නික්මයාම 22:1-31
22 “කෙනෙක් ගවයෙක්ව හෝ බැටළුවෙක්ව හොරකම් කරලා ඌව මැරුවොත් නැත්නම් විකුණුවොත් ඔහු සතාගේ අයිතිකරුට වන්දියක් ගෙවිය යුතුයි. ඔහු ගවයෙක් වෙනුවෙන් ගවයන් පස්දෙනෙක්වත් බැටළුවෙක් වෙනුවෙන් බැටළුවන් හතරදෙනෙක්වත්+ වන්දිය විදිහට දිය යුතුයි.
2 (“හොරෙක්+ ගෙයක් බිඳින අතරතුරේදී ඔහුට පහර දීලා ඔහු මැරුණොත් පහර දුන්න කෙනා මිනී මැරුමකට වරදකරුවෙක් වෙන්නේ නැහැ.
3 ඒත් හොරාට පහර දුන්නේ එළිය වැටුණාට පස්සේ නම් පහර දුන්න කෙනා හොරාගේ මරණයට වග කිව යුතුයි.)
“හොරෙක් ඔහු හොරකම් කරපු දේට අනිවාර්යයෙන්ම වන්දි ගෙවිය යුතුයි. ඔහුට වන්දිය ගෙවන්න බැරි නම් හොරකම් කරපු දේ වෙනුවෙන් ඔහුව දාසකමට විකිණිය යුතුයි.
4 හොරකම් කරපු සතෙක් හොරා ළඟ ඉඳලා අහු වුණොත් ඔහු ඒ සතා වෙනුවෙන් සත්තු දෙන්නෙක්ව වන්දිය විදිහට අයිතිකරුට දිය යුතුයි. ඒ සතා ගවයෙක්, බූරුවෙක් හෝ බැටළුවෙක් වුණත් සත්තු දෙන්නෙක්ව දිය යුතුයි.
5 “මිනිසෙක් වෙනත් කෙනෙක්ගේ කෙතක හෝ මිදිවත්තක ඔහුගේ සතාට නිදැල්ලේ යන්න ඇරලා ඒ සතා ඒකේ අස්වැන්න කාලා දැම්මොත් ඔහු වන්දියක් ගෙවිය යුතුයි. ඔහු තමාගේ කෙතේ හෝ මිදිවත්තේ පලදාවෙන් හොඳම කොටස වන්දිය විදිහට දිය යුතුයි.
6 “ගින්නක් කටු ගස්වලට පැතිරිලා ඒ ළඟ තියෙන ධාන්‍ය ගොඩවල්, කපපු නැති අස්වැන්න නැත්නම් මුළු කෙතම ගිනි ගත්තොත් ඒ ගින්න අවුළපු කෙනා විනාශ වුණ දේ වෙනුවෙන් වන්දියක් ගෙවිය යුතුයි.
7 “කෙනෙක් ආරක්ෂිතව තියාගන්න කියලා තමන්ගේ අසල්වැසියාට මුදල් හෝ වෙන යම් දෙයක් භාර දුන්නාට පස්සේ ඒක ඔහුගේ ගෙදරින් හොරකම් කළොත් ඔබ කළ යුත්තේ මෙයයි. හොරාව අහු වුණොත් ඔහු හොරකම් කරපු දේ වගේ දෙගුණයක් වන්දි විදිහට ගෙවිය යුතුයි.+
8 හොරාව අහු වුණේ නැත්නම් ඒ ගෙදර අයිතිකරුව විනිශ්චයකරුවන් ඉදිරියට ගෙන යා යුතුයි.+ එතකොට ඔහු ඒ බඩු හොරකම් කළාද නැද්ද කියලා සැබෑ දෙවියන් දැනුම් දෙයි.
