යේසුස්ගේ නියෝජිතයන්ගේ ක්‍රියා 13:1-52
13 අන්තියෝකියේ තිබුණ සභාවේ අනාගතවක්තෘවරුයි, ගුරුවරුයි හිටියා.+ ඒ අය තමයි බානබස්, නීගර් කියලත් හඳුන්වපු සිමියොන්, සිරේනියෙන් ආපු ලූෂස්, දිසාපති වුණ හෙරොද් එක්ක එකට ඉගෙනගත්ත මනායින් සහ සාවුල්.
2 එයාලා යෙහෝවා* දෙවියන්ට සේවය කරමින් නිරාහාරව හිටපු වෙලාවක දෙවියන්ගේ බලයෙන් එයාලට මෙහෙම දැන්නුවා. “මම බානබස්වයි, සාවුල්වයි විශේෂ වැඩකට තෝරගෙන තියෙනවා.+ දැන් එයාලට ඒ වැඩේ භාර දෙන්න.”+
3 ඉතින් එයාලා නිරාහාරව ඉඳලා යාච්ඤා කළා. ඊටපස්සේ එයාලා ඒ දෙන්නා පිට අත් තියලා එයාලව පිටත් කරලා යැව්වා.
4 ඒ දෙන්නාව පිටත් කළේ දෙවියන්ගේ බලයෙන් ලැබුණ මඟ පෙන්වීමට අනුවයි. ඉතින් එයාලා සිලූෂියට ගිහින් එතන ඉඳන් සයිප්‍රසයට නැවකින් ගියා.
5 එයාලා සලමිසය කියන නගරෙට ගොඩ බැස්සා. එහෙදී එයාලා යුදෙව්වරුන්ගේ සිනගෝගවලට ගිහින් දෙවියන්ගේ පණිවිඩය දැනුම් දුන්නා. යොහන් එයාලාගේ උදව්වට හිටියා.+
6 එයාලා දූපත පුරාම ගිහින් පාෆස් කියන නගරෙට ආවා. එහෙදී එයාලට බාර්යේසුස් කියලා යුදෙව් මනුස්සයෙක්ව හම්බ වුණා. එයා මන්තර ගුරුකම් කරන බොරු අනාගතවක්තෘවරයෙක්.
7 එයා හිටියේ ඒ දූපතේ ආණ්ඩුකාරයා* වුණ සර්ජියස් පාවුලස් එක්ක. සර්ජියස් පාවුලස් හරිම බුද්ධිමත් කෙනෙක්. එයාට දෙවියන්ගේ පණිවිඩය දැනගන්න ලොකු ආසාවක් තිබුණා. ඒ නිසා එයා බානබස්ටයි, සාවුල්ටයි එයා ළඟට එන්න කියලා කිව්වා.
8 ඒත් මන්තර ගුරුකම් කරපු එලිමස් එයාලට විරුද්ධ වුණා. (එලිමස් කියන නමේ තේරුම මන්තර ගුරුකම් කරන කෙනා.) එයාට ඕන වුණේ ආණ්ඩුකාරයා පණිවිඩය අහලා ඒ ගැන විශ්වාසයක් ඇති කරගන්න එක කොහොමහරි නවත්තලා දාන්නයි.
9 පාවුල් කියන නමිනුත් හඳුන්වපු සාවුල් තුළ ඒ වෙලාවේ දෙවියන්ගේ බලය ප්‍රබල විදිහට ක්‍රියාත්මක වෙන්න පටන්ගත්තා. එයා එලිමස් දිහා බලලා,
10 මෙහෙම කිව්වා. “ඔයා මහ බොරුකාරයෙක්! දුෂ්ටකම්වලින් පිරුණු යක්ෂයාගේ පුතෙක්!+ හරි දේට විරුද්ධව වැඩ කරන සතුරෙක්! ඇයි ඔයා හැම වෙලාවෙම යෙහෝවාගේ* සත්‍ය ඉගැන්වීම් විකෘති කරන්න හදන්නේ?
