ගණන් කතාව 9:1-23
9 ඊශ්‍රායෙල්වරු ඊජිප්තුවෙන් පිටත් වුණාට පස්සේ ගත වුණ දෙවෙනි අවුරුද්දේ පළවෙනි මාසයේ+ යෙහෝවා දෙවියන් සීනයි පාළුකරයේදී මෝසෙස්ට මෙහෙම කිව්වා.
2 “නියම කරපු කාලයේදී+ ඊශ්‍රායෙල්වරු පාස්කු පූජාව+ සූදානම් කළ යුතුයි.
3 ඔබට නියම කරපු විදිහට මේ මාසයේ 14වෙනිදා හිරු බැස යනවාත් එක්කම* ඔබ ඒ පූජාව සූදානම් කළ යුතුයි. ඔබ ඒ පූජාව සූදානම් කළ යුත්තේ ඔබට දුන්න හැම නීතියකටම සහ මඟ පෙන්වීමකටම එකඟවයි.”+
4 පාස්කු පූජාව සූදානම් කරන්න කියලා මෝසෙස් ඊශ්‍රායෙල්වරුන්ට කිව්වා.
5 ඉතින් පළවෙනි මාසයේ 14වෙනිදා හිරු බැස යනවාත් එක්කම එයාලා පාස්කු පූජාව සූදානම් කළා. ඒ වෙනකොට එයාලා හිටියේ සීනයි පාළුකරයේ. යෙහෝවා මෝසෙස්ට කියපු හැම දේම ඊශ්‍රායෙල්වරු ඒ විදිහටම කළා.
6 මළ සිරුරක් අල්ලපු නිසා අපවිත්‍ර වුණ පුරුෂයන් කීපදෙනෙක් හිටියා.+ ඒ නිසා ඒ අයට එදා පාස්කු පූජාව සූදානම් කරන්න බැරි වුණා. එයාලා මෝසෙස් සහ ආරොන් ළඟට ගිහින්+
7 මෙහෙම කිව්වා. “මළ සිරුරක් අල්ලපු නිසා අපි අද ඉන්නේ අපවිත්‍ර තත්වයක. ඒත් අපිත් ආසයි ඊශ්‍රායෙල් සෙනඟත් එක්ක එකතු වෙලා නියම කරපු දවසේදී යෙහෝවාට පාස්කු පූජාව ඔප්පු කරන්න. ඒ ගැන අපිට මුකුත්ම කරන්න බැරිද?”+
8 එතකොට මෝසෙස් “පොඩ්ඩක් ඉන්න. යෙහෝවා මේ ගැන මොනවාද කියන්නේ කියලා අපි බලමු”+ කියලා එයාලට කිව්වා.
9 යෙහෝවා මෝසෙස්ට මෙහෙම කිව්වා.
10 “ඊශ්‍රායෙල්වරුන්ට මේ දේ කියන්න. ‘කෙනෙක් මළ සිරුරක් අල්ලපු නිසා අපවිත්‍ර තත්වයක ඉන්න පුළුවන්.+ නැත්නම් ඔහු දුර ගමනක් ගිහින් ඉන්නවා වෙන්න පුළුවන්. ඒ වගේ කෙනෙක් වුණත් යෙහෝවා වන මං වෙනුවෙන් පාස්කු පූජාව සූදානම් කළ යුතුයි. ඔබේ හැම පරම්පරාවක්ම ඒ දේ කළ යුතුයි.
11 ඔවුන් ඒ පූජාව සූදානම් කළ යුත්තේ දෙවෙනි මාසයේ+ 14වෙනිදා හිරු බැස යනවාත් එක්කමයි. ඔවුන් ඒක කන්න ඕනෙ මුහුන් නොදැමූ රොටි සහ තිත්ත පලා එක්කයි.+
12 ඔවුන් පහුවෙනිදා උදේ වෙන කල් ඒ සතාගේ මස් තබා නොගත යුතුයි.+ උගේ එක ඇටයක්වත් නොකැඩිය යුතුයි.+ පාස්කු පූජාව ගැන මම දුන්න හැම නීතියකටම එකඟව ඔවුන් ඒක සූදානම් කළ යුතුයි.
13 ඒත් පවිත්‍රව ඉන්න කෙනෙක් හෝ දුර ගමනක් ගියේ නැති කෙනෙක් නියම කරපු කාලයේදී යෙහෝවා වන මට පාස්කු පූජාව ඔප්පු කළේ නැත්නම් ඔහුව මරා දැමිය යුතුයි.+ ඒ කෙනා තමන් කරපු වරද වෙනුවෙන් වග කිව යුතුයි.
