ගණන් කතාව 16:1-50
16 රූබෙන්+ ගෝත්‍රයට අයිති දාතාන්, අබිරාම්, ඕන් සහ ලෙවී ගෝත්‍රයට අයිති කෝරා+ එකට එකතු වුණා. (කෝරා ඉෂ්හාර්ගේ+ පුතා. ඉෂ්හාර් කෝහාත්ගේ+ පුතා. කෝහාත් ලෙවීගේ+ පුතා. දාතාන් සහ අබිරාම් එලියාබ්ගේ+ පුතුන්. ඕන් පෙලෙත්ගේ පුතා.)
2 එයාලා ඊශ්‍රායෙල් සෙනඟ අතරේ හිටපු අධිපතීන් 250දෙනෙක්වත් එකතු කරගෙන, මෝසෙස්ට විරුද්ධව කතා කරන්න පටන්ගත්තා. ඒ අධිපතීන් සෙනඟ අතරෙන් තෝරගත්ත, හැමෝම හොඳින් දන්න අඳුරන අය.
3 එයාලා එකතු වෙලා+ මෝසෙස් සහ ආරොන් ළඟට ගිහින් මෙහෙම කිව්වා. “ඔය දෙන්නා විතරක් නෙමෙයි, මේ මුළු සෙනඟම ශුද්ධයි.+ යෙහෝවා එයාලා එක්කත් ඉන්නවා.+ ඉතින් ඔය දෙන්නා විතරක් ඇයි යෙහෝවාගේ සෙනඟට වඩා ඉහළින් යන්න හදන්නේ? අපිට දැන් ඔයාලව එපා වෙලයි තියෙන්නේ!”
4 ඒක ඇහුවාම මෝසෙස් දණින් වැටිලා ඔළුව බිමටම පහත් කරගෙන
5 කෝරාටයි, එයා එක්ක හිටපු අයටයි මෙහෙම කිව්වා. “දෙවියන්ගේ අනුමැතිය දිනාගෙන ඉන්න සේවකයා කවුද,+ ශුද්ධව ඉන්නේ කවුද, ඔහු ඉස්සරහට එන්න ඕනෙ කවුද කියලා+ යෙහෝවාම හෙට උදේට දන්වයි. දෙවියන් ඉස්සරහට යන්න ඕනෙ ඔහු තෝරගන්න කෙනායි.+
6 කෝරා, ඔයායි ඔයාත් එක්ක ඉන්න අනිත් හැමෝමයි+ සුවඳ ද්‍රව්‍ය ඔප්පු කරන භාජන+ අරගෙන
7 හෙට යෙහෝවා ඉස්සරහට ගිහින් සුවඳ ද්‍රව්‍ය ඔප්පු කරන්න. එතකොට යෙහෝවා තෝරගන්නේ කාවද කියලා අපිට දැනගන්න පුළුවන්.+ ශුද්ධව ඉන්නේ කවුද කියලා දෙවියන්ම පෙන්නයි. ලෙවීවරුනි,+ ඔයාලා ඔයාලාගේ සීමාව පැනලයි ඉන්නේ. ඔයාලා කතා කළා දැන් හොඳටම ඇති!”
8 මෝසෙස් එයාලට මෙහෙමත් කිව්වා. “ලෙවීවරුනි, මං කියන දේ දැන් අහන්න.
9 ඊශ්‍රායෙල්ගේ දෙවියන් ඔයාලට භාර දුන්නේ කොච්චර වටින වගකීමක්ද! ඔයාලට ඒ ගැන අගයක් නැද්ද? ඔහු මුළු සෙනඟ අතරින් ඔයාලව වෙන් කරලා+ ඔහු ළඟට එන්න ඔයාලට ඉඩ දුන්නා. ශුද්ධ කූඩාරමේ සේවය කරන්නත් සෙනඟ ඉස්සරහට ගිහින් එයාලට සේවය කරන්නත් යෙහෝවා තෝරගත්තේ ඔයාලවයි.+
10 දෙවියන් ඔයාලවයි, ඔයාලාගේ සහෝදරයන්වයි ඔහු ළඟටම ගෙන්නගත්තා. එච්චර වටින දෙයක් දීලත් දැන් ඔයාලට පූජකයන් වෙන්නත් ඕනෙද?+
11 ඔයාලත් ඔයාලා එක්ක ඉන්න මේ හැමෝමත් කතා කරන්නේ යෙහෝවාට විරුද්ධවයි. අනික ඔයාලා ආරොන්ට විරුද්ධව කතා කරන්නේ එයා මොන වරදක් කළාටද?”+
12 පස්සේ මෝසෙස් එලියාබ්ගේ පුතාලා වන දාතාන්ට සහ අබිරාම්ට+ එයා ළඟට එන්න කියලා පණිවිඩයක් යැව්වා. ඒත් එයාලා මෙහෙම දන්වලා එව්වා. “අපි එන්නේ නැහැ.
