ගීතාවලිය 22:1-31
සංගීත අධ්‍යක්ෂක වෙත. “අලුයම් මුවදෙන”* කියන තාලයට ගායනා කරන්න. දාවිත් රචනා කරපු ගීතයක්.
22 මගේ දෙවියනි, මගේ දෙවියනි, ඔබ මාව අත්හැරියේ ඇයි?+
මං උදව් ඉල්ලලා අඬද්දී මට උත්තර දෙන්නේ නැත්තේ ඇයි?+මාව ගලවගන්නේ නැත්තේ ඇයි?
2 මගේ දෙවියනි, මම දවස පුරාම ඔබට හඬගැසුවත් ඔබ මට උත්තර දෙන්නේ නැහැ.+රෑ පුරාත් මම නිහඬව හිටියේ නැහැ.
3 ඒත් ඔබ ශුද්ධයි.+ඊශ්‍රායෙල්වරුන්ගෙන් නැඟෙන ප්‍රශංසාවලින් ඔබ* වට වෙලා.
4 අපේ පියවරු විශ්වාසය තිබ්බේ ඔබ මතයි.+ඔවුන් ඔබව විශ්වාස කළා. ඔබත් ඔවුන්ව බේරගත්තා.+
5 ඔවුන් ඔබට හඬගැසූ නිසා ඔබ ඔවුන්ව ගලවගත්තා.ඔබව විශ්වාස කළ නිසා ඔවුන්ගේ බලාපොරොත්තු කඩ වුණේ* නැහැ.+
6 ඒත් මම නිකම්ම නිකම් පණුවෙක් වගෙයි.මිනිසුන් මට සමච්චල් කරනවා.* ඔවුන් මං දිහා බලන්නේ පිළිකුලෙන්.+
7 මාව දකින හැමෝම මට කවටකම් කරනවා.+සමච්චලේට ඔළුව වනවන ඔවුන් මට මෙහෙම කියනවා.+
8 “ඔහුගේ ජීවිතේ ඔහු යෙහෝවාට භාර දුන්නා.ඉතින් දෙවියන්ම ඇවිත් ඔහුව බේරගත්තදෙන්!
දෙවියන් ඔහුට ඒ තරම් ආදරේ නම්, දෙවියන්ම ඇවිත් ඔහුව ගලවගනියි!”+
9 මව්කුසේ හිටපු මට මෙලොව එළිය දකින්න සැලැස්සුවේ ඔබයි.+මාව මව් තුරුලේ සුරක්ෂිතව තැබුවෙත් ඔබමයි.
10 උපන් දා ඉඳන් මාව තිබ්බේ ඔබේ රැකවරණය යටතෙයි.මව්කුසේ හිටපු කාලේ ඉඳන්ම මගේ දෙවියන් ඔබයි.
11 ඒත් දැන් විපත්ති මං ළඟටම ඇවිත්.අනේ, මගෙන් ඈත් වෙලා ඉන්න නම් එපා.+මගේ උදව්වට ඔබ හැර වෙන කවුරුත්ම නැහැ.+
12 ජවයෙන් පිරුණු ගව රැළක් මාව වට කරගෙන.+බාෂාන්වල ශක්තිමත් ගවයෝ මාව කොටු කරගෙන.+
13 මගේ සතුරෝ හරියට ගොදුර ඉරලා දාන ගොරවන සිංහයෝ වගෙයි.+ඔවුන් කට ඇරලා මට විරුද්ධව ගර්ජනා කරනවා.+
14 බිමට හලන වතුර වගේ මගේ ශක්තිය මගෙන් ගිලිහිලා ගිහින්.
මගේ ඇටකටු සන්ධිවලින් වෙන් වෙලා ගිහින්.මගේ හදවත උණු වුණ ඉටි වගේ දිය වෙලා ගිහින්.+
15 මට කිසිම ශක්තියක් නැහැ.මම දැන් කැඩිලා ගිය වළං කෑල්ලක් වගෙයි.+මගේ දිව උඩු තල්ලේ ඇලිලා.+ඔබ මාව මිනී වළටම ඇදලා දානවා.+
16 බල්ලෝ මාව වට කරගෙන.+මැර කල්ලියක් වගේ ඔවුන් මාව කොටු කරගෙන.+ඔවුන් සිංහයන් වගේ මගේ අත පය හපා කනවා.+
17 මගේ ඇටකටු එකින් එක ගණන් කරන්න පුළුවන්.+
ඔවුන් මාව ගිලින්න වගේ බලන් ඉන්නවා.
