එසකියෙල් 5:1-17
5 “මනුෂ්‍ය පුත්‍රය, තියුණු කඩුවක් අරගෙන ඒක කොණ්ඩේ කපන්න ගන්න දැළි පිහියක් විදිහට පාවිච්චි කරන්න. ඒකෙන් ඔයාගේ ඔළුව බූ ගාලා රැවුල කපාගන්න. ඊටපස්සේ තරාදියක් අරගෙන ඒ කෙස් කිරලා කොටස්වලට වෙන් කරන්න.
2 ඔයා නගරය වටලගෙන ඉන්න දවස් සම්පූර්ණ වුණාම ඒ කෙස්වලින් තුනෙන් කොටසක් අරගෙන ඒක නගරය මැද පුච්චන්න.+ තවත් කොටසක් අරගෙන ඒක නගරය වටේට අල්ලන ගමන් කඩුවෙන් ඒකට පහර දෙන්න.+ ඉතුරු කොටස හුළඟට ගහගෙන යන්න ඉඩ දෙන්න. ඒක පස්සේ එළවගෙන යන්න මම කඩුවක් එවනවා.+
3 “තුන්වෙනි කොටසේ කෙස්වලින් ටිකක් අරගෙන ඒක ඔයාගේ ඇඳුමේ ඔතාගන්න.
4 ඒකෙන් තවත් ටිකක් අරගෙන ඒක ගින්නට වීසි කරලා පුච්චලා දාන්න. ඒ ගින්න මුළු ඊශ්‍රායෙල් ජාතියටම විරුද්ධව ඇවිළෙයි.+
5 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘මේකෙන් නියෝජනය කරන්නේ යෙරුසලම. මම ඇයව ජාතීන් මැද තිබ්බා. දේශයන්ගෙන් වට කරලා ඇයව තිබ්බා.
6 ඒත් ඇය මගේ පනත් කඩ කරලා මගේ තීන්දුවලට විරුද්ධව වැඩ කළා. අවට දේශවල ඉන්න ජාතීන් කළාටත් වඩා දුෂ්ට දේවල් ඇය කළා.+ ඇගේ සෙනඟ මගේ තීන්දු ප්‍රතික්ෂේප කළා. මගේ පනත් පිළිපැද්දේ නැහැ.’
7 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘අවට ඉන්න ජාතීන්ට වඩා ඔබ ගොඩක් ප්‍රශ්න ඇති කළා. මගේ පනත් ඔබ පිළිපැද්දේ නැහැ. මගේ තීන්දුවලට එකඟව ඔබ වැඩ කළෙත් නැහැ. ඒ වෙනුවට ඔබ වැඩ කළේ අවට ජාතීන්ගේ තීන්දුවලට එකඟවයි.+
8 ඒ නිසා ශ්‍රේෂ්ඨතම පාලකයාණන් වන යෙහෝවා මෙහෙම කියනවා. “යෙරුසලම, මම ඔබේ සතුරෙක් වෙනවා.+ මම ඔබට විරුද්ධව තීන්දු කරපු දේ ජාතීන් බලාගෙන ඉද්දීම ඉටු කරනවා.+
9 ඔබ කරපු හැම පිළිකුල් දෙයක්ම නිසා මීට කලින් මම කවදාවත් කරලා නැති දෙයක් ඔබට කරනවා.+ ඒ වගේ දෙයක් මම ආයේ කවදාවත් කරන්නේ නැහැ.