11 යෙහෝවා* ඔයාට දඬුවම් කරනවා. දැන් ඔයාගේ පෙනීම නැති වෙලා දවස් ගාණක් යන කල් ඔයාට හිරු එළියවත් දකින්න බැරි වෙයි.” ඒ වෙලාවෙම එයාව ගන මීදුමකින් වැහිලා ගියා. එයාට දැනුණා හැම දේම අඳුරු වෙලා එයාගේ පෙනීම නැති වෙනවා කියලා. එයාව අතින් අල්ලගෙන යන්න පුළුවන් කෙනෙක්ව හොයහොය එයා එහේ මෙහේ ඇවිද්දා.
12 වෙච්ච දේ දැක්කාම ආණ්ඩුකාරයාට ස්වාමීන් ගැන විශ්වාසයක් ඇති වුණා. යෙහෝවා* ගැන ඉගෙනගත්ත දේවල් නිසා එයා පුදුම වුණා.
13 පාවුල් සහ එයාත් එක්ක හිටිය දෙන්නා පාෆස් ඉඳන් නැවකට ගොඩ වෙලා පම්ෆිලිය පළාතේ තියෙන පර්ගා කියන නගරෙට ආවා. ඒත් එහෙදී යොහන්+ එයාලව අත්හැරලා ආපහු යෙරුසලමට ගියා.+
14 ඒ වුණත් අනිත් දෙන්නා පර්ගා නගරෙන් පිටත් වෙලා පිසිදිය ප්‍රදේශයේ තිබුණ අන්තියෝකියට ආවා. සබත් දවසේදී එයාලා සිනගෝගයට ගිහින් ඉඳගත්තා.+
15 නීතියෙන් සහ අනාගතවක්තෘවරුන්ගේ ලියවිලිවලින් ප්‍රසිද්ධියේ කියෙව්වාට පස්සේ+ ඒ සිනගෝගයේ නායකයන් එයාලට මෙහෙම පණිවිඩයක් යැව්වා. “සහෝදරයෙනි, මෙතන ඉන්න අයව දිරිගන්වන්න ඔයාලට මොනවා හරි කියන්න තියෙනවා නම් දැන් ඔයාලට පුළුවන් කතා කරන්න.”
16 ඉතින් පාවුල් නැඟිටලා, හැමෝටම නිශ්ශබ්ද වෙන්න කියලා අතින් සංඥා කරලා කතා කරන්න පටන්ගත්තා.
“ඊශ්‍රායෙල් ජනයෙනි, මට ඇහුම්කන් දෙන්න. දෙවියන්ට ගරුබිය දක්වන අනිත් හැමෝමත් මං කියන දේ අහන්න.
17 ඊශ්‍රායෙල්වරුන්ගේ දෙවියන් අපේ මුතුන්මිත්තන්ව තෝරගත්තා. එයාලා ඊජිප්තුවේ විදේශිකයන් විදිහට ජීවත් වුණ කාලේදී දෙවියන් එයාලව බලවත් කළා. පස්සේ ඔහුගේ මහත් බලයෙන් ඔහු එයාලව ඒ දේශයෙන් නිදහස් කළා.+
18 ඊටපස්සේ අවුරුදු 40ක් තිස්සේ පාළුකරයේදී ඔහු එයාලා එක්ක වැඩ කළේ හරිම ඉවසීමෙන්.+
19 කානාන් දේශයේ හිටපු ජාතීන් හතක් විනාශ කළාට පස්සේ ඔහු ඒ ප්‍රදේශ ඔහුගේ සෙනඟට උරුමයක් විදිහට දුන්නා.+
20 ඒ හැම දේම වුණේ අවුරුදු 450ක විතර කාලයක් අතරතුරේ.
“ඊටපස්සේ ඔහු අනාගතවක්තෘ සාමුවෙල්ගේ කාලේ වෙන කල් එයාලව බලාගන්න විනිශ්චයකරුවන්ව පත් කළා.+
21 හැබැයි පස්සේ එයාලා කිව්වා එයාලට රජෙක් ඕනෙ කියලා.+ එතකොට තමයි දෙවියන් බෙන්ජමින් ගෝත්‍රයට අයිති කිෂ්ගේ පුතා වුණ සාවුල්ව එයාලාගේ රජ විදිහට පත් කළේ.+ එයා අවුරුදු 40ක් පාලනය කළා.
