ගණන් කතාව 21:1-35
21 කානානිවරයෙක් වුණ ආරද්වල+ රජ ජීවත් වුණේ නෙගෙබ්වල. එයාට ආරංචි වුණා ඊශ්‍රායෙල්වරු අතාරීම්වලට යන පාරේ ගමන් කරනවා කියලා. ඉතින් එයා ගිහින් ඊශ්‍රායෙල්වරුන්ට විරුද්ධව සටන් කරලා එයාලාගෙන් සමහරදෙනෙක්ව වහලුන් විදිහට අරන් ගියා.
2 ඒ වෙලාවේ ඊශ්‍රායෙල්වරු යෙහෝවා දෙවියන්ට මෙහෙම පොරොන්දු වුණා. “මේ සෙනඟව යටත් කරගන්න ඔබ අපිට උදව් කළොත් අපි එයාලාගේ නගර සම්පූර්ණයෙන්ම විනාශ කරනවා.”*
3 යෙහෝවා ඊශ්‍රායෙල්වරු කියපු දේ අහලා කානානිවරුන්ව පරාජය කරන්න එයාලට උදව් කළා. ඊශ්‍රායෙල්වරු කානානිවරුන්ව සහ එයාලාගේ නගර සම්පූර්ණයෙන්ම විනාශ කළා. ඒ නිසා ඒ තැනට හොර්මා*+ කියන නම තිබ්බා.
4 පස්සේ ඊශ්‍රායෙල්වරු හෝර් කන්දේ+ ඉඳන් රතු මුහුදට යන මාර්ගය හරහා ගමන් කළා. එයාලා එහෙම කළේ ඒදොම්වරුන්ගේ+ දේශය මඟහැරලා යන්න ඕනෙ නිසයි. ගමන නිසා සෙනඟ හිටියේ හොඳටම හෙම්බත් වෙලා.
5 ඒ නිසා එයාලා දිගටම දෙවියන්ටත් මෝසෙස්ටත් විරුද්ධව+ මෙහෙම කිව්වා. “ඊජිප්තු දේශයේ ඉඳන් අපිව මේ පාළුකරයට ගෙනාවේ අපිව මරලා දාන්නද? අපිට කන්න කෑම නැහැ. බොන්න වතුර නැහැ.+ මේ කිසි කමකට නැති කෑම දැන් අපිට එපා වෙලා!”*+
6 ඉතින් යෙහෝවා එයාලා අතරට විෂ සර්පයන්ව එව්වා. සර්පයන් එයාලට දෂ්ට කරපු නිසා එයාලාගෙන් හුඟදෙනෙක් මැරුණා.+
7 සෙනඟ මෝසෙස් ළඟට ඇවිත් මෙහෙම කිව්වා. “අපේ අතින් වුණේ ලොකු වරදක්! අපි යෙහෝවාටයි, ඔයාටයි විරුද්ධව කතා කළා.+ අනේ, මේ සර්පයන්ව මෙහෙන් අයින් කරන්න කියලා යෙහෝවාගෙන් ඉල්ලන්න.” එතකොට මෝසෙස් සෙනඟට සමාව දෙන්න කියලා දෙවියන්ගෙන් ඉල්ලුවා.+
8 ඒ වෙලාවේ යෙහෝවා මෝසෙස්ට මෙහෙම කිව්වා. “විෂ සර්පයෙක්ගේ හැඩේට රූපයක් හදලා ඒක කණුවක එල්ලන්න. සර්පයෙක් කාට හරි දෂ්ට කළොත් එයාට කියන්න ඒ රූපය දිහා බලන්න කියලා. එතකොට එයාගේ ජීවිතේ බේරෙයි.”
9 මෝසෙස් ඒ වෙලාවෙම ගිහින් තඹවලින් සර්පයෙක්ගේ රූපයක්+ හදලා ඒක කණුවක එල්ලුවා.+ සර්පයෙක් කාට හරි දෂ්ට කළාම ඒ කෙනා ඒ රූපය දිහා බැලුවා. ඒකෙන් එයාගේ ජීවිතේ බේරුණා.+
10 ඒ සිද්ධියෙන් පස්සේ ඊශ්‍රායෙල්වරු ඔබොත්+ කියන තැනට ඇවිත් කඳවුරු බැඳගත්තා.
11 පස්සේ එයාලා එතනින් පිටත් වෙලා ඉයෙඅබරිම්+ කියන තැනට ඇවිත් කඳවුරු බැඳගත්තා. ඉයෙඅබරිම් තිබුණේ නැඟෙනහිර පැත්තේ, මෝවබ් දේශයට මුහුණ ලා තියෙන පාළුකරයේ.
