එසකියෙල් 34:1-31
34 යෙහෝවා දෙවියන් ආයෙත් සැරයක් මට කතා කරලා මෙහෙම කිව්වා.
2 “මනුෂ්‍ය පුත්‍රය, ඊශ්‍රායෙල් සෙනඟගේ එඬේරුන්ට විරුද්ධව අනාවැකි කියන්න. එයාලට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “ඊශ්‍රායෙල්වරුන්ගේ එඬේරුන්ට මුහුණ දෙන්න වෙන්නේ මොන තරම් දරුණු දේකටද!+ මොකද ඔවුන් තමන්වම පෝෂණය කරගන්නවා. ඇත්තටම එඬේරුන් පෝෂණය කරන්න ඕනෙ තමන්ගේ බැටළුවන්ව නෙමෙයිද?+
3 ඔබ කන්නේ සතුන්ගේ තෙල් කොටස්. අඳින්නේ බැටළු ලොම්වලින් හදපු ඇඳුම්. රැළේ ඉන්න මහතම සතාව කෑමට මරනවා.+ ඒත් රැළේ ඉන්න බැටළුවන්ට ඔබ කන්න දෙන්නේ නැහැ.+
4 ඔබ දුර්වල වුණ සතුන්ව ශක්තිමත් කළේවත් ලෙඩ උන්ට සාත්තු කළේවත් තුවාල වුණ උන්ට බෙහෙත් බැන්දෙවත් නැහැ. අයාලේ ගිය උන්ව ආයේ ගෙනාවෙවත් නැති වුණ සතුන්ව හොයාගෙන ගියේවත් නැහැ.+ ඒ වෙනුවට ඔබ උන්ව පාලනය කළේ හරිම නපුරු, කුරිරු විදිහටයි.+
5 එඬේරෙක් නැතුව බැටළුවෝ ඒ මේ අත විසිරිලා ගියා.+ හැම තැනම විසිරිලා ගිය උන්ව වනසතුන් ඇවිත් අල්ලගෙන කෑවා.
6 මගේ බැටළුවන් අතරමං වෙලා හැම කන්දක් දිගෙත් හෙල් මතත් ඔහේ ඇවිදගෙන ගියා. මගේ බැටළුවන් පොළොවේ සීසීකඩ විසිරිලා ගියා. කවුරුත් උන්ව හෙව්වෙවත් උන්ව හොයාගෙන ගියේවත් නැහැ.
7 “‘“එඬේරුන් වන ඔබ, යෙහෝවා කියන මේ දේට දැන් ඇහුම්කන් දෙන්න.
8 ‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “මම අනිවාර්යයෙන්ම පියවර ගන්නවා කියලා ජීවමාන දෙවි වන මම මං ගැනම දිවුරලා කියනවා. මොකද එඬේරෙක් හිටියේ නැති නිසා හැම වනසතෙක්ම ඇවිත් මගේ බැටළුවන්ව අල්ලගෙන උන්ව කාලා දැම්මා. මගේ එඬේරු මගේ බැටළුවන්ව හොයාගෙන ගියේ නැහැ. ඔවුන් මගේ බැටළුවන්ව පෝෂණය කළේ නැහැ. ඒ වෙනුවට ඔවුන් කළේ තමන්වම පෝෂණය කරගන්න එකයි.”’
9 එඬේරුන් වන ඔබ, යෙහෝවා කියන මේ දේට දැන් ඇහුම්කන් දෙන්න.
10 ශ්‍රේෂ්ඨතම පාලකයාණන් වන යෙහෝවා කියන්නේ මේකයි. ‘මම එඬේරුන්ට විරුද්ධව පියවර ගන්නවා. මගේ බැටළුවන්ව බලාගත්ත විදිහ ගැන එඬේරුන් මට වග කියන්න ඕනේ. මගේ බැටළුවන්ව පෝෂණය කරන වගකීමෙන් මම ඔවුන්ව අයින් කරලා දානවා.+ එඬේරුන්ට ආයේ තමන්ව පෝෂණය කරගන්න හම්බ වෙන්නේ නැහැ. ඔවුන්ගේ කටෙන් මගේ බැටළුවන්ව මං බේරගන්නවා. එතකොට උන්ව කාලා බඩ කට පුරවගන්න ඔවුන්ට හම්බ වෙන්නේ නැහැ.’”
