එසකියෙල් 36:1-38
36 “මනුෂ්‍ය පුත්‍රය, ඊශ්‍රායෙල් දේශයේ කඳු ගැන අනාවැකි කියන්න. මෙහෙම කියන්න. ‘ඊශ්‍රායෙල් දේශයේ කඳුකරය, යෙහෝවා දෙවියන් කියන දේට ඇහුම්කන් දෙන්න.
2 ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “සතුරෝ ඔබට හිනා වෙවී ‘අතීතයේ ඉඳන් තිබුණ උස් තැන් දැන් අපිට අයිති වෙලා’”+ කියලා කිව්වා.’
3 “ඉතින් මේ අනාවැකිය කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “ඔවුන් ඔබව පාළු කරලා හැම පැත්තකින්ම ඔබව වට කරලා ඔබට පහර දුන්නා. ඒ නිසා ජාතීන් අතරින් ඉතුරු වෙලා ඉන්න අය හදන්නේ ඔබව අයිති කරගන්න. මිනිස්සු ඔබ ගැන කතා වෙනවා. ඔබට අපහාස කරනවා.+
4 ඊශ්‍රායෙල් කඳුකරය, ශ්‍රේෂ්ඨතම පාලකයාණන් වන යෙහෝවා කියන දේට දැන් ඇහුම්කන් දෙන්න. ශ්‍රේෂ්ඨතම පාලකයාණන් වන යෙහෝවා කඳු, හෙල්, ගංගා, නිම්න සහ නටබුන් වුණ තැන්වලට+ මෙහෙම කියනවා. පාළුවට ගිය, අවට ජාතීන්ගෙන් ඉතුරු වුණ අය අපහාස කරපු, කොල්ල කාපු නගරවලට ඔහු මෙහෙම කියනවා.+
5 ඒ හැමෝටම ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. ‘ජාතීන් අතරේ ඉතුරු වෙලා ඉන්න අයටත් ඒදොම් දේශයේ හැමෝටමත් විරුද්ධව මම කේන්තියෙන් කතා කරනවා.+ මගේ කේන්තිය ගින්නක් වගේ ඇවිළිලයි තියෙන්නේ. ඔවුන් කිසිම සැලකිල්ලක් පෙන්නන්නේ නැතුව, හරිම සතුටින්+ මගේ දේශය අයිති කරගත්තා. ඔවුන් එහෙම කළේ එහේ තණබිම් අල්ලගෙන දේශය කොල්ල කන්නයි.’”’+
6 “ඊශ්‍රායෙල් දේශය ගැන අනාවැකි කියන්න. කඳු, හෙල්, ගංගා සහ නිම්නවලට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “ජාතීන් ඔබට නින්දා කළා. ඒ නිසා මම ලොකු තරහකින්, කේන්තියකින් ඔවුන්ට වෙන දේ ගැන කියනවා.”’+
7 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘මම මගේ අත උස්සලා දිවුරලා කියන්නේ ඔබ අවට ඉන්න ජාතීනුත් නින්දාවට පත් වෙනවා කියලා.+
8 ඒත් ඊශ්‍රායෙල් කඳුකරය, අතුඉති ලියලලා ඔබ පල දරයි.+ මගේ සෙනඟ වෙනුවෙන් ඔබ එහෙම කරයි. මොකද ඔවුන් ළඟදීම ආපහු එනවා.
9 මම ඔබ එක්කම ඉන්නවා. සතුටින් ඔබ දිහා බලනවා. ඔබට අයිති ප්‍රදේශවල බීජ වපුරලා වගා කරයි.
10 මම ඔබේ සෙනඟගේ ඒ කියන්නේ මුළු ඊශ්‍රායෙල් සෙනඟගේ ගාණ වැඩි කරනවා. නටබුන් වුණ නගර ආපහු ගොඩනඟලා+ මිනිස්සු ඒවාවල පදිංචි වෙයි.+
11 මම ඔබේ සෙනඟගේ සහ සතුන්ගේ ගාණ වැඩි කරනවා.+ ඔවුන් ගණනින් ගොඩක් වැඩි වෙයි. කලින් වගේම ඔබ ආයෙත් මිනිස්සුන්ගෙන් පිරුණු තැනක් වෙයි.+ අතීතයේ තිබුණාටත් වඩා හොඳ ජීවිතයක් මම ඔබට දෙනවා.+ එතකොට මම යෙහෝවා කියලා පිළිගන්න ඔබට සිද්ධ වෙනවා.+
12 මගේ සෙනඟ වන ඊශ්‍රායෙල්වරු ඔබේ ප්‍රදේශවල ඇවිදියි. ඔවුන් ඔබව අයිති කරගනියි.+ ඔබ ඔවුන්ගේ උරුමය වෙයි. ඔබ ආයේ ඔවුන්ගේ දරුවන්ව ඔවුන්ගෙන් උදුරගන්නේ නැහැ.’”+
13 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔවුන් ඔබ ගැන කියන්නේ “ඔබ මිනිස්සුන්ව ගිලලා දාන, ඔබට අයිති ජාතීන්ගේ දරුවන්ව උදුරගන්න දේශයක්” කියලයි.’