12 එතන ඉඳන් එයාලා ෂේරෙද්+ නිම්නය වෙන කල් ගිහින් ඒ කිට්ටුව කඳවුරු බැඳගත්තා.
13 පස්සේ එයාලා අමෝරිවරුන්ගේ දේශ සීමාවට එහායින් තිබුණ පාළුකරයට ඇවිත් ආනොන්+ නිම්නයට අයිති පළාතේ කඳවුරු බැඳගත්තා. ආනොන් කියන්නේ මෝවබ්වරුන්ගේ දේශ සීමාව. මෝවබ් දේශය සහ අමෝරිවරුන්ගේ දේශය වෙන් කරන සීමාව ඒකයි.
14 යෙහෝවා දෙවියන්ගේ යුද්ධ ගැන සටහන් කරලා තියෙන ලියවිල්ලේ ඒ ගැන සඳහන් වෙන්නේ මේ විදිහටයි. “සූෆා ප්‍රදේශයේ වහෙබ් කියන තැන සහ ආනොන් නිම්නයෙන් ගලා යන අතු ගංගා.
15 ඒ අතු ගංගා ආර් නුවර වෙන කල් ගලා බහිනවා. එතන ඉඳන් ඒවා ගලා යන්නේ මෝවබ් දේශ සීමාව හරහායි.”
16 ඊශ්‍රායෙල්වරු ඊළඟට ගියේ බෙයර්වලට. “සෙනඟව මෙතනට රැස් කරන්න. මං එයාලට බොන්න වතුර දෙන්නම්” කියලා යෙහෝවා මෝසෙස්ට කිව්වේ ඒ ස්ථානයේ තියෙන ළිඳ ගැනයි.
17 ඒ වෙලාවේ ඊශ්‍රායෙල්වරු ළිඳ දිහා බලාගෙන මෙහෙම ගායනා කළා.
“ඔබේ දිය උල්පත් බිඳ අපිට වතුර දෙන්න. සෙනඟෙනි, වතුර උනද්දී ගී ගයන්න!
18 අධිපතීන් සහ වංශවත් අය හෑරූ ළිඳ මෙය නොවේද!
මෙය ඔවුන්ගෙම සැරයටිවලින් හෑරූ ළිඳ නොවේද!”
ඊටපස්සේ සෙනඟ ඒ පාළුකරයේ ඉඳන් මත්තනාවලට ගියා.
19 එතනින් එයාලා නහලියෙල්වලටත් නහලියෙල් ඉඳන් බාමොත්වලටත්+ ගියා.
20 එයාලා බාමොත් ඉඳන් මෝවබ්+ ප්‍රදේශයේ තියෙන නිම්නයට ඇවිත් පිස්ගාවල+ මුදුන වෙන කල් ගමන් කළා. පිස්ගාවල මුදුනේ ඉඳන් බලද්දී යෙෂිමොන්*+ කියන ප්‍රදේශය පේනවා.
21 ඊශ්‍රායෙල්වරු අමෝරිවරුන්ගේ රජ වන සීහොන් ළඟට පණිවිඩකරුවන්ව යවලා මෙහෙම දැන්නුවා.+
22 “ඔබේ දේශය හරහා යන්න අපිට අවසර දෙන්න. අපි ඔබේ කෙත්වතු මැදින්වත් මිදිවතු මැදින්වත් යන්නේ නැහැ. අපි ඔබේ ළිංවලින් වතුර බොන්නෙත් නැහැ. ඔබේ දේශය පහු කරගෙන යන කල් අපි රජගේ මාර්ගයේ විතරක් යන්නම්.”+
23 ඒත් සීහොන් රජ එයාගේ දේශය හරහා ගමන් කරන්න ඊශ්‍රායෙල්වරුන්ට ඉඩ දුන්නේ නැහැ. එයා එයාගේ මුළු හමුදාවම රැස් කරගෙන පාළුකරයට ගිහින් යහෂ් කියන තැනදී ඊශ්‍රායෙල්වරු එක්ක සටන් කළා.+
24 ඒත් ඊශ්‍රායෙල්වරු සීහොන්ට කඩුවෙන් පහර දීලා+ එයාගේ දේශය යටත් කරගත්තා.+ එයාලා ආනොන්+ නිම්නය සහ යබ්බොක්+ නිම්නය අතරේ තිබුණ මුළු ප්‍රදේශයම යටත් කරගත්තා. ඒත් එයාලා යාසෙර්+ පහු කරගෙන ගියේ නැහැ. මොකද ඒක අම්මොන්වරුන්ගේ දේශ සීමාව.+
25 ඒ හැම නුවරක්ම යටත් කරගත්තාට පස්සේ ඊශ්‍රායෙල්වරු හෙෂ්බොන්වල තිබුණ අමෝරිවරුන්ගේ+ නගරවලත් ඒ අවට තිබුණ කුඩා නගරවලත් පදිංචි වුණා.
