යේසුස්ගේ නියෝජිතයන්ගේ ක්‍රියා 9:1-43
9 සාවුල් ස්වාමීන්ගේ ගෝලයන් එක්ක හිටියේ හරිම කේන්තියෙන්. එයා දිගින් දිගටම එයාලට තර්ජනය කළා. එයාට ඕනෙ වුණේ එයාලව කොහොමහරි මරලා දාන්න.+ ඉතින් එයා උත්තම පූජකයා ළඟට ගිහින්,
2 එයාට කිව්වා දමස්කයේ තියෙන සිනගෝගවලට* පෙන්නන්න පුළුවන් ලිපි කීපයක් ලියලා දෙන්න කියලා. සාවුල් අදහස් කළේ ‘ස්වාමීන්ගේ මාර්ගයට’+ අයිති පුරුෂයන්ව සහ ස්ත්‍රීන්ව එයාට අහු වුණොත් ඒ ලිපිවල අවසරයෙන් එයාලව අල්ලගෙන බැඳලා යෙරුසලමට අරන් එන්නයි.
3 එයා දමස්කයට ළං වෙනවාත් එක්කම එකපාරටම අහසෙන් එළියක් එයා වටේ විහිදුණා.+
4 ඒත් එක්කම එයා බිම ඇදන් වැටුණා. එතකොට “සාවුල්, සාවුල්, ඔයා මට පීඩා කරන්නේ ඇයි” කියන හඬක් එයාට ඇහුණා.
5 සාවුල් ඇහුවා “ස්වාමීනි, ඔබ කවුද” කියලා. එතකොට ඒ හඬ මෙහෙම කිව්වා. “මම යේසුස්.+ ඔයා පීඩා කරන්නේ මටයි.+
6 දැන් නැඟිටලා නගරෙට යන්න. කෙනෙක් ඇවිත් ඔයා කරන්න ඕනෙ මොනවාද කියලා ඔයාට කියයි.”
7 සාවුල් එක්ක ගිය අය වෙච්ච දේ දිහා ගල්ගැහිලා වගේ බලාගෙන හිටියා. එයාලට කටහඬක් ඇහුණත් එයාලා කාවවත් දැක්කේ නැහැ.+
8 ඊටපස්සේ සාවුල් හිටගත්තා. එයා ඇස් ඇරගෙන හිටියත් එයාට කිසිම දෙයක් පෙනුණේ නැහැ. ඉතින් එයාලා සාවුල්ව අතින් අල්ලගෙන දමස්කයට අරන් ගියා.
9 දවස් තුනක් යන කල් එයාට කිසිම දෙයක් පෙනුණේ නැහැ.+ එයා කිසිම දෙයක් කෑවේ බිව්වෙත් නැහැ.
10 දමස්කයේ අනනියස් කියලා ගෝලයෙක් හිටියා.+ ස්වාමීන් එයාට දර්ශනය වෙලා “අනනියස්” කියලා කතා කළා. එතකොට එයා “ඇයි මගේ ස්වාමීනි” කියලා ඇහුවා.
11 ස්වාමීන් එයාට මෙහෙම කිව්වා. “දැන් ඔයා කෙළින් වීථියට ගිහින් යූදස්ගේ ගෙදරට යන්න. එහෙදී ටාසස් ඉඳන් ආපු සාවුල්+ කියන කෙනාව ඔයාට හම්බ වෙයි. එයා එහේ යාච්ඤා කරකර ඉන්නවා.
12 අනනියස් කියලා කෙනෙක් ඇවිත් එයාව අල්ලලා ආයෙත් එයාට පෙනීම දෙන විදිහ එයා දර්ශනයකින් දැක්කා.”+
13 ඒත් අනනියස් මෙහෙම කිව්වා. “ස්වාමීනි, මං එයා ගැන අහලා තියෙනවා. එයා යෙරුසලමේදී ඔබේ ශුද්ධ තැනැත්තන්ට කරපු දුෂ්ට දේවල් ගැන හුඟක් අය මට කියලා තියෙනවා.
14 එයා මෙහේ ආවෙත් ඔබේ නමින් කන්නලව් කරන හැමෝවම හිරේට දාන්න.* එයා ඒකට නායක පූජකයන්ගෙන් අවසරත් අරගෙන.”+
15 ඒත් ස්වාමීන් එයාට මෙහෙම කිව්වා. “ඔයා ගිහින් එයාව හම්බ වෙන්න. මං එයාව විශේෂ වැඩකට තෝරගෙන තියෙනවා.+ මගේ නම ගැන ජාතීන්ටත්+ රජවරුන්ටත්+ ඊශ්‍රායෙල්වරුන්ටත් දැනුම් දෙන්න මං එයාව තෝරගත්තා.
