ගණන් කතාව 11:1-35
11 සෙනඟ හරිම කේන්තියෙන් එක දිගටම එයාලාගේ දුක් කරදර ගැන යෙහෝවා දෙවියන් ඉස්සරහා කන්කෙඳිරි ගාන්න පටන්ගත්තා. ඒක ඇහුණාම යෙහෝවාට හොඳටම කේන්ති ගියා. ඒ නිසා යෙහෝවා එයාලව විනාශ කරන්න ගින්නක් එව්වා. කඳවුරේ මායිම කිට්ටුව හිටිය කීපදෙනෙක් ඒ ගින්නට අහු වෙලා මැරුණා.
2 ඒ වෙලාවේ සෙනඟ අඬඅඬ මෝසෙස්ට කිව්වා එයාලව බේරගන්න කියලා. මෝසෙස් එයාලා වෙනුවෙන් යෙහෝවාට කන්නලව් කළා.+ එතකොට ගින්න නිවිලා ගියා.
3 ඒ නිසා ඒ තැනට තබෙරා* කියන නම තිබ්බා. මොකද සෙනඟව විනාශ කරන්න යෙහෝවා ගින්නක් එව්වේ එතනදියි.+
4 ඊශ්‍රායෙල්වරු අතරේ හිටපු වෙනත් ජාතීන්ට අයිති අය+ හරිම කෑදර විදිහට කෑම ගැන හිතහිත ඒ ගැන කොඳුරන්න පටන්ගත්තා.+ එතකොට ඊශ්‍රායෙල් සෙනඟත් අඬඅඬ මෙහෙම කිව්වා. “අපිට කන්න මස් කෝ?+
5 ඊජිප්තුවේ ඉන්න කාලේ අපිට කොච්චර දේවල් කන්න තිබුණාද? අපි හිතේ හැටියට මාළු කෑවා! පිපිඤ්ඤා, කොමඩු, ලීක්ස්, ලූනු, සුදුලූනු කොච්චර කෑවාද?+
6 ඒත් දැන් අපිට කන්න තියෙන්නේ මන්නා විතරයි.+ ඒවා විතරක් කාලා දැන් අපේ ඇඟට කිසි පණක් නැහැ.”
7 මන්නාවල+ හැඩේ කොත්තමල්ලි ඇට+ වගේ. ඒවාට තිබුණේ ඩෙලියම්* ලාටු වගේ පෙනුමක්.
8 සෙනඟ බිම වැටිලා තිබුණ මන්නා එකතු කරගෙන ඒවා ඇඹරුම් ගලකින් අඹරගත්තා. එහෙම නැත්නම් වංගෙඩියක දාලා කොටාගත්තා. ඊටපස්සේ එයාලා ඒවා භාජනවලට දාලා තම්බගෙන ඒවාවලින් රවුම් කැවිලි හදාගත්තා.+ ඒවාට තිබුණේ තෙල් මිශ්‍ර කරලා හදාගත්ත රස කැවිලිවල රහ.
9 රෑට කඳවුර වටේට පින්න වැටුණාම මන්නාත් බිම වැටුණා.+
10 හැම කෙනෙක්ම එයාලාගේ පවුලේ අය එක්ක කූඩාරම්වලින් එළියට ඇවිත් අඬඅඬ ඉන්නවා මෝසෙස් දැක්කා. සෙනඟ හැසිරුණ විදිහ ගැන යෙහෝවාට හුඟක් කේන්ති ගියා.+ මෝසෙස්ටත් එයාලා ගැන ලොකු කලකිරීමක් ඇති වුණා.
11 ඒ වෙලාවේ මෝසෙස් යෙහෝවාට මෙහෙම කිව්වා. “ඔයාගේ සේවකයා වන මට මේ තරම් අමාරු වගකීමක් දුන්නේ ඇයි? මං මොකක් හරි වරදක් කරලා ඔයාගේ හිත රිද්දුවාද? ඒ නිසාද මේ වගේ සෙනඟක් බලාගන්න මට භාර දුන්නේ?+
12 එයාලාගේ මුතුන්මිත්තන්ට දෙනවා කියලා ඔයා දිවුරලා පොරොන්දු වුණ දේශයට+ එයාලව අරන් යන්න කියලා ඔයා මට කියනවා. කිරි බොන දරුවෙක්ව උකුළේ තියාගෙන යනවා වගේ එයාලව එතනට අරගෙන යන්න කියලද ඔයා මට කියන්නේ? ඇයි මම එහෙම කරන්නේ? මමද එයාලව බිහි කළේ?
13 ‘අපිට මස් ඕනේ! අපිට මස් ඕනේ’ කියකිය සෙනඟ අඬනවා. මෙච්චර ලොකු සෙනඟකට මං කොහෙන් මස් හොයලා දෙන්නද?
