නික්මයාම 12:1-51
12 යෙහෝවා ඊජිප්තුවේදී මෝසෙස්ට සහ ආරොන්ට මෙහෙම කිව්වා.
2 “ඔයාලා මේ මාසය, අවුරුද්දේ පළවෙනි මාසේ විදිහට ගණන් ගන්න.+
3 මුළු ඊශ්‍රායෙල් සෙනඟට මෙහෙම කියන්න. ‘මේ මාසේ දහවෙනිදා, හැම කෙනෙක්ම තමන්ගේ පවුලේ අය වෙනුවෙන් බැටළුවෙක්ව+ තෝරගන්න ඕනේ. එක පවුලකට එක බැටළුවෙක් ගාණේ ගන්න.
4 සම්පූර්ණ බැටළුවෙක්වම කන්න තරම් පිරිසක් පවුලක හිටියේ නැත්නම් ළඟම ඉන්න අසල්වැසි පවුලට ගෙදරට එන්න කියලා එයාලත් එක්ක බැටළුවාව බෙදාගෙන කන්න. ඔක්කොම කීදෙනෙක් ඉන්නවාද, ඒ එක් එක් කෙනාට කොච්චර ප්‍රමාණයක් ඕනෙද කියලා තීරණය කරලා බැටළුවාව බෙදාගන්න.
5 බැටළුවා කිසිම කැළලක් නැති+ අවුරුද්දක් වයස පිරිමි සතෙක් විය යුතුයි. බැටළුවෙක්ව හරි එළුවෙක්ව හරි තෝරගන්න පුළුවන්.
6 මේ මාසේ 14වෙනිදා වෙන කල්+ ඔයාලා ඌව ළඟ තියාගෙන බලාගත යුතුයි. එදා දවසේ හිරු බැස යනවාත් එක්කම* ඊශ්‍රායෙල්වරු හැමෝම තම තමන්ගේ සතාව මැරිය යුතුයි.+
7 සතාගේ ලේ ටිකක් අරන්, උගේ මස් කන ගෙවල්වල උළුවහු කණු දෙකෙත් උඩු ලීයෙත් ගාන්න.+
8 “‘එදා රෑට+ උගේ මස් ගින්නෙන් පුච්චලා මුහුන් දාපු නැති රොටි+ සහ තිත්ත පලා එක්ක කන්න.+
9 උගේ මස් අමුවෙන් කන්නවත් වතුරෙන් තම්බලා කන්නවත් එපා. ඔළුව, කකුල්, බඩවැල් එක්ක මුළු සතාවම ගින්නෙන් පුච්චන්න.
10 උගේ මස් පහුවදා උදේ වෙන කල් තියාගන්න එපා. සතාගේ යම් කොටසක් ඉතුරු වුණොත් ඒක ගින්නෙන් පුච්චලා දාන්න.+
11 ඉණපටිය බැඳගෙන පාවහන් දාගෙන සැරයටියත් අතේ තියාගෙන ඉක්මනින් ඒක කන්න. මොකද ඒක යෙහෝවා වන මට ගෞරව කරන්න පවත්වන පාස්කු උත්සවයයි.
12 මම එදා රෑට ඊජිප්තුව මැදින් ගිහින් ඊජිප්තුවරුන්ගේ හැම කුලුඳුල් දරුවෙක්ටම සහ හැම කුලුඳුල් සතෙක්ටම පහර දෙනවා.+ මං ඊජිප්තුවරුන්ගේ දෙවිවරුන් හැමෝටම විරුද්ධව මගේ විනිශ්චය ප්‍රකාශ කරනවා.+ මම යෙහෝවා.
13 ඔයාලා ඉන්න ගෙවල්වල ගාන ලේ මං සලකන්නේ ලකුණක් විදිහටයි. මං ඊජිප්තු දේශයට පහර දෙද්දී ඒ ලකුණ තියෙන නිසා ඔයාලට කිසිම අනතුරක් වෙන්නේ නැහැ. ඒ ලකුණ දැක්කාම මං ඔයාලාගේ ගෙවල් පහු කරගෙන යනවා.+
14 “‘හැමෝම මේ දවස සිහි කළ යුතුයි. යෙහෝවා වන මට ගෞරව කරන්න ඔයාලා ඒ දවසේදී උත්සවයක් පවත්වන්න. ඒක ඔයාලාගේ හැම පරම්පරාවක්ම පවත්වන්න ඕනෙ නියෝගයක්.