9 කෙනෙක් වෙනත් කෙනෙක් ළඟ ඉන්න ගවයෙක්ව, බූරුවෙක්ව, බැටළුවෙක්ව පෙන්නලා එහෙම නැත්නම් ඒ කෙනා ළඟ තියෙන ඇඳුමක් හෝ වෙන ඕනෙම දෙයක් පෙන්නලා ‘මේක අයිති මටයි’ කියලා කිව්වොත් ඒ දෙන්නා ඒ නඩුව විනිශ්චයකරුවන් ඉදිරියට ගෙන යා යුතුයි.+ එතකොට වැරදිකරු කවුද කියලා සැබෑ දෙවියන් දැනුම් දෙයි. වැරදිකරු තමන්ගේ අසල්වැසියාගෙන් ගන්න උත්සාහ කරපු දේ වගේ දෙගුණයක් වන්දියක් විදිහට ගෙවිය යුතුයි.+
10 “කෙනෙක් තමන්ගේ බූරුවාව, ගවයාව, බැටළුවාව හෝ වෙන ඕනෑම සතෙක්ව බලාගන්න තමන්ගේ අසල්වැසියාට දුන්නාට පස්සේ ඌ මැරුණොත්, දරුණු විදිහට තුවාල වුණොත් නැත්නම් සොරුන් ඌව පැහැරගෙන ගියොත් සහ ඒකට ඇසින් දුටු සාක්ෂිකරුවෙක් නැත්නම් කරන්න ඕනෙ මෙහෙමයි.
11 සතාව බලාගන්න භාරගත්ත කෙනා තමන් සතාව හොරකම් කළේ නැහැ කියලා යෙහෝවා දෙවියන්ගේ නමින් අයිතිකරුට දිවුරා කිව යුතුයි. සතාගේ අයිතිකරුත් ඔහු කියපු දේ පිළිගත යුතුයි. නැති වුණ සතා වෙනුවෙන් වන්දියක් ගෙවිය යුතු නැහැ.+
12 ඒත් සතා ඔහුගේ රැකවරණයේ ඉද්දී වෙනත් කෙනෙක් ඌව හොරකම් කළොත් ඔහු අයිතිකරුට වන්දියක් ගෙවිය යුතුයි.
13 වනසතෙක් ඌව මරලා දැම්මොත් ඔහු සාක්ෂියක් විදිහට මැරුණ සතාව අරන් ඇවිත් අයිතිකරුට පෙන්විය යුතුයි. මරලා දාපු සතා වෙනුවෙන් ඔහු වන්දියක් ගෙවිය යුතු නැහැ.
14 “කෙනෙක් තමන්ගේ අසල්වැසියාගෙන් සතෙක්ව ඉල්ලගත්තාට පස්සේ සතාගේ අයිතිකරු නැති වෙලාවක ඌ දරුණු විදිහට තුවාල වුණොත් නැත්නම් මැරුණොත් ඔහු අනිවාර්යයෙන්ම අයිතිකරුට වන්දියක් ගෙවිය යුතුයි.
15 ඌට අනතුරක් වුණේ උගේ අයිතිකරු ළඟ ඉද්දීම නම් ඌ වෙනුවෙන් වන්දියක් ගෙවිය යුතු නැහැ. කුලියට ගත්ත සතෙක්ට අනතුරක් වුණොත් අයිතිකරුට කුලිය විතරක් ගෙවිය යුතුයි.
16 “මිනිසෙක් විවාහ ගිවිසගෙන නැති තරුණියක්ව* රවට්ටලා ඇය එක්ක ලිංගික සම්බන්ධකම් පැවැත්තුවොත් ඔහු අනිවාර්යයෙන්ම නියමිත මුදල* ගෙවලා ඇයව තමන්ගේ බිරිඳ විදිහට භාරගත යුතුයි.+
17 සමහරවිට ඇගේ පියා ඔහුට ඇයව විවාහ කරලා දෙන්න කොහොමටවත් කැමති නැති වෙන්න පුළුවන්. ඒ වුණත් තරුණියක්ව විවාහ කරගද්දී ගෙවන මුදල ඔහු ගෙවිය යුතුයි.
