එස්තර් 3:1-15
3 ඒ දේවල්වලට පස්සේ අහෂ්වේරොෂ් රජ ආගග්ගෙන් පැවතෙන+ හම්මෙදාතාගේ පුතා වුණ හාමාන්ට+ විශේෂ ගෞරවයක් දීලා අනිත් අධිපතීන් හැමෝටම+ වඩා උසස් තනතුරක් එයාට දුන්නා.
2 ඒ නිසා රජමාලිගාවේ දොරටුව ළඟ හිටපු නිලධාරීන් හැමෝම හාමාන් එතනින් යන එන වෙලාවට වැඳ වැටිලා එයාට ආචාර කළා. එහෙම කරන්න කියලා රජ නියෝගයකුත් පනවලා තිබුණා. ඒත් මොර්දෙකයි හාමාන් ඉස්සරහා වැඳ වැටුණෙවත් එයාට ආචාර කළේවත් නැහැ.
3 ඉතින් රජමාලිගාවේ දොරටුව ළඟ හිටපු නිලධාරීන් මොර්දෙකයිගෙන් මෙහෙම ඇහුවා. “ඇයි ඔයා රාජ නියෝගය ගණන් ගන්නේ නැතුව ඉන්නේ?”
4 එයාලා මොර්දෙකයිට හැමදාම ඒ ගැන කිව්වත් එයා ඒගොල්ලෝ කියපු දේවල් ඇහුවේ නැහැ. මොර්දෙකයිට දිගටම මේ විදිහට වැඩ කරන්න ඉඩ දෙයිද+ කියලා බලන්න එයාලා ඒ ගැන හාමාන්ට කිව්වා. මොකද එයා යුදෙව්වෙක්+ කියලා මොර්දෙකයි ඒ නිලධාරීන්ට කියලා තිබුණා.
5 මොර්දෙකයි වැඳ වැටිලා තමන්ට ආචාර කරන්නේ නැහැ කියලා හාමාන් දැක්කාම එයා කේන්තියෙන් පුපුරන්න පටන්ගත්තා.+
6 මොර්දෙකයි යුදෙව්වෙක් කියලා එයාලා හාමාන්ට කියලා තිබුණ නිසා මොර්දෙකයිව විතරක් මරලා වැඩක් නැහැ කියලා එයා හිතුවා. ඉතින් අහෂ්වේරොෂ් රජගේ රාජධානිය පුරාම ඉන්න යුදෙව්වන් හැමෝවම ඒ කියන්නේ මොර්දෙකයිගේ ජාතියට අයිති හැමෝවම මරලා දාන්න අවස්ථාවක් එන කල් හාමාන් බලාගෙන හිටියා.
7 අහෂ්වේරොෂ් රජ පාලනය කරපු 12වෙනි අවුරුද්දේ+ පළවෙනි මාසේදී ඒ කියන්නේ නීසාන්* මාසේදී ඒ දේ කරන්න* ඕනෙ මාසේ සහ දවස තීරණය කරන්න හාමාන් ඉස්සරහා කෙනෙක් දාදු*+ දැම්මා. දාදුව 12වෙනි මාසෙට ඒ කියන්නේ ආදාර්*+ මාසෙට වැටුණා.
8 ඊටපස්සේ හාමාන් අහෂ්වේරොෂ් රජ ළඟට ගිහින් මෙහෙම කිව්වා. “රජතුමනි, ඔබතුමාගේ රාජධානිය පුරාම+ විසිරිලා ඉන්න ජන කොටසක් ඉන්නවා.+ එයාලාගේ නීති අනිත් හැම ජාතියකම නීතිවලට වඩා ගොඩක් වෙනස්. එයාලා ඔබතුමා දාලා තියෙන නීති පිළිපදින්නෙත් නැහැ. ඒ වගේ ජන කොටසකට ජීවත් වෙන්න ඉඩ දුන්නොත් ඒකෙන් ඔබතුමාට යහපතක් නම් වෙන්නේ නැහැ.
