ගණන් කතාව 35:1-34
35 යෙරිකෝවට මුහුණ ලා, යොර්දාන් ගඟ+ ළඟ තියෙන මෝවබ් පාළුකරයේදී යෙහෝවා දෙවියන් මෝසෙස්ට මෙහෙම කිව්වා.
2 “ඊශ්‍රායෙල් සෙනඟට කියන්න ඔවුන්ට උරුමයක් විදිහට ලැබෙන ඉඩම්වලින් ලෙවීවරුන්ට ජීවත් වෙන්න නගර දෙන්න කියලා.+ ඒ වගේම ඒ නගර අවට තියෙන තණබිම් ඔවුන් ලෙවීවරුන්ට දෙන්න ඕනේ.+
3 ලෙවීවරු ඒ නගරවල ජීවත් වෙයි. ඒ තණබිම්වල ඔවුන්ගේ සත්ව රැළවල් සහ අනිත් සතුන් ඇති කරන්නත් ගොවිපොළවල් හදන්නත් පුළුවන්.
4 ලෙවීවරුන්ට දෙන තණබිම් මනින්න ඕනෙ මෙහෙමයි. නගරයේ පවුරේ ඉඳන් හතර පැත්තටම රියන්* 1,000 ගාණේ මනින්න.
5 එතන ඉඳන් තණබිමේ මායිම ලකුණු කරගන්න. මායිම දිගේ උතුරු පැත්තට රියන් 2,000කුත් නැඟෙනහිර පැත්තට රියන් 2,000කුත් බස්නාහිර පැත්තට රියන් 2,000කුත් දකුණු පැත්තට රියන් 2,000කුත් එන විදිහට ලකුණු කරගන්න.* නගරය තියෙන්න ඕනෙ හරි මැද. නගර වටේ තියෙන තණබිම් මනින්න ඕනෙ ඒ විදිහටයි.
6 “කෙනෙක් අතින් මිනී මැරුමක් වුණොත් ඒ කෙනාට පලා ගිහින් ආරක්ෂාව ලබාගන්න+ නගර 6කුත්+ තවත් නගර 42කුත් ලෙවීවරුන්ට දෙන්න.
7 ඒ විදිහට ලෙවීවරුන්ට නගර 48ක් දෙන්න ඕනේ. ඒ නගර අවට තියෙන තණබිමුත් ඔවුන්ට දෙන්න.+
8 ලෙවීවරුන්ට ඒ නගර දෙන්න ඕනෙ ඊශ්‍රායෙල්වරුන්ට උරුම වෙන ඉඩම්වලින්.+ විශාල බිම් කොටසක් උරුම වෙන අය වැඩි නගර ප්‍රමාණයකුත් කුඩා බිම් කොටසක් උරුම වෙන අය අඩු නගර ප්‍රමාණයකුත් දෙන්න ඕනේ.+ ලෙවීවරුන්ට දෙන නගර ප්‍රමාණය තීරණය වෙන්නේ එක් එක් ගෝත්‍රයට උරුම වෙන බිම් කොටසේ විශාලත්වයට අනුවයි.”
9 යෙහෝවා මෝසෙස්ට මෙහෙමත් කිව්වා.
10 “ඊශ්‍රායෙල් සෙනඟට මේ දේත් කියන්න. ‘යොර්දාන් ගඟෙන් එගොඩ වෙලා කානාන් දේශයට ගියාට පස්සේ+
11 පහසුවෙන්ම යන්න පුළුවන් නගර කීපයක් ආරක්ෂාව ලබා දෙන නගර විදිහට තෝරගන්න. අත්වැරදීමක් නිසා කෙනෙක් අතින් තව කෙනෙක් මැරුණොත් ඒ කෙනා ආරක්ෂාව ලබා දෙන නගරයකට පලා යන්න ඕනේ.+
12 සෙනඟ ඉස්සරහා විනිශ්චයක් ලැබෙන කල් ඔහු ආරක්ෂාව ලබා දෙන නගරයේ ඉන්න ඕනේ.+ එහෙම කළේ නැත්නම් ඔහුට විනිශ්චයක් ලැබෙන්න කලින් මිනීමරුවාව මරලා දාන්න අයිතිය තියෙන කෙනා*+ ඔහුව මරන්න ඉඩ තියෙනවා.
13 ඔබ දෙන නගර හය ආරක්ෂාව ලබා දෙන නගර විදිහට පාවිච්චි කරන්න.