26 හෙෂ්බොන් කියන්නේ අමෝරිවරුන්ගේ රජ වුණ සීහොන්ගේ අගනුවර. සීහොන් රජ මෝවබ්වරුන්ගේ රජ එක්ක සටන් කරලා එයාට අයිති මුළු දේශයම ඒ කියන්නේ ආනොන් නිම්නය වෙන කල් තිබුණ මුළු ප්‍රදේශයම යටත් කරගෙන තිබුණා.
27 ඒ සිද්ධිය ගැන සමහර අය මේ විදිහට ඇනුම් පද කියනවා.
“හෙෂ්බොන් නුවරට එන්න.
සීහොන්ගේ නුවර ශක්තිමත්ව ගොඩනඟා ස්ථිරව පිහිටවමු!
28 සීහොන්ගේ නුවර වන හෙෂ්බොන් ඉඳන් ගින්නක් නික්ම ආවා.
ඒ ගින්නෙන් මෝවබ්වරුන්ගේ ආර් නුවර දැවී ගියා. ආනොන් නිම්නයේ උස් තැන්වල හිටපු ප්‍රධානීන් විනාශ වී ගියා.
29 මෝවබ්වරුනි, ඔබට මුහුණ දෙන්න වෙන්නේ මොන තරම් දරුණු විපතකටද!
කෙමොෂ්ගේ+ ජනයෙනි, ඔබව සම්පූර්ණයෙන්ම විනාශ වී යයි!
පලා යන ඔහුගේ දූපුතුන්ව ඔහු අමෝරිවරුන්ගේ රජ වන සීහොන්ට පාවා දෙනවා.
30 අපි ඔවුන්ට පහර දෙමු.හෙෂ්බොන් ඉඳන් දීබොන් දක්වා+ නැති නාස්ති කරමු.නෝෆා දක්වාම ගිහින් හැම කෙනෙක්වම විනාශ කරමු.මේදෙබා+ දක්වා තියෙන හැම දේම ගින්නෙන් විනාශ වී යයි.”
31 ඊශ්‍රායෙල්වරු අමෝරිවරුන්ගේ දේශයේ පදිංචි වුණා.
32 ඊටපස්සේ මෝසෙස් යාසෙර් නගරයේ තොරතුරු හොයලා බලන්න මිනිස්සු කීපදෙනෙක්ව යැව්වා. ඊශ්‍රායෙල්වරු යාසෙර්+ අවට තිබුණ කුඩා නගර යටත් කරගෙන එහේ ජීවත් වුණ අමෝරිවරුන්ව පන්නලා දැම්මා.
33 ඊටපස්සේ එයාලා හැරිලා බාෂාන්වලට යන මාර්ගයේ ගියා. බාෂාන්වල රජ වන ඕග්ට+ ඒ ගැන ආරංචි වුණාම එයා එයාගේ හමුදාවත් එක්ක ඊශ්‍රායෙල්වරුන්ට විරුද්ධව සටන් කරන්න එද්රෙයි+ නුවරට ගියා.
34 ඒ වෙලාවේ යෙහෝවා මෝසෙස්ට මෙහෙම කිව්වා. “බය වෙන්න එපා.+ මං ඕග් රජවත් එයාගේ සෙනඟවත් එයාගේ දේශයත් ඔයාලට යටත් කරලා දෙනවා.+ හෙෂ්බොන්වල ජීවත් වුණ අමෝරිවරුන්ගේ රජ වන සීහොන්ව විනාශ කරපු විදිහටම ඔයාලා ඕග් රජවත් විනාශ කරයි.”+
35 ඉතින් ඊශ්‍රායෙල්වරු ඕග් රජවයි, එයාගේ පුතාලවයි, එයාගේ මුළු සෙනඟවයි විනාශ කළා. එයාලාගෙන් කිසිම කෙනෙක් ඉතුරු වුණේ නැහැ.+ ඒ විදිහට ඊශ්‍රායෙල්වරු ඕග් රජගේ දේශයත් අයිති කරගත්තා.+
පාදසටහන්
^ මූ.අ., “විනාශයට නියම කරනවා.”
^ තේරුම, “විනාශයට නියම කරපු.”
^ හෝ, “අප්පිරියයි.”
^ හෝ සමහරවිට, “කාන්තාරය; පාළුකරය.”