15 දවස් හතක්ම මුහුන් දාපු නැති රොටි කන්න.+ පළවෙනි දවසේම ඔයාලාගේ ගෙවල්වල තියෙන පිපුණු පිටි ඔක්කොම අයින් කරන්න. ඒ දවස් හතේදී කවුරු හරි මුහුන් දාපු දෙයක් කෑවොත් ඒ කෙනාව මරා දැමිය යුතුයි.*
16 පළවෙනි දවසේදී මට නමස්කාර කරන්න ශුද්ධ එක්රැස්වීමක් පවත්වන්න. හත්වෙනි දවසේදීත් එහෙම කරන්න. ඒ දවස් දෙකේ කිසිම වැඩක් කරන්න එපා.+ ඒත් එක් එක් කෙනාට ඕනෙ කරන කෑම ටික විතරක් පිළියෙල කරගන්න ඔයාලට පුළුවන්.
17 “‘හැම කෙනෙක්ම මුහුන් නොදැමූ රොටි උත්සවය පැවැත්විය යුතුයි.+ මොකද මං ඔයාලා හැමෝවම* ඊජිප්තුවෙන් පිටතට ගේන්නේ ඒ දවසේදියි. ඔයාලාගේ හැම පරම්පරාවක්ම ඒ දිනය සිහි කළ යුතුයි. ඒක මං ඔයාලට දෙන නියෝගයක්.
18 පළවෙනි මාසේ 14වෙනිදා හවස් වරුවේ ඉඳන් ඒ මාසේ 21වෙනිදා හවස් වරුව වෙන කල් හැමෝම මුහුන් නොදැමූ රොටි කෑ යුතුයි.+
19 ඒ දවස් හතේම ඔයාලාගේ ගෙවල්වල පිපුණු පිටි තියාගන්න එපා. විදේශිකයෙක් වුණත් ඊශ්‍රායෙල් ජාතිකයෙක් වුණත්+ මුහුන් දාපු දෙයක් කෑවොත් ඒ කෙනාව මරා දැමිය යුතුයි.+
20 මුහුන් දාපු කිසිම දෙයක් කන්න එපා. ගෙවල්වල ඉන්න හැමෝම කන්න ඕනෙ මුහුන් නොදැමූ රොටි විතරයි.’”
21 මෝසෙස් ඒ වෙලාවෙම ඊශ්‍රායෙල් වැඩිමහල්ලන් හැමෝටම+ එන්න කියලා මෙහෙම කිව්වා. “ඔයාලා එක් එක් කෙනා ඔයාලාගේ පවුල් වෙනුවෙන් සතෙක්ව* තෝරගන්න. පාස්කුවට ඔප්පු කරන පූජාව වෙනුවෙන් ඒ සතාව මරලා
22 උගේ ලේ භාජනයකට එකතු කරගන්න. හිසොප්* මිටියක් ඒ ලේවල පොඟවලා ඒ මිටියේ තියෙන ලේ ගෙදර උළුවහු කණු දෙකේ සහ උඩු ලීයේ ගාන්න. උදේ වෙන කල් කිසිම කෙනෙක් තමන්ගේ ගෙවල්වලින් එළියට නොයා යුතුයි.
23 එතකොට ඊජිප්තුවරුන්ට පීඩා කරන්න යෙහෝවා දේශය මැදින් යද්දී උළුවහු කණු දෙකේ සහ උඩු ලීයේ ගාපු ලේ දැකලා ඔහු ඔයාලාගේ ගෙවල් පහු කරගෙන යයි. ඔයාලාගේ ගෙවල්වල ඉන්න අයට යෙහෝවා දෙවියන් ඒ මාරාන්තික පීඩාවෙන් පහර දෙන්නේ නැහැ.+
24 “ඔයාලත් ඔයාලාගේ දරුවනුත් මේ දිනය සිහි කරන්න ඕනේ. ඒක ඔයාලාගේ හැම පරම්පරාවකටම මම දෙන නියෝගයක්.+
25 යෙහෝවා ඔයාලට දෙන්න පොරොන්දු වුණ දේශයට ගියාට පස්සෙත් මේ උත්සවය පවත්වන්න ඕනේ.+
26 ‘මේ උත්සවය පවත්වන්නේ ඇයි’ කියලා ඔයාලාගේ දරුවන් ඇහුවොත්+
27 එයාලට මෙහෙම කියන්න. ‘පාස්කු දවසේදී යෙහෝවා අපි වෙනුවෙන් කරපු දේ සිහි කරන්න තමයි අපි මේ දේ කරන්නේ.* එදා දෙවියන් ඊජිප්තුවරුන්ට පීඩා කරද්දී අපිට පහර දෙන්නේ නැතුව අපේ ගෙවල් පහු කරගෙන ගියා. ඔහු අපේ ගෙවල්වල ඉන්න හැමෝවම ආරක්ෂා කළා.’”
