නික්මයාම 40:1-38
40 යෙහෝවා දෙවියන් මෝසෙස්ට මෙහෙම කිව්වා.
2 “ඔබ පළවෙනි මාසයේ පළවෙනිදා හමු වීමේ කූඩාරම විදිහටත් හඳුන්වන ශුද්ධ කූඩාරමේ කොටස් සවි කරලා ඒක හදන්න.+
3 ඒක ඇතුළේ ගිවිසුම් පෙට්ටිය*+ තියලා ඒක පේන්නේ නැති වෙන්න තිර රෙද්ද+ එල්ලලා ඒ කොටස වෙන් කරන්න.
4 කූඩාරම ඇතුළට මේසයත්+ අරන් ඇවිත් ඒක උඩ තියන භාණ්ඩ පිළිවෙළට සකස් කරන්න. පහන් රුකත්+ ගෙනල්ලා ඒකේ පහන් දල්වන්න.+
5 සුවඳ ද්‍රව්‍ය ඔප්පු කරන රන් පූජාසනය+ ගිවිසුම් පෙට්ටියට හරි කෙළින් හිටින විදිහට තියන්න. කූඩාරමට ඇතුල් වෙන තැනට හදපු තිර රෙද්දත් එල්ලන්න.+
6 “දවන පූජා ඔප්පු කරන පූජාසනය+ හමු වීමේ කූඩාරමට ඇතුල් වෙන තැනට ඉස්සරහින් තියන්න.
7 වතුර භාජනය හමු වීමේ කූඩාරම සහ පූජාසනය අතරේ තියලා ඒකට වතුර පුරවන්න.+
8 හමු වීමේ කූඩාරම වටේට තිර රෙදි එල්ලලා මළුව සකස් කරගන්න.+ මළුවේ දොරටුවට හදපු තිර රෙද්ද මළුවට ඇතුල් වෙන තැන එල්ලන්න.+
9 හමු වීමේ කූඩාරමටත් ඒක ඇතුළේ තියෙන හැම දේකටමත් ශුද්ධ තෛලය+ වක් කරලා ඒවා කැප කරන්න.+ ඒ විදිහට ඒ හැම දෙයක්ම පරිශුද්ධ දේවල් විදිහට වෙන් කරන්න. එතකොට ඒ හැම දේම ශුද්ධයි.
10 දවන පූජා ඔප්පු කරන පූජාසනයටත් ඒකේ හැම භාණ්ඩයකටමත් ශුද්ධ තෛලය වක් කරලා ඒවා කැප කරන්න. ඒ විදිහට පූජාසනය පරිශුද්ධ දෙයක් විදිහට වෙන් කරන්න. එතකොට ඒක ඉතා ශුද්ධයි.+
11 වතුර භාජනයත් ඒ භාජනය තියන ආධාරකයත් ඒ විදිහටම කැප කරලා ඒවාත් පරිශුද්ධ දේවල් විදිහට වෙන් කරන්න.
12 “ආරොන්ටයි, ඔහුගේ පුතුන්ටයි හමු වීමේ කූඩාරමට ඇතුල් වෙන තැනට එන්න කියලා වතුරෙන් නාන්න කියලා කියන්න.*+
13 ඊටපස්සේ ආරොන්ට හදපු ශුද්ධ ඇඳුම් ඔහුට අන්දවලා+ ඔහුව අභිෂේක කරන්න.+ එතකොට පූජකයෙක් විදිහට මට පරිශුද්ධ සේවයක් කරන්න ඔහුට පුළුවන්.
14 ආරොන්ගේ පුතුන්ටත් එන්න කියලා ඔවුන්ට මහපු ඇඳුම් අන්දවන්න.+
15 ඊටපස්සේ ඔවුන්ගේ පියාව අභිෂේක කළා වගේ ඔවුන්වත් අභිෂේක කරන්න.+ එතකොට පූජකයන් විදිහට මට සේවය කරන්න ඔවුන්ට පුළුවන්. ඔවුන්ව ඒ විදිහට අභිෂේක කරන නිසා පූජකයන් වීමේ අයිතිය තියෙන්නේ ඔවුන්ටයි. ඔවුන්ගේ හැම පරම්පරාවකදීම ඒ අයිතිය හිමි වෙන්නේ ඔවුන්ටයි.”+
16 මෝසෙස් යෙහෝවා දෙවියන් අණ කරපු හැම දේම ඒ විදිහටම කළා.+
17 දෙවෙනි අවුරුද්දේ පළවෙනි මාසයේ පළවෙනිදා ශුද්ධ කූඩාරමේ කොටස් සවි කරලා ඒක හැදුවා.+
18 මෝසෙස් කූඩාරමේ අඩි+ පොළොවට සවි කරලා රාමු+ අඩි මත තියලා නියමිත තැන්වලට පොලු+ දැම්මා. එයා ඒකේ කණුත් හිටෙව්වා.
19 ඊටපස්සේ එයා කූඩාරමට උඩින් දාන රෙද්ද අතුරලා+ ඊට උඩින් අනිත් ආවරණය+ දැම්මා. යෙහෝවා මෝසෙස්ට අණ කරපු විදිහටම එයා කළා.
