ගීතාවලිය 116:1-19
116 මම යෙහෝවාට ගොඩක් ආදරෙයි!මොකද ඔහු මට ඇහුම්කන් දෙනවා.*මං උදව් ඉල්ලලා කන්නලව් කරද්දී ඔහු මට සවන් දෙනවා.+
2 ඔහුගේ දෙසවන් මං දෙසට යොමු කරනවා.*+මගේ දිවි ඇති තුරා මං ඔහුට අයැදිනවා.
3 මරණයේ රැහැන් මං වටේ එතුණා.මිනී වළේ බැමි අතරේ මං හිර වෙලා හිටියා.+
දුක් කරදර සහ හිත් වේදනා නිසා මං වැටිලා හිටියා.+
4 ඒත් මං යෙහෝවාගේ නම කියලා යාච්ඤා කරනවා.+
“අනේ යෙහෝවා, මාව බේරගන්න” කියලා මං කියනවා.
5 යෙහෝවා අනුකම්පාව පෙන්වන ධර්මිෂ්ඨ කෙනෙක්.+අපේ දෙවියන් දයාවන්ත කෙනෙක්.+
6 යෙහෝවා අද්දැකීම් අඩු අයව ආරක්ෂා කරනවා.+
මං හොඳටම වැටිලයි හිටියේ. ඒත් ඔහු මාව බේරගත්තා.
7 දැන් මට* ආයෙත් සැනසිල්ලේ ඉන්න පුළුවන්.මොකද යෙහෝවා මට ආදරෙන් සැලකුවා.
8 ඔබ මාව මරණයෙන් බේරගත්තා. මගේ ඇස්වල කඳුළු පිස දැම්මා.මගේ පාද පැටලිලා වැටෙන්න ඔබ ඉඩ දුන්නේ නැහැ.+
9 මං ජීවත් වෙලා ඉන්න තාක් කල් යෙහෝවාට සේවය කරනවා.*
10 මම හුඟක් දුක් පීඩාවලට මුහුණ දුන්නා.ඒත් දෙවියන් ගැන මට විශ්වාසයක් තිබුණා.මං කතා කරන්න පෙලඹුණේ ඒ නිසයි.+
11 මම කලබල වෙලා මෙහෙම කිව්වා.
“හැමෝම බොරුකාරයෝ.”+
12 යෙහෝවා දෙවියන් මං වෙනුවෙන් කරපු හැම දේකටමමම ඔහුට කොහොම ස්තුති කරන්නද?
13 ගැලවීම* කියන කුසලානයෙන් මම පානය කරනවා.යෙහෝවාගේ නම කියලා මම යාච්ඤා කරනවා.
14 මම යෙහෝවාට වුණ පොරොන්දු ඉටු කරනවා.ඔහුගේ මුළු සෙනඟ ඉස්සරහා මම ඒවා ඉටු කරනවා.+
15 යෙහෝවාට විශ්වාසවන්තව ඉන්න අයගේ මරණයඔහු සලකන්නේ දරන්න බැරි පාඩුවක් විදිහටයි.+
16 යෙහෝවා දෙවියනි,ඔබට කන්නලව් කරන මම ඔබේ සේවකයා.
ඔබේ සේවකයා වන මම ඔබේ දාසියගේ පුතා.
මට දාලා තිබුණ විලංගුවලින් ඔබ මාව නිදහස් කළා.+
17 මම ඔබට ස්තුති පූජාවක් ඔප්පු කරනවා.+යෙහෝවාගේ නම කියලා මම අයැදිනවා.
18 මම යෙහෝවාට වුණ පොරොන්දු ඉටු කරනවා.+ඔහුගේ මුළු සෙනඟ ඉස්සරහා මම ඒවා ඉටු කරනවා.+
19 යෙහෝවාගේ ගෘහයේ මළුවේ ඉඳන්,+යෙරුසලමේ ඉඳන් මම ඒවා ඉටු කරනවා.
යාහ්ට ප්රශංසා කරන්න!*+
පාදසටහන්
^ හෝ සමහරවිට, “යෙහෝවා මට ඇහුම්කන් දෙද්දී මගේ හිත ආදරෙන් පිරෙනවා.”
^ හෝ, “ඔහු පහතට නැමිලා මට සවන් දෙනවා.”
^ හෙබ්රෙව් භාෂාවෙන් නෙෆෙෂ්. “පැහැදිලි කිරීමක්” බලන්න.
^ මූ.අ., “මං ජීවතුන්ගේ දේශයේ ඉද්දී යෙහෝවා ඉස්සරහා ගමන් කරනවා.”
^ හෝ, “ශ්රේෂ්ඨ ගැලවීම.”
^ හෝ, “හලෙලූයා.” “යාහ්” කියන්නේ යෙහෝවා කියන නම කෙටියෙන් කියන විදිහක්.