11 “‘ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “මගේ බැටළුවන්ට මං ඉන්නවා. මං උන්ව හොයාගෙන යනවා. උන්ව බලාගන්නවා.+
12 අතරමං වුණ තමන්ගේ බැටළුවන්ව ආයෙත් හොයාගත්ත එඬේරෙක් වගේ මමත් මගේ බැටළුවන්ව බලාගන්නවා. උන්ව පෝෂණය කරනවා.+ වලාකුළුවලින් සහ අන්ධකාරයෙන් වැහිලා අඳුරු වුණ දවසේදී උන් මංමුළා වෙලා ගියා. ඒ තැන්වලින් මං උන්ව බේරගන්නවා.+
13 ජාතීන් අතරේ සහ දේශවල විසිරිලා ඉන්න ඔවුන්ව මම එකට එකතු කරලා ඔවුන්ගේ දේශයට ආපහු අරගෙන එනවා. මම ඔවුන්ව ඊශ්‍රායෙල්වල කඳුකරයටත් දිය පහරවල් ළඟටත් මිනිස්සු ජීවත් වෙන හැම තැනකටමත් අරන් ගිහින් පෝෂණය කරනවා.+
14 මම මගේ බැටළුවන්ව සරු තණබිමකට ගෙනල්ලා පෝෂණය කරනවා. ඊශ්‍රායෙල් දේශයේ උස කඳු මත උන් තණකොළ කයි.+ උන් ලගින්නේ නිල් තණබිම්වල.+ ඊශ්‍රායෙල් කඳුකරයේ හොඳම තණබිම්වලින් උන් පෝෂණය වෙයි.”
15 “‘“මම අනිවාර්යයෙන්ම මගේ බැටළුවන්ව පෝෂණය කරලා+ උන්ට නිදහසේ ඉන්න තැනක් දෙනවා”+ කියලා ශ්‍රේෂ්ඨතම පාලකයාණන් වන යෙහෝවා කියනවා.
16 “නැති වුණ බැටළුවන්ව මම හොයාගෙන යනවා.+ අතරමං වුණ බැටළුවන්ව මං අරන් එනවා. තුවාල වුණ උන්ට බෙහෙත් බඳිනවා. දුර්වල උන්ව ශක්තිමත් කරනවා. ඒත් මහත එකාවයි, ශක්තිමත් එකාවයි මම විනාශ කරලා දානවා. කෑම විදිහට මං උන්ට දෙන්නේ මගේ විනිශ්චය.”
17 “‘මගේ බැටළුවෙනි, ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “මම එක් එක් බැටළුවාව විනිශ්චය කරලා සාධාරණය ඉටු කරනවා. බැටළුවන්වයි, එළුවන්වයි දෙගොල්ලන්වම මම විනිශ්චය කරනවා.+
18 ඔබ* හොඳම තණබිම්වලින් කනවා මදිවට ඉතුරු වෙලා තියෙන තණකොළ කකුලෙන් පාගලා දානවා. පිරිසිදු වතුර බීලා ඊටපස්සේ කකුලෙන් වතුර කලත්තලා ඒක මඩ කරලත් දානවා.
19 දැන් මගේ බැටළුවන් කන්න ඕනෙ ඔබ පාගලා දාපු තණකොළද? බොන්න ඕනෙ ඔබ කලත්තලා මඩ කරපු වතුරද?”
20 “‘ශ්‍රේෂ්ඨතම පාලකයාණන් වන යෙහෝවා ඔවුන්ට මෙහෙම කියනවා. “මම ඇවිත් මහත බැටළුවන්ව විනිශ්චය කරලා කෙට්ටු බැටළුවන්ට සාධාරණය ඉටු කරලා දෙනවා.
21 මොකද ලෙඩ වුණ බැටළුවන්ව ඔබ තල්ලු කරලා දැම්මා.* උන් දුර ඈතට විසිරිලා යන කල්ම ඔබ ඔබේ අංවලින් උන්ට ඇන්නා.
22 මම මගේ බැටළුවන්ව බේරගන්නවා. උන් ආයෙත් සතුන්ගේ ගොදුරක් වෙන්නේ නැහැ.+ මම එක් එක් බැටළුවාව විනිශ්චය කරලා සාධාරණය ඉටු කරනවා.