14 ආරක්ෂාව ලබා දෙන නගර විදිහට යොර්දාන් ගඟෙන් නැඟෙනහිර පැත්තේ තියෙන නගර තුනකුත්+ කානාන් දේශයේ තියෙන නගර තුනකුත්+ වෙන් කරන්න.
15 ඊශ්‍රායෙල් ජාතිකයෙක් හෝ ඊශ්‍රායෙල්වරු අතරේ ඉන්න විදේශිකයෙක්+ අතින් අත්වැරදීමක් නිසා කෙනෙක් මැරුණොත් ආරක්ෂාව ලබන්න ඒ කෙනා ඒ එක නගරයකට පලා යන්න ඕනේ.+
16 “‘ඒත් කෙනෙක් යකඩ ආයුධයකින් තවත් කෙනෙක්ට පහර දීලා ඒ කෙනා මැරුණොත් ඔහු මිනීමරුවෙක්. ඒ මිනීමරුවාව අනිවාර්යයෙන්ම මැරිය යුතුයි.+
17 මිනිසෙක්ගේ ජීවිතේට හානියක් කරන්න පුළුවන් විදිහේ ගලකින් කෙනෙක් තව කෙනෙක්ට ගහලා ඔහු මැරුණොත් ඒ කෙනා මිනීමරුවෙක්. ඒ මිනීමරුවාව අනිවාර්යයෙන්ම මැරිය යුතුයි.
18 මිනිසෙක්ගේ ජීවිතේට හානියක් කරන්න පුළුවන් විදිහේ ලී ආයුධයකින් කෙනෙක් තව කෙනෙක්ට ගහලා ඔහු මැරුණොත් ඒ කෙනා මිනීමරුවෙක්. ඒ මිනීමරුවාව අනිවාර්යයෙන්ම මැරිය යුතුයි.
19 “‘මිනීමරුවාව මරලා දාන්න ඕනෙ මිය ගිය කෙනාගේ නෑදෑයෙක්. මිනීමරුවාව අහු වුණාම ඒ කෙනා මිනීමරුවාව මැරිය යුතුයි.
20 කෙනෙක් වෛරයක් හිතේ තියාගෙන මිනිසෙක්ව තල්ලු කරලා ඒ මිනිසා වැටිලා මැරුණොත් තල්ලු කරපු කෙනා මිනීමරුවෙක්. එහෙම නැත්නම් කෙනෙක් මිනිසෙක්ගේ ජීවිතේට හානියක් කරන අරමුණෙන්* යම් දේකින් ගහලා ඒ මිනිසා මැරුණොත්+ ගහපු කෙනා මිනීමරුවෙක්.
21 ඒ වගේම කෙනෙක් වෛරයක් හිතේ තියාගෙන මිනිසෙක්ට අතින් පහර දීලා ඒ මිනිසා මැරුණොත් පහර දුන්න කෙනා මිනීමරුවෙක්. ඒ මිනීමරුවාව අනිවාර්යයෙන්ම මැරිය යුතුයි. මිනීමරුවාව මරලා දාන්න අයිතිය තියෙන කෙනාට මිනීමරුවාව අහු වුණාම ඔහුව මැරිය යුතුයි.
22 “‘ඒත් කෙනෙක් හදිස්සියේ තව කෙනෙක්ව තල්ලු කරලා ඒ කෙනා වැටිලා මැරෙන්න පුළුවන්. එහෙම නැත්නම් දෙයක් වීසි කරද්දී ඒක වැදිලා කෙනෙක් මැරෙන්න පුළුවන්. ඒත් ඒක කරපු කෙනාගේ හිතේ මැරුණ කෙනා ගැන කිසිම වෛරයක් තිබුණේ නැහැ.+ ඔහු ඒක කළේ හිතාමතා නෙමෙයි.
23 එහෙමත් නැත්නම් කෙනෙක් ගලක් පෙරළද්දී ඒ ගලට යට වෙලා තව කෙනෙක් දරුණු විදිහට තුවාල වෙලා මැරෙන්න පුළුවන්. ඒත් ඒ කෙනා එතන ඉන්නවා කියලා ගල පෙරළපු කෙනා දැක්කේ නැහැ. ඔහුගේ හිතේ මැරුණ කෙනා ගැන කිසිම වෛරයක් තිබුණෙත් නැහැ. ඔහු ඒක කළේ හිතාමතා නෙමෙයි.
