ගණන් කතාව 5:1-31
5 යෙහෝවා දෙවියන් මෝසෙස්ට මෙහෙම කිව්වා.
2 “ලාදුරු රෝගීන්ව,+ ශරීරයෙන් ශ්‍රාවයක් ගලන අයව+ සහ මළ සිරුරක්* අල්ලපු නිසා අපවිත්‍ර වුණ අයව+ කඳවුරෙන් එළියට යවන්න කියලා ඊශ්‍රායෙල්වරුන්ට කියන්න.
3 ඒ විදිහට අපවිත්‍ර වෙලා ඉන්න පුරුෂයන්, ස්ත්‍රීන් හැමෝවම කඳවුරෙන් එළියට යවන්න ඕනේ. එහෙම කළේ නැත්නම්, මං ඔවුන් අතරට ඇවිත් ඉන්න තැන*+ අපවිත්‍ර වෙයි.”+
4 යෙහෝවා මෝසෙස්ට අණ කරපු විදිහටම ඊශ්‍රායෙල්වරු අපවිත්‍ර වෙලා හිටපු හැම කෙනෙක්වම කඳවුරෙන් එළියට යැව්වා.
5 යෙහෝවා මෝසෙස්ට මෙහෙමත් කිව්වා.
6 “ඊශ්‍රායෙල්වරුන්ට මෙහෙම කියන්න. ‘පුරුෂයෙක් හරි ස්ත්‍රියක් හරි යම් වරදක් කරලා යෙහෝවා වන මගේ විශ්වාසය කැඩුවොත් ඒ කෙනා තමන් කරපු වරදට වග කිව යුතුයි.+
7 ඒ පුරුෂයා හරි ස්ත්‍රිය හරි තමන් කරපු වරද පිළි අරන් ඒ ගැන දැනුම් දිය යුතුයි.+ ඒ වගේම ඒ වරද නිසා අලාභයක් සිද්ධ වුණ කෙනාට ඒ වෙනුවෙන් සම්පූර්ණ වන්දියක් ගෙවිය යුතුයි. වුණ අලාභයෙන් පහෙන් කොටසකුත් ඒ කෙනාට ගෙවිය යුතුයි.+
8 පාඩුව වින්ද කෙනා මිය ගියොත් වන්දිය ගෙවිය යුත්තේ ඔහුගේ කිට්ටු නෑදෑයෙක්ටයි. ඒත් වන්දිය භාරගන්න කිට්ටු නෑදෑයෙක් නැත්නම් ඒ වන්දිය ඔහු යෙහෝවාට දිය යුතුයි. ඒක අයිති වෙන්නේ පූජකයාටයි. ඒ වන්දියත් එක්ක ඔහු තම වරදට සමාව ලබාගන්න පූජකයාට බැටළුවෙක්වත් දිය යුතුයි.+
9 “‘ඊශ්‍රායෙල්වරු පරිත්‍යාගයක්+ විදිහට පූජකයා ළඟට ගේන හැම ශුද්ධ දෙයක්ම අයිති වෙන්නේ පූජකයාටයි.+
10 එක් එක් කෙනා පරිත්‍යාග කරන ඕනෙම ශුද්ධ දෙයක් පූජකයාට අයිති වෙනවා.’”
11 යෙහෝවා දෙවියන් මෝසෙස්ට මෙහෙමත් කිව්වා.
12 “ඊශ්‍රායෙල්වරුන්ට මෙහෙම කියන්න. ‘සමහරවිට ස්ත්‍රියක් ඇගේ පුරුෂයාට ද්‍රෝහි වෙලා
13 වෙනත් පුරුෂයෙක් එක්ක ලිංගික සම්බන්ධකම් පවත්වන්න ඉඩ තියෙනවා.+ ඇය ඒක ඇගේ පුරුෂයාගෙන් හැංගුවොත්, ඒ වගේම ඒ ගැන සාක්ෂි දෙන්න කිසිම කෙනෙක් නැති වුණොත් ඇගේ වරද හෙළි නොවෙන්න ඉඩ තියෙනවා. ඒත් ඇය කරපු වරද නිසා ඇය දෙවියන් ඉස්සරහා අපවිත්‍රයි.