13 කිරියෙන් සහ පැණියෙන් ඉතිරිලා යන දේශයක හිටපු අපිව ඔයා මේ පාළුකරයට අරන් ආවේ මරලා දාන්නයි.+ ඒ මදිවට ඔයා දැන් අපිව පාලනය කරන්නත් හදනවාද?
14 ඔයා අපිව කිරියෙන් සහ පැණියෙන් ඉතිරෙන දේශයකට අරන් යනවා කියලා කිව්වා නේද?+ කෙත්වතු, මිදිවතු දෙනවා කියලත් පොරොන්දු වුණා නේද? කෝ දැන් ඒවා? ඔයා කියන්නේ මේ මිනිස්සුන්ට අන්ධයෝ වගේ ඔයාගේ පස්සෙන් එන්න කියලද?* අපි කොහොමටවත් ඔයා ළඟට එන්නේ නැහැ.”
15 ඒක අහලා මෝසෙස්ට හුඟක් කේන්ති ගියා. එයා යෙහෝවා දෙවියන්ට මෙහෙම යාච්ඤා කළා. “අනේ දෙවියනි, මේ සෙනඟ ඔප්පු කරන එක ධාන්‍ය පූජාවක්වත් පිළිගන්න එපා. මං එයාලා කාටවත් කිසිම කරදරයක් කළේ නැහැ. එයාලට අයිති එක සතෙක්වත් මං ගත්තේ නැහැ.”+
16 ඊටපස්සේ මෝසෙස් කෝරාට මෙහෙම කිව්වා. “හෙට ඔයාත් ඔයා එක්ක ඉන්න අනිත් හැමෝමත් යෙහෝවා ඉස්සරහට එන්න ඕනේ. ආරොනුත් එතනට එයි.
17 ඔයාලා එක් එක් කෙනා සුවඳ ද්‍රව්‍ය ඔප්පු කරන භාජනවලට සුවඳ ද්‍රව්‍ය දාලා ඒවා යෙහෝවා ඉස්සරහට අරන් යන්න. ඔයාත් ඔයා එක්ක ඉන්න 250දෙනාත් ආරොනුත් ඒ දේ කරන්න ඕනේ.”
18 ඉතින් එයාලා එක් එක් කෙනා සුවඳ ද්‍රව්‍ය ඔප්පු කරන භාජනවලට සුවඳ ද්‍රව්‍ය දාලා හමු වීමේ කූඩාරමට ඇතුල් වෙන තැනට ගියා. මෝසෙස් සහ ආරොනුත් එතන හිටියා.
19 කෝරා එයාගේ පැත්තේ හිටපු අයව+ මෝසෙස්ටයි, ආරොන්ටයි විරුද්ධව උසිගන්වලා එයාලව හමු වීමේ කූඩාරමට ඇතුල් වෙන තැනට රැස් කළා. ඒ වෙලාවේ යෙහෝවාගේ තේජස මුළු ඊශ්‍රායෙල් සෙනඟ ඉස්සරහා දිස් වුණා.+
20 යෙහෝවා මෝසෙස්ටයි, ආරොන්ටයි මෙහෙම කිව්වා.
21 “මං දැන්ම මේ සෙනඟව විනාශ කරලා දානවා. ඒ නිසා ඔයාලා දෙන්නා ඉක්මනටම එයාලා ඉන්න තැනින් අයින් වෙන්න.”+
22 ඒක ඇහුවාම ඒ දෙන්නා දණ ගහලා බිමටම ඔළුව පහත් කරගෙන මෙහෙම කිව්වා. “අනේ දෙවියනි, හැමෝටම ජීවිතය දෙන්නේ ඔයායි.*+ එක් කෙනෙක් කරපු වැරැද්දක් නිසා ඔයා මුළු ජාතිය එක්කම කේන්ති ගන්නේ ඇයි?”+
23 ඒ වෙලාවේ යෙහෝවා මෝසෙස්ට මෙහෙම කිව්වා.
24 “‘කෝරාගේ, දාතාන්ගේ සහ අබිරාම්ගේ+ කූඩාරම් ළඟින් දැන්මම අයින් වෙන්න’ කියලා සෙනඟට කියන්න.”
25 මෝසෙස් එතනින් නැඟිටලා ඊශ්‍රායෙල් වැඩිමහල්ලන්+ එක්ක දාතාන් සහ අබිරාම් හිටපු තැනට ගියා.