14 “‘ඔබ එක්ක විදේශිකයෙක් ජීවත් වෙනවා නම් යෙහෝවා වන මං වෙනුවෙන් ඔහුත් පාස්කු පූජාව සූදානම් කළ යුතුයි.+ ඔහු ඒක සූදානම් කළ යුත්තේ පාස්කුව ගැන මං දුන්න නීති, මඟ පෙන්වීම්වලට එකඟවයි.+ ඊශ්‍රායෙල් ජාතිකයෙක් වුණත් විදේශිකයෙක් වුණත් පිළිපැදිය යුත්තේ එකම නීතියයි.’”+
15 ගිවිසුම් පෙට්ටිය* තියලා තියෙන ශුද්ධ කූඩාරම සවි කරපු දවසේදී+ වලා ටැඹක් ඇවිත් ඒකට ඉහළින් නැවතුණා. ඒත් රෑට කූඩාරමට ඉහළින් ගින්නක් පේන්න තිබුණා. ඒක උදේ වෙන කල්ම තිබුණා.+
16 ඒ දේ දිගටම ඒ විදිහට වුණා. දවල් කාලයේදී වලා ටැඹ කූඩාරමට ඉහළින් තිබුණා. ඒත් රෑ පුරාම ඒකට ඉහළින් ගින්නක් පේන්න තිබුණා.+
17 හමු වීමේ කූඩාරමට ඉහළින් තිබුණ වලා ටැඹ එතනින් අයින් වෙලා යද්දී ඊශ්‍රායෙල්වරුත් ඒ වෙලේම කූඩාරම් අකුළගෙන එතනින් පිටත් වෙලා ගියා.+ වලා ටැඹ කොහේ හරි තැනක නතර වුණාම ඊශ්‍රායෙල්වරුත් එතන කඳවුරු බැඳගත්තා.+
18 වෙන තැනකට යන්න කියලා යෙහෝවා ඊශ්‍රායෙල්වරුන්ට දැනුම් දුන්නාම හිටපු තැනින් එයාලා පිටත් වෙලා ගියා. කොහේ හරි තැනක නතර වෙන්න කියලා යෙහෝවා දැනුම් දුන්නාම එයාලා එතන කඳවුරු බැඳගත්තා.+ ශුද්ධ කූඩාරමට ඉහළින් වලා ටැඹ නතර වෙලා තියෙන කල් හිටපු තැනින් ඊශ්‍රායෙල්වරු පිටත් වෙලා ගියේ නැහැ.
19 ශුද්ධ කූඩාරමට ඉහළින් වලා ටැඹ දවස් ගාණක් නැවතිලා තියෙද්දීත් ඊශ්‍රායෙල්වරු යෙහෝවා දෙවියන්ට කීකරු වෙලා එතන නතර වෙලා හිටියා.+
20 සමහර අවස්ථාවලදී වලා ටැඹ එක තැනක නතර වෙලා තිබුණේ ටික දවසයි. යම් තැනක කඳවුරු බැඳගන්න කියලා යෙහෝවා දැනුම් දුන්නාම ඊශ්‍රායෙල්වරු එහෙම කළා. එතනින් පිටත් වෙලා යන්න කියලා යෙහෝවා දැනුම් දුන්නාම එයාලා එතනින් පිට වෙලා ගියා.
21 සමහර අවස්ථාවලදී වලා ටැඹ එක තැනක නතර වෙලා තිබුණේ එක රැයක් විතරයි. ඒ වුණත් වලා ටැඹ උදේට එතනින් අයින් වෙලා ගියාම ඊශ්‍රායෙල්වරුත් එතනින් පිටත් වෙලා ගියා. වලා ටැඹ අයින් වෙලා ගියේ දවල්ට වුණත් රෑට වුණත් ඊශ්‍රායෙල්වරු එයාලා හිටපු තැනින් පිටත් වෙලා ගියා.+
22 වලා ටැඹ කූඩාරමට ඉහළින් දවස් දෙකක්, මාසයක් හෝ ඊට වැඩි කාලයක් තිබුණත් ඊශ්‍රායෙල්වරු කඳවුරු බැඳගත්ත තැනින් පිටත් වෙලා ගියේ නැහැ. ඒත් වලා ටැඹ අයින් වෙලා ගිය ගමන්ම එයාලත් එතනින් පිටත් වුණා.
23 යම් තැනක කඳවුරු බැඳගන්න කියලා යෙහෝවා දැනුම් දුන්නාමත් එතනින් පිට වෙලා යන්න කියලා යෙහෝවා දැනුම් දුන්නාමත් එයාලා යෙහෝවා දෙවියන්ට කීකරු වුණා. යෙහෝවා මෝසෙස්ට අණ කරපු විදිහටම ඊශ්‍රායෙල්වරු කළා.
පාදසටහන්
^ පේන විදිහට මෙතන කතා කරන්නේ හිරු බැස යන වෙලාව සහ අඳුර වැටෙන වෙලාව අතර කාලය ගැනයි.
^ මූ.අ., “සාක්ෂි පෙට්ටිය.”