14 හැබැයි පස්සේ කාලෙක, ඇය ඔහුට ද්‍රෝහි වෙලා කියලා පුරුෂයාට සැකයක් ඇති වෙලා ඔහු ඇයට වෛර කරන්න ඉඩ තියෙනවා. ඇය ඒ අපවිත්‍ර ක්‍රියාව නොකළත් පුරුෂයාට ඒ වගේ සැකයක් ඇති වෙන්න ඉඩ තියෙනවා. ඒ වගේ අවස්ථාවකදී ඔහු කළ යුත්තේ මෙයයි.
15 ඒ පුරුෂයා ඔහුගේ බිරිඳව පූජකයා ළඟට අරන් යන්න ඕනේ. ඇය වෙනුවෙන් පූජාවක් ඔප්පු කරන්න බාර්ලි පිටි ඒපාවකින් දහයෙන් කොටසකුත්* ඔහු ගේන්න ඕනේ. ඔහු ඒකට තෙල්වත් කට්ටකුමංජල්වත් නොදැමිය යුතුයි. මොකද ඒක සැකයක් ඇති වුණ නිසා ඔප්පු කරන ධාන්‍ය පූජාවක්. වරද මතක් කරලා දෙන පූජාවක්.
16 “‘පූජකයා ඇයව යෙහෝවා වන මං ඉස්සරහට අරන් එන්න ඕනේ.+
17 ඊටපස්සේ පූජකයා මැටි භාජනයකට පිරිසිදු වතුර ටිකක් පුරවලා ශුද්ධ කූඩාරම තියෙන තැනින් පස් ටිකක් අරන් ඒ වතුරට මිශ්‍ර කළ යුතුයි.
18 යෙහෝවා වන මං ඉස්සරහට අරන් ආපු ඒ ස්ත්‍රියගේ කොණ්ඩේ පූජකයා ලිහා දැමිය යුතුයි. ඔහු වරද මතක් කරලා දෙන ධාන්‍ය පූජාව ඒ කියන්නේ සැකයක් නිසා ඔප්පු කරන පූජාව ඇගේ අල්ල මත තැබිය යුතුයි.+ ඒ වෙලාවේ පූජකයා ශාපයක් ගේන තිත්ත වතුර ඔහුගේ අතේ තියාගත යුතුයි.+
19 “‘ඊටපස්සේ පූජකයා මෙහෙම කියලා ඇගෙන් දිවුරුමක් ගත යුතුයි. “ඔයාගේ පුරුෂයා එක්ක විවාහ වුණාට පස්සේ ඔයා වෙනත් පුරුෂයෙක් එක්ක කවදාවත් ලිංගික සම්බන්ධකම් පවත්වලා නැත්නම්,+ එයාට ද්‍රෝහි වෙලා නැත්නම් ශාපයක් ගේන මේ තිත්ත වතුරෙන් ඔයාට කිසි හානියක් සිදු නොවේවා!
20 හැබැයි ඔයා විවාහ වුණාට පස්සේ ඔයා වෙනත් පුරුෂයෙක් එක්ක ලිංගික සම්බන්ධකම් පවත්වලා+ ඔයාගේ පුරුෂයාට ද්‍රෝහි වෙලා තියෙනවා නම් . . .”
21 ‘මං ඒ වරද කළා නම් මට ශාප වෙන්න ඕනෙ’ කියලා ඇගෙන් දිවුරුමක් අරන් පූජකයා මෙහෙමත් කිව යුතුයි. “ඔයා දුන්නේ බොරු දිවුරුමක් නම් යෙහෝවා ඔයාගේ බඩ ඉදිමෙන්න සලස්වයි. ඔයාගේ මුළු ජීවිත කාලයටම ඔයා වඳ ස්ත්‍රියක් වෙයි. යෙහෝවා ඔයාට ගේන ඒ ශාපය සෙනඟට පාඩමක් වෙයි. එයාලා ශාප කරද්දී, දිවුරද්දී ඔයාට වුණ දේ එයාලට මතක් වෙයි.