16 මගේ නම නිසා එයාට මොන තරම් දුක් විඳින්න වෙනවාද කියලා මම එයාට පෙන්නනවා.”+
17 ඉතින් අනනියස් ඒ ගෙදරට ගිහින් සාවුල්ව හම්බ වෙලා එයාව අල්ලලා මෙහෙම කිව්වා. “සාවුල්, මගේ සහෝදරයා, මාව ඔයා ළඟට එව්වේ ස්වාමීන් වන යේසුස්. පාරේදී ඔයාට දර්ශනය වුණේ ඔහුයි. ඔහු මාව එව්වේ ඔයාට ආයෙත් පෙනීම දීලා දෙවියන්ගේ බලයත් ඔයාට දෙන්නයි.”+
18 ඒ වෙලාවෙම එයාගේ ඇස්වලින් කොරපොතු වගේ දෙයක් වැටිලා එයාට ආයෙත් පෙනීම ලැබුණා. ඊටපස්සේ සාවුල් නැඟිටලා බව්තීස්ම වුණා.
19 එයා කෑම කාලා ආයෙත් ශක්තිමත් වුණා.
එයා දමස්කයේ හිටපු ගෝලයන් එක්ක දවස් කීපයක්ම හිටියා.+
20 එයා පරක්කු කරන්නේ නැතුව යේසුස් දෙවියන්ගේ පුතා කියලා සිනගෝගවල දේශනා කරන්න පටන්ගත්තා.
21 එයා කියපු දේවල් අහපු හැමෝම පුදුම වෙලා මෙහෙම ඇහුවා. “මේ ඉන්නේ යෙරුසලමේදී යේසුස්ගේ අනුගාමිකයන්ට දරුණු විදිහට පීඩා කරපු මිනිහා නේද?+ එයා මෙහෙට ආවේ ගෝලයන්ව අල්ලගෙන නායක පූජකයන් ළඟට අරන් යන්න නේද?”+
22 ඒත් සාවුල් දෙවියන්ගේ බලයෙන් තව තවත් ශක්තිමත් වෙලා යේසුස් කියන්නේ ක්‍රිස්තුස් කියලා දමස්කයේ හිටපු යුදෙව්වන්ට තර්කානුකූලව ඔප්පු කරලා පෙන්නුවා. ඒ කිසිම කෙනෙක්ට එයාත් එක්ක තර්ක කරන්න බැරි වුණා.+
23 දවස් ගාණක් ගත වුණාට පස්සේ යුදෙව්වන් එයාව මරලා දාන්න කුමන්ත්‍රණය කළා.+
24 ඒත් එයාලාගේ කුමන්ත්‍රණය ගැන සාවුල්ට ආරංචි වුණා. ඒ අය එයාව මරලා දාන්න හිතාගෙන රෑ දවල් දෙකේම නුවරේ දොරටු ළඟ රැකගෙන හිටියා.
25 ඉතින් එයාගේ ගෝලයෝ රෑ වුණාම එයාව ලොකු කූඩයක දාලා පවුරේ හිඩසකින් පහළට බැස්සුවා.+
26 සාවුල් යෙරුසලමට ගියාම+ එයා ගෝලයන්ව හම්බ වෙන්න හැදුවත් ඒ හැමෝම එයාට බය වුණා. මොකද එයා යේසුස්ගේ ගෝලයෙක් කියලා එයාලා විශ්වාස කළේ නැහැ.
27 ඉතින් ඒ වෙලාවේ බානබස්+ එයාගේ උදව්වට ඇවිත් එයාව නියෝජිතයන් ළඟට එක්කගෙන ගියා. සාවුල් පාරේ යද්දී ස්වාමීන් එයාට දර්ශනය වෙලා+ කතා කරපු විදිහයි, එයා දමස්කයේ ඉද්දී යේසුස්ගේ නමින් බය නැතුව කතා කරපු විදිහයි බානබස් එයාලට අකුරක් නෑර කිව්වා.+
28 ඊටපස්සේ සාවුල් ගෝලයන් එක්ක නැවතුණා. එයා නිදහසේ යෙරුසලමේ තැනින් තැනට ගිහින් නිර්භීතව ස්වාමීන්ගේ නමින් කතා කළා.
29 ග්‍රීක භාෂාව කතා කරපු යුදෙව්වන් එක්කත් එයා කතා කළා. එයා දිගටම ඒ අය එක්ක තර්ක කළා. ඒ නිසා එයාලා කීප වතාවක්ම උත්සාහ කළා එයාව මරලා දාන්න.+
30 සහෝදරයන්ට ඒ ගැන ආරංචි වුණාම එයාලා සාවුල්ව සිසේරියට අරන් ගිහින් ටාසස්වලට පිටත් කරලා ඇරියා.+
31 ඒකෙන් පස්සේ යුදය, ගලීලය සහ සමාරිය+ පුරාම හිටපු ක්‍රිස්තියානීන්ට* සාමකාමී කාලයක් උදා වුණා. සභාව දිගටම ශක්තිමත් වුණා. මොකද හැමෝම යෙහෝවා* ගැන ගරුබියක් ඇතුව වැඩ කරලා දෙවියන්ගේ බලයෙන් ලොකු සැනසීමක් ලැබුවා.+ එයාලාගේ ගාණත් එන්න එන්නම වැඩි වුණා.