ඒක ඇහුවාම හැමෝම දණින් වැටිලා දෙවියන්ට නමස්කාර කළා.
28 යෙහෝවා මෝසෙස් සහ ආරොන් මාර්ගයෙන් අණ කරපු හැම දෙයක්ම ඊශ්‍රායෙල්වරු ඒ විදිහටම කළා.+
29 මධ්‍යම රාත්‍රියේදී යෙහෝවා දෙවියන් ඊජිප්තුවේ හිටිය හැම කුලුඳුලෙක්ටම පහර දුන්නා.+ සිංහාසනයේ හිටපු පාරාවෝගේ කුලුඳුල් දරුවාත් සිරගෙයි හිටපු සිරකරුවන්ගේ කුලුඳුල් දරුවනුත් හැම කුලුඳුල් සතෙක්මත් මැරුණා.+
30 පාරාවෝත් එයාගේ සේවකයන් හැමෝමත් ඊජිප්තුවේ හැමෝමත් රෑ අවදි වුණා. එදා රෑ මිනිස්සු වැලපෙන හඬ ඊජිප්තුව පුරාම ඇහුණා. මොකද හැම ගේකම මරණයක් වෙලා තිබුණා.+
31 පාරාවෝ එදා රෑම මෝසෙස්ට සහ ආරොන්ට එන්න කියලා+ මෙහෙම කිව්වා. “තව මොහොතක්වත් මගේ සෙනඟ අතරේ ඉන්න එපා. දැන්මම මෙහෙන් යන්න. ඊශ්‍රායෙල් සෙනඟත් එක්ක ගිහිල්ලා යෙහෝවාට නමස්කාර කරන්න. ඒකනේ මගෙන් ඉල්ලුවේ.+
32 සත්තු ටිකත් අරන් යන්න.+ යන්න කලින් මටත් ආශීර්වාද කරන්න.”
33 “මේ මිනිස්සුන්ව ඉක්මනටම+ මෙහෙන් පිට කළේ නැත්නම් අපිටත් මැරෙන්නයි වෙන්නේ”+ කියලා ඊජිප්තුවරු කතා වුණා. ඒ නිසා දේශයෙන් වහාම පිටත් වෙන්න කියලා එයාලා ආයේ ආයේ ඊශ්‍රායෙල්වරුන්ට කිව්වා.
34 ඒ නිසා ඊශ්‍රායෙල්වරු මුහුන් දාපු නැති පිටි ගුලියි, පිටි අනන භාජනයි ඇඳුම්වල ඔතලා ඒවා කරේ තියාගෙන එහෙන් පිට වුණා.
35 එහෙන් යද්දී ඊශ්‍රායෙල්වරු මෝසෙස් කියලා තිබුණ විදිහට ඊජිප්තුවරුන්ගෙන් රන් රිදී ආභරණ සහ ඇඳුම් ඉල්ලගත්තා.+
36 ඊශ්‍රායෙල්වරුන්ට කරුණාවෙන් සලකන්න යෙහෝවා ඊජිප්තුවරුන්ගේ හිත් පෙලඹුව නිසා ඊශ්‍රායෙල්වරුන් ඉල්ලපු හැම දෙයක්ම එයාලා දුන්නා. ඊශ්‍රායෙල්වරු ඊජිප්තුවරුන්ගේ වටිනා දේවල් හුඟක් අරන් ගියා.+
37 ඊශ්‍රායෙල්වරු රමෙසේස් ඉඳන්+ සුක්කොත්වලට+ යන්න පිටත් වුණා. පුරුෂයන් හයලක්ෂයක් විතර පයින් ඒ ගමන ගියා. කුඩා දරුවනුත් සෙනඟ අතරේ හිටියා.+
38 ඊශ්‍රායෙල්වරුන් එක්ක වෙනත් ජාතීන්ට අයිති විශාල සෙනඟකුත්*+ ගියා. ඒ වගේම එළුවන්, බැටළුවන් සහ ගවයන් ඇතුළු විශාල සත්ව රැළකුත් එයාලා අරන් ගියා.
39 ඊජිප්තුවෙන් එද්දී අරන් ආපු පිටි ගුලිවලින් එයාලා රොටි පුච්චගත්තා. ඒ පිටි ගුලිවලට මුහුන් දාලා තිබුණේ නැහැ. මොකද ඊජිප්තුවරුන් එයාලව දේශයෙන් පන්නලා දාපු නිසා ගමනට ඕනෙ කරන දේවල් සූදානම් කරගන්නවත් එයාලට වෙලාවක් තිබුණේ නැහැ.+
40 ඊජිප්තුවෙන්+ පිට වෙලා යද්දී ඊශ්‍රායෙල්වරු අවුරුදු 430ක්+ විදේශිකයන් විදිහට වෙනත් දේශවල ජීවත් වෙලා තිබුණා.
