ද්විතීය කතාව 3:1-29
3 “ඊටපස්සේ අපි හැරිලා බාෂාන්වලට යන පාරේ ගියා. බාෂාන්වල රජ වුණ ඕග්ට ඒ ගැන ආරංචි වුණාම එයා එයාගේ හමුදාවත් එක්ක අපිට විරුද්ධව සටන් කරන්න එද්රෙයි+ නුවරට ආවා.
2 ඒ වෙලාවේ යෙහෝවා දෙවියන් මට මෙහෙම කිව්වා. ‘බය වෙන්න එපා. මං ඕග් රජවත් එයාගේ සෙනඟවත් එයාගේ දේශයත් ඔයාලට යටත් කරලා දෙනවා. හෙෂ්බොන්වල ජීවත් වුණ අමෝරිවරුන්ගේ රජ වන සීහොන්ව විනාශ කරපු විදිහටම ඔයාලා ඕග් රජවත් විනාශ කරයි.’
3 අපේ දෙවි වන යෙහෝවා කියපු විදිහටම බාෂාන්වල රජ වුණ ඕග්වයි, එයාගේ හමුදාවයි අපේ අතට අල්ලලා දුන්නා. එයාලාගෙන් කිසිම කෙනෙක් ඉතුරු වුණේ නැහැ. අපි එයාලව විනාශ කරලා දැම්මා.
4 ඊටපස්සේ එයා යටතේ තිබුණ හැම නුවරක්ම අපි අල්ලගත්තා. බාෂාන් දේශයේ ඕග් රජගේ+ රාජධානිය වුණ මුළු අර්ගොබ් පළාත පුරාම නුවරවල් 60ක් තිබුණා. අපි ඒ එක නුවරක්වත් අත්හැරියේ නැහැ.
5 ඒ හැම නුවරක්ම විශාල පවුරුවලින් වට වුණ දොරගුලු දාලා තිබුණ සුරක්ෂිත නුවරවල්. ඊට අමතරව ඒ ප්‍රදේශයේ තිබුණ පොඩි පොඩි නගර ගොඩකුත් අපි යටත් කරගත්තා.
6 හෙෂ්බොන්වල රජ වුණ සීහොන් යටතේ තිබුණ නගරවලට කරපු විදිහටම අපි ඒ හැම නුවරක්ම විනාශ කරලා දැම්මා.+ ඒවාවල හිටපු හැම පුරුෂයෙක්ම, ස්ත්‍රියක්ම, කුඩා දරුවෙක්ම අපි විනාශ කළා.+
7 ඒත් එයාලට අයිති සත්තුන්වයි, නුවරවල්වල තිබුණ වස්තුවයි අපි ගත්තා.
8 “අපි යොර්දාන් ගඟ කිට්ටුව හිටපු අමෝරිවරුන්ගේ ඒ රජවරුන්+ දෙන්නාට අයිති ප්‍රදේශ අල්ලගත්තා. ඒ ප්‍රදේශයට ආනොන් නිම්නයේ ඉඳලා හෙර්මොන් කන්ද වෙන කල්ම විහිදිලා තිබුණ ප්‍රදේශය අයිති වුණා.+
9 (සීදොන්වරුන් හෙර්මොන් කන්දට කිව්වේ සිරියොන් කියලයි. අමෝරිවරුන් ඒ කන්දට කිව්වේ සෙනීර් කියලයි.)
10 අල්ලගත්ත ඒ ප්‍රදේශයට උස් තැනිතලාවේ* තිබුණ ඔක්කොම නුවරවල් සහ මුළු ගිලියද් දේශයම ඇතුළත් වුණා. ඒ වගේම බාෂාන්වල රජ වුණ ඕග්ගේ රාජධානියට අයිති වෙලා තිබුණ සලෙකා සහ එද්රෙයි+ කියන නුවරවල් දක්වා තිබුණ මුළු ප්‍රදේශයත් ඇතුළත් වුණා.
11 රෙෆායිවරුන්ගෙන් ඉතුරු වෙලා හිටියේ බාෂාන්වල රජ වුණ ඕග් විතරයි. එයාගේ මිනිය තැන්පත් කළේ රියන්* නමයක් දිග, රියන් හතරක් පළල යකඩ* මිනී පෙට්ටියක. ඒක අද වෙන කල් අම්මොන්වරුන්ට අයිති රබ්බා නුවරේ තියෙනවා.