32 මේ අතරේ පේතෘස් ඒ මුළු පළාත පුරාම තැනින් තැනට යද්දී ලිද්දාවේ+ ඉන්න ශුද්ධ තැනැත්තන්වත් හම්බ වෙන්න ගියා.
33 එහෙදී එයාට අනීයස් කියන අංශභාග රෝගියාව හම්බ වුණා. එයා අවුරුදු අටක් තිස්සේ ඔත්පළ වෙලා හිටපු කෙනෙක්.
34 ඒ වෙලාවේ පේතෘස් එයාට මෙහෙම කිව්වා. “අනීයස්, යේසුස් ක්‍රිස්තුස් දැන් ඔයාව සුව කරනවා.+ නැඟිටලා ඔයාගේ ඇඳ හදාගන්න.”+ ඒක ඇහුණ ගමන්ම එයා නැඟිට්ටා.
35 එයා සනීප වෙලා ඉන්නවා දැක්කාම ලිද්දාවේ සහ ෂාරොන් තැනිතලාවේ ජීවත් වුණ හැමෝම ස්වාමීන් ගැන විශ්වාස කරන්න පටන්ගත්තා.
36 යොප්පාවේ තබිතා කියලා යේසුස්ගේ ගෝලයෙක් හිටියා. ග්‍රීක භාෂාවෙන් එයාට කිව්වේ දොර්කස්* කියලා. එයා හුඟක් යහපත් දේවල් කරපු කාන්තාවක්. ඒ වගේම එයා අගහිඟකම් තිබුණ අයට නිතරම උදව් කරපු, එයාගෙම අතින් හදපු දේවල් එයාලට තෑගි කරපු කෙනෙක්.
37 ඒ දවස්වල එයා අසනීප වෙලා මැරුණා. ඉතින් ගෝලයෝ එයාගේ සිරුර හෝදලා පිරිසිදු කරලා ඒක උඩුමහල් කාමරයක තිබ්බා.
38 යොප්පාව තිබුණේ ලිද්දාවට කිට්ටුවෙන්. පේතෘස් ලිද්දාවේ ඉන්නවා කියලා එයාලට ආරංචි වුණාම “අනේ, ඉක්මනට අපි ඉන්න තැනට එන්න” කියලා දෙන්නෙක් අතේ එයාලා පේතෘස්ට පණිවිඩයක් යැව්වා.
39 ඉතින් පේතෘස් එයාලා හිටපු තැනට ගියා. එයා ආවාම ගෝලයෝ එයාව උඩුමහල් කාමරයට එක්කගෙන ආවා. එතකොට වැන්දඹුවන් හැමෝම එයා ළඟට ඇවිත් අඬඅඬ, දොර්කස් එයාලට මහලා දීපු පිට වස්ත්‍රයි, අනිත් ඇඳුම් හැම එකක්මයි ගෙනත් පෙන්නුවා.
40 ඊටපස්සේ පේතෘස් හැමෝටම එළියට යන්න කියලා+ දණගහලා යාච්ඤා කළා. එයා දොර්කස්ගේ සිරුර දිහා බලලා “තබිතා නැඟිටින්න” කියලා කිව්වා. එතකොට දොර්කස් ඇස් ඇරලා වටපිට බැලුවා. පේතෘස්ව දැක්කාම එයා ඇඳේ ඉඳගත්තා.+
41 පේතෘස් එයාට අත දීලා එයාට හිටගන්න උදව් කළා. ඊටපස්සේ පේතෘස් ශුද්ධ තැනැත්තන්ටයි, වැන්දඹුවන්ටයි අඬගහලා දොර්කස් දැන් ජීවත් වෙනවා කියලා කිව්වා.+
42 ඒ සිද්ධිය ගැන ආරංචිය යොප්පාව පුරාම පැතිරිලා ගියා. ඒ නිසා හුඟක් අය ස්වාමීන්ව විශ්වාස කරන්න පටන්ගත්තා.+
43 පේතෘස් දවස් කීපයක්ම යොප්පාවේ නතර වෙලා හිටියා. එයා හිටියේ හම් පදම් කරන කෙනෙක් වුණ සීමොන්ගේ ගෙදර.+
පාදසටහන්
^ “පැහැදිලි කිරීමක්” බලන්න.
^ මූ.අ., “බැඳලා තියන්න; විලංගු දාන්න.”
^ මූ.අ., “ක්‍රිස්තියානි සභාවට.”
^ දොර්කස් කියන ග්‍රීක නමේ සහ තබිතා කියන ඇරමයික නමේ තේරුම, “ගසෙල් මුවෙක්.”