26 මෝසෙස් සෙනඟට මෙහෙම කිව්වා. “මේ දුෂ්ට මිනිස්සුන්ගේ කූඩාරම් ළඟින් අයින් වෙන්න. එයාලට අයිති කිසිම දෙයක් අල්ලන්නවත් එපා. එහෙම කළේ නැත්නම් එයාලාගේ වැරැද්ද නිසා ඔයාලත් විනාශ වෙයි.”
27 ඒක අහපු ගමන්ම සෙනඟ කෝරාගේ, දාතාන්ගේ සහ අබිරාම්ගේ කූඩාරම් ළඟින් අයින් වුණා. ඊටපස්සේ දාතාන් සහ අබිරාම් එයාලාගේ භාර්යාවන්, දරුවන් සහ ළදරුවන් එක්ක එළියට ඇවිත් එයාලාගේ කූඩාරම් ඉස්සරහා හිටගත්තා.
28 එතකොට මෝසෙස් මෙහෙම කිව්වා. “මං කිසිම දෙයක් මගේ හිතුමනාපෙට කළේ නැහැ. මාව ඔයාලා ළඟට එව්වේ යෙහෝවා. දැන් මේ වෙන්න යන දෙයින් ඔයාලට ඒක පැහැදිලි වෙයි.
29 මේ අය දෙවියන්ගෙන් දඬුවමක් ලබන්නේ නැතුව සාමාන්‍යයෙන් මිනිස්සු මැරෙන විදිහට මැරුණොත් මාව එවලා තියෙන්නේ යෙහෝවා නෙමෙයි.+
30 ඒත් ඔයාලා මීට කලින් කවදාවත් දැකලා නැති දෙයක් යෙහෝවා කළොත් ඒ කියන්නේ පොළොව පැළිලා* පණපිටින්ම එයාලවයි, එයාලට අයිති හැම දෙයක්මයි ගිලගත්තොත්* එතකොට ඔයාලා දැනගනියි එයාලා අගෞරව කළේ යෙහෝවාටයි කියලා.”
31 මෝසෙස් ඒක කියලා ඉවර වෙනවාත් එක්කම පොළොව පැළෙන්න පටන්ගත්තා.+
32 පොළොව ඒකේ කට ඇරලා එයාලවත් එයාලාගේ පවුල්වල අයවත් කෝරාගේ+ පැත්ත ගත්ත හැමෝවමත් ගිලගත්තා.
33 ඒ හැමෝම පණපිටින්ම මිනී වළට ගියා. ඊටපස්සේ පොළොව එයාලව වහගත්තා. ඒ විදිහට එයාලා ඊශ්‍රායෙල් සෙනඟ අතරින් විනාශ වෙලා ගියා.+
34 එයාලා කෑගහන සද්දේ ඇහිලා ඒ කිට්ටුව හිටපු අය “මෙතනින් දුවමු. නැත්නම් පොළොව අපිවත් ගිලගනියි” කියකිය දිව්වා.
35 ඊටපස්සේ යෙහෝවා ගින්නක් එව්වා.+ සුවඳ ද්‍රව්‍ය ඔප්පු කරකර හිටපු මිනිස්සු 250දෙනාම ඒ ගින්නෙන් විනාශ වුණා.+
36 යෙහෝවා දෙවියන් මෝසෙස්ට මෙහෙම කිව්වා.
37 “පූජක ආරොන්ගේ පුතා වන එලියාසර්ට කියන්න ඇවිළෙන අඟුරු අතරේ තියෙන සුවඳ ද්‍රව්‍ය ඔප්පු කරන භාජන+ ටික එකතු කරගන්න කියලා. මොකද ඒ භාජන ශුද්ධයි. එතන තියෙන අඟුරු ඈතකට අරන් ගිහින් වීසි කරන්න කියලත් එයාට කියන්න.
38 ඒ භාජන යෙහෝවා වන මං ඉස්සරහට අරගෙන ආපු නිසා ඒවා ශුද්ධයි. මට අකීකරු වෙලා ජීවිත නැති කරගත්ත ඒ මිනිස්සු ගෙනාපු සුවඳ ද්‍රව්‍ය ඔප්පු කරන භාජන තළලා තුනී තහඩු හදාගන්න. ඒ තහඩු පූජාසනයේ+ සවි කරන්න. ඒක ඊශ්‍රායෙල් සෙනඟට අනතුරු ඇඟවීමක් වෙයි.”+
39 ගින්නෙන් විනාශ වුණ මිනිස්සු සුවඳ ද්‍රව්‍ය ඔප්පු කරන්න ගෙනාපු තඹ භාජන පූජක එලියාසර් එකතු කරගෙන ඒවා තළලා තුනී තහඩු හැදුවා. ඊටපස්සේ ඒ තහඩු පූජාසනයේ සවි කළා.
