ද්විතීය කතාව 14:1-29
14 “ඔයාලා හැමෝම ඔයාලාගේ දෙවි වන යෙහෝවාගේ දරුවෝ. ඔයාලා මැරුණ කෙනෙක් වෙනුවෙන් ඔයාලාගේ ඇඟ කපාගන්නවත්+ ඔයාලාගේ ඇහිබැමි බූ ගාන්නවත් එපා.*+
2 මොකද ඔයාලාගේ දෙවි වන යෙහෝවා ඔයාලව සලකන්නේ ශුද්ධ සෙනඟක් විදිහටයි.+ දෙවියන් ඔහුගේ සෙනඟ විදිහට තෝරගත්තේ ඔයාලවයි. පොළොවේ ඉන්න ජාතීන් අතරින් යෙහෝවා ඔහුගේ විශේෂ සෙනඟ* විදිහට තෝරගත්තේ ඔයාලවයි.+
3 “දෙවියන් පිළිකුල් කියලා සලකන කිසිම දෙයක් කෑමට ගන්න එපා.+
4 ඔයාලට කෑමට ගන්න පුළුවන් සතුන් තමයි මේ:+ ගවයා, බැටළුවා, එළුවා,
5 විවිධ මුව වර්ග,* වල් එළුවා, වල් බැටළුවා සහ කඳුකරයේ ඉන්න බැටළුවා.
6 කුර දෙකට බෙදුණු, වමාරලා කන හැම සතෙක්ම කෑමට ගන්න ඔයාලට පුළුවන්.
7 ඒත් වමාරලා කන හරි කුර දෙකට බෙදුණු හරි සතුන් අතරින් මේ සත්තු කෑමට ගන්න ඔයාලට අවසර නැහැ. ඔටුවා, හාවා සහ බෙන්හාවා. උන් වමාරලා කන සත්තු වුණත් උන්ගේ කුර බෙදිලා නැහැ. ඒ නිසා උන්ව සලකන්න ඕනෙ අපවිත්‍ර සත්තු විදිහටයි.+
8 ඌරාත් අපවිත්‍ර සතෙක්. උගේ කුර බෙදිලා තිබුණත් ඌ වමාරලා කන්නේ නැහැ. ඒ නිසා ඌව අපවිත්‍ර සතෙක් විදිහට සලකන්න ඕනේ. ඒ සතුන්ගේ මස් කන්න ඔයාලට අවසර නැහැ. උන්ගේ මළ කුණකටවත් අත තියන්න එපා.
9 “වතුරේ ඉන්න සත්තුන්ගෙන් වරල් සහ කොරපොතු තියෙන ඕනෙම සතෙක්ව ඔයාලට කෑමට ගන්න පුළුවන්.+
10 වරල් සහ කොරපොතු නැති කිසිම සතෙක්ව කෑමට ගන්න එපා. උන්ව අපවිත්‍ර සතුන් හැටියට සලකන්න ඕනේ.
11 “පවිත්‍රයි කියලා සලකන ඕනෙම කුරුල්ලෙක්ව කෑමට ගන්න ඔයාලට පුළුවන්.
12 ඒත් මේ කුරුල්ලන්ව කෑමට ගන්න ඔයාලට අවසර නැහැ. රාජාලියා, මාළු උකුස්සා, කලු ගිජුලිහිණියා,+
13 රතු උකුස්සා, කලු උකුස්සා, අනිත් හැම උකුසු වර්ගයක්ම,
14 හැම කපුටු වර්ගයක්ම,
15 පැස්බරා, බකමූණා, මුහුදු කපුටා, එක එක වර්ගයේ කුරුලුගොයන්,*
16 පුංචි බස්සා, කන් දිග බකමූණා, හංසයා,
17 පැස්තුඩුවා, ගිජුලිහිණියා, දියකාවා,
18 මානකොකා, එක එක වර්ගයේ කොක්කු, පොරෝ කුරුල්ලා සහ වවුලා.
19 පියාපත් ඇති රංචු ගැහෙන හැම කෘමි වර්ගයක්ම අපවිත්‍රයි කියලා සලකන්න ඕනේ. උන්ව කෑමට ගන්න එපා.
20 පියාසර කරන, පවිත්‍රයි කියලා සලකන ඕනෙම සතෙක්ව කෑමට ගන්න ඔයාලට පුළුවන්.
21 “මැරිලා හිටපු සතෙක්ව ඔයාලට හම්බ වුණොත් ඌව කෑමට ගන්න ඔයාලට අවසර නැහැ.+ ඔයාලාගේ නගරවල ජීවත් වෙන විදේශිකයෙක්ට ඒ සතාව දෙන්න පුළුවන්. උගේ මස් කන්න එයාට පුළුවන්. එහෙම නැත්නම් වෙනත් ජාතියකට අයිති කෙනෙක්ට ඒ සතාව විකුණන්න පුළුවන්. මොකද ඔයාලා ඔයාලාගේ දෙවි වන යෙහෝවාට ශුද්ධ සෙනඟක්.