23 මම උන්ව බලාගන්න එක එඬේරෙක්ව පත් කරනවා.+ ඒ මගේ සේවක දාවිත්.+ ඔහු උන්ව පෝෂණය කරයි. උන්ව ආදරෙන් බලාගෙන උන්ගේ එඬේරා වෙයි.+
24 යෙහෝවා වන මම ඔවුන්ගේ දෙවියන් වෙනවා.+ මගේ සේවක දාවිත් ඔවුන්ගේ අධිපතියා වෙනවා.+ ඒ දේ කියන්නේ යෙහෝවා වන මමයි.
25 “‘“සමාදානය ලැබෙනවා කියලා සහතික කරන ගිවිසුමක් මම ඔවුන් එක්ක ඇති කරගන්නවා.+ දේශයේ ඉන්න දරුණු වනසතුන්ව මම පන්නලා දානවා.+ එතකොට මගේ බැටළුවන්ට කිසිම බයක් සැකක් නැතුව පාළුකරයේ ජීවත් වෙන්නත් කැලෑවල නිදහසේ නිදාගන්නත් පුළුවන් වෙයි.+
26 මම ඔවුන්ටත් මගේ කන්ද අවට ප්‍රදේශයටත් ආශීර්වාද ලැබෙන්න සලස්වනවා.*+ මම දේශයට නියම කාලෙට වැස්ස ලබා දෙනවා. ආශීර්වාද, වැස්ස වගේ ඇද හැළෙයි.+
27 දේශයේ ගස් පලවලින් බර වෙයි. පොළොවෙන් හොඳ අස්වැන්නක් ලැබෙයි.+ මගේ සෙනඟ බයක් සැකක් නැතුව දේශයේ ජීවත් වෙයි. ඔවුන්ගේ කරේ තියෙන වියගහ කඩලා දාලා ඔවුන්ව දාසකමට අරන් ගිය අයගේ අතින් බේරගත්තාම මම යෙහෝවා කියලා පිළිගන්න ඔවුන්ට සිද්ධ වෙනවා.+
28 ඔවුන් ආයේ ජාතීන්ගේ ගොදුරක් වෙන්නේ නැහැ. වනසතුන්ට ඔවුන්ව ගිලලා දාන්න හම්බ වෙන්නේ නැහැ. ඔවුන් බයක් සැකක් නැතුව ජීවත් වෙයි. ඔවුන්ව බය කරන්න කිසිම කෙනෙක් ඉතුරු වෙන්නේ නැහැ.+
29 “‘“මම ඔවුන්ට දෙන ප්‍රදේශය ඒකේ වගා කරන දේවල් නිසා ප්‍රසිද්ධ වෙනවා. සාගතයකින් ඔවුන්ගේ ජීවිත අහිමි වෙන්නෙවත්+ ජාතීන්ගේ නින්දාවට ඔවුන් ආයේ ලක් වෙන්නෙවත් නැහැ.+
30 ‘එතකොට ඊශ්‍රායෙල් සෙනඟගේ දෙවි යෙහෝවා වන මම ඔවුන් එක්ක ඉන්නවා කියලත් ඔවුන් මගේ සෙනඟ කියලත් ඔවුන් තේරුම්ගනියි.’+ එහෙම කියන්නේ ශ්‍රේෂ්ඨතම පාලකයාණන් වන යෙහෝවායි.”’
31 “‘මගේ බැටළුවෙනි,+ ඔබව බලාගන්නේ මමයි. ඔබ නිකම්ම මිනිස්සු විතරයි. ඔබේ දෙවියන් මමයි’ කියලා ශ්‍රේෂ්ඨතම පාලකයාණන් වන යෙහෝවා කියනවා.”
පාදසටහන්
^ ඒ කියන්නේ බැටළුවන්ගෙන්, එළුවන්ගෙන් සහ මහත බැටළුවන්ගෙන් නියෝජනය කරපු පුරුෂයන්ව.
^ ඒ කියන්නේ ඇඟෙන්, උරහිසෙන් තල්ලු කළා.
^ හෝ සමහරවිට, “ඔවුන් නිසාත් කන්ද අවට ප්‍රදේශය නිසාත් ආශීර්වාද ලැබෙයි.”