22 දෙවියන් එයාව රජකමෙන් අයින් කරලා දාවිත්ව රජ විදිහට පත් කළා.+ ‘මම යෙස්සේගේ පුතා වන දාවිත්ව තෝරගත්තා.+ එයා මගේ හිත සතුටු කරන කෙනෙක්.+ ඉස්සරහට එයා මං කැමති හැම දෙයක්ම කරනවා’ කියලා දෙවියන්ම දාවිත් ගැන සාක්ෂි දුන්නා.
23 දෙවියන් පොරොන්දු වුණ විදිහට ඒ මිනිසාගේ පෙළපතින් ඊශ්‍රායෙල් දේශයට ගැලවුම්කරුවෙක් ලබා දුන්නා. ඒ තමයි යේසුස්.+
24 යේසුස් එන්න කලින් යොහන් ඊශ්‍රායෙල්වරුන් හැමෝටම ප්‍රසිද්ධියේ දේශනා කරලා කිව්වා පසුතැවිලි වෙනවා කියලා පෙන්නන්න බව්තීස්ම වෙන්න කියලා.+
25 යොහන්ට පවරලා තිබුණ සේවය ඉවර වෙන්න ළං වෙද්දී එයා මෙහෙම කිව්වා. ‘ඔයාලා හිතන්නේ මං කවුරු කියලද? පොරොන්දු වුණ කෙනා මං නෙමෙයි. වෙන කෙනෙක් එනවා. ඔහුගේ පාවහන්වල පටි ගලවන්න තරම්වත් මං වටින්නේ නැහැ.’+
26 “සහෝදරයෙනි, මට ඇහුම්කන් දෙන්න. ආබ්‍රහම්ගෙන් පැවතෙන අයත් දෙවියන්ට ගරුබිය දක්වන අනිත් හැමෝමත් මං කියන දේ අහන්න. ඒ කෙනා මාර්ගයෙන් ගැලවීම ලබා දෙනවා කියන පණිවිඩය දෙවියන් දැනුම් දුන්නේ අපිටයි.+
27 ඒත් යෙරුසලමේ ඉන්න අයවත් එයාලාගේ පාලකයන්වත් ඒ කෙනාව පිළිගත්තේ නැහැ. ඒ වෙනුවට එයාලා ඔහුට විරුද්ධව විනිශ්චයක් දුන්නා. ඒකෙන් අනාගතවක්තෘවරුන් කියපු හැම දෙයක්ම ඉටු වුණා.+ ඇත්තටම අනාගතවක්තෘවරු ලියපු ඒ දේවල් හැම සබත් දවසකම ප්‍රසිද්ධියේ කියවනවා.
28 ඔහුව මරන්න කිසිම හේතුවක් තිබුණේ නැහැ.+ ඒත් ඔහුව මරලා දාන්න කියලා එයාලා පිලාත්ගෙන් දිගින් දිගටම ඉල්ලුවා.+
29 එයාලා කරපු දේවල් නිසා ඔහු ගැන ලියලා තියෙන හැම දෙයක්ම ඉටු වුණා. ඊටපස්සේ එයාලා ඔහුව වධකණුවෙන්* පල්ලෙහට අරන් සොහොන් ගෙයක* තැන්පත් කළා.+
30 ඒත් දෙවියන් ඔහුව මරණයෙන් නැඟිට්ටෙව්වා.+
31 ඊටපස්සේ, ගලීලයේ ඉඳන් යෙරුසලමට ඔහුත් එක්ක ගිහින් තිබුණ අය ඉස්සරහා ඔහු දවස් ගාණක් තිස්සේ කීප සැරයක්ම දර්ශනය වුණා. එයාලා තමයි දැන් සෙනඟ ඉස්සරහා ඔහු ගැන සාක්ෂි දෙන්නේ.+
32 “අපි දැන් ඔයාලට මේ කියන්නේ දෙවියන් අපේ මුතුන්මිත්තන්ට දුන්න පොරොන්දුව ගැන. ඒක ශුභාරංචියක්.