“එළු පැටියෙක්ව උගේ මවගේ කිරිවල උයන්න එපා.+
22 “හැම අවුරුද්දකම ඔයාලාගේ කෙත්වතුවලින් ලැබෙන අස්වැන්නෙන් දහයෙන් කොටසක් ඔයාලා අනිවාර්යයෙන්ම දෙන්න ඕනේ.+
23 ඔයාලා දහයෙන් කොටස විදිහට වෙන් කරන ධාන්‍යයි, අලුතින් පෙරූ වයිනුයි, තෙලුයි, ඔයාලාගේ ගව රැළේ සහ එළු බැටළු රැළේ කුලුඳුල් සතුන්වයි ඔයාලාගේ දෙවි වන යෙහෝවා ඔහුගේ නම දරන්න තෝරගන්න තැනට අරන් ගිහිල්ලා ඔහු ඉස්සරහා කන්න ඕනේ.+ එහෙම කරන එකෙන් ඔයාලාගේ දෙවි වන යෙහෝවා ගැන හැමදාම ගරුබියක් ඇතුව ඉන්න ඔයාලා ඉගෙනගනියි.+
24 “හැබැයි හිතන්න, ඔයාලා ඉන්නේ ඔයාලාගේ දෙවි වන යෙහෝවා ඔහුගේ නම දරන්න තෝරගන්න තැනට+ ගොඩක් ඈතින් කියලා. ඔයාලාගේ දෙවි වන යෙහෝවාගේ ආශීර්වාදය නිසා ලැබුණ දේවලින් වෙන් කරගත්ත දේ අරගෙන එතනට යන්න ඔයාලට අමාරු වෙන්න පුළුවන්.
25 ඒ වගේ වෙලාවක ඔයාලා වෙන් කරගත්ත දේවල් විකුණලා සල්ලි ගන්න. ඊටපස්සේ ඒ සල්ලි අරගෙන ඔයාලාගේ දෙවි වන යෙහෝවා ඔහුගේ නම දරන්න තෝරගන්න තැනට යන්න.
26 ඒ සල්ලිවලින් ගවයන්, බැටළුවන්, එළුවන්, වයින්, වෙනත් මත්පැන් වර්ග සහ ඔයාලා කැමති ඕනෙම දෙයක් ගන්න ඔයාලට පුළුවන්. ඔයාලටයි, ඔයාලාගේ පවුලේ හැමෝටමයි ඔයාලාගේ දෙවි වන යෙහෝවා ඉස්සරහා කෑම කාලා සතුටු වෙන්න පුළුවන්.+
27 ඔයාලාගේ නගරවල ජීවත් වෙන ලෙවීවරුන්ගේ අවශ්‍යතා ගැනත් සැලකිලිමත් වෙන්න.+ මොකද එයාලට දේශයෙන් උරුමයක් විදිහට ප්‍රදේශයක් දෙන්නේ නැහැ.+
28 “හැම අවුරුදු තුනකටම සැරයක් ඒ තුන්වෙනි අවුරුද්දේ ඔයාලට ලැබෙන අස්වැන්නෙන් දහයෙන් කොටසක් සම්පූර්ණයෙන් ඔයාලා ඉන්න නගරවලම ගොඩගහන්න ඕනේ.+
29 ඔයාලට වගේ දේශයේ උරුමයක් ලැබෙන්නේ නැති ලෙවීවරුන්ට, ඔයාලාගේ නගරවල ජීවත් වෙන විදේශිකයන්ට, තාත්තා නැති දරුවන්ට සහ වැන්දඹුවන්ට ඒවාවලින් ඇති තරම් අරගෙන යන්න පුළුවන්.+ ඔයාලා ඒ විදිහට කරනවා නම් ඔයාලාගේ දෙවි වන යෙහෝවා ඔයාලා කරන හැම දේකටම ආශීර්වාද කරයි.+
පාදසටහන්
^ හෝ, “නළලේ රෝම අයින් කරන්නවත් එපා.”
^ හෝ, “වටිනා වස්තුව.”
^ හෙබ්‍රෙව් භාෂාවෙන් මුව වර්ග කීපයක් ගැන කියනවා. ඒ කියන්නේ මුවා, ගසෙල් මුවා (කුරංගයා), ගෝනාට ටිකක් සමාන රෝබක් මුවා සහ ඇන්ටිලෝප් මුවා.
^ හෝ, “කොබෙයි උකුස්සන්.”