41 අවුරුදු 430 අවසන් වුණ දවසේදීම යෙහෝවා දෙවියන්ට අයිති මුළු ඊශ්‍රායෙල් ජාතියම* ඊජිප්තුවෙන් පිට වෙලා ගියා.
42 යෙහෝවා ඊශ්‍රායෙල්වරුන්ව ඊජිප්තුවෙන් පිටතට අරන් ආපු ඒ රාත්‍රිය සිහි කළ යුතු රාත්‍රියක්. ඒ රාත්‍රියේදී යෙහෝවා කරපු දේ එයාලාගේ හැම පරම්පරාවකම අය සිහි කළ යුතුයි.+
43 යෙහෝවා මෝසෙස්ට සහ ආරොන්ට මෙහෙමත් කිව්වා. “පාස්කු උත්සවයට අදාළ පනත මෙයයි. වෙනත් ජාතියකට අයිති කිසිම කෙනෙක්ට පාස්කු භෝජනයෙන් කන්න අවසර නැහැ.+
44 කෙනෙක් ළඟ මිලට ගත්ත දාසයෙක් ඉන්නවා නම් ඒ දාසයාව චර්මච්ඡේදනය කළ යුතුයි.+ ඊටපස්සේ ඒ දාසයාට පාස්කු භෝජනයෙන් කන්න පුළුවන්.
45 ඒත් වෙනත් දේශයකින් ටික කාලෙකට පදිංචියට ඇවිත් ඉන්න කෙනෙක්ටවත් කුලීකරුවෙක්ටවත් ඒකෙන් කන්න අවසර නැහැ.
46 සතාගේ මස් කන අය සතාව මරපු ගෙදරම ඉඳන් ඒ මස් කෑ යුතුයි. ගෙදරින් එළියට මස් අරන් යන්න එපා. සතාගේ ශරීරයේ එක ඇටයක්වත් කඩන්න එපා.+
47 මුළු ඊශ්‍රායෙල් සෙනඟම පාස්කුව සැමරිය යුතුයි.
48 ඔයාලා එක්ක ජීවත් වෙන විදේශිකයෙක් කැමති නම් යෙහෝවා දෙවියන් කරපු දේ සිහි කරලා පාස්කු උත්සවය සමරන්න, එයාගේ පවුලේ හැම පිරිමියෙක්වම චර්මච්ඡේදනය කළ යුතුයි. එතකොට ඊශ්‍රායෙල් ජාතිකයන් වගේ එයාටත් පාස්කුව සමරන්න පුළුවන්. චර්මච්ඡේදනය වුණේ නැති කිසි කෙනෙක්ට පාස්කු භෝජනයෙන් කන්න බැහැ.+
49 ඊශ්‍රායෙල් ජාතිකයන් වන ඔයාලටත් ඔයාලා එක්ක ජීවත් වෙන විදේශිකයන්ටත් තියෙන්නේ එකම නීතියයි.”+
50 යෙහෝවා මෝසෙස් සහ ආරොන් මාර්ගයෙන් අණ කරපු හැම දෙයක්ම ඊශ්‍රායෙල් සෙනඟ ඒ විදිහටම කළා.
51 ඒ දවසේදී යෙහෝවා දෙවියන් මුළු ඊශ්‍රායෙල් සෙනඟවම* ඊජිප්තු දේශයෙන් පිටතට අරන් ආවා.
පාදසටහන්
^ පේන විදිහට මෙතන කතා කරන්නේ හිරු බැස යන වෙලාව සහ අඳුර වැටෙන වෙලාව අතර කාලය ගැනයි.
^ මූ.අ., “ඊශ්‍රායෙල් සෙනඟ අතරින් අයින් කළ යුතුයි.”
^ හෝ, “සේනාවක් වගේ ඉන්න ඔයාලව.”
^ ඒ කියන්නේ බැටළු පැටියෙක් හරි එළු පැටියෙක් හරි.
^ මේක පැළෑටි වර්ගයක් හෝ වර්ග කීපයක් වෙන්න පුළුවන්. ඒත් ඒකෙන් හඳුන්වන දේ හරියටම කියන්න බැහැ.
^ මූ.අ., “පාස්කු පූජාව ඔප්පු කරන්නේ.”
^ ඊජිප්තුවරු ඇතුළු වෙනත් ජාතීනුත් ඒ සෙනඟට ඇතුළත් වුණා.
^ මූ.අ., “සේනාවම.”
^ මූ.අ., “ඊශ්‍රායෙල්වරුන්ව එයාලාගේ සේනාවන් එක්ක.”