12 ඒ කාලේදී අපි ආනොන් නිම්නය ළඟ තියෙන අරෝයේර්+ ඉඳන් ගිලියද් කඳුකර ප්‍රදේශයෙන් භාගයක් වෙන කල් අයිති කරගත්තා. එහේ තිබුණ නුවරවල් මම රූබෙන් සහ ගාද් ගෝත්‍රවලට දුන්නා.+
13 ගිලියද් දේශයේ ඉතුරු කොටසයි, ඕග් රජගේ රාජධානිය වුණ බාෂාන් දේශයයි මම මනස්සේ+ ගෝත්‍රයෙන් එක කොටසකට දුන්නා. බාෂාන් දේශයට අයිති වුණ අර්ගොබ් පළාත කලින් හැඳින්නුවේ රෙෆායිවරුන්ගේ දේශය විදිහටයි.
14 “ගෙෂූර්වරුන්ගේ සහ මයකාත්වරුන්ගේ+ දේශ සීමා වෙන කල් තියෙන අර්ගොබ්+ පළාත මනස්සේගේ පුතා වුණ යායිර්+ අයිති කරගත්තා. බාෂාන් දේශයේ තිබුණ ගම්මානවලට එයා එයාගේ නම තිබ්බා. අද වෙන කල් ඒවා හඳුන්වන්නේ හව්වෝත්යායිර්*+ කියලා.
15 මම ගිලියද් දේශය මාකීර්ට දුන්නා.+
16 රූබෙන් සහ ගාද් ගෝත්‍රවලට+ මම ගිලියද් දේශයේ ඉඳලා ආනොන් නිම්නය වෙන කල් තියෙන ප්‍රදේශය දුන්නා. මායිම විදිහට ගත්තේ ආනොන් නිම්නයේ මැද. එයාලට අයිති ප්‍රදේශයට ආනොන් නිම්නයේ මැද ඉඳලා ගිලියද් දේශයේ අම්මොන්වරුන්ගේ දේශ සීමාවේ තියෙන යබ්බොක් නිම්නය දක්වා ප්‍රදේශය අයිති වුණා.
17 අරබා නිම්නය සහ යොර්දාන් ගඟත් ඒකේ නැඟෙනහිර ඉවුර දිගේ තියෙන ප්‍රදේශයත් ඒකට අයිතියි. ඒ වගේම කින්නෙරෙත් මුහුදේ* ඉඳලා අරබා මුහුද කියලත් හඳුන්වන ලුණු මුහුද* වෙන කල් තියෙන ප්‍රදේශයත් ඒකට අයිතියි. ලුණු මුහුද තියෙන්නේ නැඟෙනහිර පැත්තේ තියෙන පිස්ගා කන්ද පාමුල.+
18 “ඊටපස්සේ මම එයාලට* මෙහෙම කිව්වා. ‘ඔයාලාගේ දෙවි වන යෙහෝවා මේ දේශය ඔයාලට උරුමයක් විදිහට දීලයි තියෙන්නේ. ඒත් ඔයාලා අතරේ ඉන්න එඩිතර පුරුෂයන් හැමෝම යුද්ධ කරන්න ලෑස්ති වෙලා ඔයාලාගේ සහෝදරයන්ගේ සහයට එයාලා එක්ක එහා පැත්තට යන්න ඕනේ.+
19 ඔයාලාගේ භාර්යාවන්වයි, දරුවන්වයි මම ඔයාලට දුන්න නුවරවල්වල තියලා යන්න පුළුවන්. ඔයාලට ගොඩක් සත්ව රැළවල් ඉන්නවා කියලා මම දන්නවා. ඒ සත්තුන්වත් තියලා යන්න පුළුවන්.
