයක් තියලා+ මගේ සුවඳ ද්‍රව්‍යයි,+ මගේ තෙලුයි+ ඒක උඩින් තිබ්බා.
42 විනෝදයෙන් ඉන්න පුරුෂයන්ගේ හඬ එහෙන් ඇහුණා. ඒ කට්ටිය අතරේ පාළුකරයෙන් ගෙන්නගත්ත බේබද්දොත් හිටියා. එයාලා ඒ ස්ත්‍රීන් දෙන්නාට ලස්සන ඔටුනු දාලා එයාලාගේ අත්වලට වළලුත් දැම්මා.
43 “අනාචාරයේ යෙදිලා හෙම්බත් වෙලා ඉන්න ඇය ගැන මම මෙහෙම කිව්වා. ‘ඒ මොනවා වුණත් ඇය දිගටම ගණිකාවක් වගේ හැසිරෙයි.’
44 ඒ අය ඇය ළඟට ආයේ ආයේ ගියා. කෙනෙක් ගණිකාවක් ළඟට ආයේ ආයේ යනවා වගේ පහත් විදිහට හැසිරුණ ඔහොලා සහ ඔහොලිබා කියන ස්ත්‍රීන් දෙන්නා ළඟට ඒ අය දිගටම ගියා.
45 ඇය අනාචාරයේ යෙදුණ නිසාත්+ ලේ හලපු නිසාත්+ ධර්මිෂ්ඨ පුරුෂයෝ ඇවිත් ඇයට ලැබෙන්න ඕනෙ විනිශ්චය දෙනවා. මොකද ඔවුන් දෙන්නාම අනාචාරයේ යෙදෙන ස්ත්‍රීන්. එයාලාගේ අත්වල ලේ තැවරිලා.+
46 “ශ්‍රේෂ්ඨතම පාලකයාණන් වන යෙහෝවා කියන්නේ මේකයි. ‘ඔවුන්ට විරුද්ධව හමුදාවක් කැඳවනවා. ඒ අය ඔවුන්ට කරන දේ දැකලා හැමෝම බයෙන් වෙවුලයි. ඔවුන්ට අයිති හැම දේම කොල්ල කයි.+
47 ඒ හමුදාව ඔවුන්ට ගල් ගහලා+ ඔවුන්ව කඩුවෙන් මරලා දානවා. ඔවුන්ගේ දරුදැරියන්ව මරලා+ ගෙවල් ගිනිබත් කරලා දානවා.+
48 දේශයේ සිද්ධ වුණ හැම පහත් දෙයක්ම මම නැත්තටම නැති කරලා දානවා. හැම ස්ත්‍රියක්ම ඔබට වුණ දෙයින් පාඩමක් ඉගෙනගෙන ඔබ කරපු පහත් දේවල්වලින් අයින් වෙලා ඉඳියි.+
49 ඔබ කරපු පහත් දේවල්වලටත් පිළිකුල්සහගත රූපවලට නමස්කාර කරලා ඔබ කරපු වැරදිවලටත් ලැබෙන්න ඕනෙ දඬුවම් ඒ හමුදාව ඔබට දෙයි. එතකොට ශ්‍රේෂ්ඨතම පාලකයාණන් වන යෙහෝවා මමයි කියලා පිළිගන්න ඔබට සිද්ධ වෙනවා.’”+
පාදසටහන්
^ තේරුම, “මගේ කූඩාරම ඇය ඇතුළේ.”
^ තේරුම, “ඇගේ කූඩාරම.”
^ හෙබ්‍රෙව් භාෂාවෙන් ඒ රූප කොච්චර පිළිකුල් දේවල්ද කියලා විස්තර කරන්න ඒවාට “ගොම” කියන වචනය පාවිච්චි කරලා තියෙනවා.
^ සමහරවිට මෙතන කතා කරන්නේ ඊජිප්තුවරු ගැන වෙන්න ඇති.
^ මූ.අ., “ජටාවන්.”
^ දුනුවායන් පාවිච්චි කරපු එකක්.
^ ඒ කියන්නේ ඊජිප්තුවරු.
^ ඒ කියන්නේ දෙවියන්ට ද්‍රෝහි වෙලා වැඩ කළා.
^ ඒ කියන්නේ ඔහොලිබා.