18 “ඔබ අතරේ මන්තරකාරියක් ඉන්නවා නම් ඇයව මරා දැමිය යුතුයි.+
19 “කෙනෙක් සතෙක් එක්ක ලිංගික සම්බන්ධකම් පැවැත්තුවොත් ඔහුව අනිවාර්යයෙන්ම මරා දැමිය යුතුයි.+
20 “යෙහෝවාට හැර වෙනත් දෙවිවරුන්ට පුදපූජා ඔප්පු කරන හැම කෙනෙක්වම මරා දැමිය යුතුයි.*+
21 “ඔබ අතරේ ඉන්න විදේශිකයන්ට ඔබ හිංසා පීඩා නොකළ යුතුයි. ඒ අයගෙන් අයුතු ප්‍රයෝජන නොගත යුතුයි.+ මොකද ඔබත් ඊජිප්තුවේදී විදේශිකයන් විදිහට ජීවත් වුණා.+
22 “ඔබ වැන්දඹුවන්ටවත් පියා නැති දරුවන්ටවත්* හිරිහැර නොකළ යුතුයි.+
23 ඔබ ඒ වගේ අයට හිරිහැර කළොත් ඔවුන් අඬඅඬ මට කරන කන්නලව්වලට මම අනිවාර්යයෙන්ම ඇහුම්කන් දෙනවා.+
24 මට ඔබ ගැන ඇති වෙන දැවෙන කෝපය නිසා මම ඔබව කඩුවෙන් මරලා දානවා. එතකොට ඔබේ භාර්යාවන් වැන්දඹුවන් වෙයි. ඔබේ දරුවන් පියෙක් නැති දරුවන් වෙයි.
25 “මගේ සෙනඟ අතරේ ඉන්න දුප්පත් කෙනෙක්ට ඔබ ණයට මුදල් දුන්නොත් වෙනත් අය වගේ කෑදර විදිහට ඔහුගෙන් පොලී අය කරන්න එපා.+
26 “ඔබ ඇපයක් විදිහට ඔබේ අසල්වැසියාගෙන් ඔහුගේ පිට ඇඳුම ගත්තොත්+ ඉර බැහැලා යන්න කලින් ඒක ආයෙත් ඔහුට දිය යුතුයි.
27 මොකද ඔහුට තියෙන්නේ ඒක විතරයි. ඔබ ඒ ඇඳුම ඔබ ළඟ තියාගත්තොත් ඔහු නිදාගද්දී ඇඟ උණුසුම් කරගන්නේ මොකකින්ද?+ ඔහු අඬඅඬ මට කන්නලව් කළොත් මම අනිවාර්යයෙන්ම ඔහුට ඇහුම්කන් දෙනවා. මොකද මම අනුකම්පාවෙන් පිරුණු දෙවි කෙනෙක්.+
28 “ඔබ දෙවියන්ට අපහාස* නොකළ යුතුයි.+ ඔබ අතරේ ඉන්න අධිපතියෙක්* ගැනවත් ඔබ අවමන්සහගත විදිහට කතා නොකළ යුතුයි.+
29 “ඔබේ සරු අස්වැන්නේ මුල් පලදාවෙනුත් කිසි අඩුවක් නැතුව ලැබෙන තෙල් සහ වයින්වලිනුත් කොටසක් අදිමදි නොකර මට දිය යුතුයි.+ ඔබේ කුලුඳුල් පුතුන්වත් ඔබ මට දිය යුතුයි.+
30 කුලුඳුල් වහු පැටියෙක්ට සහ බැටළු පැටියෙක්ට ඔබ කළ යුත්තේ මෙයයි.+ ඌව දවස් හතක් උගේ මව එක්ක තියන්න. අටවෙනි දවසේදී ඌව මට දෙන්න.+
31 “ඔබ මගේ සෙනඟ නිසා ඔබ ශුද්ධව සිටිය යුතුයි.+ වනසතෙක් මරලා දාපු කිසිම සතෙක්ගේ මස් කන්න එපා.+ උගේ මස් බල්ලන්ට දැමිය යුතුයි.
පාදසටහන්
^ මූ.අ., “කන්‍යාවක්ව.”
^ මෙතන කියන්නේ තරුණියක්ව විවාහ කරගද්දී එයාගේ පියාට ගෙවන මුදල ගැනයි.
^ මූ.අ., “විනාශයට නියම කළ යුතුයි.”
^ හෝ, “අම්මා තාත්තා නැති දරුවන්ටවත්.”
^ හෝ, “ශාප.”
^ හෝ, “පාලකයෙක්.”