20 ඒත් ඔයාලා ඔයාලාගේ සහෝදරයන් එක්ක යොර්දාන් ගඟෙන් එගොඩ වෙලා යෙහෝවා උරුමයක් හැටියට දෙන දේශය අයිති කරගන්න එයාලට උදව් කරන්න ඕනේ. යෙහෝවා ඔයාලට වගේ ඔයාලාගේ සහෝදරයන්ටත් කරදරයක් නැතුව සැනසිල්ලේ ජීවත් වෙන්න අවස්ථාවක් ලබා දෙන කල් ඔයාලා එයාලට උදව් කරන්න ඕනේ. ඊටපස්සේ මම ඔයාලට දුන්න මේ දේශයට ආයෙත් එන්න ඔයාලට පුළුවන්.’+
21 “ඊටපස්සේ මම යොෂුවාට මෙහෙම කිව්වා.+ ‘ඔයාගේ දෙවි වන යෙහෝවා මේ රජවරුන් දෙන්නාට කරපු දේ ඔයා ඇස් දෙකෙන්ම දැක්කා. ගඟෙන් එහා පැත්තේ තියෙන ඔයාලා දැන් යටත් කරගන්න යන හැම රාජ්‍යයකටමත් යෙහෝවා කරන්නේ ඒ දේමයි.+
22 ඉතින් එයාලට බය වෙන්න එපා. ඔයාලා වෙනුවෙන් සටන් කරන්නේ ඔයාලාගේ දෙවි වන යෙහෝවායි.’+
23 “ඒ වෙලාවේ මම යෙහෝවාට මෙහෙම කන්නලව් කළා.
24 ‘ශ්‍රේෂ්ඨතම පාලකයාණන් වන යෙහෝවා, ඔයා වගේ බලවත් ක්‍රියා සහ පුදුම දේවල් කරන වෙන කිසිම දෙවි කෙනෙක් ස්වර්ගයෙවත් මේ පොළොවෙවත් නැහැ.+ ඔයාගේ ශ්‍රේෂ්ඨත්වයෙන් සහ මහත් බලයෙන් බිඳක් දකින්න ඔයාගේ සේවකයා වන මටත් ඔයා අවස්ථාව දුන්නා.+
25 අනේ දෙවියනි, යොර්දාන් ගඟෙන් එගොඩ තියෙන ලස්සන කඳුකරයට සහ ලෙබනොන් ප්‍රදේශයට, ඒ සරුසාර දේශයට යන්න මටත් අවස්ථාව දෙන්න.’+
26 ඒත් ඔයාලා නිසා මගේ අතින් වුණ වැරැද්ද ගැන යෙහෝවා මං එක්ක හිටියේ කේන්තියෙන්.+ ඒ නිසා යෙහෝවා මගේ ඉල්ලීමට එකඟ වුණේ නැහැ. ඔහු මට මෙහෙම කිව්වා. ‘මාත් එක්ක මේ ගැන ආයේ කතා කරන්න එපා. මගේ තීරණය වෙනස් කරන්නේ නැහැ.
27 පිස්ගා කන්ද මුදුනට ගිහින්+ මුළු දේශයම බලාගන්න. මොකද යොර්දාන් ගඟෙන් එගොඩ වෙලා ඒ දේශයට යන්න ඔයාට ලැබෙන්නේ නැහැ.+
28 ඔයාගෙන් පස්සේ නායකයා හැටියට යොෂුවාව පත් කරන්න.+ එයාව ධෛර්යවත් කරලා ශක්තිමත් කරන්න. ගඟෙන් එගොඩ වෙලා ඒ දේශයට සෙනඟව අරගෙන යන්නේ එයායි.+ ඔයා දකින දේශය ඊශ්‍රායෙල් සෙනඟ උරුම කරගන්නේ එයාගේ නායකත්වය යටතෙයි.’
29 ඒ හැම දෙයක්ම වුණේ අපි බෙත්පෙයෝර්+ ඉස්සරහා තිබුණ නිම්නයේ හිටපු කාලෙදියි.
පාදසටහන්
^ හෝ, “සානුවේ.”
^ හෝ සමහරවිට, “බැසෝල්ට්.” ඒ කියන්නේ කලු ගල් වර්ගයක්.
^ තේරුම, “යායිර්ගේ කූඩාරම් ගම්මාන.”
^ ඒ කියන්නේ ගෙනසරෙත් විල නැත්නම් ගලීල මුහුද.
^ ඒ කියන්නේ මළ මුහුද.
^ මෝසෙස් මෙතන කතා කරන්නේ රූබෙන්, ගාද් සහ මනස්සේ ගෝත්‍රයේ කොටසකට.