14 ‘ඔවුන් එහෙම කියන නිසා ඔබ ආයේ මිනිස්සුන්ව ගිලලා දාන්නෙවත් ජාතීන්ගේ දරුවන්ව මරලා දාන්නෙවත් නැහැ’ කියලා ශ්‍රේෂ්ඨතම පාලකයාණන් වන යෙහෝවා කියනවා.
15 ‘ඔබට ජාතීන්ගේ නින්දාවලට ලක් වෙන්නවත් මිනිස්සුන්ගේ අපහාසවලට මුහුණ දෙන්නවත් මම ආයේ ඉඩ දෙන්නේ නැහැ.+ ඔබ නිසා ඔබට අයිති ජාතීන් ආයේ විනාශ වෙන්නේ නැහැ’* කියලා ශ්‍රේෂ්ඨතම පාලකයාණන් වන යෙහෝවා කියනවා.”
16 යෙහෝවා ආයෙත් සැරයක් මට කතා කරලා මෙහෙම කිව්වා.
17 “මනුෂ්‍ය පුත්‍රය, ඊශ්‍රායෙල් සෙනඟ එයාලට අයිති දේශයේ ජීවත් වුණ කාලේ එයාලා හැසිරුණ විදිහ නිසාත් කරපු දේවල් නිසාත් දේශය අපවිත්‍ර වුණා.+ ඔසප් දවස්වලදී ස්ත්‍රියක් අපවිත්‍රයි වගේ මං ඉස්සරහා එයාලත් අපවිත්‍ර වුණා.+
18 එයාලා දේශය පුරා ලේ හලපු නිසාත්+ පිළිකුල්සහගත රූප* හදාගෙන දේශය අපවිත්‍ර කරපු නිසාත්+ මම මගේ කේන්තිය එයාලට විරුද්ධව පිට කළා.
19 ඉතින් මම එයාලව ජාතීන් අතරට පන්නලා දැම්මා. දේශයන් පුරා විසුරුවාහැරියා.+ එයාලා ජීවත් වුණ විදිහ සහ කරපු දේවල්වලට අනුව මම එයාලව විනිශ්චය කළා.
20 ඒත් එයාලා ඒ ජාතීන් අතරට ගියාම ඒ මිනිස්සු මගේ ශුද්ධ නමට අගෞරව කරලා+ එයාලා ගැන මෙහෙම කිව්වා. ‘මෙයාලා යෙහෝවා දෙවියන්ගේ සෙනඟ. ඒත් ඔහු දීපු දේශයෙන් එයාලට යන්න වුණා.’
21 ඉතින් මම මගේ ශුද්ධ නම ගැන හිතලා පියවර ගන්නවා. මොකද ඊශ්‍රායෙල් සෙනඟ එයාලා විසිරිලා ගිය ජාතීන් අතරේ මගේ නම අගෞරවයට පත් කළා.”+
22 “ඉතින් ඊශ්‍රායෙල් සෙනඟට මෙහෙම කියන්න. ‘ශ්‍රේෂ්ඨතම පාලකයාණන් වන යෙහෝවා කියන්නේ මෙහෙමයි. “ඊශ්‍රායෙල් සෙනඟෙනි, මං ඔබව බේරගන්නේ ඔබ ගැන හිතලා නෙමෙයි. ජාතීන් අතරේ ඉද්දී ඔබ අගෞරවයට පත් කරපු මගේ ශුද්ධ නම ගැන හිතලයි.”’+
23 ‘ජාතීන් අතරේ ඔබ මගේ නම අගෞරවයට පත් කළත් මම මගේ ශ්‍රේෂ්ඨ නමට ගෞරවයක් ගේනවා.+ මම ඔබ එක්ක වැඩ කරන විදිහ නිසා මම ශුද්ධ කෙනෙක් කියන දේ ජාතීන් දකියි. එතකොට මම යෙහෝවා කියලා පිළිගන්න ඔවුන්ට සිද්ධ වෙනවා’+ කියලා ශ්‍රේෂ්ඨතම පාලකයාණන් වන යෙහෝවා කියනවා.
24 ‘ජාතීන් අතරේ විසිරිලා ඉන්න ඔබව මම එකට රැස් කරනවා. ඔබ ඉන්න හැම දේශයකින්ම ඔබව එකතු කරලා ආපහු ඔබේ දේශයට අරන් එනවා.+
25 මම ඔබ පිටට පිරිසිදු වතුර ඉහිනවා. එතකොට ඔබ පවිත්‍ර වෙයි.+ ඔබ කරපු හැම අපවිත්‍ර දෙයක්ම ඔබෙන් හෝදලා අරිනවා.+ ඔබේ පිළිකුල්සහගත රූප මම අයින් කරලා දානවා.+
26 මම ඔබට අලුත් හදවතක් දෙනවා.+ අලුත් විදිහකට හිතන්න මම ඔබට උදව් කරනවා.+ මම ඔබේ ගල් හිත අයින් කරලා+ ඔබට මොළොක් හදවතක්* දෙනවා.