40 එහෙම කළේ ආරොන්ගේ පවුලට* අයිති නැති කිසිම කෙනෙක්ට සුවඳ ද්‍රව්‍ය ඔප්පු කරන්න යෙහෝවා ඉස්සරහට එන්න බැහැ කියන දේ ඊශ්‍රායෙල්වරුන්ට මතක් කරන්නයි.+ ඒ වගේම කෝරා සහ එයාත් එක්ක හිටපු අය වගේ වැඩ කරන එක කොයි තරම් අනතුරුදායකද කියන දේ සෙනඟට මතක් කරන්නයි.+ යෙහෝවා මෝසෙස් මාර්ගයෙන් අණ කරපු හැම දේම එලියාසර් කළා.
41 ඒත් පහුවෙනිදා මුළු ඊශ්‍රායෙල් සෙනඟම “ඔයාලා යෙහෝවාගේ සෙනඟව මරලා දැම්මා” කියලා මෝසෙස්ටයි, ආරොන්ටයි+ චෝදනා කළා.
42 සෙනඟ මෝසෙස්ටයි, ආරොන්ටයි විරුද්ධව කතා කරකර එක තැනකට රැස් වුණා. හමු වීමේ කූඩාරම දිහා හැරිලා බලද්දී එයාලා දැක්කා වලා ටැඹ මුළු කූඩාරමම වහගන්නවා. යෙහෝවාගේ තේජසත් එයාලා ඉස්සරහා දිස් වුණා.+
43 ඒ වෙලාවේ මෝසෙස් සහ ආරොන් හමු වීමේ කූඩාරම ළඟට ආවා.+
44 එතකොට යෙහෝවා මෝසෙස්ට මෙහෙම කිව්වා.
45 “මං දැන්මම මේ සෙනඟව විනාශ කරනවා. ඔයාලා ඉක්මනින් එයාලා ඉන්න තැනින් අයින් වෙන්න.”+ ඒක ඇහුවාම මෝසෙස් සහ ආරොන් දණින් වැටිලා මුහුණු බිමටම පහත් කරගත්තා.+
46 ඊටපස්සේ මෝසෙස් ආරොන්ට මෙහෙම කිව්වා. “යෙහෝවා ඉන්නේ ගොඩක් කේන්තියෙන්. ඔහු දැනටමත් සෙනඟට වසංගතයකින් පහර දෙන්න පටන් අරන්. ඉක්මනටම සුවඳ ද්‍රව්‍ය ඔප්පු කරන භාජනයකට පූජාසනයේ තියෙන ඇවිළෙන අඟුරු ටිකක් දාන්න.+ ඒකට සුවඳ ද්‍රව්‍යයත් දාලා සෙනඟ ළඟට ගිහින් එයාලා වෙනුවෙන් දෙවියන්ගෙන් සමාව ඉල්ලන්න.”+
47 මෝසෙස් කියපු විදිහටම ආරොන් ඉක්මනටම සෙනඟ ළඟට දුවලා ගිහින් සුවඳ ද්‍රව්‍ය ඔප්පු කරලා එයාලට සමාව දෙන්න කියලා ඉල්ලුවා. ඒ වෙද්දීත් වසංගතය පටන් අරගෙනයි තිබුණේ.
48 වසංගතයෙන් මැරුණ අයත් ජීවත් වෙලා ඉන්න අයත් අතරේ ආරොන් දිගටම හිටගෙන හිටියා. වසංගතය නවතින කල් එයා එහෙම හිටියා.
49 කෝරාගේ කැරැල්ල නිසා මැරුණ අයට අමතරව වසංගතයෙන් 14,700ක් මැරුණා.
50 වසංගතය නැවතුණාට පස්සේ ආරොන් හමු වීමේ කූඩාරම ළඟ හිටපු මෝසෙස් ළඟට ගියා.
පාදසටහන්
^ මූ.අ., “ඔයා මේ මිනිස්සුන්ගේ ඇස් උගුල්ලලා දාන්නද හදන්නේ?”
^ මූ.අ., “හැම ජීවියෙක්ටම ජීවන හුස්ම දෙන්නේ ඔයායි.”
^ මූ.අ., “පොළොව ඒකේ කට ඇරලා.”
^ “එයාලව පණපිටින්ම මිනී වළට ඇදගත්තොත්” කියන අදහසත් මුල් භාෂාවේ තියෙනවා.
^ හෝ, “පූජක පවුලට.”