9 රජතුමා කැමති නම් එයාලව විනාශ කරන්න නියෝග කරලා ඒක ලිඛිතව දැනුම් දෙන්න. එහෙම කළොත් රජතුමාගේ භාණ්ඩාගාරයේ තැන්පත් කරන්න මම රිදී තලෙන්ත* 10,000ක් නිලධාරීන්ගේ අතට දෙන්නම්.”*
10 එතකොට රජ එයාගේ මුද්ද*+ ගලවලා යුදෙව්වරුන්ගේ සතුරෙක් වුණ ආගග්ගෙන් පැවතෙන+ හම්මෙදාතාගේ පුතා වුණ හාමාන්ට+ ඒක දුන්නා.
11 රජ හාමාන්ට මෙහෙම කිව්වා. “ඒ සෙනඟවයි, රිදීයි* මම ඔයාට භාර දෙනවා. ඔයාට හොඳයි කියලා හිතෙන දෙයක් එයාලට කරන්න.”
12 ඊටපස්සේ පළවෙනි මාසේ 13වෙනිදා රජගේ ලේකම්වරුන්ට+ එන්න කියලා කිව්වා. එයාලා හාමාන් අණ කරපු හැම දෙයක්ම රජගේ දිසාපතීන්ටයි, පළාත්වල ආණ්ඩුකාරයන්ටයි, විවිධ ජන කොටස්වල අධිපතීන්ටයි ලියලා යැව්වා.+ ඒ එක එක පළාත්වල ඉන්න මිනිස්සු කතා කරන භාෂාවෙන් සහ එයාලට කියවන්න පුළුවන් අකුරුවලින් ඒක ලියලා යැව්වා. ඒ හැම ලියුමක්ම අහෂ්වේරොෂ් රජගේ නමින් ලියලා එයාගේ මුද්දෙන් මුද්‍රා කරලයි+ යැව්වේ.
13 12වෙනි මාසේ ඒ කියන්නේ ආදාර්+ මාසේ 13වෙනිදා යුදෙව්වන් හැමෝවම ඝාතනය කරන්න ඕනෙ කියලා දන්වලා රාජධානියේ හැම පළාතකටම පණිවිඩකරුවන් අතේ ඒ ලියුම් යැව්වා. බාල මහලු, ස්ත්‍රී පුරුෂ හැමෝවම එකම දවසේ මරලා එයාලව නැත්තටම නැති කරලා දාන්න කියලත් එයාලාගේ දේපළ පැහැරගන්න+ කියලත් කරපු නියෝගය ඒ ලියුම්වල සඳහන් වුණා.
14 ලියුමේ තියෙන හැම දෙයක්ම හැම පළාතකම ජීවත් වුණ මිනිස්සු නීතියක් හැටියට පිළිපදින්න ඕනෙ කියලා හැමෝටම දැනුම් දුන්නා. එහෙම කළේ හැමෝටම ඒ දවසට සූදානම් වෙලා ඉන්න පුළුවන් වෙන්නයි.
15 ෂූෂන්*+ මාලිගාවේදී* නිකුත් කරපු නීතිය ඇතුළත් ඒ ලියුම් රජ අණ කරපු විදිහටම පණිවිඩකරුවන් පුළුවන් තරම් ඉක්මනින් බෙදලා දුන්නා.+ ඊටපස්සේ රජයි, හාමානුයි ඉඳගෙන වයින් බොන්න පටන්ගත්තා. ඒත් මොනවාද වෙන්නේ කියලා තේරුම්ගන්න බැරුව ෂූෂන්* නුවරේ හිටපු මිනිස්සු අතරේ නොසන්සුන් තත්වයක් ඇති වුණා.
පාදසටහන්
^ ඒ කියන්නේ හාමාන්ගේ සැලැස්ම ක්‍රියාත්මක කරන්න.
^ මූ.අ., “පූර්.” ඒකේ බහු වචනය පූරීම්. යුදෙව්වන්ගේ උත්සවයක් පූරීම් කියන නමින් හඳුන්වනවා.
^ හෝ සමහරවිට, “ඒ වැඩේ කරන අයට ගෙවන්න මම රිදී තලෙන්ත 10,000ක් භාණ්ඩාගාරයට දෙන්නම්.”
^ මූ.අ., “මුද්‍රා තියන මුද්ද.”
^ මෙතන කතා කරන්නේ යුදෙව්වන්ගෙන් පැහැරගන්න රිදී ගැන වෙන්න පුළුවන්.
^ හෝ, “සූසා.”
^ හෝ, “බලකොටුවේදී.”
^ හෝ, “සූසා.”