27 මම මගේ බලය පාවිච්චි කරලා ඔබ හිතන විදිහ වෙනස් කරනවා. මගේ නියෝගවලට එකඟව වැඩ කරන්න ඔබව පොලඹවනවා.+ එතකොට ඔබ මගේ තීන්දු හිතට අරන් ඒවාට එකඟව ජීවත් වෙයි.
28 මම ඔබේ මුතුන්මිත්තන්ට දුන්න දේශයේ ඔබ ජීවත් වෙයි. ඔබ මගේ සෙනඟ වෙනවා. මම ඔබේ දෙවියන් වෙනවා.’+
29 “‘ඔබ වහල් වෙලා හිටපු හැම අපවිත්‍ර දේකින්ම මම ඔබව නිදහස් කරනවා. සරු අස්වැන්නක් දෙන්න කියලා මම ධාන්‍යවලට අණ කරනවා. මම සාගතයකින් ආයේ ඔබට පහර දෙන්නේ නැහැ.+
30 මම ගස්වල පලදාවයි, කෙත්වතුවල අස්වැන්නයි ගොඩක් වැඩි කරනවා. එතකොට ඔබ ආයේ කවදාවත් සාගතයකට අහු වෙලා ජාතීන්ගේ නින්දාවට ලක් වෙන්නේ නැහැ.+
31 ඔබ කරපු දුෂ්ට, නරක වැඩ ගැන එදාට ඔබට මතක් වෙයි. ඔබ කරපු වැරදි වැඩ නිසාත් පිළිකුල් දේවල් නිසාත් ඔබට ඔබ ගැනම පිළිකුලක් දැනෙයි.+
32 ඒත් මේ දේ මතක තියාගන්න. මං ඔබව බේරගන්නේ ඔබ ගැන හිතලා නෙමෙයි’+ කියලා ශ්‍රේෂ්ඨතම පාලකයාණන් වන යෙහෝවා කියනවා. ‘ඊශ්‍රායෙල් සෙනඟෙනි, ඔබ කරපු දේවල් ගැන හිතලා ලැජ්ජා වෙන්න.’
33 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබ කරපු හැම වැරදි දේකින්ම මම ඔබව පවිත්‍ර කරන දවසේදී මම නගර මිනිස්සුන්ගෙන් පුරවනවා.+ නටබුන් වුණ තැන් ආයේ ගොඩනඟනවා.+
34 පාළුවට ගිහින් කියලා යන එන අය දැකපු දේශය ආයේ වගාබිම්වලින් පිරෙනවා.
35 එදාට මිනිස්සු මෙහෙම කියයි. “පාළුවට ගිය දේශය දැන් ඒදන් උයන වගේ.+ විනාශ වෙලා ගරාවැටුණු නගර දැන් පවුරුවලින් වට වුණ, සෙනඟගෙන් පිරුණු නගර වෙලා.”+
36 කඩලා දාපු තැන් ආයේ ගොඩනැඟුවෙත් පාළුවට ගිය දේශයේ ආයේ වගා කළෙත් යෙහෝවා වන මම කියලා පිළිගන්න ඔබ අවට ඉතුරු වෙලා ඉන්න ජාතීන්ට සිද්ධ වෙනවා. ඒ දේ කිව්වෙත් ඒ දේ ඉටු කළෙත් යෙහෝවා වන මමයි.’+
37 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔවුන්ගේ ගාණ බැටළු රැළක් වගේ වැඩි කරන්න කියලා මගෙන් ඉල්ලන්න මම ඊශ්‍රායෙල් සෙනඟට ඉඩ දෙනවා. මම ඒ ඉල්ලීම ඉටු කරනවා.
38 එතකොට නටබුන් වුණ නගර සෙනඟගෙන් පිරිලා යනවා.+ ඔවුන් හරියට එක රොත්තට එන ශුද්ධ සෙනඟක් වගෙයි. උත්සව කාලේ යෙරුසලමේ ඉන්න බැටළු රැළක් වගෙයි.*+ එහෙම වෙද්දී මම යෙහෝවා කියලා පිළිගන්න ඔවුන්ට සිද්ධ වෙනවා.’”
පාදසටහන්
^ මූ.අ., “ආයේ වැටිලා යන්නේ නැහැ.”
^ හෙබ්‍රෙව් භාෂාවෙන් ඒ රූප කොච්චර පිළිකුල් දේවල්ද කියලා විස්තර කරන්න ඒවාට “ගොම” කියන වචනය පාවිච්චි කරලා තියෙනවා.
^ ඒ කියන්නේ දෙවියන්ගේ මඟ පෙන්වීම් පිළිගන්න කැමති හදවතක්.
^ හෝ සමහරවිට, “පූජා කරන්න යෙරුසලමට ගෙනාපු බැටළු රැළක් වගෙයි.”