22 ශාපයක් ගේන මේ වතුර ඔයා බිව්වාම ඔයාගේ බඩ ඉදිමෙයි. ඔයා වඳ ස්ත්‍රියක් වෙයි.” එතකොට ස්ත්‍රිය “ආමෙන්! ආමෙන්”* කියලා පැවසිය යුතුයි.
23 “‘පූජකයා ඒ ශාපය ලියවිල්ලක සටහන් කරලා තිත්ත වතුරෙන් ඒක මකා දැමිය යුතුයි.
24 ඊටපස්සේ පූජකයා ශාපයක් ගේන ඒ තිත්ත වතුර ස්ත්‍රියට බොන්න දිය යුතුයි. ඒ වතුර බිව්වාම ඇයට වේදනාවක් ඇති වෙයි.
25 සැකයක් ඇති වුණ නිසා ඔප්පු කරන්න ගෙනාපු ධාන්‍ය පූජාව+ ඇගේ අතින් අරගෙන පූජකයා ඒක යෙහෝවා වන මං ඉස්සරහා ඒ මේ අත සෙලවිය යුතුයි. ඊටපස්සේ ඔහු ඒක පූජාසනය ළඟට ගෙනා යුතුයි.
26 පූජකයා ඒ ධාන්‍ය පූජාවෙන් අහුරක් අරගෙන මුළු පූජාවම නියෝජනය කරන්න* ඒක පූජාසනය මත දැවිය යුතුයි.+ ඊටපස්සේ ඔහු ස්ත්‍රියට තිත්ත වතුර බොන්න දිය යුතුයි.
27 ඇය තමන්ගේ පුරුෂයාට ද්‍රෝහි වෙලා තියෙනවා නම් ශාපයක් ගේන ඒ වතුර බිව්වාට පස්සේ ඇයට වේදනාවක් දැනෙයි. එතකොට ඇගේ බඩ ඉදිමෙයි. ඇය වඳ ස්ත්‍රියක් වෙයි. කාට හරි ශාප කරද්දී සෙනඟ ඇයට වුණ දේ මතක් කරගනියි.
28 ඒත් ස්ත්‍රිය ඇගේ පුරුෂයාට ද්‍රෝහි වෙලා නැත්නම් ඇයට ඒ දඬුවම ලැබෙන්නේ නැහැ. ඇයට දරුවන් බිහි කරන්න පුළුවන් වෙයි.
29 “‘පුරුෂයෙක්ට ඔහුගේ බිරිඳ ගැන සැකයක් ඇති වුණාම අනුගමනය කළ යුතු නීතිය එයයි.+ බිරිඳ ඇගේ පුරුෂයාට ද්‍රෝහි වුණොත්
30 එහෙම නැත්නම් ඇය ද්‍රෝහි වුණේ නැතත් පුරුෂයාට ඒ ගැන සැකයක් ඇති වුණොත් ඔහු බිරිඳව යෙහෝවා වන මං ඉස්සරහට ගෙනා යුතුයි. පූජකයා ඉහත සඳහන් නීතිය ඒ විදිහටම ක්‍රියාත්මක කළ යුතුයි.
31 ස්ත්‍රිය වරදක් කරලා තියෙනවා නම් ඇයට දඬුවම් විඳින්න වෙයි. ඒත් පුරුෂයා නිදොස් කියලා ඔප්පු වෙයි.’”
පාදසටහන්
^ හෙබ්‍රෙව් භාෂාවෙන් නෙෆෙෂ්. “පැහැදිලි කිරීමක්” බලන්න.
^ හෝ, “මගේ ශුද්ධ කූඩාරම පිහිටුවලා තියෙන කඳවුර.”
^ හෝ, “එසේම වේවා! එසේම වේවා!”
^ හෝ, “සිහිගැන්වීමක් විදිහට.”