20 ඊටපස්සේ මෝසෙස්, සාක්ෂියක් විදිහට දෙවියන් දුන්න ගල් පුවරු දෙක+ ගිවිසුම් පෙට්ටිය+ ඇතුළේ තියලා පියනෙන්+ පෙට්ටිය වැහුවා. ගිවිසුම් පෙට්ටියේ+ පොලු+ දෙක එයා වළලුවලට දැම්මා.
21 එයා ශුද්ධ කූඩාරම ඇතුළට ගිවිසුම් පෙට්ටිය අරන් ඇවිත් ඒක පේන්නේ නැති වෙන්න තිර රෙද්ද+ එල්ලලා ඒ කොටස වෙන් කළා.+ යෙහෝවා අණ කරපු විදිහටම මෝසෙස් කළා.
22 ඒ තිර රෙද්දට අනිත් පැත්තෙන් එයා මේසය තිබ්බා.+ මේසය තියලා තිබුණේ ශුද්ධ කූඩාරමේ උතුරු පැත්තේ.
23 ඊටපස්සේ එයා, මේසය උඩ දෙවියන්ට පූජා කරන රොටි තිබ්බා.+ එයා ඒ රොටි යෙහෝවා ඉස්සරහා මේසය උඩ පේළියට තියලා තිබ්බා. යෙහෝවා අණ කරපු විදිහටම ඒ දේ කළා.
24 එයා මේසය ඉස්සරහින් පහන් රුක තිබ්බා.+ ඒක තිබ්බේ කූඩාරමේ දකුණු පැත්තේ.
25 යෙහෝවා මෝසෙස්ට අණ කරපු විදිහටම එයා ඒකේ පහන් යෙහෝවා ඉස්සරහා දල්වලා තිබ්බා.+
26 ඊළඟට එයා හමු වීමේ කූඩාරම ඇතුළේ තියෙන තිර රෙද්දට ඉස්සරහින් රන් පූජාසනය+ තිබ්බා.
27 යෙහෝවා අණ කරපු විදිහටම පූජාසනයේ සුවඳ ද්‍රව්‍ය+ ඔප්පු කරන්නයි+ මෝසෙස් එහෙම කළේ.
28 අන්තිමට එයා හමු වීමේ කූඩාරමට ඇතුල් වෙන තැනට හදපු තිර රෙද්ද එල්ලුවා.+
29 එයා හමු වීමේ කූඩාරමට ඉස්සරහින් දවන පූජා ඔප්පු කරන පූජාසනය තිබ්බා.+ යෙහෝවා අණ කරපු විදිහටම ඒකේ දවන පූජා+ සහ ධාන්‍ය පූජා ඔප්පු කරන්නයි මෝසෙස් එහෙම කළේ.
30 හමු වීමේ කූඩාරම සහ පූජාසනය අතරේ එයා වතුර භාජනය තියලා ඒකට වතුර පිරෙව්වා.+
31 මෝසෙස්, ආරොන් සහ ආරොන්ගේ පුතාලා අත පය හෝදගත්තේ ඒකෙන්.
32 හමු වීමේ කූඩාරමට ඇතුල් වෙන හැම වෙලාවකදීම සහ පූජාසනය ළඟට යන හැම වෙලාවකදීම යෙහෝවා මෝසෙස්ට අණ කරපු විදිහටම එයාලා අත පය හෝදගත්තා.+
33 එයා හමු වීමේ කූඩාරම සහ පූජාසනය වටේට තිර රෙදි එල්ලලා මළුව+ සකස් කළා. මළුවේ දොරටුවට හදපු තිර රෙද්දත් එයා එල්ලුවා.+
ඒ විදිහට මෝසෙස් ශුද්ධ කූඩාරමේ හැම වැඩක්ම ඉවර කළා.
34 ඊටපස්සේ හමු වීමේ කූඩාරම වලා ටැඹෙන් වැහිලා ගියා. යෙහෝවා දෙවියන්ගේ තේජස ශුද්ධ කූඩාරම පුරාම දකින්න තිබුණා.+
35 හමු වීමේ කූඩාරම වලා ටැඹෙන් වැහිලා තිබුණ නිසාත් ඒක යෙහෝවාගේ තේජසින් පිරිලා තිබුණ+ නිසාත් කූඩාරම ඇතුළට යන්න මෝසෙස්ට බැරි වුණා.
36 හමු වීමේ කූඩාරමට ඉහළින් තිබුණ වලා ටැඹ එතනින් අයින් වුණාම ඊශ්‍රායෙල් සෙනඟත් කූඩාරම් අකුළගෙන එයාලා හිටපු තැනින් පිටත් වෙලා ගියා. එයාලා තැනින් තැන ගමන් කරපු කාලය පුරාම ඒ විදිහට කළා.+
37 ඒත් වලා ටැඹ කූඩාරමට ඉහළින් නතර වෙලා තියෙද්දී එයාලා හිටපු තැනින් පිට වෙලා වෙන තැනකට ගියේ නැහැ. වලා ටැඹ එතනින් අයින් වෙන කල් එයාලා හිටපු තැනම නැවතිලා හිටියා.+
38 දවල්ට යෙහෝවාගේ වලා ටැඹ හමු වීමේ කූඩාරමට ඉහළින් තිබුණා. රෑට කූඩාරමට ඉහළින් ගිනි ටැඹ තිබුණා. ඊශ්‍රායෙල් සෙනඟ තැනින් තැනට ගමන් කරපු කාලය පුරාම වලා ටැඹත් ගිනි ටැඹත් එයාලට දකින්න ලැබුණා.+