10 “‘“ඔබ අතරේ ඉන්න තාත්තලා තමන්ගෙම පුතාලව මරලා කයි.+ පුතාලා තාත්තලව මරලා කයි. මම ඔබට විරුද්ධව තීන්දු කරපු දේ මම කරනවා. ඔබ අතරේ ඉතුරු වෙලා ඉන්න හැමෝවම මම හැම පැත්තටම* විසුරුවාහරිනවා.”’+
11 “ශ්‍රේෂ්ඨතම පාලකයාණන් වන යෙහෝවා මෙහෙම කියනවා. ‘ඔබේ පිළිකුල්සහගත රූපවලින්, ඔබ කරපු පිළිකුල් දේවලින් ඔබ මගේ ශුද්ධස්ථානය අපවිත්‍ර කළා.+ ඒ නිසා මමත් අනිවාර්යයෙන්ම ඔබව ප්‍රතික්ෂේප කරනවා. ජීවමාන දෙවි වන මම මං ගැනම දිවුරලා ඒක කියනවා. මට ඔබ ගැන කිසිම දුකක් දැනෙන්නෙවත් මම ඔබට අනුකම්පාවක් පෙන්නන්නෙවත් නැහැ.+
12 ඔබෙන් තුනෙන් කොටසක් වසංගතවලින්* නැත්නම් සාගතයෙන් මැරිලා යනවා. තව කොටසක් කඩුවෙන් පහර කාලා නගරය වටේට වැටිලා ඉඳියි.+ ඉතුරු කොටස මම හැම පැත්තකටම* විසුරුවාහරිනවා. ඔවුන් පස්සේ එළවගෙන යන්න මම කඩුවක් එවනවා.+
13 ඊටපස්සේ මම මගේ කේන්තිය පිට කරන එක නතර කරනවා. ඔවුන්ට විරුද්ධව ඇවිළුණ මගේ කෝපය නිවිලා යයි. එතකොට මම සෑහීමට පත් වෙනවා.+ මම මගේ කේන්තිය පිට කළාම සෙනඟ දැනගනියි යෙහෝවා වන මමයි ඔවුන්ට කතා කළේ කියලා. මම එහෙම කතා කළේ වෙනත් දෙවිවරුන්ට කරන නමස්කාරය මම දැඩි ලෙස හෙළා දකින නිසයි+ කියලා එතකොට ඔවුන් තේරුම්ගනියි.
14 “‘මම ඔබව පාළු තැනක් කරනවා. මම ඔබව අවට ඉන්න ජාතීන්ගෙත් ඔබව පහු කරගෙන යන හැමෝගෙමත් නින්දාවට ලක් වෙන්න සලස්වනවා.+
15 මම කේන්තියෙන්, ලොකු කෝපයකින් ඔබට විරුද්ධව දීපු තීන්දුව ඉටු කරද්දී, ඔබට දඬුවම් කරද්දී අවට ඉන්න ජාතීන්ගේ නින්දාවට ඔබ ලක් වෙයි.+ ඔවුන් ඔබට හිනා වෙයි. ඔබට සිද්ධ වෙන දේ ජාතීන්ට අනතුරු ඇඟවීමක් වෙයි. ඔබට වෙන දේ දැක්කාම ඔවුන් බය වෙයි. මේ දේ කියන්නේ යෙහෝවා වන මමයි.
16 “‘මම ඔබේ සෙනඟව විනාශ කරන්න සාගතය කියන මාරාන්තික ඊතල ඔබට විරුද්ධව එවනවා. මම එවන ඊතල නිසා ඔබ නැති වෙලා යයි.+ ඔබට ආහාර ලැබෙන එක මම නවත්තලා* සාගතය තව තවත් දරුණු කරනවා.+
17 මම ඔබට විරුද්ධව සාගතයක් ගේනවා. ඔබට විරුද්ධව දරුණු වනසතුන්ව එවනවා.+ ඒ නිසා ඔබේ දරුවන්ව ඔබට අහිමි වෙයි. වසංගත සහ මිනී මැරුම් නිසා ඔබට ඔළුව උස්සගන්නවත් බැරි වෙයි. මම ඔබට විරුද්ධව කඩුවක් එවනවා.+ මේ දේ කියන්නේ යෙහෝවා වන මමයි.’”
පාදසටහන්
^ මූ.අ., “හුළං හමන හැම පැත්තටම.”
^ හෝ, “ලෙඩ රෝගවලින්.”
^ මූ.අ., “හුළං හමන හැම පැත්තටම.”
^ මූ.අ., “රොටි එල්ලලා තියන ලී කඩලා.”