14 මේ සෙනඟව මට තනියෙන් බලාගන්න බැහැ.+
15 ඔයා මගෙන් ඒ වගේ දෙයක් බලාපොරොත්තු වෙනවා නම් දැන්මම මාව මරලා දාන්න.+ ඔයා මං ගැන සතුටු වෙනවා නම් තවත් මට මේ විදිහට දුක් දෙන්න එපා.”
16 ඒ වෙලාවේ යෙහෝවා දෙවියන් මෝසෙස්ට මෙහෙම කිව්වා. “ඊශ්‍රායෙල් සෙනඟ අතරේ ඉන්න පුරුෂයන් 70දෙනෙක්ව තෝරගන්න. එයාලව තෝරගන්න ඕනෙ ඔයා දන්න අඳුරන වැඩිමහල්ලන් සහ අධිපතීන් අතරෙනුයි.+ ඔයා එයාලත් එක්ක හමු වීමේ කූඩාරම ළඟට ගිහිල්ලා එතනට වෙලා ඉන්න.
17 මං එතනට ඇවිත්+ ඔයාත් එක්ක කතා කරන්නම්.+ මං ඔයාට දුන්න මගේ බලයෙන් කොටසක්+ ඒ වැඩිමහල්ලන්ට දෙනවා. මේ සෙනඟව බලාගන්න එයාලා ඔයාට උදව් කරයි. එතකොට ඔයාට තනියම ඒ වගකීම දරන්න වෙන්නේ නැහැ.+
18 ඔයා සෙනඟට මෙහෙම කියන්න. ‘“ඊජිප්තුවේ ඉද්දී අපිට හොඳට කන්න තිබුණා. දැන් අපිට කන්න මස් නැහැ”+ කියකිය ඔයාලා යෙහෝවා ඉස්සරහා අඬපු නිසා යෙහෝවා අනිවාර්යයෙන්ම ඔයාලට කන්න මස් දෙනවා.+ හෙට වෙද්දී පවිත්‍ර වෙලා* ඉන්න.+ හෙට ඔයාලා අනිවාර්යයෙන්ම මස් කනවා.+
19 දවසක්, දෙකක්, පහක්, දහයක්, විස්සක් නෙමෙයි
20 මාසයක්ම ඔයාලට කන්න මස් ලැබෙයි. අප්පිරියා* වෙන කල්ම+ ඔයාලට මස් කන්න වෙයි. මොකද ඔයාලා අතරේ ඉන්න ඔයාලාගේ දෙවි යෙහෝවාව ඔයාලා ප්‍රතික්ෂේප කළා. “ඊජිප්තුවෙන් අපිව අරන් ආවේ ඇයි” කියකිය ඔයාලා ඔහු ඉස්සරහා ඇඬුවා.’”+
21 එතකොට මෝසෙස්, දෙවියන්ට මෙහෙම කිව්වා. “මේ සෙනඟ අතරේ පුරුෂයන් විතරක් හයලක්ෂයක් ඉන්නවා.+ ඒත් ‘මං මාසයක් පුරාම එයාලට කන්න මස් දෙනවා’ කියලා ඔයා කියනවා. කොහොමද එච්චර ලොකු සෙනඟකට මස් කන්න දෙන්නේ?
22 රංචු පිටින් සත්තු මරලා එයාලට කන්න දුන්නත් මුහුදේ ඉන්න ඔක්කොම මාළු ටික අල්ලලා දුන්නත් ඒවා එයාලට ඇති වෙයි කියලා හිතනවාද?”
23 යෙහෝවා මෝසෙස්ට මෙහෙම කිව්වා. “යෙහෝවා වන මට ඒ දේ කරන්න බැහැ කියලා ඔයා හිතනවාද?+ මං ඔයාට කියපු දේ වෙයිද නැද්ද කියලා දැන් ඔයාට බලාගන්න පුළුවන්.”
24 ඊටපස්සේ මෝසෙස් සෙනඟ ළඟට ගිහින් යෙහෝවා කියපු හැම දෙයක්ම එයාලට කිව්වා. එයා සෙනඟ අතරේ හිටපු වැඩිමහල්ලන්ගෙන් 70දෙනෙක්ව තෝරගෙන හමු වීමේ කූඩාරම ළඟට එයාලට එන්න කිව්වා.+
25 ඊටපස්සේ යෙහෝවා වලාකුළකින් මෝසෙස් ළඟට ඇවිත්+ එයාත් එක්ක කතා කළා.+ දෙවියන් මෝසෙස්ට දීලා තිබුණ බලයෙන් කොටසක්+ වැඩිමහල්ලන් 70දෙනාට දුන්නා. එයාලට ඒ බලය ලැබුණ ගමන්ම එයාලා අනාගතවක්තෘවරුන් වගේ වැඩ කරන්න පටන්ගත්තා.*+ ඒත් ඊටපස්සේ එයාලා ඒ විදිහට වැඩ කළේ නැහැ.