33 දෙවියන් ඒ පොරොන්දුව එයාලාගේ දරුවන් වන අපි වෙනුවෙන් ඉටු කරලා දුන්නා. ඔහු එහෙම කළේ යේසුස්ව නැවත නැඟිට්ටවලා.+ ‘ඔබ මගේ පුතා. අද ඉඳන් ඔබේ තාත්තා මමයි’+ කියලා දෙවෙනි ගීතිකාවේ කියලා තියෙන දේ එදා ඉටු වුණා.
34 ඒ වගේම දෙවියන් ඔහුව මරණයෙන් නැඟිට්ටෙව්වේ කවදාවත් කුණු වෙලා* යන්නේ නැති ශරීරයක් ඇතුවයි. ඒ ගැන දෙවියන් කලින්ම මෙහෙම කියලා තිබුණා. ‘මම දාවිත්ට පෙන්නනවා කියලා පොරොන්දු වුණ නොසැලෙන ආදරය* ඔයාටත් පෙන්නනවා. ඒ පොරොන්දුව විශ්වාසවන්තයි.’+
35 තවත් ගීතිකාවක මෙහෙමත් කියනවා. ‘ඔබට විශ්වාසවන්තව ඉන්න කෙනාට මිනී වළේ කුණු වෙන්න ඔබ ඉඩහරින්නේ නැහැ.’+
36 දාවිත් ජීවත් වෙලා ඉද්දී එයා දෙවියන්ට සේවය කරලා* මිය ගියා. ඊටපස්සේ එයාගේ මුතුන්මිත්තන් වගේ එයාවත් තැන්පත් කළා. එයාගේ ශරීරය නම් කුණු වෙලා ගියා.+
37 ඒත් දෙවියන් නැවත නැඟිට්ටවපු කෙනාගේ ශරීරය කුණු වුණේ නැහැ.+
38 “ඉතින් සහෝදරයෙනි, අපි කියන මේ දේ හිතට ගන්න. ඒ කෙනා මාර්ගයෙන් තමයි ඔයාලාගේ පව්වලට සමාව ලබාගන්න පුළුවන් වෙන්නේ.+
39 ඔයාලා නිදොස් අය කියලා ප්‍රකාශ කරන්න මෝසෙස්ගේ නීතියට බැරි වුණා.+ ඒත් ඒ කෙනා නිසා, විශ්වාසයක් ඇති කරගන්න හැමෝවම දෙවියන් නිදොස් අය විදිහට පිළිගන්නවා.+
40 ඒ නිසා අනාගතවක්තෘවරුන්ගේ පොතේ කියලා තියෙන මේ දේ ඔයාලට වෙන්න දෙන්න එපා.
41 ‘අනුන්ට නින්දා කරන්නෙනි, කට ඇරන් පුදුමෙන් බලන් ඉන්න. මොකද ඔයාලා ජීවත් වෙලා ඉන්න කාලේදීම ඔයාලා හිතන්නෙවත් නැති දෙයක් මම කරනවා. ඔයාලට ඒ ගැන විස්තර ඇතුව කිව්වත් ඔයාලා ඒ ගැන විශ්වාස කරන්නේ නැහැ. අන්තිමට ඔයාලා මිය යනවා.’”+
42 ඊටපස්සේ ඒ දෙන්නා එතනින් පිට වෙලා යද්දී සෙනඟ එයාලාගෙන් ඉල්ලුවා මේ දේවල් ගැන ඊළඟ සබත් දවසේදීත් ඇවිල්ලා එයාලට කියලා දෙන්න කියලා.