24 ඒ වගේ අවස්ථාවලදී වරදකරුව මරලා දාන්න අයිතිය තියෙන කෙනාවත් වරදකරුවාවත් විනිශ්චයකරුවන් ඉස්සරහට අරන් යන්න ඕනේ.+ විනිශ්චයකරුවන් ඒ කාරණා සැලකිල්ලට අරන්
25 වරදකරුව මරලා දාන්න අයිතිය තියෙන කෙනාගෙන් වරදකරුව බේරගත යුතුයි. ඔහු වරද කරලා ආරක්ෂාව ලබාගන්න පලා ගිය නගරයටම විනිශ්චයකරුවන් ඔහුව ආයෙත් යවන්න ඕනේ. ශුද්ධ තෛලයෙන්+ අභිෂේක කරපු උත්තම පූජකයා මැරෙන කල්ම ඒ නගරයෙන් පිට වෙන්න ඔහුට අවසර නැහැ.
26 “‘ඒත් වරද කරපු කෙනා ආරක්ෂාව ලබා දෙන නගරයෙන් එළියට ගියොත්
27 ඔහුව මරලා දාන්න අයිතිය තියෙන කෙනාගේ අතට ඔහුව අහු වෙන්න ඉඩ තියෙනවා. එහෙම වෙලා ඒ කෙනා වරදකරුව මරලා දැම්මොත් වරදකරුගේ ලේවලට ඔහු වග කියන්න ඕනෙ නැහැ.
28 මොකද උත්තම පූජකයා මැරෙන කල් වරදකරු ආරක්ෂාව ලබා දෙන නගරයේ ඉන්න ඕනේ. ඔහුට ආයෙත් ගෙදර යන්න පුළුවන් වෙන්නේ උත්තම පූජකයා මැරුණාට පස්සෙයි.+
29 ඔබ දේශයේ කොතනක ජීවත් වුණත් නඩු විභාග කරද්දී ඒ නීතිය පිළිපැදිය යුතුයි. ඔබෙන් පැවතෙන හැමෝම ඒ නීතිය පිළිපදින්න ඕනේ.
30 “‘කෙනෙක් තවත් කෙනෙක්ව හිතාමතාම මැරුවා කියලා ඔප්පු කරන්න සාක්ෂි තියෙනවා නම්+ ඔහුට මරණ දණ්ඩනය නියම කළ යුතුයි.+ ඒත් ඉන්නේ එක සාක්ෂිකරුවෙක් විතරයි නම් ඔහුට මරණ දණ්ඩනය නියම කරන්න බැහැ.
31 මරණ දණ්ඩනය නියම කරපු කෙනෙක්ව බේරගන්න ගෙවන කිසිම මුදලක් භාරගන්න එපා. ඔහුව අනිවාර්යයෙන්ම මරා දැමිය යුතුයි.+
32 ආරක්ෂාව ලබා දෙන නගරයකට පලා ගිය කෙනෙක්ට උත්තම පූජකයා මිය යන්න කලින් ඔහුගේ ගෙදරට යන්න ඕනෙ වෙලා ඒ වෙනුවෙන් කවුරු හරි වන්දියක් දෙන්න හැදුවොත් ඒක භාරගන්න එපා.
33 “‘ඔබේ දේශය අපවිත්‍ර වෙන්න ඉඩ දෙන්න එපා. ලේ හැලුවොත් දේශය අපවිත්‍ර වෙනවා.+ දේශය ආයෙත් ශුද්ධ තත්වයකට ගේන්න පුළුවන් වෙන්නේ ලේ හලපු කෙනාව මැරුවොත් විතරයි.+
34 ඔබ ජීවත් වෙන දේශය අපවිත්‍ර කරන්න එපා. මොකද මම ඔබ අතරේ ඉන්නවා. යෙහෝවා වන මං ඊශ්‍රායෙල් සෙනඟ අතරේ ඉන්නවා.’”+
පාදසටහන්
^ සමහරවිට මුළු තණබිමේ මායිම් මනින්න ඇත්තේ ඒකේ මැද තිබුණ නුවරේ දිග පළල අත්හැරලා.
^ මූ.අ., “ලේවල පළිය ගන්න කෙනා.”
^ මූ.අ., “කෙනෙක් මඟ රැකගෙන ඉඳලා.”