26 හමු වීමේ කූඩාරම ළඟට ගියේ නැති වැඩිමහල්ලන් දෙන්නෙක් හිටියා. එයාලවත් වැඩිමහල්ලන් විදිහට ලියාපදිංචි කරලයි තිබුණේ. එක් කෙනෙක් එල්දාද්. අනිත් කෙනා මේදාද්. ඒ දෙන්නාටත් දෙවියන්ගේ බලය ලැබුණා. කඳවුරේ ඉද්දීම එයාලා අනාගතවක්තෘවරුන් වගේ වැඩ කරන්න පටන්ගත්තා.
27 තරුණයෙක් ඒක දැකලා මෝසෙස් ළඟට දුවලා ගිහින් “එල්දාද් සහ මේදාද් කඳවුරේ ඉඳන් අනාගතවක්තෘවරුන් වගේ වැඩ කරනවා” කියලා කිව්වා.
28 එතකොට තරුණ වයසේ ඉඳන්ම මෝසෙස්ට සේවය කරපු නූන්ගේ පුතා වන යොෂුවා+ මෙහෙම කිව්වා. “මෝසෙස් මගේ ස්වාමීනි, එයාලට එහෙම කරන්න ඉඩ දෙන්න එපා!”+
29 ඒත් මෝසෙස් එයාට මෙහෙම කිව්වා. “මට ඒකෙන් පාඩුවක් වෙයි කියලා ඔයාට බයද? බය වෙන්න එපා. යෙහෝවාට සේවය කරන හැම කෙනෙක්ම අනාගතවක්තෘවරුන් වෙනවා නම් කොච්චර හොඳද! එතකොට යෙහෝවා ඔහුගේ බලය ඒ හැම කෙනෙක්ටම දෙයි.”
30 ඊටපස්සේ මෝසෙස් වැඩිමහල්ලන් එක්ක ආපහු කඳවුරට ගියා.
31 යෙහෝවා දෙවියන් තද හුළඟක් හමන්න සැලැස්සුවා. ඒ හුළඟත් එක්ක මුහුද පැත්තෙන් කඳවුරට වටුවෝ ගහගෙන ආවා. මුළු කඳවුරම වැහෙන්න උන් බිම වැටිලා හිටියා.+ පොළොවේ ඉඳන් රියන්* දෙකක් විතර උසට උන් ගොඩගැහිලා හිටියා.* කඳවුරේ ඉඳන් දවසක් ඇතුළත ගමන් කරන්න පුළුවන් දුරක් යන කල් උන් පේන්න හිටියා. උන් ඒ විදිහට කඳවුර වටේටම හිටියා.
32 සෙනඟ එදා මුළු දවස පුරාමත් රාත්‍රිය පුරාමත් වටුවෝ එකතු කරගත්තා. එයාලා පහුවෙනිදා දවස පුරාමත් උන්ව එකතු කරගත්තා. අඩුවෙන්ම එකතු කරගත්ත කෙනාත් විශාල භාජන දහයක් පිරෙන්න තරම් වටුවන් ප්‍රමාණයක්* එකතු කරගෙන තිබුණා. සෙනඟ එයාලා එකතු කරගත්ත වටුවෝ කඳවුර වටේට ඇතිරුවා.
33 යෙහෝවාට සෙනඟත් එක්ක හුඟක් කේන්ති ගියා. එයාලා එකතු කරගත්ත මස් ඉවර වෙන්නත් කලින්* යෙහෝවා එයාලට පහර දුන්නා. සෙනඟගෙන් විශාල පිරිසක් විනාශ වුණා.+
34 හරිම කෑදර විදිහට හැසිරුණ ඒ අයගේ මළ සිරුරු ඒ ස්ථානයේ තැන්පත් කළා.+ ඒ නිසා ඒ ස්ථානයට කිබ්‍රොත්හත්තාවා*+ කියන නම තිබ්බා.
35 ඊටපස්සේ සෙනඟ කිබ්‍රොත්හත්තාවා ඉඳන් හෂේරොත්+ වෙන කල් ගිහින් එහේ කඳවුරු බැඳගත්තා.
පාදසටහන්
^ තේරුම, “ගින්න.”
^ ඩෙලියම් කියන්නේ සුවඳවත් මැලියම් වර්ගයක්. ඒක ලබාගන්නේ කොළ අඩු පොඩි පඳුරු වර්ගයකින්.
^ මූ.අ., “ශුද්ධ තත්වයක.”
^ හෝ, “මස් නහයෙන් එන කල්.”
^ හෝ, “අනාවැකි කියන්න පටන්ගත්තා.”
^ හෝ, “පොළොවේ ඉඳන් රියන් දෙකක් විතර උඩින් පියාඹගෙන ආපු උන් මුළු කඳවුරම වහගත්තා.”
^ හෝ, “එයාලාගේ කටේ මස් තියෙද්දීම.”
^ තේරුම, “කෑදරයන්ගේ සොහොන්.”