43 සිනගෝගයේ හිටපු හැමෝවම පිටත් කරලා යැව්වාට පස්සේ යුදෙව්වන් සහ යුදෙව් ආගමට හැරිලා දෙවියන්ට නමස්කාර කරපු හුඟදෙනෙක් පාවුල් සහ බානබස් පිටිපස්සේ ගියා. දෙවියන්ගේ මහත් කරුණාව ලබාගන්න දිගටම උත්සාහ කරන්න කියලා ඒ දෙන්නා එයාලට දිරිගැන්නුවා.+
44 ඊළඟ සබත් දවසේදී යෙහෝවාගේ* පණිවිඩය ගැන දැනගන්න නගරේ ඉන්න හැමෝම වගේ රැස් වුණා.
45 රැස් වෙලා හිටපු සෙනඟව දැක්කාම යුදෙව්වරුන්ට ඇති වුණේ ලොකු ඊර්ෂ්‍යාවක්. ඉතින් එයාලා හුඟක් අපහාසාත්මක විදිහට පාවුල් කියපු හැම දේකටම විරුද්ධව තර්ක කළා.+
46 එතකොට පාවුල් සහ බානබස් බය නැතුව මෙහෙම කිව්වා. “දෙවියන්ගේ පණිවිඩය මුලින්ම කියන්න කිව්වේ ඔයාලටයි.+ ඒත් ඔයාලා ඒ පණිවිඩය ප්‍රතික්ෂේප කරනවා. ඔයාලම තීරණය කරලා තියෙනවා ඔයාලා සදාකාල ජීවනය ලබාගන්න සුදුසු අය නෙමෙයි කියලා. ඒ නිසා අපි දැන් වෙනත් ජාතීන් ළඟට පණිවිඩය අරන් යනවා.+
47 මොකද යෙහෝවා* අපිට මෙහෙම අණ කරලා තියෙනවා. ‘මම ඔයාලව ජාතීන්ට ආලෝකයක් විදිහට පත් කරනවා. එහෙම කරන්නේ පොළොවේ ඈත කෙළවරවල ඉන්න අයටත් ඔයාලා මාර්ගයෙන් ගැලවීම ලබාගන්න පුළුවන් වෙන්නයි.’”+
48 ඒ දේවල් ඇහුවාම වෙනත් ජාතීන්ට අයිති අය හුඟක් සතුටු වෙලා යෙහෝවාගේ* පණිවිඩය කොයි තරම් පුදුමාකාරද කියලා කියන්න පටන්ගත්තා. සදාකාල ජීවනය ලබා දෙන සත්‍යය පිළිගන්න කැමැත්තෙන් හිටපු හැමෝම යේසුස්ගේ අනුගාමිකයන් වුණා.
49 යෙහෝවා* දෙවියන්ගේ පණිවිඩය ඒ ප්‍රදේශය පුරාම පැතිරිලා ගියා.
50 ඒත් යුදෙව්වරු එකතු වෙලා සමාජයේ හොඳ පිළිගැනීමක් තිබුණ, දෙවියන් ගැන ගරුබියක් තිබුණ ස්ත්‍රීන්වයි, නගරයේ ප්‍රධානීන්වයි පාවුල්ට සහ බානබස්ට විරුද්ධව උසිගැන්නුවා.+ ඉතින් එයාලා ඒ දෙන්නාට පීඩා කරලා එයාලව එයාලාගේ ප්‍රදේශයෙන් පන්නලා දැම්මා.
51 ඒ නිසා ඒ දෙන්නා එයාලාගේ කකුල්වල තියෙන දූවිලි ගසලා දාලා ඉකෝනියට ගියා.+
52 ගෝලයෝ දිගටම සතුටින් හිටියා.+ එයාලට දෙවියන්ගේ බලයත් කිසිම අඩුවක් නැතුව ලැබුණා.
පාදසටහන්
^ එක පළාතක් අධීක්ෂණය කරපු රෝම පාලකයෙක්. “පැහැදිලි කිරීමක්” බලන්න.
^ හෝ, “ගහෙන්.”
^ හෝ, “සිහි වෙන්න හදපු සොහොන් ගෙයක.”
^ හෝ, “විනාශ වෙලා.”
^ “පැහැදිලි කිරීමක්” බලන්න.
^ හෝ, “දෙවියන්ගේ කැමැත්ත ඉටු කරලා.”