18 මගේ ඇඳුම් ඔවුන් අතරේ බෙදාගන්නවා.මගේ ඇඳුම් බෙදාගන්න දාදු දානවා.+
19 අනේ යෙහෝවා, මගෙන් ඈත් වෙලා ඉන්න එපා.+
ඉක්මනින්ම මගේ උදව්වට එන්න.+ මගේ ශක්තිය ඔබයි.
20 මාව කඩුවෙන් ගලවගන්න.මගේ ඇඟට කඩා පනින බල්ලන්ගෙන් මගේ වටිනා ජීවිතය බේරගන්න.+
21 සිංහයාගේ කටිනුත්+ වල් හරකුන්ගේ අංවලිනුත් මාව ආරක්ෂා කරන්න.මට උත්තර දීලා මාව බේරගන්න.
22 මම මගේ සහෝදරයන්ට ඔබේ නම ගැන කියලා දෙනවා.+සභාව මැද මම ඔබට ප්‍රශංසා කරනවා.+
23 යෙහෝවා ගැන ගරුබියක් ඇත්තෙනි, ඔහුට ප්‍රශංසා කරන්න!
යාකොබ්ගෙන් පැවතෙන සියල්ලෙනි, දෙවියන්ව ගෞරවයට පත් කරන්න!+
ඊශ්‍රායෙල්ගෙන් පැවතෙන්නෙනි, ලොකු ගෞරවයකින්, භක්තියකින් ඔහු ඉස්සරහට යන්න.
24 මොකද දෙවියන් අසරණයාව අහකට දැම්මේ නැහැ.
දුක් විඳින නිසාම ඒ අසරණයාව පිළිකුල් කළේ නැහැ.+
ඒ කෙනාගෙන් තමන්ගේ මුහුණ ඉවතට හරවගත්තෙත් නැහැ.+ඔහු අඬඅඬ උදව් ඉල්ලද්දී දෙවියන් ඔහුට ඇහුම්කන් දුන්නා.+
25 දෙවියනි, විශාල පිරිසක් රැස් වෙලා ඉන්න සභාව මැද මම ඔබට ප්‍රශංසා කරනවා.+ඔබට ගරුබියක් තියෙන අය ඉස්සරහා මගේ පොරොන්දු ඉටු කරනවා.
26 නිහතමානී අය කාලා බීලා තෘප්තිමත් වෙයි.+යෙහෝවාගේ මඟ පෙන්වීම් පතන අය ඔහුට ප්‍රශංසා කරයි.+
ඔබට හැමදාටම සතුටින් ජීවත් වෙන්න ලැබේවා!*
27 පොළොව පුරාම ඉන්න ජනයා යෙහෝවාව සැබෑ දෙවියන් විදිහට පිළි අරන් ඔහු ළඟට එයි.
දෙවියනි, ජාතීන් අතරේ ඉන්න හැම පවුලක්ම ඔබ ඉස්සරහා වැඳ වැටෙයි.+
28 මොකද රජකම අයිති යෙහෝවාටයි.+ජාතීන්ව පාලනය කරන්නේ ඔහුයි.
29 කිසිම දේකින් අඩුවක් නැති අය* කාලා බීලා දෙවියන් ඉස්සරහා වැඳ වැටෙයි.දූවිල්ලට හැරිලා යන හැම කෙනෙක්ම ඔහුට දණ නමයි.තමන්ගේ ජීවිත රැකගන්න ඒ එක් කෙනෙක්ටවත් පුළුවන්කමක් නැහැ.
30 ඔවුන්ගෙන් පැවතෙන අයත් ඔහුට සේවය කරයි.යෙහෝවා දෙවියන් ගැන ඔවුන් මතු පරම්පරාවලටත් කියලා දෙයි.
31 ඔහුගේ ධර්මිෂ්ඨකම ගැන ඔවුන් හැමෝටම කියයි.
ඔහු කරපු යහපත් දේවල් ගැන ඉදිරි පරම්පරාවලටත් දැනුම් දෙයි.
පාදසටහන්
^ සමහරවිට මේක විශේෂ සංගීත ශෛලියක් නැත්නම් තාලයක් වෙන්න පුළුවන්.
^ හෝ, “ඔබේ සිංහාසනය.”
^ හෝ, “ඔවුන් ලැජ්ජා වුණේ.”
^ හෝ, “මං මිනිසුන්ට නින්දාවක්.”
^ මූ.අ., “ඔබේ හිත් හැමදාටම ප්‍රාණවත්ව තිබේවා!”
^ මූ.අ., “පුෂ්ටිමත් අය.”
